A blechoel el nger er a rechad:

▪ “A rokui el klechelid a di rael el mo er a Dios.”

▪ “A lsekum e ngblak a rengum e ngdiak a belkul aike el tekoi el moumerang.”

Ngerang dilung a Jesus?

▪ “Bo msiseb er chobutek el siseball; e a siseball el mora tellemall a klou, ma rael er ngii a meteu, me te betok ar chad el soiseb er ngii. E a siseball el mora klengar chobutek, ma rael er ngii a kekerei, me te mekesai ar chad el metik er ngii.” (Matteus 7:13, 14) A Jesus a dimlak loumerang el kmo a rokui el rael a di mo er a Dios.

▪ “Sel sils e te betok ar mo dmu er ngak el kmo, ‘Rubak, Rubak, a ki kora ulemlaoch loba ngklem, a ki kora dirrek luleldik rar mekngit el reng loba ngklem, e meruul a betok el ngarngii a klisichel lurreor loba ngklem?’ Isei e ak bleketakl dmu er tir el kmo, ‘Ngkmal diak kudengelkemiu; mcheridemiu ar meruul a chelebirukel.’” (Matteus 7:22, 23) Me a Jesus a diak el kengei er tirke el rokui el melekoi el kmo te oltirakl er ngii.

A REBETOK el chedal a klechelid a kmal oumerang aike el siukang me a osisechakl er a klechelid er tir. Engdi ngera mo duubech a lsekum a osisecheklir a diak loltirakl a osisechakl el ngar er a  Tekingel a Dios el Biblia? A Jesus a ulechotii a kngtil a doltirakl a siukang er a rechad er sera longedecheduch er tirke el mengeteklel a klechelid er a taem er ngii, el kmo: “Ko meruul a tikingel a Dios el mo diak a blkul, el tekoi er kemiu ra rechuodel el mei a uchul.” E liluut el dochelii el kmo: “Ar chad er tial renged a mengull er ngak era di berdel a ngerir, e a rengrir a cheroid er ngak, te mla ngma llach rar chad me ngosisecheklir e olisechakl, me te mengull el meluluuch er ngak el diak a blkul.”​—Matteus 15:1-9; Isaia 29:13.

A omerelled a lmuut el klou a ultutelel, el diak di el klaumerang er kid el merekong. A Biblia a melekoi el kirir a rebebil el leko te mengull er a Dios el kmo: “Te melekoi ra ngerir el kmo, ‘A ki medengelii a Dios;’ e chomerellir choumededenger er ngii.” (Titus 1:16) E dirrek el melekoi el kirir a rechad er a chelecha el taem el kmo: “[Te] betik a rengrir ra tametereng el kuk ngaruchei ra le betik a rengrir ra Dios, te teletelel a ngar chomeluu ra Dios e mengoit ra klisichel ngiil tekoi. Mongeroid er kau er tirikel uaisel chad.”​—2 Timoteus 3:4, 5.

Ngar er ngii a lmuut el meklou a ultutelel er a di blakerreng. E ngera uchul? E le a chad a sebechel el mo blak a rengul er a cheleuid el rolel. Me ngkmal klou a ultutelel a melemalt el klemedengei el kirel a Dios. (Rom 10:2, 3) Me a denguu tia el klemedengei e doltaut aike el lolekoi a Biblia e ngmo uchul e kede odeuir a rengul a Dios. (Matteus 7:21) Me nguaisei, a mera el klechelid a ngar er ngii er ngii a melemalt el uldasu me a melemalt el osisechakl me a melemalt el omeruul. E a melemalt el omeruul a belkul a kmo kede meruul a soal a Dios er a bek el sils!​—1 Johanes 2:17.

A lsoam a lmuut el omesodel a Biblia el kirel a Dios e momekedong er a Resioning er a Jehovah el kirel a diak el ocheraol el omesubel a Biblia.

[Blurb er a 9 el llel]

A mera el klechelid a ngar er ngii er ngii a melemalt el uldasu me a melemalt el osisechakl me a melemalt el omeruul