A Ker el Mla er a Remlenguiu

Uriul er a ieleb, e a Noah a ulsebekii er a Arhe a belochel el liluut el mei el oba “llel a kerrekar el olive.” Ngika el belochel, ngmiltik er tia el llel a kerrekar er ker?

A Biblia a ouchais er kid el kmo a ralm a “mlo dmolech me ngmleieleb a ikel kot el mekididai el rois.” (Genesis 7:19) Sera lebo er a eou a ralm, e ngmle edei el taem el ta el sandei a delongelel el Noa a ulelsebek a belochel. Sera ongeru er a taem, e a belochel a liluut el mei el “blengechel er a chemadech el llel a kerrekar el olive. Ma Noa a mlo medengei el kmo ngmla moriou a ralm.”​—⁠Genesis 8:​8-11.

Nguaisei, chelecha el taem e ngdiak a rolel a bo dodenge el kmo ngmle ua ngera klteketel el taem e a telkib el basio er tia el chutem a mleieleb, e le teletelel a chutem a kmal mle ngodech er a uruil er a Ieleb. Ma leuaisei, e ngulterekokl el mleieleb a oumesingd el basio el meketeket el mlo uchul a kodellel a betok el kerrekar. Engdi, ngdirk mla er ngii a bebil el kerrekar el mle mesisiich el sebechel el mereched el meloseb er sera lebo er a eou a ralm.

El kirel sel kerrekar el olive, e a The New Bible Dictionary a melekoi el kmo: “A lsekum e ngmetuk e a beches el dellomel a duubech er sel risel e kuk mukeroul, me ngbekord er a kleim el beches el chelechedal a sebechel el duubech. Aike el di kmedu el mad el kerrekar el olive a dirrek el meloseb er a osisiu el rolel. “Ngdi ua dedu el kmo a klisichel a diak lsebechel el metemall,” el ua lolekoi a The New Schaff-​Herzog Encyclopedia of Religious Knowledge. Ngdiak a chad er a chelecha el sils el medengei a komakai el omesodel a cherrecherel ma kleldelel ma lechub e ngkelekeltel aike el ralm er a ieleb. Ma leuaisei, e ngdiak lsebeched el mo ulterekokl el medengei el kmo aike el ralm er a ieleb ngerang rirellii el mo er a aike el kerrekar el olive ma bebil er a dellomel.

Engdi, aike el kerrekar el olive er a chereomel a diak lsebechel el duubech er a mekelekolt, el uai aike el debetik er a chetebtel a rois. Ngbai oumesingd er a taem, e ngduubech er aike el basio el ngar er a eou er a ede el telael el feet, el average a kleald er ngii a ngar er a bab er a okeim el degrees er a Fahrenheit. “Ma leuaisei,” el ua lolekoi sel babier el The Flood Reconsidered, “e a Noa a mle sebechel el mo medengei er a chemadech el llel a kerrekar el kmo aike el ngar er a eou el dellas a mirrael el mo diak a ralm er ngii. A Noa er sera lluut el osebekii a belochel er a ta el sandei er a uriul, e ngdimlak lluut el mei, el olechotel a ildisel aike el dellomel ma chudel ma ike el mo sebechel ngika el belochel el mo reborb er ngii.​—⁠Genesis 8:⁠12.