Tia El Omengkar Er Kid A Kmal Mla Mo Orechudel

“Misei e mongkar, e ngdiak modengei el kmo a Rubak er kemiu ngmei er choingeral sils.”​​—⁠MATTEUS 24:⁠42.

“A NGAR er a uchei er a rokui el tekoi, e a twentieth century a chillebangel a betok el mekemad,” a lolekoi a chad er a omeluches el Bill Emmott. Altang kongei el kmo a bek el taem er a reksi er a klechad e a rechad a milechesuar a berredel a mekemad ma kdekudel el omeruul, engdi ngdochelir el kmo: “A twentieth century a dimlak lekakerous er aike el mereko el betok el dart el rak, e ngbai a mle kakerous er ngii a klungel a telemall. Tiakid a sel mle kot el dart el rak el mla er ngii a mekemad er ngii el luluuldimukl er a beluulechad el rokir . . . E dirrek, ma sel tekoi el ko er a tiang a kmo, ngdimlak di blel chimo el mekemad er a beluulechad el rokir, e ngbai mle teblong.”

² Aike el mekemad el uchul e ng mlo “kautok ar beluu mar beluu, ma renged ma renged” a lulemlaoch er ngii a Jesus Kristus. Engdi, aikang a di mle ta er aike el ‘olangch a morngii sel lemei a Kristus, ma ullebongel ra taem ra beluulechad.’ Ngar er tia el klou el ulaoch, e a Jesus a dirrek el melsaod el kirel a klengerenger, ma rakt, ma desiu. (Matteus 24:​3, 7, 8; Lukas 21:​6, 7, 10, 11) Ngar er a betok el rolel, e a choua ika el telemall a mlechisois a klungel ma klisichel. A kngtil a chad a kmal betok, el desang er a blekerdelel el mo er a Dios ma rechad. A telemellel a tekoi er a kldung ma obdisel a delengerenger ma kdekudel el omeruul a mochotang. A rechad a mla mo betik a rengrir er a udoud er a bai lebetik a rengrir er a Dios, e oltoir er a tametereng. Aika el rokui a olecholt el kmo kede kiei er a “blsechel a ringel.”​—⁠2 Timoteus 3:​1-5.

³ Ngua ngerang a osengem el kirel aike el di merael el mo mekngit el blekeradel er a klengar er a klechad? A rebetok a kora diak lolatk er ngii, e medecherecher a rengrir, el kirel aike el meringel el blekeradel er a chelecha el sils. Me tirke el ngar er a bab a deruchellir ma remellomes a rengrir el chad er tia el beluulechad a diak lodengelii a belkul a “cholangch ra taem”; ma remengeteklel a klechelid a dirrek el dimlak lemelemalt el omekrael er a rechad el kirel tia el tekoi. (Matteus 16:​1-3) Engdi Jesus a milengelechel er a rulebengkel el kmo: “Misei e mongkar, e ngdiak modengei el kmo a Rubak er kemiu ngmei er choingeral sils.” (Matteus 24:42) A Jesus a melisiich er kid el diak di domes e lemerekong e ngbai “mongkar.” A bo dongkar, e ngkired el blechoel el kerekikl. Tiang a lmuut el klou er a di dodengei el kmo kede kiei er a uriul el sils, e lmuut el klou er a di dodengei el kmo ngmeringel a blekeradel. Ng kmal kirel el mo ulterekokl a rengud el kmo “a ullebongel ra rokuil tekoi a kmedang.” (1 Petrus 4:⁠7) Sel lebo leuaisei e a omengkar er kid a mo orechudel. Me nguaisei, a ker el kired el melatk er ngii a kmo: ‘Ngerang a mo ngosukid el melisiich a uldesued er a kmo a ullebongel a kmedang?’

⁴ Ka di molatk er a blekerdelel a beluulechad er sel taem er a uchei er a leduubech a ileakl el tekoi er a reksi er a klechad​—⁠sel klou el Ieleb er a sils er a Noah. Ngkmal mle mekngit a blekerdelir a rechad misei e a Jehovah a ngmle “mekngte rengul”. Ngdilu el kmo: “Ak mo okngemedeterir a rokuil chad el kulemeob er tir ra ikel bek el lengar ngii.” (Genesis 6:​6, 7) E ngii a mirruul el uaisei. Ma longaisisiu er aike el tekoi el dilubech er a taem er a Noah ma chelecha el taem er kid, e a Jesus a dilu el kmo: “Le be ldum a Ngelekel a chad e ngua sel taem ra Noah.”​—⁠Matteus 24:⁠37.

