1-2. Ngera kirel a chad el meruul er ngii er uchei er a lemetecholb?

 CHELSEL aika el mereko el eim el rak e te betok er a miliol el chad a mla metecholb el ta er a Sioning er a Jehovah. A rebetok er tir a locha di ua Timothy el disaiplo er a taem er a rekot el Kristiano el mlo medengelii a klemerang er a ‘lekekerei.’ (2 Ti. 3:​14, 15) A rebebil a mlo meklou el chad e mesuub el mo medengelii a Jehovah, el bebil er tir a locha kmal chudelang. Ngmla er ngii a ta el redil el milsuub a Biblia lobengterir a Resioning er a Jehovah e miltecholb er a le 97 a rekil!

² A lsekum ke mesuub a Biblia me a lechub a rechad er a blim a Sioning er a Jehovah, e kau ke melatk a mo metecholb? Tiang a kmal ungil turrekong! Engdi uchei er ometecholb e ngkirem el rullii a telbilel a rengum el mora Jehovah. Tia el suobel a mo mesaod er a belkul a detibir a klengar er kid el mora Jehovah. Ngdirrek el mo ngosukau el mo mesa el kmo sel bla bom ready e ngdiak a belkul el momai er a rengum a tibir a rengum el mora Jehovah e metecholb.

NGERA TELBILEL A RENG?

3. Mouchais a bebil el ocholt er a Biblia er a rechad el mle telbiil el mora Jehovah.

³ Ngar er a Biblia e a chad el telbiil el mora Jehovah a mleakl el kirel a chedaol el tekoi. A rechad er a Israel a mle renged el telbiil el mora Jehovah. Engdi rebebil el chedal tia el renged a dirrek el mle telbiil el mora Jehovah er a ileakl el rolel. El ua tiang, a medal a ulekungel a Aron a mla er ngii a kolt el tubereberk  el besiich er ngii el mle “chedaol lochotel a telbiil.” Tia el kolt el besiich a uluuchais el kmo a Aron a mleakl el mo mesiou el ngar er a ileakl el rolel el ngarbab el prist er a Israel. (Lev. 8:​9, NW) A re Nasarait me te mle ileakl el telbiil el mora Jehovah. A tekoi el “Nasarait” a mengai er a tekoi er a Hebru el nazirʹ, el belkul a kmo “Ngike el Mla Meakl,” me a lechub “Ngike el Telbiil.” A re Nasarait a mle kirir el oltirakl a ileakl el llach el melluches el kirir er a Llach er a Moses.—Ule. 6:​2-8.

4. (a) Sel omtibir a rengum el mora Jehovah e ngera sel mo kot el klou a ultutelel el tekoi er a klengar er kau? (b) Ngera belkul a de “chitii a klechad” er kid? (Dirrek el momes er a siasing.)

⁴ Sel omtibir a rengum el mora Jehovah, e ke melilt el mo disaiplo er a Jesus Kristus e nguu a soal a Dios el mo kot el klou a ultutelel el tekoi er a klengar er kau. Ngera uldimukl er tiang? A Jesus a dilu el kmo: “A le ngarngii a soal lokiuellek, e le chitii a klechad er ngii.” (Mt. 16:​24, BT) A tekoi er a Grik el moiuid el “chitii a klechad er ngii” a dirrek el sebechel moiuid el kmo “di ngii el kotouar er ngii.” Sel omtibir a rengum el mora Jehovah el ta er a mesiungel e ngkirem el oltngakl a ngii di el tekoi el diak loltirakl er a soal. (2 Ko. 5:​14, 15) Tia belkul a kmo ke oltngakl a “urerel a klechad” el ua deleboes. (Gal. 5:​19-21; 1 Ko. 6:18) Sel molengesenges aika el tekingel e ngmo rullii a klengar er kau el mo meringel? Ngdiak a lsekum e ngbetik a rengum er a Jehovah e ulterekokl a rengum el kmo a llechul a uchul a klungiolem. (Psa. 119:97; Isa. 48:​17, 18) A odam el Nicholas a kmo: “Ngsebechem el lomes a llechul a Jehovah el ua blil a kelebus el merers er kau me ngdiak el sebechem el meruul aike el soam me a lechub e ngsebechem lomes el ua sersel a blil a laion el omekerreu er kau er a tellemall.”

5. (a) Ngmekera omtibir a rengum el mora Jehovah? (b) Ngera klekakerous er a telbilel a reng me a techolb? (Dirrek el momes er a siasing.)

