A Dereder el Mo Oltaut er a Moktek er a Dios

“[A Dios a] meruul a bek el tekoi el ngar sel telbilel a rengul.”​—EFESUS 1:11.

1. Ngera uchul ma rokui el ongdibel er a Resioning er Jehovah a mo kldibel er a April 12, 2006?

 SEL KEBESENGEI er a ongede el ureor er a April 12, 2006, e a bekord 16 milliol el chad a mo kldibel el mengedaol er a Chedaol el Blsoil er a Rubak. Ngar er a derta er aike el ongdibel e ngmo er ngii a tebel, e a bebul sel tebel e ngar er ngii a diak omkukel el blauang el omtechei er a bedengel a Kristus ma bekerekard el bilong el okesiul a mloiitel el rsechel. Sel bocha er a ullebengelel a cheldecheduch el mesaod er a belkul a Chedaol el Blsoil el kirel a kodellel a Jesus, e aika el klekedall el kot e ngblauang e ngmochu bilong a bo lorrael er a delongelir a rechad el ngar er isei. E ngar er a chelsel a bebil er a ongdibel er a Resioning er a Jehovah e a ta el chad ma lechub a kuk bebil a sebechir el melai aika el klekedall. Engdi ngar er a chelsel a betok el ongdibel e ngdiak a ta er tir el sebechel el melai ngii el klekedall. Ngera uchul ma redi mekesai el Kristiano, el tir a melatk el mo kiei er a eanged a mo mengang e melim, e a rebebil a diak el sebechir?

2, 3. (a) Ngmlekerang a Jehovah er a lomeob el oltirakl er a moktek er ngii? (b) Ngerang a mle moktek er a Jehovah er a lomeob er a chutem ma rechad?

² A Jehovah a Dios el ngar er ngii a moktek er ngii. Ma bo loltaut er a moktek er ngii, e ngii a “meruul a bek el tekoi el ngar sel telbilel a rengul.” (Efesus 1:11) A kot e ngmilebii ngike el di ta el Ngelekel el Sechal. (Johanes 1:1, 14; Chocholt 3:14).E sola e okiu ngika el ngelekel, e a Jehovah a milebii a telungalek er ngii el reng el sechal e a uriul e ngmilebii a meues el eanged, el uldimukl er a chutem ma chad el ngar er a bebul.​—Job 38:4, 7; Psalm 103:19-21; Johanes 1:2, 3; Kolose 1:15, 16.

³ A Jehovah a dimlak lebebii tia el chutem el ua lolasem er a rechad el kmo te rredemelel a mo er a eanged el mo reng el ngelekel ma lechub e ngdiak. E tiang a osisecheklir a rechad er a betok el klechelid el ngar er a Klsuul el Klekristiano. Ngmilebii a chutem el moktek er ngii a “kirir a re chad el kiei er ngii.” (Isaia 45:18) A Dios a milebii a chutem el kirel a chad ma chad el kirel a chutem. (Psalm 115:16) A chutem a mle kirel el mo paradis el mui er a remelemalt el chad el tir a mo mengetmokl e mengkar er ngii. A omelatk el mo er a eanged a dimlak el ta el lemedung el mo er tirke el teru el obekel.​—Genesis 1:26-28; 2:7, 8, 15.

A Moktek er a Jehovah a Mleasem

4. Ngmlekera e mlo er ngii a omelsemai el kirel a rolel a longedereder a Jehovah er a uchelel a reksi er a klechad?

⁴ A reng el ngelekel a Dios a ulemtok e mlo melemall er a moktek er ngii er sera bo lemeterekakl er sel sengk el ngii a mimokl el omelilt. Ngtilemellii a budech el lulebang tirke el sorir el chederedall er a omengederederel a Jehovah. A Satan a ngilititerir tirke el kot el obekel el mo er a  rael el ileakl er a Dios. (Genesis 3:1-6) Ngdimlak lomtok er a klisichel a Jehovah, e ngbai ngmilsemai er a rolel ma lemeltel el mengedereder. Ma uchetemel a tekoi el kirel a omengederederel a Jehovah a mlo er ngii el ngar er a chutem er a uchelel a reksi er a klechad.

