1. A doltirakl er a 1 Petrus 3:8, e ngera uchul me ngdmeu a rengud el obengterir tirke el melatk a uldesued me aike el mo klungioled?

NGDMEU a rengud el obengterir tirke el melatk a uldesued me aike el mo klungioled. Tirka melasem el mo medengei a uldesued me aike el ngar er a rengud. Te medengei aike el dousbech e olengeseu er kid er a uchei er a dolengit a ngeso. Kede kmal oba klou el omereng el saul el kirir a rechad el olecholt a ‘klechubechub’ * el bedulkid.​—Monguiu er a 1 Petrus 3:8.

2. Nglocha ngera uchul me ngmo meringel er kid el olecholt a klechubechub?

² Kid el Kristiano a soad el olecholt a klechubechub. Engdi a mera er ngii, ngdiak leblechoel el beot a doruul er tiang. E ngera uchul? A ta el uchul a kmo, ngdiak demecherrungel. (Rom 3:23) Me ngkirel el mo blak a rengud el omtok er sel uldesued el di melatk er a di kid. Ngdirrek, a rebebil a locha meringel er tir el mo chubechub e le okurulir me a lechub e ngtekoi el dilubech er a klengar er tir er a uchei a uchul. Kede dirrek el mekususeu er a blekerdelir a rechad el iliuekl er kid. Ngar er aika el uriul sils, e a rebetok a diak lolatk a uldesuir a rechad, e te bai “betik a rengrir ra di tir.” (2 Ti. 3:1, 2, BT) Me ngera sebechel ngosukid el mo mesisiich er aika el omelsemai el rullii el mo meringel er kid el olecholt a klechubechub?

3. (a) Ngmekera bo dungil olecholt a klechubechub? (b) Ngera kede mo mesaod er tia el suobel?

³ Ngsebeched el mo ungil olecholt a klechubechub sel doukerebai er a Jehovah el Dios me a Ngelekel, el Jesus Kristus. A Jehovah a Dios er a bltikerreng, e mla kutmeklii a kot el ungil el kerebai el kirel a dolatk er a rechad. (1 Jn. 4:8) A Jesus a kmal cherrungel el oukerebai er a blekerdelel a Demal. (Jn. 14:9) Sera  lengar tia el chutem, e ngulechotii a rolel e a chad a sebechel el olecholt er a klechubechub. Ngar tia el suobel, e kede omuchel el mo mesaod er a rolel e a Jehovah me a Jesus a olecholt el kmo te melatk er a rechad. E a uriul, e kede mo mesaod er a rolel e ngsebeched el mo oukerebai er tir.

4. Ngmekera Isaia 63:7-9 e ochotii el kmo a Jehovah a melatk a uldesuir a remesiungel?

⁴ A Biblia a olisechakl el kmo a Jehovah a melatk a uldesuir tirke el mesiou er ngii. El ua tiang, ka molatk er a uldesuel a Jehovah er a bo lechelebangel a ringel a rechad er a Israel er a irechar. A Tekingel a Dios a kmo: “Ngmle meringel er ngii aike el rokui el ringelir.” (Monguiu er a Isaia 63:7-9, NW.) * A uriul, e ngokiu a profet el Sekaria, e a Jehovah a dilu el kmo sel bo lechuarm a rechedal, e ngii me ngchuarm. A Jehovah a dilu er a remesiungel el kmo: “Ngikel mo merutech er kemiu a rutechii a chelsul a medak.” (Sek. 2:8) Tiang a mera el mesisiich el olechotel a uldesuel a Jehovah el kirir a rechedal!

