A Biblia a mesaod el kmo a uriul er a taem el rechad er a Midian a ngiluu a Josef el mora Ekipten, e a Jakob me a telungalek er ngii a millukl er a Kanaan el mora Ekipten. Te mlo kiei er a Gosen el ngar a Nile Delta el renged er a Ekipten. (Gen. 47:1, 6) A rechad er a Israel a “kmal mlo obdois e mesisiich.” Me a rechad er a Ekipten a mlo medakt er tir el chad er a Israel me te rirelleterir el mo sibai.​—Exo. 1:7-14.

A rebebil a melekoi a mekngit el kirel tia el cheldecheduch el ngar a Biblia, e mesaod el kmo tia di cheldecheduch el chelid. Me nguaisei, engdi ngar ngii a olechotel el meketeklii el kmo a rechad er a Sem * a mle sibai el kiliei er a Ekipten er a irechar.

A remengiis a chutem a mla metik a bebil olechotel a delengchokl el mla er ngii er a mo bedul diluches er a Ekipten. A Dr. John Bimson a mesaod el kmo ngar ngii a 20 me a lechub e nglmuut el betok el olechotel el meketeklii el kmo a rechad er a Sem a kiliei er a diluches er a Ekipten. Me a lmuut el tang, a Egyptologist James K. Hoffmeier a dilu el kmo: “Ngar er a bekord el taem er a 1800 el mora 1540 B.C., e a Ekipten a mle ua merau el beluu el rirelleterir a rechad el millekoi a tekingir a rechad er a Sem el mlara ngebard er a Asia me ngmlo sorir el melukl el mong.” Ngdirrek el dilu el kmo: “Tiaikid el taem a osisiu ngii me a ‘Temir Tirke el Bdelul a Kebliil’ el osisiu ngii me a taem me a blekeradel el losaod er ngii a babier a Genesis.”

Ngar ngii a lmuut el bebil er a olechotel el ngar a dimes er a beluu er a Ekipten. A papyrus el milluches er a bekord el (c. 2000–c. 1600 B.C.E.) a llechukl a ngklir a resibai el uluureor er a blai el ngar a dimes er a Ekipten. A betok er a okeua er ngii el ngakl a ngklir a rechad er a telungalek er a Sem. Tirka el sibai me a lechub e te mesiou a uluureor el meruul a kall, mengaus, me a remeruul a meklou el ureor. Me a Hoffmeier a milsaod el kmo: “Me a lsekum te betok er a okoua el chad er a Sem a uluureor er tia el blai el ngar a Thebaid [er a dimes er a Ekipten], e ngulterekokl el mla er ngii a relmuut el bebil el kiliei er a bita el beluu er a Ekipten, el ileakl sel beluu er a Delta.”

A chad er a omengiis el David Rohl a milluches el kmo, a bebil ngklir a resibai el ngar tia el list a “di ua ngklir a rechad el dechuiu er a Biblia.” El ua tiang, ngar ngii a tbetbil a klalo el llechukl er ngii a osisiu el ngakl el ua Isakar, Aser, me a Sipra. (Exo. 1:3, 4, 15) Me a ulebongel el tekingel a Rohl a dilu el kmo, “Tiang a mera el olechotel el meketeklii sel taem el rechad er a Israel a mle sibai el ngar a beluu er a Ekipten.”

A Dr. Bimson a kmo: “A omesodel a Biblia el kirel a klsibai el mla er ngii er a beluu er a Ekipten me a dirrek el babier er a Exodus a oterekeklii a klemerang er aika el reksi er a klechad.”