5. Ngera el tekoi a mlo er ngii, e ngmelutk er a rua techang?

⁵ El obengkel tia el klou a ultutelel el tekoi el kirel a omengedereder er a eanged ma chutem a ongeru el tekoi el ledillii a Satan er a taem er a Job. Ngulleker el kirel a moktek er a reblebelel a Dios el tir a chederedall e mesiou er ngii. A Satan a ulemtechakl a tekoi el kmo te meruul el uaisei el di kirel a klungiolir engdi sel taem el lemeasem, e te mo omtok er a Dios. (Job 1:7-11; 2:4, 5) Tia el tekoi a mildung el kirir a rechad el tir a mesiou er a Dios engdi tia el omelsemai a dirrek el uldimukl er ngii a rengelekel a Dios el reng, el mo lmuut er a di ta el Ngelekel a Jehovah.

6. Ngmilekerang a Jehovah e mle blak a rengul er a moktek er ngii ma ngklel?

⁶ A Jehovah a blak a rengul er a moktek er ngii ma klungel a ultutelel a belkul a ngklel misei e ngii a mlo Profet e Olsobel. a Ngdilu er a Satan el kmo: “E kau ma redil a mo kauketui, ma ruldidellel a rsechem ma ruldidellel a rsechel a redil a di mo blechoel el kaucherarou. E a uldidellel a rsechel a mo rukemii a bdelum e kau a mo mengchii a kotel ochil.” (Genesis 3:15) Me ngoeak a Uldidellel a Rsechel a “redil”, ma lechub a cheldebechelel el ngar er a eanged e a Jehovah a mo onger er a omelsemai er a Satan e mo mesterir a ruldidellel a rsechel a Adam a omelatk el kirel a ngubet ma klengar.​—Rom 5:21; Galatia 4:26, 31.

“Bertelel a Uldesuel a Rengul”

7. Ngera el moktek er a Jehovah a lulechotii el oeak a apostol el Paulus?

⁷ Ngar er a babilengel el mo er a Rekristiano er a Efesus, e a apostol a mle ungil el mesaod er a rolel a Jehovah a bo loureor el loltaut er a moktek er ngii. A Paulus a milluches el kmo: “El ulechotii er kid a bertelel a uldesuel a rengul, el oltirakl ra dibla ltibir el telbilel a rengul, el oeak a Kristus el kmo, a bo lturk a blsechel e ngodekdak a bek el tekoi ra eanged ma chutem el mo tang el ngara Kristus.” (Efesus 1:9, 10) A klebokel el moktek er a Jehovah a mo odekdak a rokui el tekoi er a eanged ma chutem el lengar er ngii tirke el chad el chederedall er a omengederederel. (Chocholt 4:11) Seikid e a ngklel a mo mechedaol e a Satan a mocholt el bulak, e a soal a rengul a mo meketmokl “ra belulechad el ua chomerellel ra eanged.”​—Mattteus 6:10.

8. Ngera belkul sel tekoi el mloiuid el kmo “dereder”?

⁸ Sel ‘bla letibir’ a Jehovah ma lechub a moktek er ngii a mo motaut el oeak a “dereder.” A Paulus a uluusbech er a tekoi el belkul a kmo “ngerachel er a blai.” Ngmelutk er a rolel a longetmokl a ngerachel, e diak lolekoi el kirel a kabelment el uai a Rengedel a Messias.  b Ma mengasireng  el rolel el bo longedmokl er a moktek er ngii a uldimukl er ngii a “chedaol el bertelel” el ngii a mengal el mo bleketakl er a chelsel aike el mei el betok el rak.​—Efesus 1:10; 3:9.