⁵ Ngsebeched el omdasu el kmo ngdi osisiu a uldesuel a Jehovah el kirel a beluulechad er a chelecha el taem el di ua sel luldesuel er a uchei er a  Ieleb. E le ngulekngemedii sel mekngit el beluulechad er sils er a Noah, me ngulterekokl el mo olekngemed er tia el mekngit el beluulechad er a chelecha el sils. A bo lebleketakl a klemedengei er kid el kirel aike el kaisisiu el tekoi el dilubech er seikid el taem er kid a melisiich a rengud el kmo a ullebongel er a beluulechad er a chelecha el taem a kmedang. Ma leuaisei,e ngera mo aike el kaisisiu el blekeradel? A lsal kesai e ngngar er ngii a eim el tekoi. Sel kot a kmo ngmla er ngii a uleklatk el luleberk el kirel a mereku el telemall.

Mesubed er “A Ikel Tekoi el Diak Le Ues”

⁶ Sera taem er a Noah, e a Jehovah a millekoi el kmo: “Ngdiak kbechiteterir ar chad me le ngar el mo cherechar, ele te di chad el kirir el mo mad. Chelechal mong e te di mo chad el diak bo le betok ra 120 a rekrir.”(Genesis 6:⁠3) A sbedel tia el tekoi er sera 2490 B.C.E. a ulechotii a uchelel a ullebongel er sel mekngit el beluulechad. Ka di molatk er a klungel a ultutelel tia el tekoi el kirir tirke el mle kiei er sel taem! Ngdi medechel kung a 120 el rak e a Jehovah a mo “odureklii a ieleb el mora chutem el mo olekngemed a rokuil outeliil.”—⁠Genesis 6:⁠17.

⁷ A Noah a ngiluu a subed er sel mereku el telemall er a betok el rak er a uchei, e ngmle mellomes a rengul el ousbech er a taem el mengetmokl el kirel a osobel. A apostol el Paulus a melekoi el kmo: “Ma Noah ngiluu a sbedel a Dios el kirel a ikel tekoi el diak le ues, e mlengull er ngii e meruul ra Arhe el kirel me le mosobel ar chad ra blil.” (Hebru 11:⁠7) E kid kede kuk mekerang? Ngmla chuib a bekord el 90 el rak er se er a uchelel aike el uriul el sils er tia el mekngit el blekeradel er a beluulechad el ulemuchel er sera 1914. Me kede mera el ngar er a “taem ra ullebongel.” (Daniel 12:⁠4) Ngkirel el mo ua ngerang a uldesued el kirel aike el uleklatk el me er kid? A Biblia a melekoi el kmo: “Ngdi ngikel meruul a soal a Dios a di kiei el mo cherechar.” (1 Johanes 2:17) Ma leuaisei e chelechang e ngtaem el bo leblak a rengud el meruul a soal a Dios el ua lsal kmal orechudel el tekoi.

⁸ Chelecha el taem, e a reblak a rengrir el ngalek er a skuul er a Biblia a milsuub er a mlukreng el Biblia el kmo tia el mekngit el blekeradel er a beluulechad a ulterekokl el mo metemall. E kid kede mera el oumerang er tiang? Ka mesa sel bleketakl el tekingel a Jesus Kristus el kmo: “Le isei e ngduubech a kloul ringel, el direkak le borngii er a uchelel a belulechad el me lmuut er chelechang, ma ka le borngii er chelechal mong.” (Matteus 24:21) A Jesus a dirrek el millekoi el kmo ngii a lmuut el mei el ua ngikel mlengilt er a Dios el Chad er a Kerrekeriil el mo omii er a rechad el ua klekerengel a sib a lomii a sib ma kaming. Me tirke el diak lerredemellel a mo “soiseb ra diak a ullebengelel blals, e ar melemelt a mo soiseb ra diak a ullebengelel klengar.”​—⁠Matteus 25:​31-33, 46.

