1, 2. (a) Ngera omesodel a Jehovah el kirel chelecha el taem? (b) Ngera el ker a mo monger er tia el suobel? (Momes er a siasing er a uchelel a suobel.)

 A JEHOVAH a milsaod er a taem er kid el kmo, “a re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” (Sek. 8:23) Me ngika el “chad er a Judea” a omtechei er tirke el Dios a mla melilt er tir el okiu a chedaol reng er ngii, e te dirrek el okedongall el “Israel ra Dios.” (Gal. 6:16, BT) Me tirka el “truich el chad” a omtechei er tirke el oba omelatk el mo kiei er a chutem el mo cherechar. Te medengei el kmo a Jehovah a mla omekngeltengat er tirka el ngellitel el chedal, me ngdmeu a rengrir el teloi er tir el mengull er Ngii.

² Me a Jesus a di ua profet el Sekaria el milsaod el kmo a rechedal a Dios a mo oba kltarreng. Ngmilsaod er tirke el oba omelatk el mo kiei er a eanged el tir a “kekerel delebechel” me tirke el oba omelatk el mo kiei er a chutem el tir a ‘kuk bebil el sib’ el kmo, te “di mo tal delebechel el obengkel a tal mengkerengel a sib.” (Lk. 12:32; Jn. 10:16) Me aika el eru el cheldellir a rechad a rulleterir a rebebil el mo omdasu  el kmo: (1) Ngkirir tirke el kuk bebil er a sib el mo medengei a ngklir a rokui el ngellitel er chelechang? (2) Ngkirel el mo ua ngera uldesuir a rengellitel el di kirir? (3) A lsekum a ta er a chad er a ongdibel a omuchel el melai a klekedall er a Chedaol Belsoil, e ngmo ua ngera omerellek el bedul ngii? (4) Ngkirek el bekikl er a ildisir a rengellitel a lsekum ngdi meleketek? Tia el suobel a mo onger aika el ker.

3. Ngera me ngdiak el sebeched el mo medengelterir tirke el mo teloi er a 144,000 el ngellitel?

³ Me tirke el kuk bebil el sib, ngkirir el mo medengei a ngklir a rokui el ngellitel er chelecha el taem? Ngdiak. E ngera uchul? E le ngdiak el sebeched el mo medengei el kmo te rua techang er tir a mo ngmai a omeksulir. ^[1] Me alta e a Dios a mla omekedong er tir el mo er a eanged, engdi te mo ngmai a omeksulir a lsekum te melemolem el blak a rengrir. A Satan a ungil el medengelii tiang, me ngousbech er a “re diak le meral profet” el melasem el ‘mengeuid’ er tir. (Mt. 24:24) Me a rengellitel el Kristiano a diak el sebechir el mo ulterekokl a rengrir el kmo te mo nguu a omeksulir el mo lmuut er a taem el Jehovah a meketeklii el mo er tir el kmo te mla mukerrekeriil el mle blak a rengrir. Me a Jehovah a ngike el mo olterekokl er tia el tekoi, e mesterir a ulebongel el olangch er a uchei er a lemad me a lechub e ngdi telkib er uchei er a lomuchel a kloul ringel.​—Och. 2:10; 7:3, 14.

4. A lsekum e ngdiak el sebeched el mo medengei a ngklir tirke el rokui el ngellitel er chelechang, e kede mekerang e mo ‘obengterir’?

⁴ Me a lsekum e ngdiak el sebeched el mo medengei a ngklir tirke el rokui el ngellitel er chelechang, e ngmekerang a kuk bebil el sib e mo ‘obengterir’? A Biblia a kmo: “A re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” Me alta e a Biblia a di mesaod el kirel a ta el chad er a Judea, engdi sel ledu el kmo “obengkem” e ngmesaod el kirir a rebetok. Me tiang a belkul a kmo a chad er a Judea a diak di le ta el chad, e ngbai omtechei er a cheldellir a rengellitel. Me tirke el kuk bebil el sib a medengelii tiang me te mesiou er a Jehovah el teloi er tirka el chad. Me ngdiak a ultutelel el bo lodengei a ngklir el rokui e bochu loltirakl er tir. E le Jesus a ngike el Merredeled, me a Biblia a subedid el kmo ngkired el di oltirakl er ngii.​—Mt. 23:10.