9. Ngmlekerang a Jehovah e mlekekokil el olecholt er a bertelel a uldesuel a rengul?

⁹ El oeak a betok el telbiil, e a Jehovah a milekekokil el olecholt el kmo ngmekerang e a moktek el kirel a Uldidellel a Rasech el ngar er a telbiil er a Eden a mo tmaut. A telbilel el mo er a Abraham a olecholt el kmo ngike el Uldidellel a Rasech er a telbiil a me er a chutem el oeak a Uldidellel a Rasech er a Abraham e ngii a mo uchul e a “bek el beluu er a beluulchad” a mo mukngeltengat. Sel telbiil a dirrek el melutk er a rebebil el tir a mo obengkel ngike el kot el Ngalek er a telbiil (Genesis 22:17, 18). A Llach er a telbiil el meruul el obengkel a Israel er a tech a ulechotii a moktek er a Jehovah el kirel a “chimol beluu el prist.” (Exodus 19:5, 6) A telbiil el obengkel a David a ulechotii el kmo a Uldidellel a Rasech a mo Bdelul a Renged el mo cherechar. (2 Samuel 7:12, 13; Psalm 89:3, 4) Ma Jehovah a ullecholt a bebil er a telengtengil a otutel a moktek er ngii ma dirrek aike el telbiil el Llach er a lomekrael er a Rechijudea el mo er a Messias. (Galatia 3:19, 24) Tirke el chad el mo obengkel ngike el kot el Uldidellel a Rasech a mo chedal sel meldung el “chimol beluu el prist” e mo teloi er a “beches el telbiil” el ua lebeches el “Israel,” er a klereng.​—Jeremia 31:31-34; Hebru 8:7-9. c

10, 11. (a) Ngmlekera Jehovah er a lochotii ngike el Uldidellel a Rasech? (b) Ngera uchul ma di ta el Ngelekel a Dios a mle er tia el chutem?

¹⁰ El oltirakl er a dereder el kirel a moktek er a Dios, e ngike el Uldidellel a Rasech a mle kirel el me duum er a chutem. A Jehovah a ulderechii a  anghel el Gabriel el mo er a Maria el ouchais er ngii el kmo ngmo mechellii a ngalek el sechal el ngklel a mo Jesus. A anghel a dilu er ngii el kmo: “Ngii a mo klou, e mo okedongall el kmo Ngelekel a Chimong el Kididai; e a Rubak el Dios a mo msa kingall ra demal el David, e ngii a mo mengedereder ra blil a Jakob el mo cherechar; ma chomerrederel a di ngarngii el diak a ullebengelel.” (Lukas 1:32, 33) Ma olechotel ngika el Uldidellel a Rasech a mlo bleketakl.​—Galatia 3:16; 4:4.

¹¹ Ngike el di ta el Ngelekel a Jehovah a kirel el me er a chutem me bo lemeasem er sel kot el tkurrebab el omelasem. Sel kot el cherrungel el nger el kirel a omelsemai er a Satan a ngar er a chimal. Me ngmo melemolem el blak a rengul el mo er a Demal? Tiang a uldimukl er ngii a chedaol el berrotel el tekoi. Uriul e a apostol el Paulus a milsaod er a deruchellel a Jesus el kmo: “Ngulterekokl klou tial bertelel chomeluu ra Dios el kmo: ‘A Kristus a mle chemolt el ngara teletelel a chad, e mlocholt ra Reng el kmo ngmelemalt, e mleues rar anghel, e uleberk ra chelsel a bek el renged, e a belulechad a mlo oumera er ngii, e milekider ra klebkall.’ ” (1 Timoteus 3:16) Me ngoeak sel blakerreng er ngii el mo lmuut er a kodall, e a Jesus a ullenger er sel omelsemai er a Satan. Engdi a kuk bebil er a komakai el omesodel sel chedaol el berrotel el tekoi a dirk mo bleketakl er a uriul.

“Bertelel a Rengedel a Eanged”

12, 13. (a) Ngerang a ta er a telengtengil tia el “bertelel a rengedel a Dios”? (b) Ngera mle uldimukl er ngii er a lolilt er a ulterekokl el ulecherengelir a rechad a Jehovah el tir a mo er a eanged?

