1. Ngera uchul me a Jesus a ullengit er a Jehovah el mo mengkar er a redisaiplo er ngii?

SEL ulebongel el kesus er a klengar er ngii er tia el chutem, e a Jesus a mlo melatk a omelsemai el bo lechebangel a redisaiplo er ngii. Bltkil a rengul el mo er tir a uchul me ngullengit er a Demal me ‘longkar er tir er ngikel Mekngit.’ (Jn. 17:14, 15) A Jesus a mle medengei el kmo sel lluut el mora eanged e a Satan el Diabelong a di mo melemolem el oldechelakl er a ngii di el chad el soal mesiou er a Jehovah. Me a rechedal a Jehovah a kmal lousbech er a ulekerreuil.

2. Ngmekera mo ulterekokl a rengud el kmo a Jehovah a mo onger a nglunguched?

² Bltkil a rengul a Jehovah el mora Ngelekel a uchul me ngulenger er a nglunguchel. Me a lsekum e kede mora tkurrebab el klisiched el meruul a soal a Jehovah e ngdirrek el mo betik a rengul er kid e mo onger a nglunguched el kirel a ngeso me a ulekerreuil. A Jehovah a Bdelul a telungalek el kmal kerekikl er a telungalek er ngii. Ngmo melemolem loba bltikerreng lomekerreu er a rengelekel. Ngtomellii a ngklel me a lechub e ngchisel a lsekum e ngdiak loruul el uaisei!

3. Ngera uchul me kede ousbech er a ulekerreuil a Jehovah er chelecha el taem?

³ Kede kmal lousbech er a ulekerreuil a Jehovah er chelecha el taem. A Satan a mla obidokl el mei er tia el chutem e “blekall er a klsiberreng.” (Och. 12:12) Ngika mla rulleterir a rebebil er a re omekcharm er kid el mo omdasu el kmo sel loldechelakl er kid e te “mengebkall er a Dios.” (Jn. 16:2) A rekuk bebil a diak loumera er a Dios me te oldechelakl er kid e le kede ngodech er a rechad er tia el beluulechad. Me alta ngkakerous a uchul e te omekcharm er kid engdi kid a diak demedakt. E ngera uchul? E le Tekingel a Dios a melekoi el kmo: “Rubak a kmal diak lechitid me ng mo melisiich e mengkar er kemiu er Ngikel Mekngit.”  (2 Th. 3:3) Ngmekera Jehovah a lomekerreu er kid? Ka me bo dosaod a eru el rolel.

4. A doltirakl er a Efesus 6:13-17, e ngera ngmla meskid a Jehovah el mo omekerreu er kid?

⁴ A Jehovah a mla meskid a klekedall er a mekemad el sebechel mekerreuid er a odechelakl er a Satan. (Monguiu er a Efesus 6:13-17.) Aika el klekedall er a mekemad el mlara Dios a mesisiich e kmal loureor! Me nguaisei, ngdi ngsebechel mekerreuid a lsekum kede milid er a derta er aika el klekedall, e melemolem el bliull er ngii. Me ngngera ngomtechei a derta er aika el klekedall er a mekemad? Ka me bo dosaod a derta er ngii.

5. Ngera klemerang el ua ia lolekesongel, e ngera uchul me ngkired el ultechull er ngii?

⁵ A klemerang el ua ia lolekesongel a omtechei a klemerang el debetik er a Tekingel a Dios el Biblia. Ngera uchul me ngkired el ultechull er tia el olekesongel? E le Satan a “demal a bek el blulak.” (Jn. 8:44) Ngika mla mo betok el telael el rak el di lomulak e mla chobeldir a “beluulchad el rokir”! (Och. 12:9) Me nguaisei engdi a klemerang er a Biblia a omekerreu er kid me ngdiak demecheblad. Kede mekera mo outechull er tia el okesiul a olekesongel? Kede meruul uaisei sel dosuub er a klemerang el kirel a Jehovah, dongull er ngii “loba reng ma klemerang,” e deblechoel el meruul a llemalt.​—Jn. 4:24, BT; Efe. 4:25; Heb. 13:18, BT.