5. Ngera el omengelechel a kmal kirir a rengellitel el melatk er ngii? E ngera uchul?

⁵ A rengellitel a kmal kirir el melatk er a omengelechel el medung er a 1 Korinth 11:27-29. (Monguiu.) Ngmekerang a ngellitel e menga er a blauang e melim er a bilong “e diak le kldmokl el kirel” er a temel a Chedaol Belsoil? A lsekum ngdiak lolemolem a ungil el deleuill er ngii me a Jehovah e mo diak leblak a rengul el bedul Ngii, e sel bo lolai aika el klekedall e ngochotii el kmo ngmeterekakl a omerellel. (Heb. 6:4-6; 10:26-29) Me tiang a mesisiich el uleklatk el mo er a rengellitel me lolemolem el blak a rengrir a lsekum ngsorir el mo nguu a “nguked, el ingii a okedongel a Dios el okiu a Kristus Jesus.”​—Fil. 3:13-16.

6. Ngkirel el mo ua ngera uldesuir a rengellitel el Kristiano?

⁶ A Paulus a dilu er a rengellitel el Kristiano el kmo: “Momtebechel a klengar er kemiu el oltirakl er sel rolel a klengar el lulterekeklii a Dios el kiriu er ser a lomekedo er kemiu.” Me te mekera loruul er tiang? A Paulus a silodii el kmo: “Di blechoel el oba ngariourreng, ma delemedemekerreng, ma kllourreng. Molecholt a bltikerreng er kemiu el outekangel a rengmiu er a blekerdelel a ta ma tang. Bor sel kot er bab el sebechiu el omtebechel er a kltarreng el loliukes er ngii a Chedaol Reng el okiu a budech el merenged el oldak er kemiu.” (Efe. 4:1-3) Me a chedaol reng er a  Jehovah a ngosuterir a remesiungel el mo ngariou a rengrir. (Kol. 3:12) Me a rengellitel a diak el kirir el omdasu el kmo te kuk ungil er a rebebil. Te ungil el medengei el kmo a Jehovah a diak lomesterir a kuk ileakl el chedaol reng er ngii el kuk ngodech er a lomesterir a rebebil el mesiungel. E diak lomdasu el kmo te lmuut el medengei a dmolech el tekoi er a Biblia er a ngii di el chad. Ngdirrek el diak el kirir el omekedong er a rebebil el mo teloi er tir el melai a klekedall er a temel a Chedaol Belsoil e le tir el omdasu el kmo tirkang a dirrek el ngellitel. Te bai oba klengariourreng e medengei el kmo, ngdi ta el Jehovah a sebechel el omekedong er a rechad el mo er a eanged.

7, 8. Ngera el tekoi a diak el kirir el meruul er ngii a rengellitel, e ngera uchul?

⁷ Me alta e a rengellitel a melechesuar el kmo tia kmal ileakl el techall el tir a mla nguu a okedong el mo er a eanged, engdi ngdiak longerechir er a rechad el mo meruul a ileakl el tekoi el di kirir. (Efe. 1:18, 19; monguiu er a Filipi 2:2, 3.) Te dirrek el medengei el kmo, a Jehovah a diak losubed er a rokui el chad er sel taem el lolilt er a remo ngellitel. Me a ngellitel a diak el kirel el mechas a rengul a lsekum a rebebil a diak loumerang el kmo ngmla mengilt. Ngungil el medengei el kmo a Biblia a omeklatk er kid me lak demereched el mo oumerang er a chad el melekoi el kmo a Dios a mla msang a ileakl el ngerachel. (Och. 2:2) Ngdirrek el diak el soal a rechad a bo lomes er ngii el ua ileakl el chad a uchul me ngdiak losubed er a ngii di el chad el kmo ngii a ngellitel. Ngdirrek el diak lekora ousulecholt aike el bo loruul sel lebo er a eanged.​—1 Ko. 1:28, 29; monguiu er a 1 Korinth 4:6-8.

⁸ Me a rengellitel el Kristiano a diak el kirir el di mengoit a temir el di dmak el ua lechedal a ta el cheldebechel. Ngdirrek el diak el kirir el di osiik er a rengellitel el odam er tir me bo lsebechir el mesaod er tia el okedong el bla lenguu, me a lechub e losiik a techellir el mo dmak e losuub er a Biblia. (Gal. 1:15-17) E le ngmo diak a kltarreng er a chelsel a ongdibel a lsekum te meruul el uaisei. Sel loruul el uaisei e te mo omtok er a chedaol reng er a Dios, el ngii a olengeseu er a rechad el mo er ngii a budech me a kltarreng er a delongelir.​—Monguiu er a Rom 16:17, 18.

9. Ngera me ngkired el kerekikl a omerelled el bedul tirke el melai a klekedall er a temel a Chedaol Belsoil? (Momes er a baks el “ A Bltikerreng a ‘Diak Loruul a De Merur er Ngii el Tekoi.’”)