⁹ A Jehovah a riruul aike el uleklatk e locha er a mederir a rechedal el oeak a okelel a reng el omeskid “ngikel blak a rengul e mellomes a rengul mesiou.” (Matteus 24:​45-47) Ma lmuut el tang, a bek el renged, ma klebiil er a rechad, ma omelekoi, ma bliongel er a rechad a kirir el mo “medakd  ra Dios e bsa klebkall, e ngmocha blsechel a loukerrekeriil.” (Chocholt 14:​6, 7) A klou a ultutelel el telengtengil tia el klumech er a Renged el omerk er ngii a Resioning er a Jehovah er a beluulechad el rokir a sel uleklatk el kmo a Rengedel a Dios a di kmedung el mo olekngemed er a omerredel a klechad. (Daniel 2:44) Ngdiak el kired el omdasu el kmo tia el uleklatk a diak a ultutelel. E le ngike el Cherrengelel a Klisiich el Dios a blechoel el oltaut er a tekingel. (Isaia 55:​10, 11) Nguleltaut er a tekingel er a sils er a Noah, me ngmo oltaut er a tekingel er a chelecha el taem er kid.​—⁠2 Petrus 3:​3-7.

Mekngit el Deleboes el Omeruul a Merael el Mo Klou

¹⁰ Chelecha el taem er kid a di ua sel taem er a Noah er a kuk ta er a rolel. A Jehovah a milellach er ngike el kot el sechal ma redil el kmo “bo le betok ar ngelekiu, . . . er ker me ker ra beluulechad,” el ousbech er sel lebilsterir a Dios el durs er a chebechiil er a melemalt el rolel er a chelsel a chebechiil. (Genesis 1:28) Se er a taem er a Noah, e tirke el dimlak lolengesenges el anghel a milekidekelii a klechad er a melengalek el deleboes el omeruul. Te mle metengel el me er tia el beluulechad, e uluumail er tir er a bedengir a rechad, e kiliei el obengterir tirke el klebokel el redil, e a rengelekir el mlechell a mle tedobech el chad, ma tedobech el mekngit el reng​— el tir a Nefilim. (Genesis 6:​2, 4) A kngterir tirke el delemumuu el anghel a di uai aike el mekngit el omeruul el mla er ngii er a beluu er a Sodom ma Gomora. (Judas 6, 7) Sei a uchul, e a mekngit el deleboes el omeruul a mirrael el mo klou er seikid el taem.

¹¹ Ngkuk ua ngerang a tekoi er a kldung er a chelechal taem er kid? Ngar er aika el ullebongel el sils, e a deleboes el omeruul a klou el tekoi er a klengar er rebetok el chad. Ma Paulus a milsaod er tirke el uaisei el chad el ua tia el kmo “te diak lodenge rur”; e a rebetok er tir a mla mo er a “bek el mengelengalek loltirakl ra ngelbesel a rengrir, el mla olterau er tir ra deleboes.” (Efesus 4:19) Aike el mekngit el siasing, ma durs er a uchei er a chebechiil, ma omeruul el mesabchemoes, ma remengolchotaor a mla mo tekoi er a klengar er a rechad. A rebebil a mla nguu a “blals . . . a le ngilai el mora bedengir” el oeak a rakt el ua rimbio, ma telemellel a klengar er a telungalek, ma kuk bebil er a mondai er a klechad.​—⁠Rom 1:​26, 27.

¹² Sera taem er a Noah, e a Jehovah a ulduruklii a Ieleb el ulekngemedii sel delemumuu el beluulechad. Ngkmal diak el kired el obes el kmo aika el sils el dekiei er ngii er a chelechang mera el di uai a taem er a Noah. Sel mereku el “kloul ringel” a mo kikidii tia el chutem er ‘ar ngara deleboes, mar ngara laokerreng, mar saudil, mar menguchet a raod.’ (Matteus 24:21; 1 Korinth 6:​9, 10; Chocholt 21:⁠8) Ngkmal orechudel el taem el bo domekeroul a kltui el kirel a mekngit e mengeroid er kid er aike el blekeradel el sebechel el mengetikaik er kid el mo er a deleboes el omeruul!​—⁠Psalm 97:​10; 1 Korinth 6:⁠18.