5. Mosaod er a tekoi el lerirellii a Jehovah el mo olengeseu er a rechedal el mle chuarm.

⁵ A Jehovah a diak di lechubteterir a rechedal el chuarm, e ngdirrek el meruul a tekoi el mo olengeseu er tir. El ua tiang, a rechad er a Israel er a lechuarm er a klsibai el ngar er a Ekipten, e a Jehovah a mle medengelii a ringelir e mle soal el osobelterir. A Jehovah a dilu er a Moses el kmo: “Ak kmal mla mo ungil meseterir a re chedak el le sal omekcharm er tir . . . , Ak mla remenges a lengelir el olengit a ngesou . . . Ak kmal mla mo ungil medengei a rengelir. Ak mle metengel el me olsobel er tir er a re chad er a Ekipten.” (Exo. 3:7, 8) A Jehovah a mle chubteterir a rechedal a uchul me ngrirelleterir el mo mimokl er a klsibai. A betok el rak er a uriul, el ngar er a Beluu er a Nglat, e a rechad er a Israel a mlodechelakl er a recherrouir. Me ngmilekerang a Jehovah? Ng “mlo chubteterir ele tulengingd er a chelsel a ringelir ma ulecheracheb el odechelakl el mor tir.” Me a Jehovah a liluut el mo chubteterir a rechedal e mirruul a tekoi el mo ngosuterir. Nguleldurech er a remengeteklel a beluu el mo olsobel er a rechad er a Israel er a recherrouir.​—Men. 2:16, 18.

6. Mosaod er a tekoi el lerirellii a Jehovah el ochotii el kmo ngmillatk er a uldesuel a chad el mle cheleuid a uldesuel.

 ⁶ A Jehovah a melatk a uldesuir a rechedal, el mo lmuut er sel taem el cheleuid a uldesuir. Ka molatk er a Jona. A Dios a ulderchii el mo omerk er a klumech er a kerrekeriil el mora rechad er a Ninive. Me sera lobult, e a Dios a millilt el mo diak lolekngemed er tir. Nguaisei engdi a Jona a dimlak el soal tia el tekoi. Ngbai “ngilasech a rengul” e le ngdimlak lemotaut tia el ulaoch el kirel a Ninive. Engdi a Jehovah a uleba kllourreng el bedul a Jona e ngilsuir el mo sumecheklii a uldesuel. (Jon. 3:10–4:11) Cherengel a taem, e a Jona a mlo medengelii a tekoi el Jehovah ulsisecheklii, e a Jehovah a dirrek el uluusbech er ngii el mo meluches aika el tekoi el dilubech me bo dengai a klungioled er ngii.​—Rom 15:4. *

7. A omerellel a Jehovah el bedul a rechedal, ngoterekeklii a rengud er a ngerang?

⁷ A omerellel a Jehovah el bedul a rechedal a oterekeklii a rengud el kmo ngchubteterir a remesiungel. Ngmedengei a ringel me a tekoi el lechuarm a derta er kid. A Jehovah a “medengei a ngar a chelsel a rengul a chad.” (2 Kr. 6:30) Ngungil medengei aike el rokui el uldesued, me aike el dmolech el tekoi el ngar er a rengud, me a ngelsengesed. E “diak le [bechikid] me [de] bor ongarm el mo engelakl er a [klisiched].” (1 Ko. 10:13) Tia el telbiil a kmal mengelaod er a rengud!

8-10. Ngera el tekoi a ngilsuir a Jesus el mo melatk er a rechad?

⁸ A Jesus er a lengar tia el chutem, e ngkmal millatk er a rechad. Ngar ngii a edei el tekoi el ngilsuir el mo melatk er a rechad. A kot, el ua dulsaod er ngii er a uchei, a Jesus a mle cherrungel el oukerebai a blekerdelel a Demal. Ngdi ua Demal el mle betik a rengul er a rechad. Me alta nguleldeu a rengul er aike el rokui el tekoi el lullengeseu er a Demal el omeob, engdi ngkmal mle ileakl el ‘obotech a rengul er a re chad.’ (Osi. 8:31) Me a bltikerreng a rirellii el mo melatk a uldesuir a rechad.

⁹ A ongerung, e ngdi ua Jehovah, a Jesus a mle sebechel el mo medengei a uldesuir a rechad me aike el uchul me te meruul a tekoi. (Mt. 9:4; Jn. 13:10, 11) Me sel bo lodengei el kmo a rechad a kmal mekngit a rengrir, e ngkmal millatk er tir e milengelaod er tir.​—Isa. 61:1, 2; Lk. 4:17-21.

¹⁰ A ongedei, e a Jesus a chillebangel a bebil er aike el omelsemai el lechillebangel a rechad. El ua tiang, a Jesus a mlukeroul er a chelsel a chebuul el delengchokl. Nguluureor el obengkel a demal el Josef el riredelii, me ngmilsuub el mo meduch el meruul a ureor er a chim. (Mt. 13:55; Mk. 6:3) A Josef a locha mlad er a uchei er a lomuchel er a omesiungel a Jesus. Me a Jesus a mle medengelii a ringelel a doridii a betik er a rengud er a kodall. Ngdirrek el mle medengelii a ringelel a lsekum a telungalek a kakerous a klechelid er tir. (Jn. 7:5) Aika el tekoi me a lmuut el bebil er a blekeradel a mle sebechel el ngosuir el mo medengei aike el omelsemai el lechelebangel a rechad me a dirrek el uldesuir.

