1. A Jesus ngmilsterir a reteua el chad er a omenged a ngera el okedong, me te milekerang?

A REDISAIPLO el Petrus, Andreas, Jakobus, me a Johanes a mla er ngii a siobai er tir er a omenged. Te locha kmal mlo mechas a rengrir er a lerengesii a okedong er a Jesus el kmo: “Me mobengkek, e ak mo rullemiu el mo mengesokes er a re chad.” * Me te milekerang? “Te di mileche ukedir e mo obengkel el merael.” (Mt. 4:18-22) Tia el lomelilt a ngildechii a klengar er tir. Te mlo diak longesokes a ngikel, te bai mlo “mengesokes er a rechad.” (Lk. 5:10) Chelecha el taem e a Jesus a melemolem er tia el lokedong el mora remelemalt a rengrir el sorir a klemerang. (Mt. 28:19, 20) Kau ke mla kongei er a okedong er a Jesus el mo mengesokes er a rechad?

2. Ngera uchul me ngkmal kired el mo ungil merriter er tia el lomelilt er kid el mo teloi er a ureor er a berkel a klumech, e ngera mo ngosukid el rullii tia el omelilt?

² Ke locha mla olengeriakl er a omesubem er a Biblia me chelechang e ngkirem el melilt el kmo, ngsoam el mo teloi er a ureor er a berkel a klumech me a lechub e ngdiak. A lsekum ke omai er a rengum el kongei er tia el okedong er a Jesus, e lak bo lemechitechut a rengum. Ke omai er a rengum e le ke medengei el kmo tiang a kmal klou a ultutelel el omelilt. Nguaisei a Biblia melekoi el kmo a Petrus me a resechelil a “di mileche” ukedir. Engdi a Petrus me a Andreas a dimlak loruul er tia el omelilt er a di mle mereched el taem. Te milsuub el mo medengelii e mo kongei er a Jesus el Mesias el betok er a elolem el buil er a uchei. (Jn. 1:35-42) Kau me ke locha mla suub a betok el kirel a Jehovah me a Jesus, e soam el melemolem el olengeriakl er a tekoi er a klereng. Me nguaisei, engdi ngdiak el kirem el rullii tia el  omelilt e lak bo mungil tirterii. Ngera ngilsuir a Petrus, Andreas, me a rebebil el mo meruul er tia el omelilt?

3. Ngera el blekeradel a mo rullau el mo soam el kongei er a okedong er a Jesus?

³ A rekot el disaiplo er a Jesus a mla er ngii a urungulir, klemedengei er tir, blekengir, me a ducherreng er tir. Aika el osisiu el blekeradel a ulterekokl el ngilsuterir el mo ungil mengesokes er a rechad. Tia el suobel a mo mesaod er a rolel e ngsebechem el mekeroul aika el blekeradel me bo mungil disaiplo er a Kristus.

4. Ngera uchul me a Petrus a mle chad er a omenged?

⁴ A Petrus a uluureor el chad er a omenged el mesiou er a telungalek er ngii, engdi tiang a dimlak di lurerel. A Petrus a kmal mle soal a tekoi er omenged. (Jn. 21:3, 9-15) Ngdirrek el milsuub el kmal mo soal mengesokes er a rechad. Me ngoeak a ngelsuil a Jehovah, e a Petrus a kmal mlo ungil er tia el ureor.​—Rel. 2:14, 41.

5. A doltirakl er a Lukas 5:8-11, e ngera uchul me a Petrus a mle medakt, e ngera sebechel ngosukid el mo mesisiich a osisiu el uldasu?

⁵ Kede omerk e le ngbetik a rengud er a Jehovah, tiaikid a ngarbab el uchul me kede meruul er tia el ureor. Me a bltkil a rengud el mora Jehovah a sebechel ngosukid el mo mesisiich er a uldasu el kmo kede metitur. A Jesus er a lomekedong er a Petrus el mo mengesokes er a rechad e ngdilu el kmo: “Lak medakt.” (Monguiu er a Lukas 5:8-11.) A Petrus a dimlak lemedakt el kmo ngngera mo duubech a lsekum ngmo disaiplo. Ngbai mle mechas a rengul er a ildisel a ngikel el kilsokes el Jesus a uchul, me ngulemdasu el kmo ngdiak el rredemel a mo oureor el obengkel a Jesus. Me ke locha dirrek el mo medakt sel molatk aike el kirem el meruul obo mta er a disaiplo er a Kristus. A leuaisei, e molisiich er a bltkil a rengum el mora Jehovah,  Jesus, me a ngar bita er kau, seikid e ngmo er ngii a urungulem el soam el kongei er a okedong er a Jesus el mo mengesokes er a rechad.​—Mt. 22:37, 39; Jn 14:15.

