1-2. Ngmekera klengar e lmuut el mo ungil er uriul er a techolb?

 NGKMAL dmeu a rengud sel demetecholb e bo dechedal a telungalek er a Jehovah. Ngmera el ileakl el chetengakl el ngar ngii tia el kmes el deleuill er kid me a Jehovah. Kede kongei a tekingel a David el ta er a milluches er a Psalm el kmo: “Ngdmeu a rengul ngike el mngiltii e mokedii er kau [e Jehovah] el me kiei er a mekesekesel a blim.”—Psa. 65:​4, NW.

² A Jehovah a diak lolai er a ngii di el chad el mei er a mekesekesel a blil. Ngua dulsaod er ngii er sel uleak uchei el suobel, ngmelilt el olekeed er tirke el lochotii el kmo, ngsorir a lebo er ngii a kmes el deleuill er tir me ngii. (Jak. 4:8) Sel omtibir a klengar er kau el mora Jehovah e metecholb e ke mo kmeed er a Jehovah el ngar er a ileakl el rolel. Ngkmal sebechel mo ulterekokl a rengum el kmo a uriul er ometecholb e ngmo ‘oitel a klungiaol el ekor kau el olsesibes.’—Mal. 3:10; Jer. 17:​7, 8.

3. A Rekristiano el mla tuib a rengrir e metecholb te oba ngera el kmal oberaod el ngerachel? (Olisechakl 5:​4, 5)

³ Me nguaisei a techolb a di uchelel. Uriul er ometecholb e ngsoam el mora tkurrebab el klisichem el kiei el oltirakl er a telbilel a rengum mo lmuut er a bo mchebangel omengesuseu me a lechub e ngomeasem er a klaumerang er kau. (Monguiu er a Olisechakl 5:​4, 5.) Ke mla mo ta er a disaiplo er a Jesus me ke mo oltirakl er a kerebai er ngii me a tekingel el mo er sel tkurrebab  el sebechem. (Mt. 28:​19, 20; 1 Pe. 2:21) E tia el suobel a mo ngosukau el meruul er tiang.

‘MOLEMOLEM EL OLTIRAKL’ ER A JESUS ALTA KE MO CHOBANGEL A RINGEL ME A OMENGESUSEU

4. Ngoeak a ngera el rolel e a redisaiplo er a Jesus a mengol er a “teluo el kerrekar”? (Lukas 9:​23, NW)

⁴ Lak momdasu el kmo a uriul er a techolb e a klengar er kau a mo beot. A Jesus a ulemeketakl el kmo a redisaiplo er ngii a mo mengol er a “teluo el kerrekar.” Te mo meruul er tiang er a “bek el sils.” (Monguiu er a Lukas 9:​23, NW. a) Me a Jesus ngmillekoi el kmo a rultirakl er ngii a mo blechoel el di chuarm? Ngdiak. Ngika millisiich el kmo alta kede mo ngmai a klengeltengat engdi kede dirrek el mo chobangel omelsemai. A bebil er ngii el omelsemai a locha kmal mo meringel.—2 Ti. 3:12.

5. A Jesus ngtilbir a ngera el klengeltengat el mo er tirke el kongei el oriid a tekoi er tia el beluulechad?

⁵ Nglocha ngar ngii a rechedal a telungalek er kau el omtok er kau me a lechub e ke mla chemoit a techall er a kerruul er tia el beluulechad me bo lsebechem el nguu a Renged el mo kot. (Mt. 6:33) A leuaisei e ngkmal sebechel mo ulterekokl a rengum el kmo a Jehovah medengei a rokui el tekoi el bla mruul el kirel. (Heb. 6:10) Kulterekokl el mla chormii el kmo ngklemerang aika el tekingel a Jesus: “Ngikel mo ikrii a blil ma lechub a re bebil er ngii el sechal ma redil ma lechub a demal ma lechub a delal ma lechub a re ngelekel ma lechub a chetemel el kirek ma kirel a Ebangkelio, a mo ngmai a lmuut el betok er chelechang, ng mo ngmai a derdart el blai ma re bebil er ngii el sechal ma redil ma re delal ma re ngelekel ma chetemel, e dirrek el mo chuarm er odechelakl; e sel mel beluulchad e ng mo nguu a diak a ulebengelel klengar.” (Mk. 10:​29, 30) A klengeltengat el bla mngai a lmuut el ngaruchei er a ngii di el tekoi el bla mkengei el loriid.—Psa. 37:4.