6. Ngera llemalt el mo ua ia letekerengel a ulud, e ngera uchul me ngkired el milid er ngii?

⁶ A llemalt el mo ua ia letekerengel a ulud a omtechei a melemalt el llechul a Jehovah. Ngera uchul me ngkired el milid er ngii? Ngdi ua tekerengel a ulul a soldau el omekerreu er a chaidirengul, a llemalt el mo ua ia letekerengel a ulud omekerreu er a rengud me ngdiak demechetikaik er tia el mekngit el beluulechad. (Osi. 4:23, NW) A Jehovah a mengerechir er kid el mo betik a rengud er Ngii e mesiou er Ngii loba rengud el rokir. (Mt. 22:36, 37) Me a Satan a melasem el melaod er a rengud loeak sel loruul er kid el mo betik a rengud er a tekoi er tia el beluulechad, el ngii a tekoi el louketui a Jehovah. (Jak. 4:4; 1 Jn. 2:15, 16) E a lsekum e tia diak loureor e ngmo oldechelakl er kid lorrimel er kid el mo meruul a tekoi el diak lodeuir a rengul a Jehovah.

7. Kede mekera milid er a llemalt el mo ua ia letekerengel a ulud?

⁷ Kede milid er a llemalt el mo ua ia letekerengel a ulud sel dolengesenges a llechul a Jehovah el kirel a ungil me a mekngit e dekiei el oltirakl. (Psa. 97:10) A rebebil a locha mo omdasu el kmo a llechul a Jehovah a merrob a ilmekled el meruul a tekoi. Me nguaisei engdi a lsekum e ngmo diak doltaut a omellach er a Biblia er a klengar er kid, e kede mo ua soldau el ngii a medebedii a tekerengel a ulul er a temel a mekemad e le ngomdasu el kmo ngkmal mla mo oberaod. Tia kmal klebelung el tekoi! Tirke el betik a rengrir er a Jehovah a omes a llechul el kmo ng “diak lesal meringel er kid el meruul” e olsobel a klengar er kid.​—1 Jn. 5:3.

8. Ngera belkul a dekltmokl el omerk er a ungil chais er a budech el ua ia loechered?

⁸ A Paulus a dirrek el mengelechel er kid el mo kltmokl el omerk er a ungil chais er a budech el ua ia loechered. Tia belkul a kmo kede blechoel kltmokl el omerk er a ungil chais er a Renged. Sel douchais er a rebebil er a klumech er a Biblia e ngsmisichii a klaumerang er kid. Me ngkmal melisiich er kid sel domes er a rechedal a Jehovah el meliuekl er a beluulechad el rokir el osiik a techall el mo omerk er a ungil chais sel loureor, lengar er a skuul, lengar er a basio er a siobai, me sel loldingel obliil, shopping, loldingel er a rechederir el diak el ngar er a klemerang, me a longedecheduch er a rechad  el lekaodengei, mo lmuut me a di lengar er a blai el diak el sebechir el omais. A lsekum e kede mo medakt e meterob lomerk er a klumech e kede mo ua soldau el ngii a medobed a oecherel er a temel a mekemad, el beot er ngii a metemall a ochil. Tia mo rullii el mo diak el sebechel el omekerreu er ngii a loldechelakl er ngii a rebebil, me ngii a mo meringel er ngii a otirakl a tekingel a merrederel er a mekemad.

9. Ngera uchul me ngkired el cheltekill er a klaumerang er kid er a Rubak el ua ia le tekerenged?

⁹ A klaumerang er kid er a Rubak el ua ia le tekerenged a omtechei er a klaumerang er kid er a Jehovah. Kede oumerang el kmo ngmo oltaut a telbilel. Tia el klaumerang er kid a ngosukid el “dmokou el mekoad a rokui el kmard el belechel ngikel Mekngit.” Ngera uchul me ngkired el blechoel cheltekill er tia el tekerenged? E le ngomekerreu er kid me ngdiak demechetakl er a osisecheklir a rumtok a mera el osisechakl me a lechub e bo lemechitechut a rengud sel loltuub er kid a rechad. A lak a klaumerang er kid e ngmo diak a klisiched el omtok er a rechad el melasem el meruul er kid el mo oltngakl a llechul a Jehovah. Me nguaisei engdi a klaumerang er kid a mekerreuid er a bek el taem el lak dekengei el mo meruul a tekoi el melemall a llechul a Jehovah sel dengar er a ureor me a lechub e ngskuul. (1 Pe. 3:15) A bek el taem el de kotouar a ureor el ngarbab a udoud er ngii  le ngmo melemall er a omesiunged e kede cheltekill er a tekerenged. (Heb. 13:5, 6) Me a bek el taem el dolemolem el mesiou er a Jehovah alta kede chelebangel a odechelakl, e kede mukerreu loeak a tekerenged.​—1 Th. 2:2.