A “Kngterir [a Rechad] a Uleberk er Ker me Ker” er Tia el Beluulechad

¹³ Ma losaod el kirel a kuk ta er a blekeradel er a sils er a Noah, e a Biblia a melekoi el kmo: “Ngdi rokuil chad a mle mekngit el ngar medal a Dios  ma kngterir a uleberk er ker me ker.” (Genesis 6:11) A kdekudel el omeruul a dimlak lebeches el tekoi. A Kain el ngelekel a Adam a milekodir ngike el melemalt el ochellel. (Genesis 4:⁠8) A Lamek ulechotii a kdekudel el reng er a sils er ngii, er a ongitakl el ouchais el kmo ngmilekodir a kekerei el chad, e le uchul e ng chillebedii. (Genesis 4:​23, 24) Sel mle beches el tekoi er a sils er a Noah a klungel aike el kdekudel el omeruul el mla er ngii. Sera bo lebecherir er a redil er tia el beluulechad tirke el dimlak lolengesenges el anghel el ngelekel a Dios e bocha oungalek​—⁠el tir a Nefilim​—⁠e ngmirrael el mo obdois a kdekudel el omeruul el dimlak lumdesuii er a uchei er sel taem. Tirka el mekoar el chad a mle “tirke el Orrebet”​—⁠“tirke el melibas er a rebebil.” (Genesis 6:​4, footnote, New World Translation) Misei a uchul, ma beluulechad a “mio ra mekngit lomerellir” a rechad. (Genesis 6:13) Ka di molatk el kirel aike el mondai el lechillebangel a Noah er a lomecheliu er a telungalek er ngii el er a chelsel choua isel blekeradel! Engdi, Dios a ‘mla metik er a Noah el di ngiil tang ra delongelir tirkal chad el ungil ra rengul.’​—⁠Genesis 7:⁠1.

¹⁴ A kdekudel el omeruul a mle ngar er a delongelir a rechad er a klteketel a reksi er a klechad. Engdi el di ua ble leklemerang er a sils er a Noah, e tia el taem er kid a dirrek el mla omes a kdekudel el omeruul el dimlak lesa er a ngera mong el taem. Me kede blechoel el orrenges a chisel a klakoad er a chelsel a delengchokl, ma terrorism, ma okngemedir a kebliil er a rechad, ma kodellir a rebetok el chad el dimlak a ungil el uchul. Ma obengkel aika el rokui a merserasech el mekemad a uchul. Me tia el beluulechad a mla lmuut el mocha mio er a kdekudel el omeruul. Ngera uchul? E ngerang a killungii el mo klou? A nger er aika el ker a ochotii a kuk ta er a blekeradel el di osisiu el ua taem er a Noah.

¹⁵ Sera lemedalem a Rengedel a Messias er a Dios el ngar er a eanged er a 1914, e ngike el mlo King, el Jesus Kristus, a rirellii a kmal klou el tekoi. A Satan el Diabelong ma remekngit el reng er ngii a ulebidokl er a eanged el me er tia el chutem. (Chocholt 12:​9-12) Uchei er a Ieleb, e tirke el dimlak lolengesenges el anghel a chiloit a delengcheklir el ngar er a eanged; engdi, chelecha el taem er kid, e te mlodik er a eanged. Ma lmuut el tang, ngmla mo diak lsebechir el rulleterir el mo olab a ua bedengir a rechad er tia el chutem e oldeu a rengrir er aike el mengelengalek el omeruul. Ma lolecholt er a seselkreng, ma klsiberreng, ma dakt el kirel sel mereku el telemall, e te mengetikaik er a rechad ma ike el cheldebechel el mo meruul a kuk lmuut el mekngit el delengerenger ma kdekudel el omeruul el mla er ngii er a sils er a Noah. A Jehovah a ulekngemedii a beluulechad el mla er ngii er a uchei er a Ieleb er a uriul  er tirke el dimlak lolengesenges el anghel ma rengelekir a milekekii er a delengerenger. Lak mecheuid, ngmo meruul er a osisiu el tekoi er a chelecha el taem er kid! (Psalm 37:10) Engdi, tirke el blechoel el mekar er a chelecha el sils a medengei el kmo a osobeirl a kmedang.

A Klumech a Mla Oberk

¹⁶ Sel ongeua el blekeradel el osisiu er a chelecha el sils me sel beluulechad er a uchei er a Ieleb a desang er a ureor el mle kirel el meruul er ngii a Noah. A Noah a mirruul er a kmal klou el arhe. Ngdirrek el mle “ngikel omerk ra llemalt.” (2 Petrus 2:⁠5) Ngera el klumech a lulemerk er ngii? A Noah a ulemerk er a tekoi el kirel a bult ma uleklatk el kirel sel mereku el telemall. A Jesus a dilu el kmo a rechad er a taem er a Noah a “dimlak lolechesiu el mo lmuut er sera le me eeleb el okngemedeterir el rokui.”​—⁠Matteus 24:​38, 39.