6. Ngera uchul me a uriul er a techolb e ngdirk kired el oldechelakl a “ngelbesel a klechad”?

⁶ Uriul er ometecholb e ngdirk kirem el oldechelakl a “ngelbesel a klechad.” (1 Jn. 2:16) E le kau a dirk uldidellel a rsechel a Adam el mlora klengit. A lebebil e ke locha mo feel el ua apostol Paulus el dilu el kmo: “Ngak a dmeu a renguk er a llechul a Dios er sel kmal chelsel a renguk. E ngdi kmetik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit el oureor el ngar a bedengek.” (Rom 7:​22, 23) Nglocha mo mechitechut a rengum lekau el di mo oldechelakl a mekngit el ngelbesel a rengum. Me nguaisei sel mblechoel el melatk er a telbiil el mrirellii el mora Jehovah er a mtengetengii a klengar er kau el mo er ngii, e ngmo smisichau el mo melemolem el oltngakl a omengesuseu. A telbiil el bla mrellii el mora Jehovah mo omekbeot er a klengar er kau sel bo mchebangel omengesuseu. Ngoeak a ngera el rolel?

7. Ngmekera omtengetengii a klengar er kau el mora Jehovah e ngosukau el mo melemolem el loba blakerreng el mo er ngii?

⁷ Sel mtengetengii a klengar er kau el mora Jehovah e ke choitii a klechad er kau. Tia belkul a kmo ke chemoit aike el soam me a turrekong er kau el diak lodeuir a rengul a Jehovah. (Mt. 16:​24, BT) Me sel bo mchebengelii omelsemai, e ngdiak bo mongoit er a taem el melatk el kmo ke mo mekerang. Kau a mla chosimer a rokui el tekoi e di tang a omelilt el mobang, el ngii a mo melemolem el loba blakerreng el mora Jehovah. Ke mla rullii er a rengum el mo odeuir a rengul. Ke ua Job. Alta ngmlo chobangel a kmal meringel el ringel engdi ngdilu el kmo: “Ngak a di melemolem er a blakerreng er ngak!”—Job 27:​5, NW.

8. Ngmekera e sel molatk er a telbilel a rengum el mla tibir el mo meruul er a soal a Jehovah, e ngosukau el mo oltngakl a omengesuseu?

 ⁸ Sel molatk er a nglunguchem er omtibir a rengum el mora Jehovah e ngmo meskau a klisiich el mo oltngakl a ngii di el omengesuseu. El ua tiang, ke mo olengamech er a bechiil el chad? Ngkmal diak! Ke mla tibir el mora Jehovah el kmo ngkmal diak bo moruul a ngii di el tekoi el uaitiang. E a lsekum e ngdiak bechei aika el mekngit el tekoi me lemedalem er a rengum e ngdiak bo meringel loureor loltobed er a rengum er uriul. Ke mo ‘choridau’ er a “rolir a re mekngit.”—Osi. 4:​14, 15.

9. Ngmekera omolatk er a telbilel a rengum el mla tibir el mo meruul er a soal a Jehovah e ngosukau el nguu omengull er kau el mora Jehovah el mo kot er a klengar er kau?

⁹ E kuk mekerang a lsekum te offer er kau er a ureor el mo uchul e ngdiak el sebechem el mora bek el miting er ongdibel? Ngkmal bleketakl er a rengum a kirem el meruul er ngii. Uchei er a le offer tia el ureor e ke mla ngiltii el kmo ngdiak bo mkengei a ureor el mo melemall er a miting er kau. Me ngdiak bo mekesuseu el mo kongei er tia el ureor e mosiik a rolel e ngsebechem el dirk nguu a Jehovah el mo kot er a klengar er kau. Sel molebedebek er a Jesus el rirellii er a rengul el mo odeuir a rengul a Demal e ke di mo mereched el kotouar a ngii di el tekoi el diak bo lodeuir a rengul a Dios el bla mtengetengii a klengar er kau el mo er ngii, el ulterekokl a rengum.—Mt. 4:10; Jn. 8:29.

10. Ngmekera Jehovah e mo ngosukau er uriul ometecholb el mo ‘melemolem el oltirakl’ er a Jesus?

¹⁰ Me a ringel me a omengesuseu a meskau a techall el mo ochotii el kmo ngkmal soam el ‘melemolem el oltirakl’ er a Jesus. E kmal sebechel mo ulterekokl a rengum el kmo a Jehovah mo ngosukau. A Biblia kmo: “Dios a diak lechoit a telbilel, me ng diak le bechikemiu me bor ongarm el mo engelakl er a klisichiu. Me sel le mer kemiu ongarm, e ng mo meskemiu a klisiich el mtekengelii, e dirrek el meskemiu a rolel e kom tuobed er ngii.”—1 Ko. 10:13.

