“A secherel a omelim el rrom a uldimukl er a rechad el imis el melim a rrom . . . Me alta e ngngar er ngii a di ta el chad el smecher er a omelim el rrom er a chelsel a telungalek, engdi a rechedal a telungalek a mo chuarm el ngike el chad a uchul.”​−Dr. Vernon E. Johnson.

A EIM a rekil el Alice a lmangel er a dukllel el rengelel a ochil el miltemall er a eru el klebesei er a uchei a uchul me te chilsuesuii, engdi tia el chesuesuel a ochil a kmal mle kmes el omechem er a ochil me ngkmal mlo meringel. Me a Alice a ullengit er a delal me a demal me lenguu el mo er a osbitar, engdi a demal a dirk mle hangover me a delal a ua lulsiseb er a chelsel a mondai el melatk el kmo ngmo olengeseu er a techang el kot.

Sesei el klebesei er a uriul, e tia el ochil a Alice a mlo mad. Sera bocha lorael a lalech el me tuobed er a delongelel a kekul a ochil, me lenguu el mo er a osbitar e lengebetii a chesuesuel a ochil, e ngmechetong tia el ochil me a nurs el ulemes er ngii a mle taorer. Me ngmocha kirir el meluk er a ochil a Alice.

A Chad el Smecher er a Omelim el Rrom me Ngike el Kiei el Obengkel

A telemellel tia el tekoi el dilubech a lmuut el klou er a di uach el miltuk. A demal a Alice a smecher er a omelim el rrom a uchul me ngdiak a klisichel el olengeseu er a ngelekel. A counselor el Toby Rice Drews a kmo, “A chad el smecher er a omelim el rrom a nguu a rrom el mo er a uchei er a telungalek er ngii.”

E kuk mekerang a delal a Alice? Ngii a dirrek el smecher, el diak el kirel a omelim el rrom, e ngbai klengar er ngii a ultuil er a bechil el smecher er a omelim el rrom. Nguaisei, a buch a melasem er a tkul er a bab el sebechel el merrob er a omelmil a bechil me a lechub e ngmelasem el outekangel aike el mengedengodech el blekerdelel. Ngoeak tiakid el omeruul e ngmo mechesang er tia el mondai me ngmekurulii a secherel, el diak el secherel a omelim el rrom. Me tia uchul me a rechad el ua delal a Alice a lomekedong er tir el kmo codependent, el tir a rechad el kiei el obengterir a resmecher er a omelim el rrom.

Me a chad el smecher er a omelim el rrom me ngike el kiei el obengkel a mosiul a klengar er tir er a tekoi me a lechub e ngta er a chad. Alta e te smecher engdi te omdasu el kmo ngdiak el secher. Me tir el terung a di dul el diak el sebechir el ngosuterir a rengelekir. Te kmal mechesang er a meringel el blekerdelel a klengar el ua chad el smecher er a omelim el rrom el diak el sebechel el mtebechelii a omelmil er a rrom, me tir el terung a diak el sebechir el mtebechel a tellemall el mo duubech el mo er a rengelekir, el secherel a omelim el rrom a uchul.

Engdi ngngar er ngii a ngeso el kirel a chad el smecher er a omelim el rrom me a telungalek er ngii. Kede mo mesaod aikang er a ongingil el suobel. a

[Footnote]