11. Ngoingera el taem e ngmlo chemolt el kmo a Jesus a millatk er a rechad? Mosaod. (Momes er a siasing er a medal tia el babier.)

¹¹ Tia el blekerdelel a Jesus el millatk er a rechad a mle ileakl a olechotel er sera loruul a mengasireng el tekoi. A Jesus a dimlak di loruul a mengasireng el tekoi e le ngii el mle kirel el meruul el uaisei. Ngbai mle “chubteterir” tirke el chuarm. (Mt. 20:29-34; Mk. 1:40-42) El ua tiang, ka molatk er a uldesuel a Jesus er a lenguu a chad el mechad a dingal el mo cheroid er a seked e lomekungil er ngii me a lechub sera lokisii  a di ta el ngelekel a melakl el dil. (Mk. 7:32-35; Lk. 7:12-15) A Jesus a mle chubteterir tirka el chad e mle soal ngosuterir.

12. Ngmekera Johanes 11:32-35 e ochotii el kmo a Jesus a millatk er a uldesuel a Martha me a Maria?

¹² A Jesus a dirrek el ulecholt el kmo ngmillatk er a Martha me a Maria. Sera lomes er tir el kmal mekngit a rengrir er a kodellel a ochederir el Lasarus, e a “Jesus a lilangel.” (Monguiu er a Johanes 11:32-35.) Ngdimlak el llangel e le ngii el mla oridii ngika el sechelil. Ngmle medengei el kmo ngmo okisii a Lasarus. Engdi a Jesus a bai lilangel e le ngmlo medengelii a ringel el lechilarm er ngii tirka el sechelil.

13. Ngmekera blekerdelel a Jesus el chubteterir a rechad e smisichid?

¹³ Ngmo uchul a klou el klungioled sel dosuub el kirel a klechubechub el lullechotii a Jesus. Nguaisei el diak demecherrungel el uai ngii, engdi ngbetik a rengud er ngii e le ngullecholt a klechubechub el mora rechad. (1 Pe. 1:8) Ngmelisiich er kid sel dodengei el kmo ngmengedereder er chelechang el King er a Rengedel a Dios. Ngdi kmedung e ngmo choroid a rokui el ringel. E dirrek el ngii el mla er tia el chutem a uchul me ngkmal sebechel el ngosuterir a rechad el mo ungil er aike el ringel el lechuarm el omengederederel a Satan a uchul. Nguaisei, kede kmal ngeltengat el ngar ngii a Merredeled el sebechel ‘melechesiu a chelitechetud.’​—Heb. 2:17, 18; 4:15, 16.

14. Ngmo soad el mekerang sel domtab er a Efesus 5:1, 2?

¹⁴ Sel dolatk a kerebai el lekiltmokl a Jehovah me a Jesus, e ngrullid el mengal mo soad el olecholt a klechubechub. (Monguiu er a Efesus 5:1, 2.) Ngdiak el sebeched el mo medengei aike el ngar er a rengrir a rechad el uai tir. Engdi ngsebeched el melasem el mo medengei a uldesuir me aike el lousbech a rebebil. (2 Ko. 11:29) Me ngdiak deua rechad er tia el beluulechad el di melatk er a di tir, e kede bai melasem el mo ‘beiusech a medad el omes a ikel mo klungiolel a ta ma tang er a delongeled e lak di domdasu er a di kid.’​—Fil. 2:4.

15. Te rua techang a ileakl el kirir el olecholt er a klechubechub?

¹⁵ A remechuodel er a ongdibel a ileakl el kirir el olecholt er a klechubechub. Te medengei el kmo te mo mesaod er tir er a Jehovah el kirel a rolel a lomekerreu a sib er ngii. (Heb. 13:17) Me a bo lolengeseu er a rudam me a rudos er tir, e a remechuodel a kirir el mo oba klechubechub. Me te mekerang a lolecholt er tia el blekeradel?