 ROLEL E KEDE MELEMOLEM EL OLTIRAKL ER A JESUS

11. Ngera ta er a kot lungil rolel e kede melemolem el oltirakl er a Jesus? (Dirrek el momes er a siasing.)

¹¹ A Jesus a mle blak a rengul mesiou er a Jehovah e millemolem el kmeed er ngii lokiu a nglunguuch. (Lk. 6:12) Me a ta er a kot lungil rolel e ke melemolem el oltirakl er a Jesus er uriul er ometecholb a melemolem el meruul aike el tekoi lolekeed er kau er a Jehovah. A Biblia kmo: “Di dolengeriakl loltirakl er sel bla bo de siich er ngii.” (Fil. 3:​16, BT) Ngar ngii aike el taem el bo mrenges a experience er a rudam me a rudos el mla menglou omesiungir. Te locha mlora Skuul el Kirir a Rumerk er a Rengedel a Dios (SKE) me a lechub e te mla melukl el mora beluu lousbech a ngeso. A lsekum e ngdirrek el sebechem e aika kmal ungil turrekong el kirem. A rechedal a Jehovah osiik a rolel e ngsebechir el menglou a omesiungir el mo er ngii. (Rel. 16:9) Engdi ngkuk mekerang a lak el sebechem aika el turrekong er chelechang? Lak momdasu el kmo ke ngariou er tirke el sebechir. A klaidesachel el lengar ngii a Rekristiano a outekangel el mora ulebongel. (Mt. 10:22) Lak mongkekerei er a kerresel aike el sebechem el meruul loltirakl a duch er kau me a blekeradel er a klengar er kau. Tia klou a ultutelel rolel e ngsebechem el melemolem el loltirakl er a Jesus er uriul er ometecholb.—Psa. 26:1.

12-13. Ngera sebechem el meruul er ngii a lsekum ke mo feel el kmo ngmla mo mechitechut a blakerreng er kau? (1 Korinth 9:​16, 17, BT) (Dirrek el momes er a baks el “ Molemolem el Ngar er a Klaidesachel.”)

¹² E kuk mekerang a lsekum e ke feel el kmo ngmla mo diak moluluuch el mera el ngar er a rengum me a lechub e ngmla mo diak el deu a rengum lomerk el ua ngar er a mong? Ngmla mo diak el deu a rengum el menguiu er a Biblia er kau el ua ngar er a mong? A lsekum ke mo feel el uaisei er uriul er ometecholb e lak momdasu el kmo ngmla mo diak moba chedaol reng er a Jehovah. Kid el diak demecherrungel a uchul  me ngngar ngii aike el taem el sebechel mo mengedengodech a tekoi el bo domelechesiu. A lsekum e ngmo diak a blakerreng er kau e molatk er a kerebil a apostol Paulus. Alta ngmillasem loukerebai er a Jesus, ngmle medengei el kmo ngngar ngii aike el taem e ngmo diak el mesisiich a urungulel el meruul aike el kirel meruul. (Monguiu er a 1 Korinth 9:​16, 17, BT. b) Ngdilu el kmo: “A lak a reng er ngak el meruul er ngii, e ngdi ngerachel el mloterekokl er ngak.” Me a belkul a tekingel a Paulus a kmo ngmo meruul er a omesiungel alta ngmo diak el feel er ngii.

¹³ Ngdi osisiu, lak moruul a tekoi loltirakl er a rengum. Mrellii er a rengum el mo meruul er a llemalt alta ngmo diak er a rengum el meruul er ngii. A lsekum ke mo melemolem el meruul a llemalt e a cherengel a taem e ngmo mengodech a rengum. Me chelechang a ungil schedule er kau er a tekoi er a klereng a mo ngosukau el mo melemolem el oltirakl er a Jesus er uriul er ometecholb. A rudam me a rudos er kau sel lomes er kau el loutekangel er a omesiungem el mora Jehovah e ngmelisiich er tir.—1 Th. 5:11.