¹⁷ Me ngdi osisiu, a Resioning er a Jehovah a blak a rengrir el oltaut er a ngerechelir el mo omerk er a klumech, ma klumech er a Rengedel a Dios a oberkang er a beluulechad el rokir. Ngar er a bek el merekelel a beluulechad, e a rechad a sebechir el orrenges e menguiu er a klumech er a Renged el ngar er a omelekingir. A Ongkerongel el magazine, a ouchais el kirel a Rengedel a Jehovah, ma omerusel a kuk betok er a 25,000,000 e mirruul el ngar er a kuk betok er a 140 el omelekoi. Nguaisei, tia el ungil el chais er a Rengedel a Dios a mla oberk “ra belulechad el rokir, el kirel locholt el bedul a bek el renged.” Sel bo lemerek tia el ureor el oltirakl er a uldesuel a rengul a Dios, e seikid e ngmei a ullebongel.​—⁠Matteus 24:⁠14.

¹⁸ Sel dolatk el kirel a ngelsengesel a klemeriarreng el kirel a tekoi er a klereng ma kldung er a uchei er a Ieleb, e ngdiak lemeringel er kid el mo medengelii a uchul e a retonari er a Noah a millenguul er ngii ma telungalek er ngii e ulemtok er tir. Engdi a ullebongel a mlei. Me ngdi osisiu, “ar melenguul a me duum . . . el melenguul” er a chelecha el uriul el sils. A Biblia a melekoi el kmo: “Ngdi sils ra Rubak a mei el ua tal merechorech.” (2 Petrus 3:​3, 4, 10) Me ngulterekokl el mei er sel telutk el taem. Ngdiak bo lemeoud. (Habakkuk 2:⁠3) Ngkol ua ngera el mellomes el rolel a bo deblechoel el mengkar!

Te Di Mekesai A Mo Suobel

¹⁹ Aike el osisiu el blekeradel el mla er ngii er a sils er a Noah ma chelecha el taem er kid a diak ldi lolutk el mo er a kngterir a rechad ma telemellir e lemerekong. Te mla er ngii tirke el silobel er a Ieleb, me nguaisei, te dirrek el mo er ngii a remo suobel er a ullebongel er tia el mekngit el blekeradel er a beluulechad. Me tirke el silobel er a Ieleb a mle medemedemek a rengrir el dimlak lekiei el oltirakl er a rechad er sel taem. Te uleltirakl er a uleklatk er a Dios e milleakl er tir er sel mekngit el beluulechad er sel taem. A Biblia a melekoi el kmo: “E ngdi Rubak a mle ungil a rengul ra Noa. . . . me ngdi mle ngii el tang er sel taem a uldeuir a rengul a Dios.” (Genesis 6:​8, 9) Ngar er a delongelir a rokui el klechad, el rokui, e a di ta el telungalek, “me te di mlosobel ra ralm ar di mle teai.” (1 Petrus 3:20) Ma Jehovah a milellach er tir el kmo: “Bo le betok ar ngelekiu, mar uldidellel a rsechiu el mo mekekii a belulechad.”​—⁠Genesis 9:⁠1.

²⁰ A Tekingel a Dios a ouchais er kid el kmo a “kloul seked” a ‘uleak sel kloul ringel.’ (Chocholt 7:​9, 14) Te tela el ildois er a rechad a mo teloi er a klou el seked? A Jesus a millekoi el kmo: “E a siseball el mora klengar chobutek, ma rael er ngii a kekerei, me te mekesai ar chad el metik er ngii.” (Matteus 7:​13, 14) A domekesiu er tirke el betok el billiol el chad el kiei er tia el chutem er a chelecha el taem, e a remo suobel er sel mereku el klou el ringel a di mekesai. Ngdi nglocha mo er ngii a  techellir el osisiu el di ua itirke el silobel er a Ieleb. Tirke el mo suobel a sebechir el mo oungalek er a telkib el taem el tir a mo teloi er a beches el chutem er a klechad.​—⁠Isaia 65:⁠23.