10. Ngera osebeled el ngar er a Dios el mei el ua ia le lkunged, e ngera uchul me ngkired el loulkou er ngii?

¹⁰ A osebeled el ngar er a Dios el mei el ua ia le lkunged a omeltked el lebeskid a Jehovah. Ngomeltked el kmo ngmo omekngeltengat er tirke el rokui el meruul er a soal e a de mad e ngmo okisid. (1 Th. 5:8; 1 Ti. 4:10; Tit. 1:1, 2) Ngdi ua lkungel a soldau el omekerreu er a bdelul, a omeltked er a osobel omekerreu er a uldesued. Ngoeak a ngera el rolel? Tia el omeltked a rullid el di mo melatk a telbilel a Dios e ngosukid me ngdiak demeieleb er a mondai er kid. Ngmekera doulkou er a omeltked? Kede meruul uaisei sel bo doba osengel a Jehovah. El ua tiang, kede otuil a omeltked er a Dios el diak el ilteet.​—Psa. 26:2; 104:34; 1 Ti. 6:17.

11. Ngera tekingel a Dios el ua ia kedorm el saider, e ngera uchul me ngkired el lousbech er ngii?

¹¹ A tekingel a Dios el ua ia kedorm el saider a Biblia. Tia el saider a ngar ngii a klisichel el miich a rokui el blulak e rulleterir a rechad el mo mimokl er a klsuul osisechakl me a omeruul el melemall er kid. (2 Ko. 10:4, 5; 2 Ti. 3:16, 17; Heb. 4:12) Kede suubii el mo meduch lousbech er tia el saider el ngar er a melemalt el rolel sel doruul a omesubed el di kid el tang me a dirrek el loeak a training el lomeskid a cheldebechelel a Dios. (2 Ti. 2:15) A Jehovah diak di lebeskid a klekedelled er a mekemad el mo omekerreu er kid. Ngar ngii a lmuut el ta er a mesisiich el rolel a ulekerreu el lebeskid. Tiang ngerang?

12. Ngera dirrek el dousbech er ngii, e ngera uchul?

¹² A soldau el mla ngar er a mekemad a medengei el kmo ngdiak el sebechel di ngii e mo mesisiich er a mekemad, ngousbech a ngelsuil a rekldemel soldau. Me ngdi osisiu, ngdiak el sebeched el di kid e mo mesisiich er a Satan me a rultirakl er ngii. Kede ousbech a ngelsurir a rudam me a rudos er kid. A Jehovah mla meskid a ‘rudam’ er kid el tir a olengeseu er kid.​—1 Pe. 2:17, BT.

13. A doltirakl er a Hebru 10:24, 25, e ngmekera miting e ngosukid?

¹³ A ta er a rolel a dengai a ngeso a sel debo er a miting. (Monguiu er a Hebru 10:24, 25.) Kede rokui el mo mechitechut a rengud a lebebil er a taem. Sel bo el uaisei e a miting a sebechel melisiich er kid. Kede ngmai omelisiich er a nger er a rudam me a rudos er kid. A cheldecheduch el mengai er a Biblia el loltobed me a dirrek el part er tir a melisiich er kid el mo melemolem el mesiou er a Jehovah. Kede dirrek el ngmai omelisiich sel dongedecheduch er tir er a uchei me a uriul er a miting. (1 Th. 5:14) Me a lmuut kung, a miting a meskid a techelled el mo chormii a deurreng el denguu sel dolengeseu er a rebebil. (Rel. 20:35; Rom 1:11, 12) A miting a dirrek lolengeseu er kid el ngar er a lmuut el bebil er a rolel. Ngngosukid el lmuut el mo ungil a duch er kid lomerk e olisechakl. El ua tiang, kede mo meduch el ousbech aike el klekedall el ngar er a Blil a Dongu er kid. Me bo mungil kutmeklau el kirel a miting. E bo mkerekikl lorrenges er a temel a miting. E a uriul e moltaut a osisechakl el mngilai. Sel moruul el uaisei e ke mo “ungil soldau er a Kristus Jesus.”​—2 Ti. 2:3.

