1. Ngera el klou a ultutelel el tekoi a lulsaod er ngii a Jesus er sel ulebongel el kesus er ngii lobengterir a redisaiplo er ngii?

 SEL ulebongel el kesus er a Jesus el lobengterir a redisaiplo er ngii, e ngmilsaod er a bltikerreng el bekord el 30 el taem. Ngdilu er a redisaiplo er ngii el kmo ngkirir el mo ‘kaubltikerreng.’ (Johanes 15:12, 17) Tia el bltikerreng er tir a kmal mo klou el uchul me a rechad a mo dongcheterir e mo medengei el kmo te mera el oltirakl er a Kristus. (Johanes 13:34, 35) A bltikerreng el lulsaod er ngii a Jesus a diak el kora di tekoi el dolechesuar, e ngbai kmal klou a klisichel e dirrek el blekeradel el chad a kongei el tongetengii a klengar er ngii el kirir a rebebil. A Jesus a dilu el kmo: “A kot el ngarbab el bltikerreng a sel le mad a chad el kirir a re sechelil. E kemiu a sechelik a lsekum kom meruul a ikel kdu er kemiu.”​—Johanes 15:13, 14.

2. (a) A rechad te medengei a ngerang el kirir a remesiungel a Dios er chelechang? (b) Ngera el ker a bo donger er tia el suobel?

² A remesiungel a Jehovah er chelechang a lodengelterir a rechad el kirel chouaitia el bliochel el bltikerreng me a mesisiich el kltarreng er tir. (1 Johanes 3:10, 11) Tia el bltikerreng er tir a diak lultuil er a kmo te chad er ker beluu me a lechub e te chedal a ngera el klebliil, e  ngera lomelekoi a lolekoi, me a lechub e te mla er ker el mei, me a lechub e ngua ngera okurulir. Meliuekl er a beluulechad, e a remesiungel a Jehovah a mera el kaubltikerreng er a delongelir. Me ngera uchul me ngkmal klou a belkul a bltikerreng er chelechang? Ngoeak a ngera el rolel e a Jehovah me a Jesus a meleketek er kid loba bltikerreng? E mekerang e mo sebeched el olecholt er tia el bltikerreng sel dongelaod e dolisiich er a rebebil?​—1 Korinth 8:1.

3. Ngmekera taem er a “blsechel a ringel” e ngar ngii a letemellii er a rechad?

³ Kid a kiei er a taem er a “blsechel a ringel” me a klengar a di mui er a “blekiklreng ma uldikel.” (2 Timothy 3:1-5, BT; Psalm 90:10) A rebetok el chad a kmal chuarm el uchul me te mo omdasu el kmo ngdikea el sebechir loutekangel. Te kuk betok er a 800,000 el chad a ngmai a klengar er tir er a bek el rak, el belkul a kmo a ta el chad a nguu a klengar er ngii er a bek el 40 el bio er a klok. E klengiterreng e le te ngar ngii a rebebil rudam er kid el mlo chobengelii tia el tekoi me ngdi mlo tir el ngmai a klengar er tir.

4. Te rua techang el ngar er a Biblia a mlo oureng el mad?

⁴ Ngar er a taem er a Biblia, e a rebebil blak a rengrir el mesiungel a Dios a kmal mlo mekngit a rengrir er a mondai er tir me ngmlo sorir el mad. El ua tiang, a Job a kmal mlo chuarm er a ringel me ngdilu el kmo: “Ng mla tmurk a renguk el chad; ng dikea le soak el melemolem el chad.” (Job 7:16; 14:13) A Jona a kmal mlo mechitechut a rengul me ngdilu el kmo: “Mada RUBAK, ak ulengit me mnguu a klengar er ngak, ng bai ungil a kmad er a kchad.” (Jona 4:3) E a profet el Elias a mlo diak a omeltkel me ngdilu el kmo: “Ng kmal isong e RUBAK. Mnguu a klengar er ngak!” (1 King 19:4) Engdi Jehovah a kmal mle betik a rengul er tirka el blak a rengrir el mesiungel e dirrek el mle soal a lolemolem a klengar er tir. Me ngdimlak loukerrekeriil er tir el kirel a uldesuir. Ngbai ngilsuterir el lmuut el mo sorir el melemolem el ngar me bo lsebechir el melemolem el blak a rengrir el mesiou er Ngii.