“Mongkar”

²¹ Altang a Ieleb a kora diak a belkul el kirel a taem er kid, engdi ngmeskid a bleketakl el uleklatk el diak el kired el mengemikr er ngii. (Rom 15:⁠4) Aike el osisiu el blekeradel er a sils er a Noah ma chelecha el sils er kid a kirel el rullid el mo kerekikl el omtab er a klungel a ultutelel aike el dubech el tekoi e omeklatk er kid el kirel a demiel a Jesus el ua ta el merechorech el mo olekngemed er a remekngit.

²² Chelechang, e a Jesus Kristus a omekrael er a kmal klou el omengetmeklel a ureor er a klereng. E a bo lomekerrreu er a klengar er tirke el ngar er a mera el omengull, e a ua arhe el paradis er a klereng a ngar er ngii er a chelechang. A bo desobel er sel merekung el klou el ringel, ngkmal kired el ngar er a chelsel tia el paradis. Meliuekl er tia el paradis er a klereng a tia el beluulechad er a Satan, el blechoel kltmokl el mo dekeueklii a ngii di el chad el mesululang er a klereng. Me ngkmal kired el kerekikl el “mongkar” me dochotid el kltmokl el kirel sel sils er a Jehovah.​—⁠Matteus 24:​42, 44.

Ke Dirk Medengei?

• Ngera el uleklatk a lebilskid a Jesus el kirel a demiel?

• A Jesus nguleba ngerang el omekesiu er a temel a demiel?

• Ngmekerang a temed a di osisiu ngii ma sils er a Noah?

• Ngmekerang e aike el osisiu el omeruul er a sils er a Noah ma chelechang a ngosukid el melechesuar el kmo a taem a orechudel?

[Study Questions]

1, 2. Ngerang a olecholt el kmo kede kiei er a ullebongel er tia el blekeradel el beluulechad?

3. Ngera belkul el kired aike el “olangch er a taem”?

4, 5. (a) Ngera smisichii a klaumera er kid el kmo a ullebongel er tia el mekngit el blekeradel a kmed, e ngera uchul? (b) Ngera chimo el tekoi el lekaisisiu er ngii sel sils er a Noah ma demiel a ngelekel a chad?

6. Ngera el subed a luluuchais er ngii a Jehovah er a temel a Noah?

7. (a) Ngmilekerang a Noah er a lrengesii a subed el kirel a Ieleb? (b) Ngkired el mo mekerang er a aike el subed el kirel a ngemedel tia el blekeradel er a beluulechad.

8, 9. Ngera el subed a ngar er ngii er a chelechal taem, e aikang mekerang e mla oberk?

10. Ngua ngerang a kllungel sel mekngit el deleboes el omeruul er a taem er a Noah?

11. Ngera el blekerdelel a omeruul a rullii chelecha el taem el mo osisiu el uai sel sils er a Noah?

12. Ngera uchul me ngkired el meruul er kid el mouketui a mekngit?

13. Ngar er sel sils er a Noah, ngera uchul ma beluulechad a “mui er a kdekudel el omeruul”?

14. Ngmekera e a bleuulechad er a chelechang a mla mo “mui er a kdekudel el omeruul”?

15. (a) Ngera mlo uchul a ildisel a kdekudel el omeruul er a uriul el sils? (b) Ngera el mo duubech el tekoi a doumerang er ngii?

16, 17. Ngera el ongeua el tekoi a di osisiu er sel sils er a Noah ma sils er kid?

18. Ngua ngera osengir a rechad el kirel a klumech er chelechang ma osengir tirke el chad er a sils er a Noah?

19, 20. Kede mekerang a domekesiu er a Ieleb ma telemellel tial mekngit el blekeradel er a beluulechad?

21, 22. (a) A omesodel tia el cheldecheduch el kirel a Ieleb ngmekerang e mo klungiolem? (b) Ngera sel bades el kirel a 2004, e ngera uchul me ngkired el oltirakl er ngii?

[Blurb on page 7]

Sel Bades el kirel a 2004 a kmo: “Mongkar . . . Ngkiriu el di kldmokl.”​​—⁠Matteus 24:​42, 44.

[Picture on page 4]

Noah a ultireklii a uleklatk er a Dios. Kid kede meruul el uaisei?

[Picture on page 5]

“Le be ldum a Ngelekel a chad e ngua sel taem ra Noah”