⁵ Ngmekera omtibir a rengum el mora Jehovah? Ke meluluuch el tibir el mo er ngii el kmo  ke mo mengull er ngii el di ngii el tang e mo nguu a soal el mo kot er a klengar er kau. Ke tibir el kmo ngmo melemolem el betik a rengum er ngii el “oba rengum el rokir, ma klengar er kau el rokir, ma uldesuem el rokir, ma klisichem el rokir.” (Mk. 12:30) A telbilel a rengum a blart, el moruul er ngii el di delongelem kau me a Jehovah. Engdi a techolb a mora buai. Ngochotii el mora rechad el lomes el kmo ke mla rullii a telbilel a rengum. Tia el telbilem a oberaod el telbiil. Ngkirel turrekong er kau el mo otutii me a Jehovah dirrek el mengerechir er kau el mo otireklii.—Oli. 5:​4, 5.

NGERA UCHUL ME NGUNGIL OMTIBIR A RENGUM EL MORA JEHOVAH?

6. Ngera rullii a chad el mo tibir a rengul el mora Jehovah?

⁶ Sel kot el klou a ultutelel luchul me ke tibir a rengum el mora Jehovah, a kau el betik a rengum er ngii. A bltkil a rengum a diak di loltirakl er a rengum e ngbai mengai a uchetemel er a “melemalt el klemedengei” me a “utebengel a tekoi er a klereng,” el ngii aike el tekoi el omsiluub el kirel a Jehovah el luchul me ngmlukeroul a bltkil a rengum el mo er ngii. (Kol. 1:​9, NW) Omesubem er a Biblia mla oterekeklii a rengum el kmo a (1) Jehovah a mera el chad er a rengum, (2) Biblia a mlukreng el Tekingel, me (3) ngii a ousbech er a cheldebechelel el oltaut er a moktek er ngii.

7. Ngera kired el meruul er ngii er uchei er a detibir a rengud el mora Dios?

⁷ Tirke el tuib a rengrir el mora Jehovah a kirir el medengei a uchetemel osisechakl er a Biblia e kiei el loltirakl a llechul a Dios. Te mora tkurrebab el sebechir el louchais a klaumerang er tir el mora rebebil. (Mt. 28:​19, 20) Ngmla mukeroul a bltkil a rengrir el mora Jehovah me a urungulir el mo mengull er ngii el di ngii el tang. Kau, ngdirrek el uaisei a uldesuem? Sel  bo moba chouaitia el bltikerreng e ngdiak momes er a telbilel a reng me a techolb el kmo ngtekoi el moruul er ngii loldeu a rengul ngike el mesuub lobengkem me a lechub e te rechad er a blim, me a lechub e ke meruul er ngii le resechelim el meruul e ngii.

8. Ngmekera omereng el saul e sebechel ngosukau el mo tibir a rengum el mora Jehovah? (Psalm 116:​12-14)

⁸ Sel molatk aike el rokui el bla leruul a Jehovah el kirem e ngmo soam el tibir a klengar er kau el mo er ngii. (Monguiu er a Psalm 116:​12-14.) A Biblia melekoi el kirel a Jehovah el kmo ngomeskid a “bek el ungil e cherrungel sengk.” (Jak. 1:17) Sel kot el ngarbab er aika el rokui el sengk a tengetengel a Ngelekel el Jesus. Ka di molatk! A olubet a mla rullii me ngsebechel mo er ngii a kmes el deleuill er kid me a Jehovah. E mla meskid omelatk el mo kiei el mo cherechar. (1 Jn. 4:​9, 10, 19) Telbilel a rengum el mora Jehovah a ta er sel kot lungil rolel e ke ochotii omereng el saul er kau el kirel tia el kot el ngarbab lochotel a bltikerreng, me a dirrek el kirel aike el lmuut el bebil er a klengeltengat lomeskau a Jehovah. (Dut. 16:17; 2 Ko. 5:15) Chouaitia el omereng el saul a lolisiich er ngii a babier el Mkiei el Mo Cherechar! er a 46 el suobel er a 4, el luldimukl er ngii a edei el bung el video el Presenting Your Gifts to God.

KAU, KE MLA MO KLTMOKL EL KIREL A TELBILEL A RENG ME A TECHOLB?