5. Ngera me a rudam me a rudos er kid a kmal lousbech er a bltikerreng er kid er chelechang?

⁵ Chelecha el taem, e a rebetok el rudam me a rudos er kid a chuarm a meringel el blekeradel me te ousbech er a bltikerreng er kid. A rebebil a medenguul me a lechub e te modechelakl. E a rebebil a mo kirir el outekangel a ulecheracheb me a omelaes el ngar er a urerir. Me a lechub e te kmal mo mesaul a bedengir e le te oureor el betok el sikang me a lechub e ngkmal meringel a urerir. A rebebil a chelebangel a meringel el mondai er a telungalek er tir. Alta e te becherir a rechad el diak losiou er a Jehovah me te di blechoel melekoi a mekngit el bedultir. Ngoeak aikang me a lmuut el bebil el meringel tekoi, e a rebetok a kmal mo mechitechut a bedengir, e locha mo omdasu el kmo ngdiak a ultutelir el chad. Me ngtecha sebechel ngosuterir?

6. Ngoeak a ngera el rolel e a bltkil a rengul a Jehovah a melisiich er a remesiungel?

⁶ A Jehovah a melisiich er a remesiungel el kmo ngbetik a rengul er tir er chelechang e melemolem el betik a rengul er tir el mo cherechar. Ka di molatk a uldesuir a rechad er a Israel er sel taem el Jehovah a dilu el kmo: “Ke mekreos er ngak, ele kmeskau a chetengakl, e betik a renguk er kau. Lak medakt e ak ubengkem”! (Isaia 43:4, 5) Me kid a medengei el kmo a derta er kid a mekreos er a osengel a Jehovah. * (Momes er a footnote.) A Biblia a mesaod er a telbilel el kmo: “A klisichel a meskau a klisiich er a mekemad. A RUBAK a mo dmeu a rengul er kau.”​—Sefania 3:16, 17.

7. Ngmekera bltkil a rengul a Jehovah e sebeched lomekesiu er ngii er a chedil el oltut er a ngelekel? (Momes er a siasing er a uchelel a suobel.)

 ⁷ A Jehovah a tilbir el mo melisiich e mengelaod er a rechedal er a chelsel a ngii di el mondai er a klengar er tir. Ngdilu el kmo: “Kom mo ua ngalek el loltut er ngii a delal e mengisemesem er ngii el betik a rengul er ngii. Ak mo chemolodau er a Jerusalem el ua chedil a longelaod er a ngelekel.” (Isaia 66:12, 13) Ka di molatk er a rengul a tolechoi el kmal mo mechelaod sel lechelebill er ngii a delal e loilil lobengkel! A Jehovah a kmal betik a rengul er kau e soal cho bo molechesuar a ulekerreu. Me bo lulterekokl a rengum el kmo ke kmal mekreos er osengel.​—Jeremia 31:3.

8, 9. Ngoeak a ngera el rolel e a bltkil a rengul a Jesus a melisiich er kid?

⁸ Tiakid a ta er a uchul me kede medengei el kmo a Jehovah a betik a rengul er kid: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Johanes 3:16) A olubet el tengetengel a Jesus a ochotii el kmo ngii me ngdirrek el betik a rengul er kid, e tia el bltkil a rengul a melisiich er kid. A Biblia a mesaod el kmo ngdiak a “ringel; ng oturkreng” el mo sebechel “choridid er a bltkil a rengul a Kristus.”​—Rom 8:35, 38, 39.

⁹ A lebebil er a taem, e ngar ngii a mondai er kid el mo mengitechut er a bedenged me a uldesued me a lechub e nguchul a kede oridii sel deurreng er kid el mesiou er a Jehovah. Engdi sel dolatk er a delechel a bltkil a rengul a Kristus el bedulkid, e ngsebechel meskid a klisiich el outekangel. (Monguiu er a 2 Korinth 5:14, 15.) A bltkil a rengul a Jesus a meskid a urunguled el soad el melemolem el kiei e mesiou er a Jehovah. Ngsebechel el ngosukid me ngdiak bo lemechitechut a rengud, el mo lmuut er a taem el decharm er a meklou el telemellel a beluu, me a odechelakl, me a klengiterreng, me a lechub e ngsebekreng.

10, 11. Te rua techang a ngerechelir el melisiich er a remechitechut a rengrir el rudam? Mosaod.

