A Klubeled el Kirel a Kldidairreng ma Klengareourreng

SEL tekoi el dilubech er a klengar er a King el David a meketeklii a klekakerous er a mera el klengareourreng ma mekngit el kldidairreng. Tiang a dilubech er a taem el David a mlo kats er a Jerusalem e rullii el mo klou el mats er ngii. A David a ulemes er a Jehovah el mera el King er a Israel, me seikid e ngmlo melai er sel Blil a Telbiil, el olecholt el kmo a Dios a ngar er a delongelir, el mo er sel mats. Tia el tekoi a kmal mle klou a ultutelel el mo er a David me ngulechotii a deurreng er ngii er a loeakullir a repriist el mengol er a Blil a Telbiil. A rechad er a Jerusalem a ulemes er a king er tir el “mererdekekl” e “meloik el kmal dmeu a rengul.”​—1 Kronika 15:15, 16, 29; 2 Samuel 6:11-16.

Engdi a bechil a David el Mikal a dimlak el deu a rengul. Ngar er a mado e ulemes me “ng kmal mlo mederdirk a rengul er ngii,” er a bai loldeu er a rengul el mesa David el oldanges er a Jehovah. (2 Samuel 6:16) Ngera uchul ma Mikal a mle mederdirk a rengul? Nglocha ngkmal mle imis el omdasu er sel deruchellel el ngelekel a kot el king er a Israel el Saul, e chelechang e ngbechil a ongeru el king er a Israel. Nglocha millatk el kmo ngika el bechil, el ngii a king, a uchul me ngdiak el kirel el teloi er a redi chad e loldeu er a rengul. Ma osisiu el kldidiul a rengul a mlo chemolt er a tekingel er sera bo lolsiuekl er a David er a lemerema lrei. Ngdilu el kmo: “Ng uoi mle chetengakl a king er a Israel er chelechal sils! Ng dimlak lungil bliull el ua kebelung el ngar mederir a re mesiungel el ekebil ma re ofiser er ngii.”​—2 Samuel 6:20.

Ngmle ua ngera uldesuel a David er a tekingel? A David a chileklii a Mikal e dilu el kmo a Jehovah a ultngeklii a demal er a Saul, e bai ngileltii. E dirrek el dilechelii el kmo: “Me kmengal motuub. Ngdi ungil cho momdasu el kmo ngak a diak a belkuk, e ngdi tirkel ekebil el molekoi er tir a mo chemat er ngak!”​—2 Samuel 6:21, 22.

Chochoi, a David a mle ulterekokl a rengul el mo melemolem el mesiou er a Jehovah el oba klengareourreng. Tia el uldesuel a ngosukid el mo medengelii a uchul ma Jehovah a ulemekedong er a David el kmo “a chad el soal a rengul.” (Rellir 13:22; 1 Samuel 13:14) Nguaisei, a David a uleltirakl er a kot el ungil el kerebai er a klengareourreng​—el ngii a Jehovah el Dios. Me sel tekoi el lullekoi er ngii a David er sera longedecheduch er a Mikal el kmo “me kmengal motuub” a mlengai er a tekoi er a Hebru el luluusbech er ngii el mesaod er a osengel a Dios el kirel a klechad. Malta e a Jehovah a kot el Ngar er a Bab el Dios er a eanged ma chutem, engdi a Psalm 113:6, 7 a mesaod el kirel el kmo ‘e omes el mer iou er a eanged ma chutem [kongei el mecherei a ngar er a bab el deruchellel] e me olekiis er a re mechebuul er a chebechab, e mengider er a re metacherbesrir er a chelebulir.’

Me nguaisei, a Jehovah el ngar er a eou a rengul a uchul me ngouketui er a “simang el ues” er a mekedidai a rengrir el chad. (Osisechakl 6:16, 17) A Mikal a mlengai er ngii sel techellel el mo omechell er a ngelekel a David el sechal, e le ngmle mekngit a blekerdelel e dimlak longull er a chad el bla lengiltii a Dios el mo king. Me ngmlad el diak a ngelekel. Ngkol ua ngera el klou a ultutelel el suobel el kired! Tirke el rokui el sorir el nguu a kengei er a Dios a kirir el oltirakl er tia el tekoi el kmo: “E mdul rokui loubail ra ngariourreng, e ‘a Dios chomtok rar kididai a rengrir, e omsterir a grazia ar ngariou a rengrir.’”​—1 Petrus 5:5.