A lsekum e tiang a klemerang, e ka di molatk er a telemellel er a klengar er kid. El ua tiang, a ngelekel a odam er kid el sechal a di mle ngii el nguu a klengar er ngii. Me ngkmal mlo mekngit a rengul a demal. E mlo omdasu el kmo a Jehovah a ulemes el kirel a ngar medal el klebesei, e tibir el kmo ngii me a bechil a sebechir el loutekangel er tia el chelebuul. Ngar tia el beluulechad er chelechang e a rebetok er kid a mo chelebangel a ringel. Me tiang belkul a kmo, ngkired el oumerang el kmo a Jehovah a omtebechel a rokui el tekoi el duubech er a klengar er kid?

Sel dorriter er a bades er a 1 Korinth 10:13, e kede mo mesang el kmo a Biblia a diak lolisiich er a uldasu el kmo, a Jehovah a medengei a rokui el tekoi el mo duubech er a ngar medad el sebeched loutekangel, e ngii a dirrek el mo melilt a ringel el bo dechelebangel. Ngera me ngsebeched el melekoi el uaisei? Me bo dosaod a eua el uchul.

A kot, e a Jehovah a milsterir a rechad a ilmeklir el melilt a tekoi el bo loruul. Ngsoal a di lekid el melilt a tekoi el doruul. (Duteronomi 30:19, 20; Josua 24:15) A lsekum e kede melilt el mo meruul a tekoi lodeuir a rengul a Jehovah, e kede kongei er ngii me ngomekrael er kid. (Osisechakl 16:9) Engdi a lsekum e ngmo mekngit a omelilt el doruul, e ngmo kired el kiei el chuarm er a telemellel. (Galatia 6:7) Me a lsekum a Jehovah a ngike el melilt a ringel el bo dechelebangel, e a ker a kmo kid ngmera el ngar er ngii a ilmekled el melilt a tekoi el bo doruul?

A ongerung, a Jehovah a diak lomekerreu er kid el ua lolekoi a bades el kmo “a taem ma techall” a mo er a rechad el rokui. (Olisechakl 9:11) A chad a sebechel el mo accident e le ngmla er a basio er a mekngit el taem. A Jesus a milsaod el kirel a accident el dilubech el mlo uchul a kodellir a re 18 el chad er a lemuukel a turm el otelecheterir. Ngkmal mle bleketakl a tekingel el kmo, a Dios a dimlak luchul a kodellir. (Lukas 13:1-5) Me ngkmal diak lemelemalt a bo domdasu el kmo, a uchei er a leduubech a accident e a Dios a mla ngiltii el kmo, te rua techang a mo mad e rua techang a diak.

A ongedei, e a derta er kid a kmal kirel el melemolem el blak a rengul el mo er a Jehovah. A Satan a melekoi el kmo a remesiungel a Jehovah a mesiou er Ngii, e le Ngii lomesterir aike el lousbech. A Satan a dirrek el dilu el kmo, ngmo diak leblak a rengud el mo er a Jehovah sel bo dechelebangel a ringel er a klengar. (Job 1:9-11; 2:4; Ocholt 12:10) Me a lsekum a Jehovah a mo omekerreu er kid er a bebil el ringel er a klengar, e ngmo ua dedu el kmo ngmera el tekoi a tekingel a Satan.

A ongeuang, a Jehovah a diak lolilt el mo medengei a rokui el tekoi el mo duubech er a klengar er kid er a ngar medad. Me nguaisei, engdi a Jehovah a sebechel el mo medengei a tekoi el mo duubech a lsekum ngsoal. (Isaia 46:10) Engdi a Biblia a ochotii el kmo, ngdiak lolilt el mo medengei a rokui el tekoi er a ngar medad el klebesei. (Genesis 18:20, 21; 22:12) A Jehovah a kmal betik a rengul e melemalt el Dios, me ngdiak bo lolemall er sel ilmekled el melilt a tekoi el bla lebeskid.​—Duteronomi 32:4; 2 Korinth 3:17.

Me ngera mle belkul a tekingel a Paulus er a ledu el kmo, a Jehovah a “diak le bechikemiu me bor ongarm el mo engelakl er a klisichiu”? Ngar tia el tekingel e ngmilsaod a tekoi el loruul a Jehovah er sel taem el dechelebangel er a ringel, el diak el uchei er a lemei a ringel. * (Momes er a footnote.) Me a lsekum kede mo ultuil a klaumerang er kid er a Jehovah, e ngmo ngosukid el loutekangel a ngii di el ringel er a klengar er kid. (Psalm 55:22) Me chelechang e kede mo mesaod a eru el uchul me a Paulus a dilu el uaisei.

