Omelilt El Mo Meruul A Tekoi A Diak el Moiuu el Omelsemai

“NGDIAK a lmuut el meringel, ma lechub el kot el ngar er a uchei el tekoi el ua sel bo lsebeched el ungil melilt,” Napoleon Bonaparte, 19th-century el emperor er a beluu er a France, a millekoi el uaisei. Ke locha mo kongei er aika el teblo el tekoi, e le te betok el chad a sorir el di tir el melilt a tekoi er a chelsel a klengar er tir. Osisiu el taem, e te mla suubii el kmo a tekoi el di kid el melilt el mo meruul a diak el beot.

A betengel ma rengelel, a omelilt el tekoi a diak el sebeched el mo chuib er ngii. Kede chelebangel er tia el lureor er a omelilt el tekoi er a bek el sils. Uriul er a debekiis er a tutau, e kede melilt a biled el bo doubail, ma ngera el kall a bo dongang, e mekerang a bo dosmechokl a bebil er a tekoi er itia el sils. Betok er aika el tekoi el dolilt a mekekere el tekoi. Me ngdiak desal meringel el omdasu e doruul. Ma diak demekar a leklebesei el meringel el omdasu el kmo aika el tekoi el deriruul ngmle ungil ngmle mekngit.

Engdi sel kuk domes er a bitang, a bebil er a omelilt a kmal ngar er a cheroid el tekoi. Betok el mekekere el chad er a chelechang a kirir el omdasu el kmo ngera el ureor a sorir el mo meruul er a ngar mederir el klebesei. Te mo melilt el kmo ngua ngera el skuul a bo lousbech e mo ua ngera klemengetel a skulir. E dirrek el mo er ngii a taem e a rebetok a mo melilt el kmo te mo bechiil malechub e te melemolem el di mesobil. Tirke el melatk a chebechiil a kirir el melilt el kmo: ‘Ngak ak mla mo ultebechel el sebechek el mo bechiil? Ngua techa el chad a soak el mo bechil, ma lmuut el klou a ultutelel, ngua techa el chad a kuusbech er ngii?’ Sel omelilt er a chad el bo bechil a ngar er ngii a kmal klou a lerellii er a chelsel a klengar er kid.

Ma sel domes aike el meklou a belkul el tekoi, e ngkmal klou a ultutelel a bo lemellomes a rengud el melilt, e le klengeltengat a ultuil er a ungil el omelilt er kid. A bebil er a rechad a omdasu el kmo te kmal sebechir el di tir el melilt aika el meklou el tekoi me ngmo uchul e te diak losiik a ngeso el kirel. Engdi tia el omeruul ngungil? Ka me bo domes.

[Picture Credit on page 3]

Napoleon: Ng mla er a babier el The Pictorial History of the World