6. Ngera lmuut el bebil er a uchul me kede omerk er a klumech?

⁶ Molatk a lmuut el bebil er a uchul me ngar ngii a urunguled el omerk er a klumech. Ngsoad el olengesenges er a omengelechel er a Jesus el kmo: “Morael . . . e moruul er tir el mo obengkek.” (Mt. 28:19, 20) Kede dirrek el omerk er a klumech e le rechad a “suebek a rengrir e metacherbesrir” e kmal ousbech el mo medengelii a klemerang er a Renged. (Mt. 9:36) A Jehovah a soal a rokui el chad a bo lodengelii a klemerang e bo el sobel.​—1 Ti. 2:4.

7. Ngmekera Rom 10:13-15 e ochotii el kmo a ureor er a berkel a klumech a klou a ultutelel?

⁷ Sel domtab aike el meketmokl lokiu a berkel a klumech, e ngmo soad el mo meruul er tia el lureor el olsobel a klengar. Kid a diak deuai a rechad er a omenged el olterau a ngikel e dirrek el melai el mo kall e le kid a mengesokes er a rechad el olsobel a klengar er tir.​—Monguiu er a Rom 10:13-15; 1 Ti. 4:16.

8-9. Ngera kirel a chad er a omenged el medengei, e ngera uchul?

⁸ Ngar er a taem er a Jesus e a chad er a omenged er a Israel a mle kirel medengei el kmo ngera el ngikel a mle sebechel kosokes. (Lev. 11:9-12) Ngdirrek el mle kirel medengei el kmo ngar ker a ngar ngii a ngikel. A ngikel a blechoel el ngar er a basio el soal e sebechel el metik a betok el kelel er ngii. A taem el lebo er a chei a chad a dirrek el klou a ultutelel. Momtab a tekingel a ta el chad er aike el iungs er a Pacific el mora missionari el lulengemedaol er ngii el mora chei el kirel a kot el ungil taem el dongesokes a ngikel. Ngika el missionari a dilu el kmo, “Kede mo kebetech er a etiu el klok er a klukuk er a tutau.” Me a odam a dilu el kmo, “Kau a diak modengei. Kede mong er sel ungil taem er a ngikel, ngdiak el sel soad el taem.”

⁹ Me nguaisei, a redisaiplo er a Jesus el mlo mengesokes er a rechad a mlo er aike el basio el ngar ngii a rechad, el oltirakl er a taem el bo lebetik er tir. El ua tiang, a rultirakl er a Jesus a ulemerk er a templo, blil a ongdibel, obliil, me a makit. (Rel. 5:42; 17:17; 18:4) Kid me ngdirrek el kired el mo medengelterir a rechad el kiei territory er kid. Ngkired el kongei el melodech a temed me bo el sebeched el omerk er a klumech er a basio me a taem el debetik er a rechad.​—1 Ko. 9:19-23.

10. Ngera el dongu a bla leketmokl a cheldebechelel a Jehovah el kired?

¹⁰ A chad er a omenged a kirel lolab a melemalt el klekedall er a omenged e kirel meduch el ousbech. Kid me ngkired el mo ungil kltmokl el kirel a urered. Ngkired el mo meduch el lousbech a klekedelled. A Jesus a milsterir a redisaiplo er ngii a bleketakl el ulekrael el kirel a rolel a longesokes er a rechad. Nguluuchais er tir aike el kirir el olab, basio el lebo er ngii, me aike el bo lolekoi. (Mt. 10:5-7; Lk. 10:1-11) Chelecha el taem, e a cheldebechelel a Jehovah a meskid a Blil a Dongu el ngar ngii a klekedall er a chelsel el kmal oureor. * Kede dirrek el mla mosisechakl er a rolel a dousbech. Aika el osisechakl a ngosukid el mo ulterekokl a rengud e meskid a duch el mo ungil kutmeklii tia el ureor.​—2 Ti. 2:15.