A kot el uchul a kmo, “ng dirkak a ongarm el mla mer kemiu el dirkak le bor a ngii di le chad.” Me a lsekum kede melemolem el kiei er tia el beluulechad er a  Satan, e kede rokui el mo chuarm a meringel el tekoi, me a lechub e ngmeklou el telemall. Engdi a lsekum kede mo ultuil er a Jehovah el kirel a ngeso, e ngmo sebeched el loutekangel aika el ringel e melemolem el blak a rengud. (1 Petrus 5:8, 9) Ngar er a uchelel a bades er a 1 Korinth er a 10 el klou el bliongel, e a Paulus a milluches el kirel a bebil el ringel el millasem a klaumerang er a rechad er a Israel er a lengar er a belngel a ked. (1 Korinth 10:6-11) Me tirke el rokui el mlo ultuil er a Jehovah el kirel a ngeso a mlo sebechir loutekangel aike el ringel. Engdi te ngar er ngii a rebebil er tirka el chad er a Israel el mlo diak lolengesenges er a Jehovah. Me ngmlo diak leblak a rengrir el mo er ngii, e le tir el dimlak lultuil er ngii el kirel a ngeso.

A ongeru el uchul a kmo, a Dios a “blak a rengul.” E tia ngera belkul? Sel domtab er a rolel e a Jehovah a omekerreu er a remesiungel er a cherengel a taem, e kede mo medengei el kmo ngkmal blak a rengul el olengeseu er “tirkel betik a rengrir er ngii e olengesenges a llechul.” (Duteronomi 7:9) Kede dirrek el suubii el kmo, a Jehovah a di blechoel el oltaut a telbilel. (Josua 23:14) Me ngulterekokl a rengud el kmo, a (1) a Jehovah a kmal diak el bechei a ngii di el ringel el mei er kid, me lesal mo meringel el mo diak lsebeched loutekangel er ngii, e a (2) ngmo meskid a rolel e kede tuobed er ngii.

Ngmekerang a Jehovah e ‘mesterir a rolel e te tuobed er ngii’ tirke el mera el ultuil er ngii? Nguaisei, a Jehovah a sebechel el choroid a ringel. Engdi lak dobes er a tekingel a Paulus el kmo, a Jehovah a mo meskid a rolel e ngsebeched el mtekengelii. Me a Jehovah a blechoel el meskid a rolel e kede tuobed er ngii, el loeak sel lolisiich er kid me bo el sebeched el blak a rengud. Me bo dosaod a bebil el rolel a loruul er tiang.

• A Jehovah a “olengeseu er kid er a rokui el chelebuled.” (2 Korinth 1:3, 4) Ngsebechel el mengellakl a uldesued me a rengud me a kngtil a rengud el loeak a Biblia, me a chedaol reng er ngii, me a dirrek el blak a rengul mesiou.​—Mateus 24:45; Johanes 14:16, Rom 15:4.

• A Jehovah a ousbech er a chedaol reng er ngii el lomekrael er kid. (Johanes 14:26) A chedaol reng a sebechel el olengeseu er kid, me ngdiak dobes a suobel me a omellach er a Biblia me bo el sebeched el meruul a ungil omelilt.

• A Jehovah a sebechel el ousbech er a rechanghel er ngii el olengeseu er kid.​—Hebru 1:14.

• A Jehovah a sebechel el ousbech er a rudam me a rudos el olengeseu er kid. Ngsebechir el melisiich er kid el loeak aike el lolekoi me aike el loruul.​—Kolose 4:11.

Me ngera kede mla suubii er a tekingel a Paulus el ngar er a 1 Korinth 10:13? A Jehovah a diak lolilt a ongarm el bo dechelebangel. Engdi ngsebeched el mo ulterekokl a rengud el kmo a lsekum kede ultuil er Ngii, e ngmo sebeched el outekangel a ngii di el ongarm. Kede medengei el kmo a Jehovah a di blechoel el meskid a rolel, e ngmo sebeched el melemolem el blak a rengud el mo er ngii.