16. Ngera ngmeruul er ngii a odam el kerekikl el melatk a uldesuir a rechad, e ngera me tia klou a ultutelel?

¹⁶ A odam el mesiou el ta er a remechuodel el olecholt a klechubechub a mengoit a taem el obengterir a rudam me a rudos er ngii el Kristiano. Ngoker a ker e dirrek el kerekikl e klou a rengul el orrenges er tir. E tiang a ileakl el klou a ultutelel a lsekum a ta er tirka el mekreos el sib a soal louchais a uldesuel me aike el ngar er a rengul engdi ngmeringel er ngii a meruul uaisei. (Osi. 20:5) Me ngika el odam sel lekengei el mengoit a temel el obengterir a rudam er ngii, e ngmengal mo mesisiich a klaumerang me a klausechelei me a bltikerreng er a delongelir.​—Rel. 20:37.

17. Ngera el blekeradel a lolekoi a rebetok el rudam me a rudos el kmo ngkot el sorir el blekerdelir a remechuodel? Mosaod.

¹⁷ A rebetok el rudam me a rudos a melekoi el kmo sel kot el sorir el blekerdelir a remechuodel er a ongdibel a tir el melatk a uldesuir a rechad. E ngera uchul? A Adelaide a kmo: “Ngmo beot er kid a mengedecheduch er tir e le ke medengei el kmo te mo medengelii a tekoi el mosaod er ngii.” Ngdirrek el dilu el kmo: “Ngsebechem el mo medengei el kmo te melatk er a rechad el oeak sel rolel a lorrenges er kau el mengedecheduch.” A ta el odam el oba omereng el saul el kirel a omerellel a ta er a remechuodel el bedulngii a dilu el kmo: “Ngmlo merael a iuechel a medal er sera  kuuchais er ngii er a tekoi el kchelebangel er ngii. Ngmera el diak kubes er tia el tekoi el dilubech.”​—Rom 12:15.

18. Ngmekera e mo sebeched el olecholt el kmo kede melatk er a rechad?

¹⁸ Nguaisei, engdi ngdiak di el remechuodel a kirir el melatk a uldesuir a rechad. Kid el rokui a sebeched el omekeroul er tia el blekeradel. Ngokiu a ngera el rolel? Molasem el mo medengei aike el tekoi el lechelebangel a rechedal a telungalek me a rudam me a rudos er kau. Mochotii el kmo ke melatk er a rengeasek er a ongdibel me tirke el smecher me a remechudelang me tirke el mla orideterir a rebetik er a rengrir er a kodall. Moker er tir el kmo te ua ngerang, e bo mkerekikl el orrenges er tir sel louchais a uldesuir. Mngesuterir el mo melechesuar el kmo ke mera el medengelii a tekoi el lechelebangel er ngii. E mouchais er tir el kmo ngsebechem el ngosuterir er aike el sebechem. Sel doruul el uaisei, e kede olecholt er a mera el bltikerreng.​—1 Jn. 3:18.

19. Ngera uchul me ngkired el melasem el olengeseu er a rebebil er aike el sebeched?

¹⁹ Ngkired el melasem el olengeseu er a rebebil el oltirakl aike el ousbech. E ngera uchul? E le rechad a kakerous a uldesuir el kirel a ringel el lechuarm er ngii. A rebebil a sorir el mesaod a mondai er tir engdi a rekuk bebil a diak el sorir. Me ngsoad el olengeseu, engdi ngkired el mo kerekikl me ngdiak doker a ker el omekrur er a rechad. (1 Th. 4:11) Ngmo lmuut er sel taem el rechad a sorir el mesaod a mondai er tir, e nglocha mo diak deblechoel el kongei aike el losaod. Nguaisei engdi ngdiak el kired el obes el kmo sei a uldesuir. Me ngsoad el mereched el orrenges e mo meoud el mengedecheduch.​—Mt. 7:1; Jak. 1:19.

20. Ngera kede mo mesaod er a ongingil el suobel?

²⁰ Ngsoad el olecholt el kmo kede melatk a uldesuir a rechad sel dengar er a ongdibel me a dirrek sel doruul er a omesiunged. Me kede mekera olecholt el kmo kede melatk a uldesuir a rechad sel doruul er a remo disaiplo? Kede mo mesaod er tiang er a ongingil el suobel.