11. Ngera me a remengesokes er a rechad a kirir el oba blekeu?

¹¹ A rechad el lousiobai a omenged a kirir loba blekeu. A eanged a diak lulterekokl sel lebo er a kereker. Me tir a blechoel loureor a leklebesei el diak lodengei a di le kiul mo er  ngii a ses el eolt. Me a rechad el mengesokes er a rechad me te dirrek el ousbech er a blekeu. Sel domuchel el omerk er a klumech e douchais er a rechad el kmo kede Sioning er a Jehovah, e kede locha mo chemau a ses el eolt el ua ultok er a telungalek er kid, omelenguul er a rechad el dekaodengei, me a rebebil a mo diak lekengei er a klumech. Engdi ngdiak lemechas a rengud er tia el tekoi. A Jesus a ulemeklatk el kmo a rultirakl er ngii a mo omerk er a klumech el mora rechad el omtok er tir.​—Mt. 10:16.

12. A doltirakl er a Josua 1:7-9, e ngera sebechel ngosukid el mekurulii a blekeu?

¹² Ke mekera mekurulii a blekengem? A kot e bo lulterekokl a rengum el kmo a Jesus a ngar er a eanged e melemolem el omekrael er tia el ureor. (Jn. 16:33; Och. 14:14-16) E molisiich er a klaumerang er kau er a telbilel a Jehovah el mo omekerreu er kau. (Mt. 6:32-34) Sel bo el mesisiich a klaumerang er kau e nglmuut el mo mesisiich a blekengem. A Petrus me a resechelil a ulecholt er a klou el klaumerang er a lechitii a siobai er tir e bo loltirakl er a Jesus. Me nguaisei, kau me kullecholt er a klou el klaumerang er a omouchais er a rechad el mkaodengei me a rechedal a telungalek er kau el kmo, ke mla omuchel el mesuub a Biblia lobengterir a Resioning er a Jehovah e mora miting er tir! Kulterekokl el mla remuul a meklou el omelodech er a klengar er kau me bo el sebechem el kiei el oltirakl a melemalt el llechul a Jehovah. Tia uluusbech a klaumerang me a blekeu. Me chelecha el molemolem el omekeroul er a blekeu, e ngsebechem el mo ulterekokl a rengum el kmo a “RUBAK el Dios er kau a mo  obengkem er a ikel bek el bor ngii.”​—Monguiu er a Josua 1:7-9.

13. Ngmekera omelebedebek me a nglunguuch e ngosukau el mekurulii a blekeu?

¹³ Ngera lmuut el bebil er a rolel e ngsebechem el mekurulii a blekengem? Moluluuch el mo oba blekeu. (Rel. 4:29, 31) A Jehovah a mo onger a nglunguchem e diak a ta el bo lechitau. Ngblechoel lolengeseu er kau. Ngdirrek el sebechem el melebedebek el kirel a rolel e a Jehovah a ulelsobel er a rechad er a irechar. E dirrek el molatk aike el rolel e ngilsukau el mtekangel a omelsemai e milskau a klisiich el ngodechii a blekerdelel a klengar er kau. Ngika el lulemekrael er a rechedal er a Bekerkard el Daob a mo ngosukau el mo disaiplo er a Kristus. (Exo. 14:13) Bo moba osisiu el ulterekokl el reng el luleba ta er a milluches er a psalm el dilu el kmo: “A RUBAK obengkek me ng diak bo kmedakt; ngera ng sebechir a re chad el remuul el mer ngak?”​—Psa. 118:6.

14. Ngera sebeched el suubii er a Masae me a Tomoyo?

¹⁴ A lmuut el ta er a rolel e ngsebechem el mekurulii a blekengem a okiu sel mosuub er a rolel e a Jehovah ngilsuterir a resekemerur el chad el mo oba blekeu. Ka molatk er a odos el Masae. Ngika kmal mle sekemerur me ngulemdasu el kmo ngdiak el sebechel mo omerk er a klumech. Tia el uldasu el kmo ngmo mengedecheduch er a rengodech el chad a kmal mle meringel er ngii el uai a kedidai el kboub el lulemdasu el kmo ngdiak el ngimeklii. Me ngmlo blak a rengul el omekeroul er a bltkil a rengul el mora Dios me a ngar bita er ngii. Ngmillebedebek er a orechudel el taem el dekiei er ngii me ngmilluluuch el kirel a ngeso el mo soal lomerk er a klumech. Ngmlo mesisiich er tia el dektel e mle ta el losiou el regular pioneer. A Jehovah a dirrek el sebechel ngosuterir a rebeches el publisher el mo “bekeu.” Ka molatk er a odos el Tomoyo. Sera lomuchel el oldingel a obliil, e ngike el kot el chad el blo longedecheduch er ngii a uleldiu el kmo: “Ngdiak el soak el mengedecheduch er a Resioning er a Jehovah!” e merengul el chosmerii a chesimer. A Tomoyo a dimlak bo lemedakt ngbai dilu er a sechelil el kmo: “Ke rirengesii? Ngdimlak kdu el mo ngerang e ngdongchak el ta er a Sioning er a Jehovah. Ngkmal dmeu a renguk!” A Tomoyo er chelechang a mesiou el regular pioneer.

