1-2. A doltirakl er a 1 Timothy 6:20, BT, e ngera mloterekokl er a Timothy?

KEDE blechoel lolterekokl a mekreos el klokled er a rebebil. El ua tiang, kede locha melecha ududed er a bank. Me sel de llecha er a bank, e kede mengerechir er tir el mo kutmokl me ngdiak leriid me a lechub e lemerechorech. Me kede medengelii a belkul a dolterekokl a mekreos el klokled er a ta er a chad.

² Monguiu er a 1 Timothy 6:20, BT. * A apostol Paulus a ulemeklatk er a Timothy el kmo ngmloterekokl er a kmal mekreos el tekoi el ngii a melemalt el klemedengei er a moktek er a Dios el kirir a rechad. Ngdirrek el mloterekokl er ngii a techall el “momerk a tikingel a Dios” e ‘meruul a urerel chomerk ra evangkelio.’ (2 Ti. 4:2, 5, BT) Me a Paulus a milengelechel er a Timothy el mo mengkar aike el mloterekokl er ngii. Kid a ua Timothy el mla moterekokl er kid a mekreos el tekoi. Ngngera aika el tekoi? E ngera me ngkired el mengkar er tia el ileakl el techall el bla lebeskid a Jehovah?

3-4. Ngera bebil er a uchul me a klemerang er a Biblia a mekreos?

³ A Jehovah a mla ngiltid el mo nguu a melemalt el klemedengei er a mekreos el klemerang el ngar er a Tekingel el Biblia. Aika el klemerang er a Biblia a mekreos e le ngosisecheklid er a rolel a bo lungil a deleuill er kid me a Jehovah e smodii a mo uchul a mera el deurreng er a klengar. Me sel dekengei aika el klemerang e bo dekiei el oltirakl, e kede mengubet er a klsibai er a klsuul losisechakl me a mekngit lomeruul.​—1 Ko. 6:9-11.

⁴ A lmuut el ta er a uchul me ngmekreos, a Jehovah a di ocholt a klemerang el ngar er a Tekingel el mora rengariou a rengrir el tir  a “rredemelel.” (Rel. 13:48, NW) Chouaitirka el chad a kongei el oltirakl er ngike el lousbech er ngii a Jehovah el oltobed aika el klemerang. (Mt. 11:25; 24:45) Ngdiak el sebeched el di kid e mo medengei aika el klemerang, e diak a ngii di el tekoi el mo mekreos el uai ngii.​—Osi. 3:13, 15.

5. Ngera dirrek el bla loterekeklii er kid a Jehovah?

⁵ A Jehovah a dirrek el mla olterekokl er kid er a techall el mo olisechakl er a rebebil er a klemerang el kirel me a moktek er ngii. (Mt. 24:14) A klumech el domerk er ngii a kmal diak a mo mekesiur e le ngosuterir a rechad el mo chedal a telungalek er a Jehovah e mesterir a techellir el nguu a diak a ulebengelel el klengar. (1 Ti. 4:16) Me alta kede rullii a klou me a lechub e ngkekerei, engdi kede olengeseu er sel kot el klou a ultutelel el ureor el meketmeklang er chelecha el taem. (1 Ti. 2:3, 4) Tia mera el ileakl el techall el dobang el oureor el kldemel a Dios!​—1 Ko. 3:9.

6. Ngera dilubech el mora rebebil el dimlak lolemolem el klekar?

⁶ Sera taem er a Timothy, e a rebebil er a Rekristiano a dimlak longreos er a techall el lulebang el oureor el kldemel a Dios. A Demas a kmal mle betik a rengul er a beluulechad, me ngchilitii a techellel el mesiou el obengkel a Paulus. (2 Ti. 4:10) A Figelus me a Hermogenes a locha chilitii a omesiungir e le te mle medakt el mo chuarm a osisiu el odechelakl el mlora Paulus. (2 Ti. 1:15) A Himeneus, Alexander, me a Filetus a mlo omtok a mera el osisechakl e mlo diak loltirakl er a klemerang. (1 Ti. 1:19, 20; 2 Ti. 2:16-18) Tirka el rokui a mle mesisiich er a klemerang er a ta el taem engdi te mlo diak lutebengii el kmo ngera el tekoi a lmuut el mekreos.

