“Ele Ar Bek el Chad a Di Chemur Choberaod, el Di Telechellir”

“Misei e ar derta er kid a kirir el mo mesaod er tir ra Dios.” ​—ROM 14:12.

1. Ngera el tekoi a lechilebangel er ngii tirke el tedei el chad er a Hebru?

 A BEKORD el elolem el dart el rak er a ngar er a mong, e a retedei el ngeasek el Hebru el kiliei er a Babilon a mlo chelebangel er a meringel el tekoi el mle sebechel el mo uchul a kodellir. Tir te mo terrob el mengull er sel klou el bleob el chaus, el oltirakl er a llach er a beluu? Ma lechub e ngdiak bo longull er ngii me te obidokl el mo er a chelsel a kmard el ngau? A Sadrak ma Mesak ma Abednego a dimlak a temir el oker a uldesuel a ngii di el chad; ma ka luluusbech er ngii. Te di mle mereched el melekoi el kmo: “Bo modengei kau el kuoll el kmo ng diak ki bo mongull er a chedum, ma ka ki bo mosus er a bleob el kolt el mtileketekii.” (Daniel 3:1-18) Tirka el tedei el chad er a Hebru a di mle tir el mengol er a telechellir.

2. Ngtechang a ulemesiul er a uldesuel a Pilatus el kirel a Jesus, me tiang belkul a kmo ngika el kabernor er a Rom ngdiak bo lemukerrekeriil el kirel tiang?

² A kabernor a rirenges a ultutakl el kirel ngike el chad. Sera lorritel er ngii el tekoi, e ngmlo bleketakl er a rengul el kmo ngika el mlotelechakl el chad a diak a kngtil. Engdi, a rechad a sorir a bo lokodall. Ngmillasem el omtok er tir, engdi a kabernor a dimlak el sebechel el mengol er a telechellel e mlo oltirakl a uldesuir a rechad. Ngmlelebal e melekoi el kmo: “Ngdiak a ngerechelek ra rsechel ngikal chad.” E sola e kongei me bo lokodir ngii el chad. Chochoi, a Pontius Pilatus a milechititerir a rechad me lolib er a tekoi er a bai di ble lengii el oltirakl er a uldesuel el kirel a Jesus Kristus. Ngdiak a ua ngera el ildisel el ralm el sebechel el kikidii er sel diak lemelemalt el kerrekeriil el mlo er a Jesus.​—Matteus 27:11-26; Lukas 23:13-25.

3. Ngera uchul me ngdiak el kired el mechiteterir a rechad me lolilt a tekoi el kired?

³ E kau a kuk mekerang? A bo lekirem el melilt a tekoi, e kau ke mo ua itirke el tede el chad er a Hebru, ma lechub ke mo kongei er  a rebebil el omesiul er a uldesuem? Ngdiak lebeot sel lekired el melilt a tekoi. A chad a kirel el ultebechel a rengul me bo lsebechel el ungil el melilt. El ua itiang, a rechedam ma rechedil a kirir el mo ungil el melilt a tekoi el kirir a remekekerei el ngelekir. Chochoi, ma lsekum e ngchetituokel e betok a chedechedelel e ngmeringel a dolilt a tekoi. Engdi, tia el ngerachel a diak el sal oberaod me ngdiak el bo luldimukl er “a berraod,” el tirke el “ngara klereng” a mo mengol er ngii el kired. (Galatia 6:1, 2) Ngdiak, tiang a berraod el “derta er kid a kirir el mo mesaod er tir ra Dios” el kirel. (Rom 14:12) A Biblia a kmo: “Ar bek el chad a di chemur choberaod, el di telechellir.” (Galatia 6:5) Ma leuaisei, ngmekera bo dungil el melilt a tekoi el kirel a klengar er kid? A kot, e ngkired el medengei a ngelsengesed e mesuub el mo sumechokl.