¹⁰ A Jehovah a dirrek lousbech er a rechad er a ongdibel el melisiich er kid loba bltkil a rengul. Me sel bo lebetik a rengud er a rudam me a rudos er kid, e kede ochotii a bltkil a rengud el mora Jehovah. Kede meruul a rokui el sebeched el ngosuterir a rudam me bo lodengei el kmo tir me te mekreos, e a Jehovah a betik a rengul er tir. (1 Johanes 4:19-21) A apostol el Paulus a milluches el kmo: “Molemolem el kasisiich a rengmiu e mkaingeseu el ua ikal blekerdeliu er chelechang.” (1 Thesalonika 5:11) Me ngdiak lebelkul a kmo te di remechuodel er a ongdibel a sebechir el meruul er tia el tekoi. A derta er kid a sebeched loukerebai er a Jehovah me a Jesus el mengelaod er a rudam me a rudos er kid.​—Monguiu er a Rom 15:1, 2.

¹¹ A rebebil el ngar er a ongdibel el mo chuarm el meringel el uldesuir me a sebekreng er tir a uchul, a locha mo kirir lousbech a ngeso er a retoktang e mo kirir el melim a kar. (Lukas 5:31) E a remechuodel er a ongdibel me a rebebil a medengei el kmo alta ngdiak a duch er tir el ua retoktang, engdi a ngelsurir me a ongelaod el loruul a kmal meklou a ultutelel. Me a rokui el ngar er a ongdibel a sebechir el ‘melisiich rar mechitechut a rengrir, e ngosuterir ar mechitechut, e oba kllourreng el bedul tir rokui.’ (1 Thesalonika 5:14, BT) Me ngsoad el melasem el mo medengei a uldesuir a rudam er kid. Me ngkired el mo oba kllourreng el bedultir, e dirrek el mengedecheduch er tir el ngar er a rolel e kede mengelaod er tir er sel taem el bo lemechitechut a rengrir. Me kau, ke melasem el melisiich er a rebebil? Ngera sebechem el meruul el rullau el mengal mo meduch el mengelaod e dirrek el melisiich?

12. Msodii a tekoi el dilubech el mora ta el chad el mlo mesisiich loeak a bltkil a rengrir a rechad er a ongdibel er ngii.

¹² A ta el odos er kid el ngar er a Europe a  kmo: “A lebebil er a taem e ngmo soak el di ngak el nguu a klengar er ngak, engdi ngar ngii a kmal ungil el rolel a ngeso el kubang. A ongdibel er ngak a kmal mla ngosukak el kirel a klengar er ngak. A rudam me a rudos er ngak a di blechoel loubltikerreng e melisiich er ngak. Alta e te di kesai a medengei el kmo ak smecher el ringelel a uldesuek a uchul, engdi a ongdibel a di blechoel el kltmokl lolengeseu er ngak. A ta el obekel a di ua demak me a delak er a klereng. Te kmal ungil lomekerreu er ngak, e di bereked er ngak el 24 el sikang er a bek el sils.” Me nguaisei, engdi ngdiak el rokui el chad a sebechir lolengeseu el uaisei. Engdi kid el rokui a kmal sebeched el meruul aike el sebeched el olengeseu er a rudam me a rudos er kid. * (Momes er a footnote.)

13. Kede mekerang e mo sebeched el ungil mengelaod er a rebebil?

¹³ Bo mungil lorrenges. (Jakobus 1:19) Kede olecholt er a bltikerreng sel dorrenges el oba klechubechub. Moker a ungil ker el sebechel ngosukau el mo ungil medengelii a uldesuel a odam er kau. Ngmo medengei el kmo ke omekerreu er ngii, luldimukl er sel lomes er a osengem el bedulngii. Me sel taem el longedecheduch, e bo leklou a rengum e bsa techellel me louchais aike el ngar er a rengul e lak morrob er a cheldechedechal. Sel bo mungil rongesii, e ngsebechem el mo ungil medengelii a uldesuel e rullii me ngmo oumerang er kau. E seikid e ngmo beot er ngii el rongesau sel molasem el ngosuir. Sel momekerreu er a rebebil, e ngrullau el mo uchul a ongelaod el mo er tir.

14. Ngera me ngdiak el kired el di omes a kngtil a tekoi?

¹⁴ Lak di momes a kngtil a tekoi. A chad el meringel a uldesuel a mengal mo meringel a uldesuel a lsekum e ngmo omdasu el kmo kede di melekoi a mekngit el kirel. Seikid e ngmo meringel er kid el ngosuir. “A lak dungil el dobedebek a tekoi e dolekoi e ng ua saider el merus, e a dungil el dobedebek a tekoi e dolekoi e ng sebechel el omekungil.” (Osisechakl 12:18) Alta e ngdiak el durengud el melirm er a rengul a chad el meringel a uldesuel, engdi ngsebeched el mo uchul a dechelel a ringel a lsekum ngdiak dekerekikl lomdasu a tekoi er a uchei er a dolekoi. Me a lsekum ngsoad el melisiich er a odam er kid, e ngkired el rullii el mo ulterekokl a rengul el kmo kede mera el melasem el mo ungil medengelii a blekeradel el lechelebangel er ngii.​—Mateus 7:12.