9. Ngera uchul me a chad a diak el kirel morrimel el mo meruul er a telbilel a rengul?

⁹ Ke locha feel el kmo ngdirkak bom ready el tibir a rengum e mo metecholb. Nglocha dirk kirem el meruul omelodech er a klengar er kau el mo oltirakl a llechul a Jehovah, me a lechub e ke ousbech a taem el smisichii a klaumerang er kau. (Kol. 2:​6, 7) Ngdiak el rokui el mesuub a Biblia osisiu a okurulel a bltkil a rengrir el mora Jehovah me a diak el rokui el ngeasek a kltmokl el mo tuib a rengrir e metecholb er a osisiu el klebekoll. Me morriter er a okurulem er a klereng loltirakl er aike el sebechem el meruul el diak loltirakl er a ngii di el chad.—Gal. 6:​4, 5.

10. Ngera sebechem el meruul er ngii a lsekum e ke mtebengii el kmo ngdirkak bom ready el melib er a rengum e mo metecholb? (Dirrek el momes er a baks el “ Kirir Tirke el Mukeroul er a Klemerang.”)

¹⁰ Mo lmuut me a omutebengii el kmo ngdirkak bom ready el tibir a klengar er kau el mora Jehovah, e lolemolem el turrekong er kau. Moluluuch lolengit er a Jehovah me lengesukau el remuul omelodech el mousbech er a klengar er kau. (Fil. 2:13; 3:16) Ngkmal sebechel mo ulterekokl a rengum el kmo ngmo rongesau e onger a nglunguchem.—1 Jn. 5:14.

UCHUL ME A REBEBIL OMAI ER A RENGRIR

11. Ngmekera Jehovah e mo ngosukid el melemolem el loba blakerreng el mo er ngii?

¹¹ A rebebil el mla mo kltmokl el tuib a klengar er tir e metecholb a dirk omai er a rengrir. Te locha melatk, ‘Alii ak mo el metecholb e a uriul e ak rullii oberaod el klengit e mesuld a ngklek.’ A lsekum tiang a dektem e lemechelaod a rengum el kmo a Jehovah mo meskau aike el mousbech el mo “oltirakl er a soal . . . ma cho moruul a di blechoel el ungil er a rengul.” (Kol. 1:10) Ngdirrek el mo smisichau el mo meruul a llemalt. Ngika mla ngosuterir a rebetok el mo meruul a llemalt me ngkmal sebechel ngosukau. (1 Ko. 10:13) Tiakid a ta er a uchul me te di mekesai el chad a mla mesuld a ngklir er a ongdibel. A Jehovah olengeseu er a rechedal el mo melemolem el loba blakerreng.

12. Ngera mo ngosukid me ngdiak bo derellii oberaod el klengit?

¹² Rokui el diak el mecherrungel el chad a mekesuseu el mo meruul a diak el melemalt. (Jak. 1:14) Me nguaisei engdi a mo meruul er a klengit a omelilt er kau. Ngkau a ngar ngii a klisichem el melilt er a rolel obo mousbech er a klengar er kau. A rebebil a kmo ngdiak a klisiched  er omerelled me a tekoi el domelechesiu engdi tia diak el klemerang. Ngsebechem el suubii el mo mtebechel. Mo lmuut me a lebo el nguibes a rengum er a mekngit, ngsebechem el ngiltii el diak bo moruul er ngii. Ngdirrek el ngar ngii a mo ngosukau el diak bo moruul a klengit. El ua tiang, moluluuch er a bek el sils. Lengar ngii a ungil schedule er kau el mesuub er a Tekingel a Dios el di kau el tang. Mngar er a miting er a ongdibel. Mouchais er a klaumerang er kau el mora rebebil. Sel omblechoel el meruul aika el tekoi e ngmo smisichau el mo otireklii a telbilel a rengum. E lak mobes el kmo a Jehovah dirrek el mo ngosukau el otutii.—Gal. 5:16.

13. Ngera el ungil kerebai a lekiltmeklii a Josef?

¹³ Ngmo beot er kau a kiei el loltirakl er a telbilel a rengum a lsekum ngdi uchei e ke ngiltii obo moruul er ngii sel omekesuseu. A Biblia ouchais el kirir a rebetok el mirruul er tiang, el tir a dirrek el dimlak lemecherrungel el chad. El ua tiang, a bechil a Potifar a mle betok el taem el lolasem el mengesuseu er a Josef el mo obengkel. Ngdi Josef a mle ulterekokl a rengul er a tekoi el bo loruul er ngii. A Biblia kmo ng “dimlak le kengei.” A Josef a dilu el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?”(Gen. 39:​8-10) Me ngbleketakl el kmo a Josef a mle medengelii a kirel el meruul er ngii mo lmuut er a uchei er a lolasem el mengesuseu er ngii. Tia uchul me ngmlo beot er ngii a meruul a llemalt er a lemekesuseu.