7. Ngera el omeasem a lousbech a Satan el mengitechut er kid?

⁷ Ngmekera Satan e melasem el meruul er kid me dechoit aike el bla loterekokl er kid a Jehovah? Ka momtab a bebil er a omeasem el lousbech. Ngousbech a tekoi er a ongelaod me a media el melisiich a blekeradel, uldasu, me a teletael el meruul er kid el mo diak durrekodel er a klemerang. Ngmelasem el omekdakt er kid el oeak a orimel me a lechub e ngodechelakl me ngmo diak domerk er a klumech. Ngdirrek el melasem el mengesuseu er kid el mo orrenges aike “lomngakl el kmo klemedengei, e alechub e ngklsuul” el osisecheklir a rumtok me dechitii a klemerang.​—1 Ti. 6:20, BT, 21.

8. Ngera ke suubii er a experience er a odam el Daniel?

⁸ A lak dekerekikl e ngsebeched el oberius el mo cheroid er a klemerang. Ka molatk er a experience er a Daniel, * el ngii a kmal mle soal lousekool a video game. Ngmelekoi el kmo: “Ak ulemuchel el ousekool a video game er sera lebekord el teruich a rekik. Sera uchelel, e a  kuluusekool a game el dimlak a telemellel. Engdi omerolel a taem, e ak mlo ousekool a game el chelsechusem er a koadelchad me a remekngit el anghel.” Me a cherengel a taem e ngika mlo mengoit a bekord el 15 el sikang er a bek el sils el ousekool a video game. Ngdmu el kmo: “Ak mle medengei el kmo aike el game el kuluusekool me a taem el kulengoit er ngii a mirruul er ngak el mo cheroid er a Jehovah. Engdi ngkmal mlo medecherecher a renguk me ak ulemdasu el kmo a omellach er a Biblia a dimlak lolutk er ngak.” Me a lak dekerekikl, e a tekoi er a ongelaod a sebechel mekekokil el choridid er a klemerang. E sel bo el uaisei, e kede locha mo oriid aika el mekreos el tekoi el bla loterekokl er kid a Jehovah.

9. A doltirakl er a 1 Timothy 1:18, 19, e a Paulus ngulemekesiu er a Timothy el mo er techang?

⁹ Monguiu er a 1 Timothy 1:18, 19. A Paulus a ulemekesiu er a Timothy el mora soldau e milengelechel er ngii el mo “bekeu el oldechelakl a mekngit.” Tia dimlak lemera el klaumekemad e ngbai mle klaumekemad er a klereng. Ngoeak a ngera el rolel e a Rekristiano a di ua resoldau el ngar er a mekemad? E kid el soldau er a Kristus, ngera el blekeradel a kired el omekeroul? Ka me bo dosaod a eim el tekoi el sebeched el suub er a okesiu er a Paulus. Aika el tekoi a sebechel ngosukid el mo urrekodel er a klemerang.

10. Ngera omeluu er a Dios, e ngera me kede ousbech er ngii?

¹⁰ Mokurulii a omeluu er a Dios. A ungil soldau a blak a rengul. Ngmeringel el oureor el mo omekerreu er a betik er a rengul me a lechub e ngtekoi el lomes er ngii el mekreos. A Paulus a millisiich er a Timothy el mo mekurulii a omeluu er a Dios, el ngii a cherrungel el blakerreng el mora Dios. (1 Ti. 4:7, BT) Sel lorael el mo dmolech a bltkil a rengud me a omeluu er kid el mora Dios, e ngmengal mo soad el urrekodel er a klemerang.​—1 Ti. 4:8-10, BT; 6:6, BT.