A Klou a Ultutelel el Tekoi

4. Ngera el klou a ultutelel el tekoi el kirel a omelilt a sebeched el suubii er tirke el kot el obekel?

⁴ Ngar er a uchelel a reksi er a klechad, e tirke el kot el obekel a ngileltii a tekoi el mlo uchul a tellemall. Te millilt el mo mengang er a redechel sel kerrekar er a mo medengei a ungil ma mekngit. (Genesis 2:16, 17) Ngerang a mle uchetemel a omelilt er tir? A Biblia a melekoi el kmo: “Me ngiil redil er a lesa tial kerrekar el kmal klebokel ma redechel lungil osenged er ngii, e ng mocha oureng el kmo ng meral ungil a bo le mellomes a rengud. Me ng ngiluu a redechel el menga er ngii e sola e msa bechil me ng dirrek el milenga er ngii.” (Genesis 3:6) Ma omelilt er a Eba a mle delalem er a ngibeserreng. A blekerdelel a ulerrimel er a Adam el mo meruul er a osisiu el tekoi. Misei a uchul, ma klengit ma kodall a “siliseb ra rokuil chad.” (Rom 5:12) A blekerdelel a Adam ma Eba el diak lolengesenges a ollachidnger el kirel a ngelsengesel a chad: A chad a mo ngiltii a mekngit a lsekum ngdiak loltirakl er a ulekrael er a Dios.

5. Ngera el ulekrael a bla lebeskid a Jehovah, e ngerang a kired el meruul a lsoad el ngmai a klungioled er ngii?

⁵ Ngkol ua ngera el deurreng a dobang e le kede medengei el kmo a Dios a omekrael er kid! A Bades a dmu er kid el kmo: “Kom mo rongesii a ngor el di ngar ulliu el kmo, ‘Tiakid a rael el bo mokiu ngii,’ sel bo metetuchakl el mor a kadikm ma lechub e kom mor a katur.” (Isaia 30:21) A Jehovah a mengedecheduch er kid el okiu a mlukreng el tekingel, el Biblia. Ngkired el mesuub er a Biblia e nguu a melemalt el klemedengei el kirel. A lsekum ngsoad el mo ungil el melilt, e ngkired el menga “medecherecher el kall a lousbech ar mla mukeroul, el tirikel meral oureor chomelebedebekir, el mla muksau el kutukel a ungil ma mekngit.” (Hebru 5:14) Ngsebeched el omeksau a omelebedebeked sel doltaut a tekoi el desuub er a Tekingel a Dios.

6. Ngerang a dousbech er ngii me bo lungil el oureor a ukltked?

⁶ A ukltked a klou a ultutelel el tekoi el dousbech er ngii sel dolilt a tekoi. Tia el tekoi a ngar er ngii a klisichel el oukerrekeriil, me ngsebeched el “dul kaotutakl e dul kasosaod” el okiungii. (Rom 2:14, 15) Engdi, a bo lungil el oureor a ukltked, e ngkirel el mukllomes er a melemalt el klemedengei er a Tekingel a Dios e kerekikl el oltaut er ngii. A lsekum a ukltked a diak loba llomes er a Tekingel a Dios, e ngbeot er ngii el mo oltirakl er a siukang ma ike el blekeradel el meliuekl er kid ma uldesuir a rechad,  e tiang a sebechel el ngoikid el mo er a mekngit. Ngerang a mo duubech el mo er a ukltked a lsekum kede blechoel el mengemikr er ngii e mo omtok er a llechul a Dios? Ngsebechel el mo er ngii a lechul a delul el ua “delul lolangch,” el di ua kisu er a bedengel a chad, el diak lolechesuar a ngerang. (1 Timoteus 4:2) Ngar er a kuk bitang, e a lsekum a ukltked a mukeroul er a Tekingel a Dios, e ngsebechel el mo ungil el omekrael er kid.

7. Ngerang a klou a ultutelel el tekoi el ngosukid el mo ungil el melilt a tekoi?

⁷ Ma leuaisei, e a klou a ultutelel el tekoi el ngosukid el mo ungil el melilt a tekoi a melemalt el klemedengei el kirel a Biblia ma dirrek el meduch el oltaut ngii el klemedengei. Ngkired el mo kerekikl el osiik a omellach er a Dios e mo meduch el ousbech er a uldesued el oltaut aike el omellach. Ma bocha lekired el mereched el melilt a tekoi, el ua Sadrak ma Mesak ma Abednego, e kede kltmokl a lsekum ngmelemalt a klemedengei er kid er a Tekingel a Dios ma ukltked a mla muksau el oltirakl er ngii. A bo dodengei el kmo ngmekerang e a bla demukeroul el mo klou el chad a sebechel el melisiich er a omelilt er kid, e me bo dosaod a eru el tekoi er a klengar er kid.