14. Ngmekera sebeched el suubii el mo oltngakl omeruul el klengit?

¹⁴ Ngmekera sebechem el moba osisiu el ulterekokl el reng el luleba Josef? Ngsebechem el melilt er chelechang a tekoi el bo moruul er ngii sel omekesuseu. Msuubii el di mereched el lotngakl a tekoi el louketui a Jehovah, e dirrek el kmal diak mkengei el mo melebedebek el kirel. (Psa. 97:10; 119:165) Seikid e ngkmal diak bora klengit sel omekesuseu. Ke mla mo medengelii obo moruul er ngii. Ngulterekokl a rengum er a rael el bo moeak ngii.

15. Ngmekera chad e ochotii el kmo ng ‘blak a rengul el losiik’ er a Jehovah? (Hebru 11:​6, NW)

¹⁵ E kau a locha medengei el kmo ke mla metik er a klemerang e soam el mesiou er a Jehovah loba rengum el rokir, engdi nglocha dirk ngar ngii orreked er kau me ngdiak mtibir a rengum e bo metecholb. Ngsebechem el meruul er a lurruul er ngii a King David. Ngsebechem  el olengit er a Jehovah el kmo: “Morriter er ngak kau el Dios, e bo modengelii a renguk; e mesemak me betik a uldesuek. Momes ma le ngar ngii a cheleblad er a chelsek, e morolak er a rael el di ngar ngii el mo cherechar.” (Psa. 139:​23, 24) Jehovah omekngeltengat er tirke el “blak a rengrir el losiik er ngii.” Kau el meringel loureor el mo meruul er a telbilel a rengum me a techolb ochotii er ngii el kmo, ngblak a rengum losiik er ngii.—Monguiu er a Hebru 11:​6, NW. a

MOLEMOLEM LOLEKEED ER KAU ER A JEHOVAH

16-17. Ngmekera Jehovah e mengurs er tirke el mukeroul er a klemerang? (Johanes 6:​44, BT)

¹⁶ A Jesus a dilu el kmo a redisaiplo er ngii a longurs er tir a Jehovah. (Monguiu er a Johanes 6:​44, BT. b) Ka molatk er tia el kmal ileakl el tekoi me a belkul el kirem. A Jehovah a omes a ungil er a derta el chad e mengurs er tir el mo er ngii. Ngomes er ngii el chad el kmo ng “ileakl el kloklel,” me a lechub e ng “mekreos el kloklel.” (Dut. 7:​6, NW; ftn.) Tiakid osengel el kirem.

¹⁷ Engdi kau a locha ngeasek el rechad er a blim omekeroul er kau er a klemerang. Ke locha feel el kmo ke mesiou er a Jehovah le te rechad er a blim a uchul ngdiak el Jehovah a mengurs er kau. Me nguaisei engdi a Biblia kmo: “Molekeed er [kau] er a Dios, me bo lekeed er [kau].” (Jak. 4:8; 1 Kr. 28:9) Sel molekeed er kau er a Jehovah e ngii a mo olekeed er ngii er kau. A Jehovah diak lomes er kau el chedal a cheldebechel er a rechad. Ngika mengurs er a rederta el chad, mo lmuut er a rechad el mukeroul er a klemerang. Me a chad sel lolekeed er ngii er a Jehovah, e a Jehovah okedii er ngii el ua lolekoi a Jakobus 4:8.—Momekesiu er a 2 Thesalonika 2:13.

18. Ngera kede mo mesaod er a ongingil suobel? (Psalm 40:8)

¹⁸ Sel mtibir a rengum el mora Jehovah e metecholb, e ke ochotii el kmo ke oba uldesuel a Jesus. Ngika kilengei el nguu a klengar er ngii el msang a Demal e mo meruul a ngii di el tekoi el lolengit. (Monguiu er a Psalm 40:8; Heb. 10:7) Ngar ongingil suobel e kede mo mesaod er a mo ngosukau el mo melemolem el mesiou er a Jehovah loba blakerreng er uriul ometecholb.