¹² A ta er a taem er a lomerk er a klumech el ngar er a Galilea, e a Jesus a millekoi el kmo sel berrotel el tekoi a ngar er ngii a delongelel ngii me sel kabelment el Rengedel a Messias. Ngdilu er a redisciplo er ngii el kmo: “Kemiu a le bilskemiu a ilmokl ra mo medenge bertelel a rengedel a eanged, e tir a dimlak le besterir [“rengedel a Dios,” Markus 4:11].” (Matteus 13:11) A telengtengil tia el berrotel el tekoi a melekoi er a Jehovah el mo melilt er a “kekerel delebechel” er a 144,000 el chad el mo obengkel a Ngelekel el tedebechel a Uldidellel a Rasech, el mo mengedereder el obengkel el ngar er a eanged.​—Lukas 12:32; Chocholt 14:1, 4.

¹³ A rechad a ulebeob el mo kiei er a chutem a uchul, me tia belkul a kmo a Jehovah a rirelleterir a rebebil er a rechad el mo “beches el bleob” el tir a mo er a eanged. (2 Korinth 5:17) Ma losaod el kirir tirke el mo mengilt el mo er tia el ileakl el omelatk el mo er a eanged, e a apostol el Petrus, el ta er a tirka el chad, a milluches el kmo: “Le modanges a Dios el Demal a Rubak er kid el Jesus Kristus! E ngobdois el klechubechub er ngii a uchul me ngmilechellid el beches e lilia er kid a dingar lomelatk loeak chokisel a Jesus Kristus ra chelsir ar mla mad, e rirellemiu el mo oudiukes er sel diak le ngemed el ka le mukidokel el diak le moalech el ulatek ra eanged el kiriu.”​—1 Petrus 1:3, 4.

14. (a) Te mlekerang a Rechisentail e mlo teloi er a “bertelel a rengedel a Dios”? (b) Ngera uchul me ngsebeched el mo medengei aike el “dmolech ra Dios”?

¹⁴ A kuk ta er a telengtengil sel berrotel el tekoi el kirel a Rengedel a Dios er a ngar er a medad a kmo a Dios a soal a Rechisentail a bo lobengterir tirke el mekesai el chad el mo mengedereder el obengkel a Kristus el ngar er a eanged. A Paulus a milsaod er tia el tekoi er a “dereder” er a Jehovah, ma lechub a rolel a bo loltaut er a telbilel el kmo: “El chelechang e ngoeak a Reng el chemotang rar mechedaol apostol mar profet er ngii, el dimlak le cholt rar ngelekir ar chad ra ikel mlamemol telecheroll; el kmo, ar Chisentail a ngara Kristus Jesus el de dul oudiukes e klekedellel a tal chelechad, e dul oubliongel ra telbiil, el evangkelio uchul.” (Efesus 3:5, 6) E a utebengel tia el telengtengil a berrotel el tekoi a mlocholt el mo “rar mechedaol apostel.” Me ngdi osisiu er a chelecha el sils, a lsekum ngdiak a ulengeseuil a chedaol el reng, e ngdiak el sebeched el mo medengei aike el “dmolech ra Dios.”​—1 Korinth 2:10; 4:1; Kolose 1:26, 27.

15, 16. Ngera uchul ma Jehovah a millilt er tirke el mo obengkel a Jesus el mengedereder er a delongelir a rechad?

¹⁵ “A dart ma chokouang ma cheual telael el chad” el dechor er a bita er a “Ngelekel a sib” el  ngar er a Rois el Sion er a eanged a “mlengubet el mlara delongelir ar chad el mo kot el rodech el kirel a Dios ma Ngelekel a sib,” el ngii a Kristus Jesus. (Chocholt 14:1-4) A Jehovah a ngileltii a ta er a rengelekel el sechal er a eanged el mo kot el Uldidellel a Rasech er a telbiil el meldung er a Eden. Engdi ngera uchul me ngmillilt er a delongelir a rechad tirke el mo obengkel a Kristus? A apostol el Paulus a mesaod el kirel tia el ulterekokl el ulecherangel el kmo “tirikel mlokedong el ngara telbilel a rengul [a Jehovah]” e le “nguleltirakl ra soal a rengul.”​—Rom 8:17, 28-30; Efesus 1:5, 11; 2 Timoteus 1:9.