Te Rua Techang a Mo Sechelid?

8, 9. (a) Ngera el omellach a olecholt er a klungel a ultutelel a dongeroid er kid er a mekngit el klausechelei? (b) A mekngit el klausechelei, ngmelutk el di mo er a klausechelei el obengterir a redengerenger el chad e merekong? Mosaod.

⁸ A apostol el Paulus a milluches el kmo: “Lako mecheuid: ‘A mekngit el klausechelei a tomii a ungil blekeradel.’” (1 Korinth 15:33) A Jesus a dilu er a redisciplo er ngii el kmo: “Diak kom chedal a belulechad.” (Johanes 15:19) Sel bo dodengei aika el omellach, e kede mereched el omtab el kmo ngkired el mengeroid er kid er a rengar er a deleboes ma rengar er a laokreng ma remerechorech ma recheltelaol er a rrom ma remeruul choua ikaikid el tekoi. (1 Korinth 6:9, 10) Ma lorael el mo klou a klemedengei er kid er a klemerang er a Biblia, e kede melechesuar el kmo a domes aika el tekoi er a mubi ma TV ma computer ma donguiu er a babier, a dirrek el sebechel el tomellid. Ngdirrek el uaisei a dengar er a chat room er a Internet el obengterir “a recheblad” el chad.​—Psalm 26:4.

⁹ Engdi kuk ua ngerang a dousechelei er tirke el kora mekedung el chad engdi te diak loumerang er a Dios? A Biblia a dmu er kid el kmo: “A belulechad el rokir a chederdall er ngikel mekngit.” (1 Johanes 5:19) Me kede omtab el kmo a mekngit el klausechelei a diak di lolutk el mo er a rechad el meruul a mekngit e lemerekong. Ma leuaisei, e ngrolel a llomeserreng a domekeroul er a kmes el deleuill er kid el obengterir a rechad el betik a rengrir er a Jehovah.

10. Ngerang a mo ngosukid el mo ungil el melilt a tekoi el kirel a bo dobengterir a rechad er a beluulechad?

¹⁰ Ngdiak el sebeched el mo cheroid er a rechad er tia el beluulechad ma ka lekired el mo uaisei. (Johanes 17:15) E le sel doldingel a obliil ma dengar er a skuul ma doureor e kede blechoel el obengterir a rechad er a beluulechad. A Kristiano, el bechil a diak loumerang, a mocha kirel el obengterir a rechad er a beluulechad el kuk lmuut el klou el taem er a rekuk bebil. Engdi, a bla lemukeroul el mo ungil a uldesued, e kede medengei el kmo ngngar er ngii a klekakerous er a lak desal teloi er a beluulechad ma dosiik a klausechelei el obengkel. (Jakobus 4:4) Seikid, e ngsebeched el mo ungil el melilt el kirel a mo teloi er a bebil el tekoi er a skuul, el ua tekoi er a sports ma ngloik, ma mo er a party ma blengur el obengterir a rechad er a urrered.

Sel Dosiik er a Ureor

11. Ngerang a kired el kot el melatk er ngii sel dolilt el kirel a ureor?

¹¹ A doltaut a omellach er a Biblia el ua klou el chad er a klereng a mo ngosukid el mo melilt el kmo ngmekera ‘dongedmokl rar chedad.’ (1 Timoteus 5:8) A kot el tekoi el kired el melatk er ngii a kmo tiang ngngera el ureor​ —ngerang a kired el meruul er ngii. A dosiik a ureor el ngii a omtok er a Biblia a kmal mekngit. Ma leuaisei, e a remera el Kristiano a diak lekengei a ureor el ngar er ngii er ngii a omengull el bleob ma omerechorech ma mekngit el usbechel a rasech ma lmuut el bebil er a tekoi el omtok er a bades. Ngdirrek el diak domulak ma ka dongeblad er a rechad, el mo lmuut ma lsekum a merreder a orrimel er kid el mo meruul el uaisei.​—Rellir 15:29; Chocholt 21:8.

12, 13. A ngera el ureor ma ngera el kuk bebil er a tekoi a kired el melatk er ngii sel lebo lekired el melilt er a mo urered?

