KE MTEBENGII el kmo a rebetok el chad er chelechang a feel el kmo ngkirir el ileakl er a rebebil? Mo lmuut me a le ileakl omeruul el mo er tir me te dirk omdasu el kmo te rredemelel a lmuut el betok. A rechad el uaisei a di omdasu er a di tir e diak loba omereng el saul el kirel aike el ngar ngii er tir. A Biblia melekoi el kmo a rechad a mo uaisei er a uriul sils.—2 Ti. 3:2.

Nguaisei ngtiaikid er a lengar ngii a rechad el di omdasu er a di tir. A Adam me a Eva millilt el mo di tir el melilt el kmo ngngera ungil me a mekngit, el mlo uchul a klou el tellemall. Betok el dart el rak er uriul e a King Usia er a Juda mlo omdasu el kmo ngsebechel di ngii el melul ochod er a templo, engdi ngkmal mle cheleuid. (2 Kr. 26:​18, 19) Ngdi osisiu, a Refarisi me a Resadusi ulemdasu el kmo a Dios a kirel lmuut el lungil omerellel el mo er tir er a rebebil e le te uldidellel a rsechel a Abraham.—Mt. 3:9.

Kede iliuekl er a rechad el di melatk er a di tir e omdasu el kmo te kuk ungil er a rebebil me a chouai tia el uldasu a sebechel ngar ngii lerellii el mei er kid. (Gal. 5:26) Ngsebeched lomuchel lomdasu el kmo kede rredemelel a nguu a ileakl el tekoi me a lechub ngkirel ileakl omerellir a rechad el mei er kid. Ngera sebechel ngosukid me ngdiak bo domdasu el uaisei? A kot e ngkired el mo medengelii a uldesuel a Jehovah el kirel. A teblo el omellach er a Biblia sebechel ngosukid.

A Jehovah olterekokl el kmo ngngera kede mo ngmai. Molatk a bebil lolechotel.

• Ngar er a chelsel a telungalek e a bechiil el sechal a kirel mo feel er a respect er a bechil me a bechiil el redil a kirel el mo feel er a bltkil a rengul  a bechil. (Efe. 5:33) A rebechiil el chad a kirir el di olecholt er a bltikerreng er a delongelel a sechal me a redil el mora bechil el diak el ngii di el chad. (1 Ko. 7:3) A ruungalek a llemeltir el mengerechir er a blekongesenges er a rengelekir me a rengelekir a llemeltir el mengerechir er a bltikerreng me a ulekerreuil a rechad er a blirir.—2 Ko. 12:14; Efe. 6:2.

• Remechuodel el meringel el loureor el kired er a chelsel ongdibel a rredemelel a nguu a respect er kid. (1 Th. 5:12) Me nguaisei engdi ngdiak a llemeltir el mengedereder er a rudam me a rudos.—1 Pe. 5:​2, 3.

• A Dios a mla msa kabelment er a rechad a klisichir el mengerechir a tax e nguu omengull er a rengar cheungel omengederederir.—Rom 13:​1, 6, 7.

A Jehovah omeskid a lmuut el betok er a derredemelel el ngmai. Kid el ngar er a klengit a uchul me kede rredemelel a mad. (Rom 6:23) Me nguaisei engdi a Jehovah omeskid a betok el klengeltengat e le ngkmal betik a rengul er kid. (Psa. 103:​10, 11) Derta el klengeltengat me a lechub e ngileakl el techall el dengai er ngii a olechotel a krasia er ngii.—Rom 12:​6-8; Efe. 2:8.

Bo mkerekikl er a reng er tia el beluulechad. Nglocha diak dutebengii el kmo kede mla mo omdasu el kmo kede rredemelel a ngmai a lmuut el betok er a rebebil. A Jesus a ulechotii a rolel e tia el tekoi a sebechel beot el duubech loeak lebeskid a okesiu el kirir a rechad er a ureor el mluduudel er a chimo el silber el udoud. A rebebil el chad er a ureor a ulemuchel er a dirk tutau e uluureor el ta el sils er a meringel el sils. A rebebil a di uluureor el ta el sikang. Sel kot el bliongel er a rechad a ulemdasu el kmo te rredemelel a lmuut el betok le te uluureor el ta el sils er a meringel el sils. (Mt. 20:​1-16) Me a Jesus a silodii el kmo a rultirakl er ngii a kirir el mo ungil a rengrir er aike el lomesterir a Dios.

Lak em expect a betok, bai moba omereng el saul. (1 Th. 5:18) Moukerebai er a apostol Paulus el dimlak lolengit er a rudam er ngii me lomsang aike el lousbech alta ngmla er ngii a llemeltel el dmu er tir. (1 Ko. 9:​11-14) Ngkired el loba omereng el saul el kirel a derta el klengeltengat el dengai e diak de expect a ngerang er a rebebil.

 Bo lengariou a rengum. A chad sel lomdasu el kmo ngkuk kmal lungil e ngmo feel el kmo ngrredemelel a ngmai a lmuut el betok er aike el ngar ngii er ngii. A klengariourreng a kerul tia el dok el uldasu.

A profet Daniel a kutmeklii a ungil kerebai er a olecholt er a klengariourreng. Ngika mle chedal a ngarbab el telungalek, mle ungil sechal, mellomes a rengul, e betok a duch er ngii. Me ngmle rredemelel a ngmai a ileakl el techall lullab me a ileakl el omerellir a rechad el mo er ngii. (Dan. 1:​3, 4, 19, 20) Me nguaisei a Daniel a millemolem el ngariou a rengul, e tiakid el blekerdelel a uchul me ngkmal mle mekreos er osengel a Jehovah.—Dan. 2:30; 10:​11, 12, NW.

Me dotngeklii tia el reng er a beluulechad er chelecha el taem el rechad a di omdasu er a di tir e omdasu el kmo te kuk ngarbab er a rebebil. Bai lolemolem el dmeu a rengud er a derta el klengeltengat el Jehovah omeskid loeak a krasia er ngii.