11. Ngera me ngkired el omekduch a rengud?

¹¹ Mukdechar a rengum el mo meruul a llemalt. A soldau a kirel mekdechar a rengul a lsekum ngsoal melemolem el di kltmokl el kirel a mekemad. A Timothy a millemolem el mesisiich er a klereng e le nguleltirakl er a mlukreng el uleklatk er a Paulus el mo mengeroid er ngii er a ngibeserreng, e mo omekeroul a ungil blekeradel, e mo obengterir a rekldemel er a klaumerang. (2 Ti. 2:22) Tia uluusbech er ngii el omekduch er a rengul. Me kid a kired el omekduch a rengud a lsoad el mo mesisiich a mekngit el ngelbesel a rengud. (Rom 7:21-25) Me a lmuut kung, ngkired el omekduch a rengud me bo el sebeched el medebedii el choitii ngike el mechut el chad e mo oubail er ngike el beches. (Efe. 4:22, 24) E sel bo demerek el oureor el ta el sils, e nglocha kired el mekdechar a rengud e mora miting.​—Heb. 10:24, 25.

12. Ngoeak a ngera el rolel e ngsebeched el mekurulii a duch er kid lousbech er a Biblia?

¹² A soldau a kirel el mesuub lousbech a klekedellel er a mekemad. E a lsoal el mo meduch lousbech, e ngkirel blechoel el mesuub lousbech. Ngdi osisiu, kid me ngkired el mo meduch lousbech er a Tekingel a Dios. (2 Ti. 2:15) Ngsebeched el mesuub el mo meduch el ngar er aike el miting er kid. Engdi a lsoad el ngosuterir a rechad el mo medengei el kmo a klemerang er a Biblia a sebechel el ngosuterir, e ngkired el blechoel el mesuub er ngii. Ngkired el ousbech er a Tekingel a Dios el melisiich er a klaumerang er kid. Me ngdiak di donguiu er a Biblia. Ngkired el melebedebek aike el donguiu e ousbech aike el babilenged el meruul a research me bo el sebechel mo melemalt a klemedengei er kid me a usbeched er a Bades.  (1 Ti. 4:13-15) Seikid e ngmo sebeched el ousbech er a Tekingel a Dios el osisecheklterir a rechad. Nguaisei, ngdiak di donguiu a bades el mora rechad. Ngsoad el ngosuterir el mo medengelii a bades me a rolel e ngsebechir loltaut er ngii. Me sel deblechoel el mesuub er a Biblia, e ngmo sebeched el mekurulii a duch er kid el olisechakl er a rechad er a mlukreng el Tekingel a Dios.​—2 Ti. 3:16, 17.

13. A doltirakl er a Hebru 5:14, e ngera uchul me ngkired el mo ungil lomtab a tekoi?

¹³ Bo mungil lomtab a tekoi. A soldau a kirel el omtab aike el sebechel mo uchul a tellemall e oibngii er ngii. Kid a dirrek el kired el mesuub el mo omtab a blekeradel el sebechel tomellid e mo oibngid er ngii. (Osi. 22:3; monguiu er a Hebru 5:14.) El ua tiang, ngkired el mo ungil melilt a tekoi er a ongelaod. Aike el show er a TV me a mubi a blechoel el olecholt a mekngit el omeruul. E a chouaika el omeruul a kingtir a rengul a Dios e dirrek el mo uchul a tellemall. Me a uchul me kede olechib er kid er a tekoi er a ongelaod el sebechel mekokil choitechetur a bltkil a rengud el mora Dios.​—Efe. 5:5, 6.

14. Ngmilekera sekutaberreng e ngosuir a Daniel?

¹⁴ A Daniel el dulsaod er ngii er a uchei, a mlo mtebengii el kmo ngar ngii a telemellel a lousekool a game el chelsechusem er a koadelchad me a remekngit el anghel. Me ngmirruul a research el ngar er a Watchtower Library el mo ngosuir el kirel tia el mondai. Tiang ngera ngrirellii? Ngmlo diak lousekool aika el mekngit el game. E mle stob a subscription er ngii er aika el game e mlo diak lousekool el online lobengterir a rebebil er a rechad. Ngmelekoi el kmo, “Ak ulemuchel el meruul a tekoi er rikl me a lechub e ak kubengterir a rudam me a rudos er a ongdibel er a bai kuusekool a video game.” Chelecha el taem e a Daniel a mesiou el pioneer e ta er a remechuodel.