¹² Engdi, ngmo ua ngerang a lsekum a ureor a diak lomtok er a llach er a Dios? Sel lorael el mo klou a klemedengei er kid er a klemerang e bla lemukeroul a omelebedebeked, e kede mo melechesuar a kuk bebil er a tekoi el kired el melatk er ngii. Kede mo mekerang a lsekum ngkired el meruul a tekoi el omtok er a bades, el ua chad el onger er a dengua er a blai er a bakutsi? Me ngike el omdoud ma basio er a ureor a kuk bebil er a tekoi el kired el melatk er ngii. El ua itiang, a lsekum e ke chad er a omengesbereber, e kau ke mo osiik a ureor el kirem el mengesbereber er a ikelesia er a Klsuul el Klechelid el olecholt el kmo ke kongei er a klsuul el klechelid?​—2 Korinth 6:14-16.

¹³ E mekerang a lsekum ngike el oungerachel er a urerem a kongei el mo mengesbereber er a ta er a blai er a klsuul el klechelid? Ngkired el melatk el kmo ngerang a ngerechelek el kirel tia el ureor ma dirrek el ngua ngera klungel el ureor a bo kuruul el kirel. E kuk mekerang a lsekum a ureor a diak lomtok er a Biblia, el ua chad er a bost el merous a babier er a belual, el uldimukl er aike el basio el meruul a mekngit? Seikid e ngkired el melatk er sel uleklatk el ngar er a Matteus 5:45. Ngdirrek el kired el melatk el kmo a bo doruul er ngii er a bek el sils, e ngera ngmo rullii el kirel a ukltked. (Hebru 13:18) Nguaisei, a bo lsebeched el di kid el mengol a telechelled el meduch el melilt a tekoi a belkul a kmo ngkired el smisichii a omelebedebeked ma ukltked el lebilskid a Dios.

“Mletkii a RUBAK er a ikel Bek el Moruul”

14. Sel dolilt a tekoi, e ngera el tekoi a ungil a bo dolatk er ngii?

¹⁴ E kuk mekerang el kirel a omelilt er kid el kirel a kuk bebil er a tekoi, el ua omelilt el kirel a mo er a daingak ma dirrek sel dekengei ma doltngakl a bebil er a rolel a ukeruul? Sel bo lekired el melilt a tekoi, ngkired el melatk a uleklatk er a Biblia e mo meduch el oltaut er ngii. A mellomes a rengul el King el Salomon a dilu el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum. Mletkii a RUBAK er a ikel bek el moruul, e ngii a mo ochotii er kau a melemalt el rael.”​—Osisechakl 3:5, 6.

15. Ngerang a sebeched el suubii er a Rekristiano er a kot el dart el rak el kirel a rolel a dolilt a tekoi?

¹⁵ A tekoi el dolilt el mo meruul a ngar er ngii a lerellii er a rebebil, me ngkired el melatk el kirel tia el tekoi. El ua itiang, tirke el Kristiano er a kot el dart el rak a dikea lengar er a eungel a Llach er a Moses el kirel a kall el longang. Ngmle sebechir el menga kall el dimlak leklikiid er a eungel a Llach e dirrek el diak a ngera el kora mekngit er ngii. Me nguaisei,  engdi, a apostol el Paulus a milluches el kirel aike el charm el luluusbech er a omengull el bleob el kmo: “A lsekum a kall a melibas er chodam er ngak, e ngdikea kluut el menga techel a charm el mo cherechar, el kirel me lak le mesibas chodam er ngak.” (1 Korinth 8:11-13) Tirke el Kristiano er a irechar a lullisiich er tir el mo melatk er a ukltkir a rekuk bebil me lak lolibas er tir. A tekoi el dolilt er ngii a diak el kirel el rullid el mo ‘olibesongel’ el mo er a rebebil.​—1 Korinth 10:29, 32.