⁹ Ngmo ua ngera omerellem el bedul a rengellitel el rudam me a rudos? A Jesus a dilu er a redisaiplo er ngii el kmo: “Kemiu el rokui a di odam.” E dirrek el dilu el kmo: “Ngikel di ngii el olengesechekl er ngii a mo monganget, e ngikel di ngii el olenganget er ngii, a mo mongesechekl.” (Mt. 23:8-12) Me ngdiak el kired el kmal mo imis el chemat er a chad alta e ngellitel el odam er a Kristus. A Biblia sel losaod el kirir a remechuodel e ngmelisiich er kid el mo oukerebai a klaumerang er tir, engdi ngdiak lolekoi el kmo kede meruul er a ngii di el chad el mo merredeled. (Heb. 13:7) Ngklemerang el tekoi, a Biblia a melekoi el kirir a rebebil el kmo “mongull er tir el kachisois,” e le tir “el ungil lomekrael” e “chorma loureor el kirel a berekel a tikingel a Dios ma chosisechakl.” Me a omengull el mo er tir a diak lebelkul a kmo tir el ngellitel a uchul. (1 Ti. 5:17, BT) A lsekum kede kmal mo imis el chemat er a rengellitel e ngsebeched el rulleterir el mo merur. Me a lechub e kede bai rulleterir el mo mekedidai a rengrir. (Rom 12:3) Me ngdiak el soad el rullii a ngii di el tekoi el mo uchul me a ta er a ngellitel el odam er a Kristus a mo mesibas!​—Lk. 17:2.

10. Ke mekerang e ochotii a omengull el mo er a rengellitel el Kristiano?

¹⁰ Kede mekerang e ochotii a omengull el bedul tirke el bla lolilt er tir a Jehovah el mo ngellitel? Ngdiak el kired el oker er tir er a rolel e te mlo ngellitel, e le tiang a kuk di kirel ngii a medengelii  e merekong. Ngdiak a llemelted el mo medengelii. (1 Th. 4:11; 2 Th. 3:11) Ngdirrek el diak el kired el omdasu el kmo a rebecherir me a rechad er a blirir a dirrek el ngellitel, e le chad el mo ngellitel a diak lolai er tia el diukes el okiu a rechedal. (1 Th. 2:12) Ngdirrek el kired el kerekikl me lak doker a ker el mo uchul a telemellel a rengrir a rebebil. El ua tiang, ngdiak el kired el oker er a bechil a ngellitel el kirel a uldesuel sel lodengei el kmo ngmo kiei er a chutem el diak a bechil. E le kid el rokui a ungil el medengei el kmo, ngar er a chelsel a beches el beluulechad e a Jehovah a mo “mesterir a rokui a ikel lousbech.”​—Psa. 145:16.

11. Kede oibngid er a ngera el tekoi a lsekum ngdiak ‘dolad er a re chad’?

¹¹ A lsekum a omerelled el bedul a rengellitel a di ua omerelled el mo er a rebek el chad e tiang a mo uchul a ulekerreu el kired. El mekerang? A Biblia a ouchais el kmo te locha mo er ngii “tirke el leko te dirrek el oumerang” e melekoi el kmo te ngellitel el ngar er a chelsel a ongdibel. (Gal. 2:4, 5; 1 Jn. 2:19) Me a lmuut el tang, te locha mo er ngii a rengellitel el diak lolemolem el blak a rengrir. (Mt. 25:10-12; 2 Pe. 2:20, 21) Engdi a lsekum kede kerekikl me ngdiak ‘dolad er a re chad,’ e ngdiak bo doltirakl er a rechad el mo lmuut er tirke el ngellitel me a lechub e ngmerael a chisir me a lechub e ngtirke el mla mesiou er a Jehovah el kemanget el taem. Me a lsekum tirka el chad a mo mechitechut a klaumerang er tir me a lechub e te mo cheroid er a ongdibel, e ngdiak doridii a klaumerang er kid er a Jehovah e bo lak dosiou er Ngii.​—Jud. 16.

12, 13. Ngera me ngdiak el kired el bekikl er a ildisir tirke el melai a klekedall er a temel a Chedaol Belsoil?

¹² Ngmla mo betok el rak el ildisir tirke el melai a klekedall er a temel a Chedaol Belsoil a di merael el mo kesai. Engdi ngmla mo telkib el taem el bek el rak e tia el ildois a di merael el mo betok. Me kid, ngkired el mo bekikl er tia el ildois? Ngdiak el kired. Me bo desa sel uchul me ngdiak el kired el bekikl.