14. Ngera dirrek el lmuut el bebil er a ngeso el ngar ngii?

¹⁴ Ngdirrek el betok el miliol el anghel a olengeseu er kid. Ka di molatk a tekoi el sebechel a di ta el anghel el remuul! (Isa. 37:36) E chelecha e molatk a sebechel el remuul a chimo el cheldebechel er a rechanghel. Ngdiak a chad me a lechub e ngmekngit el anghel el sebechel el mo mesisiich er a rechanghel er a Jehovah. A Jehovah a kot el mesisiich. Me sel lobengked a Jehovah e ngdiak a ngii di el chad el sebechel el  mo mesisiich er kid. (Men. 6:16) Ngsebechel el mo ulterekokl a rengud er tia el tekoi! Molatk er tirke el rokui el olengeseu er kau sel bo lemechitechut a rengum er a tekingel me a lechub e ngomerellel a chad er a urerem, ngalek er a skuul, me a lechub e ngchedam el diak el ngar er a klemerang. Lak mobes el kmo ngdiak el di lekau el tang el oumekemad. Kau a oltirakl a ulekrael er a Jehovah.

15. A doltirakl er a Isaia 54:15, 17, e ngera uchul me ngdiak a sebechel torebengii a berkel a klumech?

¹⁵ A beluulechad el ngar cheungel a Satan a betok a uchul e ngouketui er kid. Kede diak domekbitang er a tekoi er a balatiks e diak dekengei el ngar er a mekemad. Kede omerk er a ngklel a Dios, omerk el kmo ngdi ta el Rengedel a sebechel meskid a budech, e oltirakl a melemalt el llechul. Kede mla ochotii el kmo a mengedereder er tia el beluulechad a bulak e omekoad er a rechad. (Jn. 8:44) Kede dirrek el louchais el kmo ngdi kmedung e ngmo mokngemed tia el beluulechad er a Satan. Me nguaisei, engdi a Satan me a rultirakl er ngii a kmal diak bo leterebengii a berkel a klumech. Kede bai di melemolem el loldanges er a Jehovah er a rokui el rolel e ngsebeched el meruul el uaisei! Me alta Satan a mesisiich engdi ngkmal diak el sebechel torebengii a klumech er a Renged me loberk er a beluulechad el rokir. Tia sebechel meketmokl e le Jehovah a omekerreu er kid.​—Monguiu er a Isaia 54:15, 17.

16. Ngmekera Jehovah e mo olsobel er a rechedal er a temel a kloul ringel?

¹⁶ Ngera di kmedu el mo duubech? A Jehovah a mo osebelid er a temel a kloul ringel loeak a eru el mengasireng el rolel. A kot e ngmo osebelterir a reblak a rengrir el chedal er sel taem el lerelleterir a reking er tia el chutem me lokngemedii a kloul Babilon, el ngii a cheldellel a rokui el klsuul el klechelid. (Och. 17:16-18; 18:2, 4) Ngdirrek el mo osebelterir a rechedal sel bo lokngemed aike el medechel er a beluulechad er a Satan er a Armakedon.​—Och. 7:9, 10; 16:14, 16.

17. Ngmekera ngosukid a dolemolem el kmeed er a Jehovah?

¹⁷ Sel dolemolem el kmeed er a Jehovah e ngdiak a tekoi el sebechel a Satan el rullii el melemall er kid el diak el sebechel a Jehovah el meltii. Ngbai Satan ngike el mo nguu a diak a ulebengelel el tellemall. (Rom 16:20, BT) Me bilau er aike el klekedall er a mekemad e lak molubet er ngii! Lak molasem el oumekemad er a Satan el di kau el tang. Molengeseu er a rudam me a rudos er kau. E moltirakl a ulekrael er a Jehovah. A omoruul el uaisei e ngsebechel mo ulterekokl a rengum el kmo a betik a rengul el Demam el ngar er a eanged a mo melisiich er kau e sobecheklau.​—Isa. 41:10.