15. Ngera ducherreng, e ngera me ngklou a ultutelel el kirir a Rekristiano?

¹⁵ A rungil chad er a omenged a oba ducherreng. A ducherreng a bla losaod er ngii el kmo “ngsel dechal a chad el sebechel kutmeklii a tekoi el kirel meketmokl.” A rechad el lousiobai a omenged a kirir el omekduch a rengrir el omkokl, e melemolem el oureor el dimerekmo bo el merek a ureor, e outekangel alta ngmo mekngit a eanged. Kid me kede ousbech er a ducherreng a lsoad el outekangel e rokir a urered.​—Mt. 10:22.

16. Ngmekera debekurulii a ducherreng?

¹⁶ Kid a dimlak di demechell e doba ducherreng. Ngbai soad el meruul a tekoi el beot er kid. Kede ousbech er a ulserechakl el reng a lsekum e ngsoad el mo oba ducherreng. Me kede ousbech a ngeso el mo meruul a tekoi el locha meringel er kid a meruul. E a Jehovah a meskid tia el ngeso lokiu a chedaol reng er ngii.​—Gal. 5:22, 23.

17. A doltirakl er a 1 Korinth 9:25-27, e ngmilekera apostol Paulus e mesaod er a rolel e ngmilekurulii a ducherreng?

¹⁷ A apostol Paulus a uleba ducherreng. Engdi ngdi mle beches el melekoi el kmo ngmle kirel el ‘melik’ er a bedengel me bo loruul a melemalt el tekoi. (Monguiu er a 1 Korinth 9:25-27.) Ngmilengelechel er a rebebil el mo oba ducherreng e mo meruul a rokui el tekoi el “ungilbesul e ulengeasek a blekerdelel.” (1 Ko.  14:40) Me ngkired el mo meduch a rengud el mesiou er a Jehovah, e tia uldimukl er a bo deblechoel el teloi er a ureor er a berkel me a osisecheklel a ungil chais.​—Rel. 2:46.

18. Ngera rullii a Jehovah me ngomes er kid el ungil mengetmokl er a ureor?

¹⁸ A chad el lousiobai a omenged a omes er a urerel el ungil lokiu a ildisel a cheldil. Engdi kid a kuk ngodech e le urered a diak el bo el ungil lokiu a ildisir a rechad el dolengeseu er tir el mei er a cheldebechelel a Dios. (Lk. 8:11-15) A Jehovah a omes er kid el ungil mengetmokl er tia el ureor a lsekum kede melemolem el outekangel el omerk er a ungil chais e olisechakl er a rechad. E ngera uchul? E le kid el olengesenges er ngii me a Ngelekel.​—Mk. 13:10; Rel. 5:28, 29.

19-20. Ngera ileakl el uchul me ngkired el omerk er a klumech er chelechang?

¹⁹ Ngar er a bebil er a beluu, e ngar ngii a telutk el temel a debo er a chei. Me sel lolekeda ulebengelel tia el taem e a chad er a omenged a mo melechesuar el kmo ngkmal orechudel el bo longesokes. Kid el mengesokes er a rechad a ngar ngii a lmuut el ta er a uchul me kede omerk er a klumech er chelechang: A ulebengelel tia el blekeradel a kmal kmedang! Ngkmal mla mo kedeb a taem el medechel el bo deteloi er tia el ureor er osobel. Me lak mongiil er a ungil el taem el mo teloi er tia el kmal klou a ultutelel el lureor.​—Oli. 11:4.

²⁰ Chelechang e ngtaem el msisichii a urungulem, e mkilungii a klemedengei er kau er a Biblia, e mokurulii a blekengem me a ducherreng er kau. Bo mobengterir a rebetok er a eai el miliol el tir a mengesokes er a rechad, e bo molechesuar er a deurreng er a Jehovah. (Neh. 8:10) Mrellii er a rengum el mo teloi er tia el ureor e mesa el mora orokiolel. A ongingil el suobel a mo mesaod a edei el rolel e ngsebeched el smisichii a rengud el mo melemolem el teloi er tia el ureor er a berkel a klumech er a Renged el mengesokes er a rechad.