¹³ “A Rubak a medengelterir a re chedal.” (2 Ti. 2:19) A rudam el omechur er tirke el melai a klekedall er a temel a Chedaol Belsoil a diak leua Jehovah el ungil el medengelterir a rengellitel. Me a ochur el lenguu a uldimukl er a ocherengir tirke el omdasu el kmo te ngellitel e a lechub e ngdiak. El ua tiang, te ngar er ngii a millai aika el klekedall er a uchei e mlo diak lolai er a uriul. E a rekuk bebil a locha ngar er ngii a mondai er a uldesuir e oumerang el kmo te mo mengedereder el obengkel a Kristus el ngar er a eanged. Me ngbleketakl el kmo ngdiak dodengelii a mera el  ildisir a rengellitel el ngar tia el chutem er chelechang.

14. Ngera omesodel a Biblia el kirel a ildisir tirke el ngellitel el mo medechel er a chutem sel lomuchel a kloul ringel?

¹⁴ Sel bo el temel a Jesus el me melai er a rengellitel el mo er a eanged e ngmo melai er tir er a chelsel a betok el beluu er a beluulechad. A Biblia a mesaod el kmo a Jesus “a mo odercheterir a re anghel er ngii el mor a ikel eual ulebengelel a beluulchad, me te mo chudelterir a re ngellitel el chedal er a bital beluulchad el mor a bitang.” (Mt. 24:31) Me a Biblia a dirrek el meketeklii el kmo ngar er a taem er a ulebongel e te dirk ngar er ngii a remekesai el ngellitel el medechel er a chutem. (Och. 12:17) Engdi ngdiak louchais er a ildisir tirke el mo medechel er sel taem el lomuchel a kloul ringel.

15, 16. Ngera el tekoi a kired el melatk el kirir tirke el 144,000 el lolilt er tir a Jehovah?

¹⁵ A Jehovah a tutkii a taem el bo lolilt er a rengellitel. (Rom 8:28-30) A Jehovah a ulemuchel el melilt er a rengellitel er a uriul er a lebekiis er a kodall a Jesus. Me ngsebeched el omdasu el kmo sel taem er a rekot el Kristiano e tirke el rokui el Kristiano a mle ngellitel. E a betok el dart el rak er a uriul e a oumesingd er tirke el millekoi el kmo te Kristiano a dimlak lemera el oltirakl er a Kristus. Me nguaisei, engdi ngar er a chelsel aike el osisiu el rak e a Jehovah a millilt er a redi kesai, el tir a mle mera el Kristiano. Tirkang a ua ungil el dellomel el Jesus a dilu el kmo ngmo dmak ngii me a mekngit el dellomel el mukeroul. (Mt. 13:24-30) Me ngar er a chelsel aika el uriul el sils, e a Jehovah a dirk melemolem el melilt er tirke el mo churrengelii tia el ochur el 144,000. ^[2] Me a lsekum a Dios a soal el melilt er a rebebil er tir er a telkib el taem er a uchei er a ulebongel, e tiang a llemeltel el meruul er ngii. (Isa. 45:9; Dan. 4:35; monguiu er a Rom 9:11, 16.) ^[3] Me ngkmal kired el kerekikl er kid me lak bo deua tirke el chad er a ureor el milengeremrum er sel omerellel a mastang el mo er tirke el chad el di uluureor el ta el sikang.​—Monguiu er a Mateus 20:8-15.

¹⁶ Ngdiak el tirke el rokui el oba omelatk el mo kiei er a eanged a toketekii a “blak a rengul e mellomes a rengul el mesiou.” (Mt. 24:45-47) Ngdi ua taem er a rekot el Kristiano, a Jehovah me a Jesus a ousbech er a redi kesai el mo omekang me a lechub e te olisechakl er a rebetok. Me te di mle kesai el ngellitel el Kristiano er a irechar a luluusbech er tir el meluches aike el Bades el tekoi er a Grik. Me chelechang e te di kesai el ngellitel el Kristiano a mukngerachel el mo omesterir a rechedal a Dios “a kelir er sel belsechel.”

17. Ngera kede mla suubii er tia suobel?

¹⁷ Me ngera kede mla suubii er tia el suobel? A Jehovah a mla tibir el mo mesterir a ruumesingd el chad a diak a ulebengelel el klengar er tia el chutem, me a dirrek el klengar el ngar er a eanged a lebesterir tirke el mo mengedereder el obengkel a Jesus. Me alta ngike el “chad er a Judea” me a “re truich el chad” a kakerous a omeltkir, engdi ngmengerechir er tir el rokui el mo olengesenges a osisiu el llach e melemolem el blak a rengrir e ngariou a rengrir. Ngdirrek el kmal kirir el oba kltarreng e dmak el mesiou er Ngii, e mo blak a rengrir el meleketek er a budech er a chelsel a ongdibel. Me a cherengel a taem el lolekeed a ulebongel, e bo dedak el rokui e dolemolem el mesiou er a Jehovah, e doltirakl er a Kristus el ua ta el delebechel.