Msiiekii a Llomeserreng er a Dios

16. Ngmekerang e a nglunguuch a sebechel el ngosukid el mo ungil el melilt a tekoi?

¹⁶ A nglunguuch a kot el ungil el ngeso sel lebo lekired el melilt a tekoi. A disciplo el Jakobus a dmu el kmo: “Ma lsekum ngngarngii ra delongeliu a ngesonges a llemesel a rengul, e bo lolengit ra Dios el ngikel ka le mekreos ma ka loungeroel e mesterir a rokuil chad, me le nguu.” (Jakobus 1:5) Me ngulterekokl a rengud el kmo ngsebeched el meluluuch el mo er a Jehovah el olengit er a llomeserreng me lengesukid el mo ungil el melilt a tekoi. Me sel dolecholt aike el ngar er a rengud el mo er a Dios e dosiik a ulekrael er ngii, e a chedaol el reng a ngosukid el mo omtab a belkul a bades e dirrek el ngosukid el lmatk a kuk bebil er a bades.

17. Ngmekerang e a rekuk bebil a sebechir el ngosukid el melilt a tekoi?

¹⁷ Ngsebechir a rekuk bebil el ngosukid a bo dolilt a tekoi? Chochoi, a Jehovah a mla meskid a remechuodel el ngar er a chelsel a ongdibel. (Efesus 4:11, 12) Ngungil a bo dongedecheduch er tir, tokubets a lsekum ngkmal oberaod tia el tekoi. A rechad el klou a klemedengei er tir er a tekoi er a klereng ma tekoi er a klechad a sebechir el ngosukid el lmatk a bebil er a uleklatk er a Biblia el mo ngosukid el “mo mketkelii a ungil ma mekngit.” (Filipi 1:9, 10) Engdi, ngkired el melatk er tiakid el tekoi: Ngkired el mo kerekikl ma rekuk bebil a diak bo lolilt a tekoi el kired. Tiang a ngerecheled, el telechelled.

A Rsel​—Ngblechoel el Mo Ungilbesul?

18. Ngerang a sebeched el melekoi el kirel a rsel a ungil el omelilt?

¹⁸ A ngii di el omelilt el oltirakl er a uleklatk er a Biblia ngblechoel el mo ungilbesul er a uriul? Chochoi, ngkirel el mo klou a rengud el mengiil er ngii. Nguaisei, a lebebil er a taem e ngsebeched el mo chelebangel a ongarm. A Sadrak ma Mesak ma Abednego a mle medengei el kmo te mo okodall a lsekum ngdiak lekengei el mo mengull er sel klou el bleob el chaus. (Daniel 3:16-19) Ma rechapostol a dirrek el mlechelebed e le tir el ullenger er a rechedal a Sanhedrin el kmo ngkirir el oltirakl er a Dios er a bai loltirakl er a rechad. (Rellir 5:27-29, 40) Ma lmuut el tang, a “taem ma techall” a ngar er ngii a lerellii er a omelilt er kid. (Olisechakl 9:11) A lsekum kede mo chuarm e le tekoi el dulilt er ngii a uchul, e ngulterekokl a rengud el kmo a Jehovah a mo ngosukid el outekangel e mo omekngeltengat er kid er a uriul.​—2 Korinth 4:7.

19. Ngmekerang e sebeched el outekangel el mengetmokl er a ngerecheled el mo ungil el melilt a tekoi?

¹⁹ Ma leuaisei, e sel dolilt a tekoi e ngkired el osiik a ngeso er a uleklatk er a Bades e ousbech er a uldesued el oltaut er ngii. Ngkol ua ngera el omereng el saul a dobang e le Jehovah a mla meskid a ngeso el oeak a chedaol el reng er ngii ma remechuodel er a ongdibel el dirrek! Me ngoeak choua ika el ulekrael ma ngeso, e me doutekangel el mengol a ngerecheled el kirel aike el tekoi el bo dolib er a rengud el kirel el ngar er a mellomes el rolel.

Ngera Ke Silubii?

• Ngerang a klou a ultutelel el tekoi el dousbech er ngii sel dolilt a tekoi?

• Ngmekerang e a dorael el mo klou el chad er a klereng a ngar er ngii a lerellii er a omelilt er kid er a remo sechelid?

• Ngerang a bebil er aike el meklou a ultutelel el tekoi el kired el melatk er ngii sel dolilt er a urered?

• Ngera el ngeso a sebeched el ousbech er ngii sel dolilt a tekoi?

[Aike el Ker er a Suobel]

[Siasing er a 24 el llel]

A orrengesmengoit er a Adam ma Eba a osisecheklid er a klou a ultutelel el tekoi

[Siasing er a 26 el llel]

Uchei er a doruul a meklou el omelilt, e mosiik er a uleklatk er a Biblia