A REBETOK el milliol el ngalek a mukcharm e mechelebed er a bek el rak. A rebetok er tir a oureor el ua resibai er a chelsel a kdekudel el blekeradel. A rekuk bebil a lorrimel er tir el mo soldau me a rebebil a lolterau a bedengir el kirel a udoud. Sei a uchul me ngmeringel er a rengalek el oumerang er a remeklou el chad e le te mlo chuarm er a delenguul el tekoi me a lmuut el bebil er a mekngit el omeruul.

Me nguaisei, te ngar er ngii a rechad el kmal chetirir aika el omeruul el mo er a rengalek. Me alta e te medengei el kmo aika el omeruul a ngar er ngii e le ngrechorecherreng me a delengerenger a uchul, engdi ngmeringel er tir el oumerang el kmo a Dios er a bltikerreng a mechei a choua aika el chebirukel el tekoi me ngmelemolem. Ngsebechir el kora mo omdasu el kmo a Dios a diak el omekerreu er a rengalek me ngmla mechititerir me te di chuarm. Tia ngmera el tekoi? A rengalek el kmal chormang er a mekngit el omerellir a rechad ngolecholt el kmo a Dios a diak el omekerreu er tir? Ngerang kmung a Biblia?

A Dios a Ouketui er a Remelemall er a Rengalek

Ngdimlak el moktek er a Jehovah el Dios el kmo a rengalek a mo mukcharm er a remeklou el chad. A mekngit el omeruul el mo er a rengalek a ta er aike el kmal el mekngit el tekoi el dilubech e le chad el mlo omtok er a Dios el ngar er a sers er a Eden. A ultok el kirel a omengederederel a Dios a mlo uchul e a rechad a mo mekngit a omerellir el mo er a rekuk bebil.​—Genesis 3:11-13, 16; Olisechakl 8:9.

 A Dios a ouketui er tirke el meruul a mekngit el mo er a remechitechut me a remechebuul. A betok el renged er a irechar el dimlak losiou er a Jehovah a uleldars er a rengelekir el tenget el mo er a rechelid er tir, engdi a Jehovah a dilu el kmo: “Ng dimlak kdu er tir me loruul er [tia el tekoi], el ka le blor ngii er a uldesuek.” (Jeremia 7:31) A Dios a ulemeklatk er a rechedal er a irechar el kmo: “Le lsekum kom mo mekngit er [tirke el  diak a demerir me a rederrir] me te lmangel el olengit a ngesou er ngak, e ngak el RUBAK a mo olengeseu er tir. Ng mo kesib a renguk.”​—Exodus 22:22-24.

A Jehovah a Betik a Rengul er a Rengalek

A ulekerreuil a Dios el mo er a rengalek a mocholt er aike el ulekrael el lebilsterir a rechedam me a rechedil. A rengalek el mukeroul er a ungil el delengchokl a mo ungil a blekerdelir sel lorael el mo meklou el chad. Me a Omebeled a kiltmeklii a chebechiil, el kirel el ngar er ngii el mo cherechar, el chad “a mecherei a demal ma delal e mo obengkel a bechil, me bo letal chelechad.” (Genesis 2:24) Ngar er a Biblia, e a durs er a chebechiil a di mo er a rekaubuch el chad me a lebo er ngii a rengalek e te mukerreu er a chelsel a ungil el delengchokl.​—Hebru 13:4.

A Bades a dirrek el melisiich er a klungel a ultutelel a omellach er a rechedam me a rechedil el mo er a rengelekir. A Biblia a kmo: “A re ngalek a sengk el mlar a RUBAK; te meral klengeltengat. A re sechal el ngelekel a kekerel chad a ua kelel a balech el ngar a chimal a tal soldau.” (Psalm 127:3, 4) A rengalek a mekreos el sengk el mla er a Dios el mei me ngsoal a bo el ungilbeserir. A Dios a mengelechel er a rechedam me a rechedil me lebesterir a rengelekir a ungil el ulekrael el kirel a klengar, el di ua chad el kmal kerekikl el omalech er a belechel. A Tekingel a Dios a olisechakl el kmo: “Me kemiul chedam, lak molengasech a rengrir ar ngelekiu, e momekeroul er tir er chomengedung ma chomellach ra Rubak.”​—Efesus 6:4.

A ta er a rolel a Jehovah a lolecholt er a bltkil a rengul el mo er a rengalek a oeak sel lolisechakl er a rechedam me a rechedil el mo omekerreu er a rengelekir er a redengerenger el chad. Ngar er a Israel er a irechar, e a “re ngalek” a mle kirir el mo orrenges er a Llach, el mesaod aike el melemalt el rolel a durs me aike el kuk diak el melemalt. (Duteronomi 31:12; Levitikus 18:6-24) A Dios a soal a rechedam me a rechedil a loruul aike el rokui el sebechir el mo omekerrreu er a rengelekir er a ngii di el chad el sebechel el mo melemall er tir.

A Ungil el Omelatk el Mo er a Rengalek

A bltkil a rengul a Jehovah el mo er a rengalek a lulechotii a Jesus, el ngii a ullecholt a blekerdelel a Demal. (Johanes 5:19) A rechapostol er a Jesus er a lolasem el leko te olengeseu er ngii er a lolekebai er a rechad el obetiterir a rengelekir el mo er a Jesus, e a Jesus a uluungeroel er tir e dilu el kmo: “Bechiiteterir ar mekekerel ngalek me le mer ngak.” E sola e “ngmilechulleterir e ulemor a chimal er bebrir, el ulemekngeltengat er tir.” (Markus 10:13-16) Nguaisei, a rengalek a ngar er ngii a ultutelir er a osengel a Jehovah me a Ngelekel.

Ngdi kmedung e a Dios a mo mesterir a rengalek, el tir a chuarm er a chelechang, a ulengull el oeak a mla metutk el King, el Jesus Kristus. A redengerenger el chad el ngar er tia el beluulechad a mo mokngemed. (Psalm 37:10, 11) E a Biblia a melekoi el kirir a remedemedemek a rengrir el chad el osiik er a Jehovah el kmo: “[Ng] mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:3, 4.

Nguaisei, a Dios a olecholt er a bltkil a rengul er a chelechang el oeak a ngeso er a tekoi er a klereng me a tekoi er a uldasu el mo er tirke el rokui el chormang er a mekngit el omeruul. Ngtibir el kmo: “Ak mo osiik a ikel mla remiid, e oluut a ikel meleuaoch, e merenged a cheltechat er a re telemall, e omkar er a re smecher.” (Esekiel 34:16) Me ngoeak a Tekingel me a chedaol el reng er ngii me a ongdibel er a Rekristiano, e a Jehovah a mengelaod er a rengalek el tir a kmal chormang er a chelebuul. Ngmera el uchul a klou el deurreng a dodengei el kmo, chelechang me a ngar er a medad el klebesei, e a “Chedam ra klechubechub, el Dios er a bek longelaod, [a] mengelaod er kid sel de ngara chelsel a ngiidil ringel.”​—2 Korinth 1:3, 4.

[Credit Line]

© Mikkel Ostergaard/​Panos Siasing