A irechar, e kede ulemdasu el kmo nguaisei e le ngtekoi el medung er a Hebru 12:16 a uchul. Ngar tiang e ngmelekoi el kmo a Esau a “dimlak longull er a Dios” e ngbai “di mle kirel a teleblengur e ng oterur a llemeltel el kot el ngalek” el mora Jakob. Me kede ulemdasu el kmo a Jakob er a lenguu a “llemeltel a kot el ngalek,” e aikang a mle uldimukl er a bo el uldidellel a rsechel a Mesias.​—Mateus 1:2, 16; Lukas 3:23, 34.

Me nguaisei engdi a bo dungil merriter aike el bebil el cheldecheduch er a Biblia e ngochotii el kmo, a chad a diak el kirel el mo kot el ngalek me bo el sebechel el mo uldidellel a rsechel a Mesias. Me bo dosaod a bebil er aika el cheldecheduch.

A kot el ngelekel a Jakob me a Lea el sechal a Ruben, e a kot el ngelekel a Jakob me a Rahel el sechal a Josef. A Ruben er a lebo er a deleboes, e nguridii a llemeltel el kot el ngalek, e aika el klisiich a mlo er a Josef. (Genesis 29:31-35; 30:22-25; 35:22-26; 49:22-26; 1 Kronika 5:1, 2) Me nguaisei engdi Mesias a dimlak lokiu a Ruben me a lechub a Josef. E ngbai ulekiu a ngelekel a Jakob me a Lea el Juda, el ngii a ongeua el ngalek.​—Genesis 49:10.

A Lukas 3:32 a kuk mesaod er a reteim er a ruldidellel a rsechel a Mesias, e a derta er tir a locha mle kot el ngalek. El ua tiang, a Boas a mle demal a Obed, e a Obed a mle demal a Jesse.​—Ruth 4:17, 20-22; 1 Kronika 2:10-12.

A David el ngelekel a Jesse a dimlak lekot el ngalek, e ngbai mle ulebongel er a reteai el ngalek el sechal. Me nguaisei, engdi Mesias a ulekiu  a David. (1 Samuel 16:10, 11; 17:12; Mateus 1:5, 6) A ongingil el uldidellel a rsechel a Mesias a mle Salomon, alta ngdimlak leketengel a David.​—2 Samuel 3:2-5.

Me tia diak lebelkul a kmo a kot el ngalek el sechal a diak a ultutelel. Ngbai ngar ngii a techellel el ngmai a klengeltengat el diak el sebechir a rebebil el ngalek el sechal el ngmai. E ngii a blechoel el mo ongingil el bdelul a telungalek, e dirrek el mo eru el chachisois a dikesel.​—Genesis 43:33; Duteronomi 21:17; Josua 17:1.

Engdi a llemeltel a kot el ngalek a sebechel mora ta er a ngalek el sechal er a telungalek. Sel taem el Abraham a silmesmechii a Ismael me lorael, e a llemeltel a kot el ngalek a mloiuid el mora Isak. (Genesis 21:14-21; 22:2) Me ngua dulsaod er a uchei, a llemeltel a Ruben el kot el ngalek a mloiuid el mora Josef.

Me ngera mle belkul a tekingel a apostol el Paulus el ngar er a Hebru 12:16? Ngdmu el kmo: “Lak bor a deleboes ma lechub e bo mua Esau el dimlak longull er a Dios, me ng di mle kirel a teleblengur e ng oterur a llemeltel el kot el ngalek.”

Me a Paulus a dimlak losaod el kirir a ruldidellel a rsechel a Mesias e ngbai milengelechel er a Rekristiano er a ledu el kmo: “Muklemalt a roliu” me “lak a choitii a krasia er a Dios.” Engdi tia sebechel mo duubech a lsekum te mora deleboes lomeruul. (Hebru 12:12-16) Seikid e te mo ua Esau el ngii a “dimlak longull er a Dios,” e bai di mle soal el melemolem er a rengul.

Me a doltirakl a siukang er sel taem, e a Esau a locha mla er ngii a techellel el mo oldars a tenget el mora Jehovah. (Genesis 8:20, 21; 12:7, 8; Job 1:4, 5) Engdi ngdi millemolem er a ngelbesel a rengul el uchul me ngulterur a llemeltel a kot el ngalek el kirel a bekerkard el sub. Nglocha mle soal loliub er ngii er a ringel el Jehovah a ulemlaoch el kmo te mo chuarm er ngii a ruldidellel a rsechel a Abraham. (Genesis 15:13) Ngdirrek lulechotii el kmo ngdimlak longull a llechul a Jehovah er sera bo lebecherir a reteru el redil el milengull a klsuul chelid, el ngii a tekoi el kmal millemall er a rengul a demal me a delal. (Genesis 26:34, 35) Me ngkmal mle ngodech a blekerdelel er a Jakob, el ngii a tilbir el mo bechil a redil el milengull er a mera el Dios!​—Genesis 28:6, 7; 29:10-12, 18.

Me aika el cheldecheduch er a Biblia, ngosisecheklid er a ngerang el kirir a ruldidellel a rsechel a Mesias? A rebebil er tir a mle kot el ngalek, e a rebebil a dimlak. A rechad er a Judea a mle ungil medengelii tiang e dirrek el kilengei er ngii. Kede mekerang e medengei? E le te kilengei el kmo a Kristus a mlei lokiu a klengelakel er a David, el ngii a kot el ulebongel el ngelekel a Jesse el sechal.​—Mateus 22:42.