A blechoel el nger er a rechad:

◼ “Ngua eolt el ngar er a ngii di el ker.”

◼ “Ngdiak el sebechel el medebodeb a llemesel a rengul me a klisichel.”

Ngerang dilung a Jesus?

◼ “A blil a Demak a betok a blil a delengchokl er ngii.” (Johanes 14:2 ) A Jesus a melekoi el kirel a Dios el kmo ngar er ngii a ulterekokl el delengcheklel.

◼ “Ak mlara Chedam el mei el mera belulechad; e lmuut el mo cheroid er tial belulechad el mora Chedam.” (Johanes 16:28) A Jesus a uluumerang el kmo a Dios a mera el ngar er ngii, e kiei er a ulterekokl el basio.

A JESUS a dimlak a ta el losaod er a Dios el kmo ngua eolt. E ngbai milengedecheduch er a Dios e dirrek el milluluuch el mo er ngii. Ngmle blechoel el omekedong er a Jehovah el kmo ng Demal el ngar er a eanged, el lulechotii a kmes el deluill er tir.​—Johanes 8:19, 38, 54.

Ngklemera el tekoi, “a Dios a reng” e ‘direkak a chad el mla mesang.’ (Johanes 1:18; 4:24) Engdi tiang a diak el belkul a kmo ngdiak a bedengel me a teletelel. A Biblia a kmo: “Ma lsekum ngngarngii a chelechad el tech, e ngdirrek el ngarngii a chelechad el reng.” (1 Korinth 15:44) Ma leuaisei e a Jehovah ngngar er ngii a bedengel el chelechad el reng?

Chochoi. Sera lebekiis a Jesus e ng “mlo soiseb ra kmal eanged el mlo duum er medal a Dios el kired.” (Hebru 9:24) Tiang a osisecheklid er a eru el meklou a ultutelel el tekoi el kirel a Dios. A kot, e ngar er ngii a ulterekokl el delengcheklel. E a ongerung, e Ngii a diak el klisiich el ngar er a di el basio er a osisiu el taem.

Ngmekerang e ngar er ngii a klisichel a Dios el sebechel el mengedereder a rokui el tekoi? A Dios a sebechel el odureklii a klisichel me a lechub a chedaol el reng er ngii el roureur a eanged me a chutem. Me a Dios a di ua chedam el lordersii a chimal el ngosuterir a rengelekel, el okiu a chedaol el reng er ngii e ngmo oltaut a moktek er ngii.​—Psalm 104:30; 139:7.

A Dios a mera el ngar er ngii, e dirrek el ngar er ngii a soal me a chetil​—e sebechel el omelechesiu a tekoi. A Biblia a ouchais er kid el kmo, ngbetik a rengul er a rechedal, e dmeu a rengul er a urerel, e ouketui a omengull el bleob, e mekngit a rengul el kirel a chelebirukel. (Genesis 6:6; Duteronomi 16:22; 1 King 10:9; Psalm 104:31) Ngar er a 1 Timoteus 1:11, e ngokedongall el “ngeltengat el Dios.” Misei a uchul me a Jesus a dilu el kmo ngsebeched el mesuub el mo betik a rengud er a Dios el oba rengud el rokir!​—Markus 12:30. a

[Footnote]

[Blurb er a 5 el llel]

A Dios a ua chedam el lodersii a chimal el okiu a chedaol el reng er ngii el mo oltaut a moktek er ngii