“Di LE KEMIU EL MERRITER . . . DI LE KEMIU EL MELASEM”

14. Ngera ungil omblechoel el meruul er ngii, e ngerang? (2 Korinth 13:​5, BT)

¹⁴ Ngdirrek el kmal mo ngosukau er a uriul er ometecholb omblechoel el merriter er kau. (Monguiu er a 2 Korinth 13:​5, BT. c) Omerollel a taem e ke kuk mong e merriter er a klengar er kau me a omerellem e momes el kmo, ke meluluuch er a bek el sils, menguiu e mesuub er a Biblia, ngar er a miting, e teloi er a berkel a klumech. Mosiik a rolel e ngsebechem el lmuut el menglou er a deurreng er kau me a klungiolem el meruul aikang. El ua tiang, di lekau el oker chouaika el ker: ‘Ngak, ngsebechek el smaod a uchetemel a osisechakl er a Biblia el mora rebebil? Ngar ngii a rolel e ngsebechek el rullii a berkel a klumech el mo dmeu a renguk el meruul er ngii? Ngkmal specific el uangerang a nglunguchek, e ngochotii el kmo ak cherrungel loumerang el ulsirs er a Jehovah? Ngak ak mora rokui el miting er a Rekristiano? Ngmekera sebechek lolengeriakl er a rolel a kurrenges e kteloi a miting er a ongdibel?’

15-16. Ngera ke suub er a experience er odam el ultngeklii omengesuseu?

¹⁵ Ngdirrek el ungil om honest el merriter a  chelitechetum. A odam el Robert a mesaod er a experience el ngosukid el mtebengii a uchul me ngkired el meruul er tiang: “Sera lebekord el 20 a rekik e ngmla er ngii a part-time el urerek. A ta er a klebesei er aki bo merek loureor e a redil el kuluureor el lobengkel a mle invite er ngak el mora blil. Ngdilu el kmo ngdi mo kemam el terung me kemam a mo ‘have a good time.’ A uchelel ak mirruul a excuse, engdi ulebongel ak mle kotouar e silodii a uchul.” Me a Robert a ultngeklii omengesuseu me kede chemat er ngii. Engdi uriul e ngmillatk el kirel tia el tekoi el dilubech e mlo mtebengii el kmo ngmle sebechel lungil sumecheklii tia el blekeradel. Ngkmo: “Ngdimlak mereched me a lechub el mesisiich a renguk el otngeklii el ua lurruul er ngii a Josef el mora bechil a Potifar. (Gen. 39:​7-9) Ngbai mlo mechas a renguk le ngmlo meringel er ngak a kotouar. Tia el tekoi a ngilsukak el mo mesa el kmo ngkirek el smisichii a deleuill er ngak me a Jehovah.”

¹⁶ Ngmo uchul a klungiolem sel morriter er kau el ua lurruul er ngii a Robert. Mo lmuut me a omotngeklii omengesuseu e di lekau el oker, ‘Ngmle ua klteketel a ngerang e ak mocha kotouar?’ A lsekum ke mesang el kmo ngkirem el meruul omelodech e lak bo lemechitechut a rengum. Bo el deu a rengum le ke mla mo medengelii tia el chelitechetum. Moluluuch el kirel e moruul aike el kirem el mo smisichii a rengum el mo kiei el oltirakl a llechul a Jehovah.—Psa. 139:​23, 24.

17. Ngmekera experience er a Robert e mle ulekuak er a ngklel a Jehovah?

¹⁷ Ngar ngii a dirrek el ta er a tekoi el desuubii er a experience er a Robert. Ngmelekoi el kmo: “Uriul er ak kotouar er ngika el ngalek er a urerek e ngdilu el kmo, ‘Ke mle pass er a test!’ Me a kuleker er ngii er a belkul a tekingel. Ngsilodii el kmo a sechelil el mle ta er a Sioning er a Jehovah a dilu er ngii el kmo a rokui el ngeasek el Sioning a mo ou double life a lsekum e ngmo er tir a techall. Me ngdilu er a sechelil el kmo ngmo melasem er ngak. Me ngkmal mlo dmeu a renguk el kilebkellii a ngklel a Jehovah.”

18. Ngera ke mla rullii er a rengum el mo meruul er ngii er uriul er ometecholb? (Dirrek el momes er a baks el “ Series el Kmal Mo Soam.”)

¹⁸ Sel omtibir a rengum el mora Jehovah e metecholb e ke ochotii el kmo ngsoam el kobkellii a ngklel er a chelsel a ngii di el blekeradel. E kmal sebechel mo ulterekokl a rengum el kmo a Jehovah medengei a ringel el omchelebangel me a omengesuseu el moltngakl. Ngmo omekngeltengat er a blakerreng er kau. Ngkmal sebechel mo ulterekokl a rengum el kmo ngoeak a chedaol reng er ngii e ngmo meskau a klisiich el mousbech er ngii. (Lk. 11:​11-13) Ngoeak a ngelsuil a Jehovah e ngmo sebechem el melemolem el loltirakl er a Jesus er uriul er ometecholb.