15. Ngera me a klsuul cheldecheduch a kengaol?

¹⁵ Ngdirrek el kired el mo ua Timothy el miltebengii a telemellel aike el klsuul tekoi el lomerk a rumtok a mera el osisechakl. (1 Ti. 4:1, 7; 2 Ti. 2:16) El ua tiang, te locha mo melasem el omerk a klsuul cheldecheduch el kirir a rudam me a lechub e te rullid el mo oumededenger er a cheldebechelel a Jehovah. Chouaika el klsuul el tekoi a sebechel choitechetur a klaumerang er kid. Ngkmal kired el mengeroid er kid me ngdiak demecheblad. E ngera uchul? E le chouaika el cheldecheduch a lomerk a “re chad el milkolk a rengrir, e diak lodengelii a klemerang.” (1 Ti. 6:4, 5) Ngsorir  a bo doumerang aika el blulekngir e bo lak doumerang er a rudam er kid.

16. Ngera el mengesang el tekoi a kired el choridid er ngii?

¹⁶ Mongeroid er kau er a mengesang el tekoi. A Timothy el “ungil soldau er a Kristus Jesus” a mle kirel ultaut a osengel er a omesiungel er a bai bo lemechesang er a tekoi er a kerruul me a lechub e ngkuk bebil er a turrekong er a klengar er ngii. (2 Ti. 2:3, 4) Me kid a di ua Timothy el diak el kired el mo mechesang e le ngsoad a betok el tekoi er a kerruul. A “ngibes er a kerruul” a sebechel rullid me ke doridii a bltkil a rengud el mora Jehovah, omereng el saul er kid el kirel a Tekingel, me a urunguled el soad el ouchais er ngii el mora rebebil. (Mt. 13:22) Ngkired el melemolem el lomekbeot er a klengar er kid e ousbech a temed me a klisiched el “momuchel losiik ra rengedel a Dios.”​—Mt. 6:22-25, 33, BT.

17-18. Ngera sebeched el meruul er ngii me doibngid er a tellemall?

¹⁷ Bo mkltmokl el di mereched el sobechakl a tekoi. A soldau a kirel di uchei e ngmelib aike el bo loruul. Me a lsekum e kede mo omekerreu aika el mla moterekokl er kid er a Jehovah, e ngkired el di mereched el mo sobechakl sel deues aike el sebechel mo uchul a tellemall. Me ngera sebechel ngosukid el mo meruul er tiang? Ngkired el di uchei e melib aike el bo doruul.

¹⁸ Ngsebeched el omekesiu er ngii el uai tiang, sel ngar ngii a klou el kldibel e te blechoel el melekoi er a rechad me lesikii a exit el kot el kmeed er tir. E ngera uchul? Me sel leduubech a emergency e ngsebechir el di mereched el tuobed er tia el basio. Me ngdi osisiu, ngsebeched el practice er a uchei el kmo kede mo mekerang a lsekum a deleboes el omeruul, merserasech el blekeradel, me a lechub a rumtok a mera el osisechakl a di kiul me chemolt er a TV me a lechub e ng Internet. A lsekum e kede kutmeklid el kirel aike el sebechel mo duubech, e ngsebeched el di mereched el mo sobecheklii a deleuill er kid me a Jehovah e melemolem el klikiid er osengel.​—Psa. 101:3; 1 Ti. 4:12.

19. Ngera el klengeltengat a bo dengai e le kid el mengkar aika el mla moterekokl er kid?

¹⁹ Ngkired el mengkar aika el mekreos el tekoi el Jehovah mla oterekokl er kid, el klemerang er a Biblia me a techall el olisechakl er a rechad el kirel. Sel doruul uaisei, e ngmo klikiid a ukltked, mo er ngii a belkul a klengar er kid, e mo dmeu a rengud e le kede olisechakl er a rechad el mo medengelii a Jehovah. Ngokiu a ngelseuil, e ngmo sebeched el mengkar aika el mla moterekokl er kid.​—1 Ti. 6:12, 19.