A apostol Paulus a milluches el mora Rekristiano er a Thesalonika el kmo: “A lsekum e ngngar ngii a chad el diak lolengesenges a tekingam el ngar tia el babier, e mlia olengchelel.” (2 Th. 3:​14, NW) Uchelel e kede dilu el kmo, tia ulekrael el mora remechuodel. A lsekum a chad a melemolem el otngakl omellach er a Biblia alta ngmla mo betok el lolekoi er ngii, e a remechuodel a mo otebedii a cheldecheduch el kirel. E a uriul e a rechedal ongdibel a diak bo longoit a taem lobengkel ngii el chad er a ikrel a miting me a odingel.

Me nguaisei engdi kede ousbech er omeldechel tia el tekoi. A omellach er a Paulus a melutk el kirel a tekoi loruul er ngii a rederta el Kristiano er a chelsel a bebil el blekeradel. Me a remechuodel a diak lousbech el mo oltobed er a cheldecheduch. Ngera uchul me kede melodech er a klemedengei er kid el kirel tia el bades? Molatk er a cherrengelel a babilengel a Paulus.

A Paulus miltebengii el kmo te mla er ngii a rebebil el ngar ongdibel el “chebirukel a rolir.” Te dimlak lekengei el lolengesenges a mlukreng el omellach. Ngar er a ta er a odngelel el mong er a uchei e ngdilu el kmo: “Ngikel chetil el oureor a diak le kirel el mengang.” Me nguaisei te dirk mla er ngii a dimlak lekengei el mo oureor el mesiou er tir alta ngmle sebechir. Me a lmuut kung te di tir lolsiseb er tir er a business er a rechad. Ngmle kirel uangerang omerellir a Rekristiano el bedul tirka el chebirukel a rolir?—2 Th. 3:​6, 10-12, NW.

A Paulus a dilu el kmo: “Mlia olengchelel.” Tiang el tekoi er a Grik a belkul a kmo ke mo kerekikl er a uaisei el chad. A Paulus a milsang a ongdibel el rokir tia el omellach ngdiak di le remechuodel. (2 Th. 1:1; 3:6) Me a rederta el Kristiano el miltebengii el kmo ngngar ngii a kldemel el Kristiano el diak lolengesenges a mlukreng el omellach a melilt el diak bo ‘lobengkel.’

Tia ngbelkul a kmo, a omerelled el bedul ngii el chad a mo uai omerelled el bedul a chad el mla mesuld a ngklel er a ongdibel? Ngdiak. A Paulus a dilu el kmo: “Momeklatk er ngii el odam er kemiu.” Me a rederta el Kristiano a mo mengoit a taem el lobengkel er a miting me a odingel engdi ngdiak lolilt el mo obengkel el meruul a tekoi er a omilil. E ngerang? A Paulus a kmo: “Me di lengii el mo merur.” Tia el olengchelel ngii el Kristiano a sebechel rullii mo merur el kirel a blekerdelel e ngmodech omerellel.—2 Th. 3:​14, 15, NW.

Ngmekera loltaut er tia el omellach a Rekristiano er chelecha el taem? A kot e ngkired el make sure el kmo a chad a mera el ‘chebirukel a rolel’ el ua losaod er ngii a apostol Paulus. Ngika diak losaod er tirke el ngodech a preference er tir me a lechub ngkuk di ngodech omelilt er tir er a tekoi el di ior a ukltkel a chad. Me a diak losaod er tirke el mla tomall a rengud. Ngbai a Paulus a milsaod er tirke el durengrir el melilt el diak lolengesenges a bleketakl el omesmechokl er a Dios.

A lsekum kede mtebengii er chelecha el taem el kmo a kldemed el Kristiano a melemolem el diak lolengesenges a bleketakl el lomesmechokl er a Tekingel a Dios, a e ngdi kid el ngiltii el mo diak dongoit a taem el lobengkel er a rolel a tekoi er a omilil. Ngii el omelilt er a rederta el chad, a uchul me ngdiak bo dosaod er ngii lobengkel a ngii di el chad el diak dedak el kiei. Kede dirrek el dirk melemolem el mengoit a taem el lobengkel er a miting me a odingel. Sel lesemecheklii a rolel e kede lmuut el mo obengkel el meruul a tekoi er a ikrel miting me a odingel.