A TV​—Ngungil a Lobeteterir a Rengalek?

A LEBEBIL er a taem, e ngsoad el mechiteterir a rengeleked me lemechelaod el omes er a tv me bo lsebeched el remuul a chelsengud. Engdi tiang ngerang mo rullii el kirir a rengeleked?

A babier el The New York Times a ouchais el kmo: “El mo lmuut er a retolechoi me te dirrek el sebechir el mengodech a uldesuir el oeak a osengel a tv.” Ngar er a ta el omesuub, e te ullecholt a mekedeb el program er a tv el mo er a ta rekrir el ngalek e mlo metik el kmo tia el omeruul a sebechel el ngodechii a blekerdelel a ngalek er a kakerous el rolel. Tia el babier el Times a ouchais el kmo: “Sel lsekum ngike el actress a meruul er ngii el medakt er a omotsia, e a rengalek a mo chetirir el ousekool er seikid el omotsia e mo chemolt er a osengir el mekngit a rengrir e suebek a rengrir ma lechub e te lmangel. E sel lsekum ngike el actress a rullii el kmal semeriar er a omotsia, e a rengalek a kmal mo sorir el ousekool er ngii.”

Me ngbleketakl el kmo, a osengel a tv a ngar er ngii a lerellii el mo er a rengalek. E kuk ngua ngerang sel klemengetel a taem el ngalek a omes er a tv? A Dr. Naoki Kataoka, el ngar er a bab el toktang er a Kawasaki Medical College er a Kurashiki er a beluu er a Siabal, a mla metik er a rebetok el ngalek el tir a di lmuk e di ngellomel el kmo te blechoel el omes a tv ma video el kmal kemanget el taem. A eru-rekil el buik a diak el sebechel el mengedecheduch ma longedecheduch e ngkmal diak dodengei a tekingel. E le ngulemuchel er a bo lta rekil el me er a chelechang el di lomes a video er a bek el sils er a tutau el mo klebesei. Engdi uriul e a delal a mlo oltirakl a tekingel a toktang, e tirrebengii a osengel er a tv e mlo obengkel el milil, e seikid e ngmocha merael el mo ungil a ngerel a longedecheduch. Chochoi, a rechedam ma rechedil a kmal kirir el mengoit a temir el lobengterir a rengelekir e mengedecheduch er tir.

A Jehovah el Dios, el Ngike el Uchul a telungalek, a meketeklii a ultutelel sel tekoi el mo uchul a klungiolel a telungalek. Ngdilu er a rechedal er a irechar el kmo: “Mosisechakl el mor a re ngelekem (a Tekingel a Dios). Ke mo omelekl cho mngar a blai ma cho mcheroid, ma cho molengull ma cho moureor.” (Duteronomi 6:7) A rechedam ma rechedil a sebechir el osisecheklterir a rengelekir el oeak a tekingir ma kerebai er tir er “sel meral rolel a klengar” el diak el oeak a osengel a tv.​—Osisechakl 22:6.