¹⁶ A moktek er a Jehovah a mo mengedaol er a klou el chedaol el ngklel e mo mesebechakl er a omengederederel er a eanged ma chutem. Me ngoeak sel ngkmal ungil el “dereder,” ma lechub a rolel a loruul a tekoi, e a Jehovah a uldureklii a di ta el Ngelekel el me er a chutem el me measem el mo er a tkurrebab el omelasem. Ma lmuut el tang, ngmle soal tia el Rengedel a Messias er a Ngelekel a lebo luldimukl er ngii a rechad el tir a mle blak a rengrir el mo er a omengederederel el mo lmuut er a kodall.​—Efesus 1:8-12; Chocholt 2:10, 11.

17. Ngera uchul me ngungil a rengud e le Jesus me tirke el mo mengedereder el obengkel a mle chad el ngar er a chutem er a ngar er a mong?

¹⁷ A Jehovah a ulechotii a klou el bltikerreng el mo er a ruldidellel a Adam er sera loderechii a Ngelekel el me er a chutem me sera lolilt er a delongelir a rechad tirke el mo oudiukes er a kabelment er a Renged el obengkel a Ngelekel. Ngmekerang e tia mo uchul a klungiolir a rebebil el tir a mle blak a rengrir el mo er a Jehovah, er a taem er a Abel el me lmuut er a chelechang? A rediak lemecherrungel el chad el mlechell el ngar er a klsibai er a klengit ma kodall, a mle kirir el mo mukungil er a bedengir ma klereng er tir me bo lsebechir el mo mecherrungel, el oltirakl er sel kot el moktek er a Jehovah el kirel a klechad. (Rom 5:12) Ngkol ua ngera el tekoi el melisiich er tirke el melatk el mo kiei er a chutem el mo cherechar a lodengei el kmo a King er tir a mo olecholt a bltikerreng ma ungil el klemedengei el di ua sel rolel el lulechotii el mo er a redisciplo er ngii er sera losiou el ngar er a chutem! (Matteus 11:28, 29; Hebru 2:17, 18; 4:15; 7:25, 26) E kol ua ngera el uchul a ongelaod el kirir sel lodengei el kmo tirke el king e prist el mo obengkel a Kristus el ngar er a eanged a resechal ma redil el mle blak a rengrir el loutekangel a chelitechetul a bedengir e mlo chelebangel a omelsemai er a klengar, el di uai kid er a chelechang!​—Rom 7:21-25.

A Moktek er a Jehovah a Diak Bo Leiit

18, 19. Ngera uchul ma tekingel a Paulus el ngar er a Efesus 1:8-11 a bleketakl el me er kid, e ngera kede mo mesaod er ngii er a ongingil el suobel?

¹⁸ Chelechang a kede mla mo medengelii a ultutelel a tekingel a Paulus el mo er a rengellitel el Kristiano, el ngar er a Efesus 1:8-11. Ngdilu el kmo a Jehovah a mla ochotii er tir a “bertelel a uldesuel a rengul,” me tir a mo “metutk el oudiukes” el obengkel a Kristus, e tir a “dimla metutk el oudiukes el ngara Kristus loeak a uldesuel ngikel meruul a bek el tekoi el ngar sel telbilel a rengul.” Kede melechesuar el kmo tiang a oureor el obengkel a “dereder” er a Jehovah el ngii a mo oltaut er a telbilel. Tia dirrek el ngosukid el mo medengei el kmo ngera uchul ma remekesai el Kristiano el mo er a Chedaol el Blsoil er a Rubak a mo melai aike el klekedall.

¹⁹ Ngar er a ongingil el suobel, e kede mo mesa el kmo ngera belkul a Chedaol el Blsoil er a kodellel a Kristus el mo er a Rekristiano el tir a melatk el mo er a eanged ma ngera uchul ma remilliol el chad el tir a melatk el mo kiei er a chutem el mo cherechar a dirrek el kmal semeriar er a belkul tia el Chedaol el Blsoil.

[Footnote]

A Omeleklel a Suobel

• Ngera uchul ma Jehovah a milebii a chutem e lilia a chad er ngii?

• Ngera uchul me ngmle kirel a di ta el Ngelekel a Jehovah el me measem er a chutem?

• Ngera uchul ma Jehovah a millilt er tirke el mo obengkel a Kristus el mengedereder er a delongelir a rechad?

[Aike el Ker er a Suobel]