Ngkmal klou a ultutelel er a tolechoi el longoit er sel kot el sikang er a klengar er ngii el obengkel a delal. E ngera uchul? E le tia ungil kirel a ulekurulel. *

Ngera rullii a chedil el mo soal lomekerreu er a ngelekel tolechoi? A brobesong el Jeannette Crenshaw a mesaod el ngar er a The Journal of Perinatal Education el kmo a chedil sel lemechell e ngmo betok a ildisel a hormone el oxytocin er a bedengel, el ngii “a rullii el mo soal lomekerreu er a ngelekel er a bek el taem el lorutech, lomes, e loltut er ngii.” A dirrek el ta er a hormone el loltobed a bedengel a chedil a “ngosuir el mo medengei a soal a ngelekel” e smisichii tia el ileakl el deleuill er ngii me a ngelekel. Ngera uchul me tia kmal utebengall?

Tia el ileakl el deleuill er a chedil me a ngelekel a lerirellii a Jehovah el Dios er a lomeob. * A King David a kmo a Dios a ulebang el mo lmuut er a ‘cherellel’ e rirellii el mo selebechakl er a kiuoku er a delal. Ngmilluluuch el kmo: “Ak di uluumeral ulsirs er kau er ser ak mechell el mer chelechang; me ser ak mechell el mer chelechang e ke di Dios er ngak.”​—Psalm 22:9, 10.

MUTEBENGII TIANG: A lsekum a Dios er a lomeob er kid a rechad e ngulterekeklii el kmo a chedil a mo kerekikl er a ngelekel e medengei aike el lousbech, e ngdiak lebelkul a kmo ngika kmal omekerreu er a derta er kid el “ngelekel a Dios”?​—Rellir 17:29.

A Jesus Kristus el ngike el kot lungil medengelii a Ulemeob a ullisechakl el kmo: “A di chimol sens a sebechiu el nguu el mechar a teblol chesisebangiau, e ngdi diak a tal chesisebangiau el ruebet er a chutem a lak le kengei a Demmiu. E kemiu a mo lmuut er a chui er a bdelmiu me ng medengei a ildisel a Dios Ma le ua isei e lak kom medakt; kemiu a lmuut el ngar uchei er a rengul a Dios er a betok el chesisebangiau!”​—Mateus 10:29-31.

Ruumesingd el chad a diak letab a mekekerei el charm el leues, e kmal diak lutab sel lerebet el mei er a chutem. Engdi Demad el ngar er a eanged a mtab a derta er ngii! E a suebek el charm el mo lmuut er a kmal betok el suebek el charm a diak bo el mekreos er ngii el ua rechad. Me ngbleketakl: “Lak kom medakt” el kmo a Dios a diak lomtab er kau. Ngkmal ngar ngii a klemeriarreng er ngii er kau!

 A Bades olterekokl a rengud

• “A RUBAK omes a ikel duubech er ker me ker; ng omes er kid a le ungil a doruul ma lechub e ng mekngit.”​—OSISECHAKL 15:3.

• “A RUBAK a mengkar er a re melemalt e orrenges ongterir.”​—PSALM 34:15.

• “Ak mo oldeu er a renguk e mo ungil a renguk er a diak le mengodech el bltkil a rengum, ele ke milsekak er a chelebulek, e dimlak mchitak er a kerior el kmlar a chelsel.”​—PSALM 31:7.

Ngngar ngii a lerellii er a klengar er kid sel dodengei el kmo a Dios a semeriar e kerekikl er kid? Ngkmal uaisei el ua losaod a Hannah * el chad er a England el kmo:

“Ngbetok el taem el blo kumdasu el kmo a Jehovah a diak el betik a rengul er ngak e dimlak longer a nglunguchek. A kulemdasu el kmo tia uaisei le ngdiak a klaumerang er ngak. A kulemdasu el kmo ngomals me a lechub e ngmengemikr er ngak le ngdiak el klou a ultutelek. Ak kmal ulemdasu el kmo ngdiak lomekerreu er ngak.”

Me nguaisei engdi a Hannah mla mo diak loumededenger er a ulekerreuil me a bltkil a rengul a Jehovah. Ngera ngildechii a uldesuel? Ngmelekoi el kmo: “Ngmilekekokil mengodech a uldesuek. Ak dirk melatk er a ta el cheldecheduch el krirengesii er a betok el rak er uchei el ngii a mesaod el kirel a olubet el tengetengel a Jesus. Tia kmal klou a lengilsukak er ngii ngdirrek el ulelterekokl er a renguk er a bltkil a rengul a Jehovah. E sel le monger a nglunguchek e ak blechoel el di lmangel e le ak mtebengii el kmo a Jehovah a kmal betik a rengul er ngak. Ngdirrek el omesubek er a Biblia e mora miting a uchul me a kmla suub a betok el kirel a Jehovah me a blekerdelel me a dirrek el uldesuel el kired. Chelecha e ngkmal sebechek el bleketakl el mesa ulekerreuil me a bltkil a rengul a Jehovah el mei er kid el rokui me a reng er ngii el soal lomekerreu er a derta er kid.”

A tekingel a Hannah kmal melisiich. Engdi ngmekera sebechel mo ulterekokl a rengum el kmo a Dios a medengei e dirrek el diak lobes a tekoi el omomelechesiu? A ongingil suobel a mo mesaod er tiang.