15. Ngera el mekreos el dongu a sebeched lousbech el mengelaod er a rechad?

¹⁵ Mousbech er a Tekingel a Dios el mengelaod er a rechad. (Monguiu er a Rom 15:4, 5.) A Biblia a mlara “Dios el uchul a kllourreng ma ducherreng,” me ngdiak lemechas a rengud a lsekum kede metik a tekoi el mengelaod er a chelsel. Ngdirrek el ngar ngii er kid a Watch Tower Publications Index me a Research Guide for Jehovah’s Witnesses. A dousbech aika el dongu, e ngmo sebeched el metik a bades me a babier el sebeched lousbech el mo mengelaod e melisiich er a rudam me a rudos er kid.

16. Ngera el blekeradel a sebechel ngosukid el mo melisiich er a chad el chuarm er a ringelel a uldasu?

¹⁶ Bo lungil e lemedemedemek a omerelliu. A Jehovah a “Chedam er a klechubechub e Dios el olengeseu a rokui el tekoi,” e dirrek el “bekokuii e kmal chubechub” el kirir a remesiungel. (Monguiu er a 2 Korinth 1:3-6; Lukas 1:78; Rom 15:13) A Paulus a kiltmeklii a ungil kerebai e le nguluukerebai er a Jehovah. Me ngmilluches el kmo: Aki “dirrek el mle medemedemek ra delongeliu,  el ua oltut el redil a lomekeroul rar ngelekel. A ki oubltikerreng el oureng er kemiu, me ngdi mle somam el meskemiu a klengar er kemam, el diak di le evangkelio ra Dios e merekong, le ngmlo betik a rengmam er kemiu.” (1 Thesalonika 2:7, 8, BT) Me sel bo lemedemedemek a omerelled el ua Jehovah, e ngmo sebeched el mengelaod er a odam el meluluuch el olengit a ongelaod!

17. Ngerang a tabesul losenged el bedul a rudam er kid el mo uchul e ngsebeched el melisiich er tir?

¹⁷ Lak mongerechir er a rudam er kau el mo cherrungel. Bo letabesul a uldesuem. A lsekum ke mengerechir er a rudam er kau el mo cherrungel e ngulterekokl el mo mekngit a rengum. (Olisechakl 7:21, 22) Ngdiak dobes el kmo a Jehovah a tabesul a osengel el kirel a tekoi el longerechir er kid el mo meruul. Tiaikid a uchul me ngkired el mo oba kllourreng er a delongeled. (Efesus 4:2, 32) Ngkmal diak lsoad el rulleterir a rudam er kid el mo omdasu el kmo aike el loruul a di olengesonges me a lechub e domekesiu er tir er a rebebil. Kede bai melisiich er tir e chemat er tir er aike el lungil tekoi el loruul. Ngoeak tiang e ngsebeched el ngosuterir el mo dmeu a rengrir sel loruul er a omesiungir el mora Jehovah.​—Galatia 6:4.

18. Ngera me ngsoad el meleketek er a rebebil loba bltikerreng?

¹⁸ A derta el mesiungel a Jehovah a kmal mekreos er a osengel Ngii me a Jesus. (Galatia 2:20) Me kid a kmal betik a rengud er a rudam me a rudos er kid a uchul, me ngkired el mo ungil a omerelled el bedultir. Me “ng kired el di blechoel el telbiil er a rengud a meruul a ikel mo uchul a budech ma olisichel a delongeled.” (Rom 14:19) Kede mera el omes el beduluchei el kirel a klengar er a Baradis, el sel taem el mo diak a ngii di el tekoi el mo uchul a chelitechetul a rengud! Ngmo diak a secher me a mekemad. A rechad a dikea lemad el belsel a klengit a uchul, e dirrek el mo diak a odechelakl, me a mondai er a telungalek, me a lechub a klengiterreng. E a uriul er a ta el telael el rak, e a rokui el chad a mo cherrungel. Me tirke el melemolem el blak a rengrir er a chelsel a ulebongel el omelsemai a mo merodel el mo ngelekel a Jehovah el ngar tia el chutem e mo “soiseb er a mededaes el klebkellir a re ngelekel a Dios.” (Rom 8:21) Mada kid el rokui, bo dolecholt er a bltikerreng el ngii a meleketek e dolengeseu er a ta me a ta er kid el mo suobel, e mo soiseb er a klebokel e beches el beluulechad er a Dios.