A UNGIL el klechelid a olisechakl er kid el mo omdasu a ungil el tekoi e mengikiid a blekerdeled. Ngngosukid el mo ungil el melilt a tekoi e rullid el mo ungil el chad. Kede mekerang e medengei el kmo a ungil el klechelid a sebechel el ngosukid er tia el tekoi?

Ka momtab a tekingel a apostol el Paulus el mo er a Rekristiano er a Korinth, er a beluu er a Gris er a kot el dart el rak. Tia el mats a mle merael a chisel el kirel a mekngit el blekeradel. A Paulus a milengelechel el kmo: “Ar ngara deleboes, mar mesiou a bleob el chelid, mar ngara laokerreng, mar saudil, mar menguchet a raod, mar merechorech, mar nguibes, mar cheltelaol ra rrom, mar melaes, mar umerober a diak bo loudiukes ra rengedel a Dios.” E liluut el dochelii el kmo: “Ngarngii ra chelsiu ar uleuaisei. Ngdi kemiu a mla mengatech, e mlechedaol, e muklemalt luleak a ngklel a Rubak el Jesus Kristus ma [r]eng ra Dios er kid.” (1 Korinth 6:9-11) Ka molebedebek, a ungil el klechelid a mle sebechel el ngosuterir a rebebil el dimlak el llechuul el mo ungil el mesiungel a Dios!

A Biblia a omeklatk el kmo: “E ngmorngii a taem el mo diak el sebechir ar chad el kilou a rengrir ra diak a rekdel losisechakl, me te ngara ikel di sorir el mengidb rar sensei el leko longedecheduch a ikel ungil er chorenges er tir.”​—2 Timoteus 4:3.

Ngerang a osisecheklel a betok el klechelid el kirel tia el tekoi? Ngoltirakl a omellach er a Biblia el kirel a melemalt el tekoi? Me a lechub e ngmengitechut a osisechakl el ngar er a Tekingel a Dios, el di melekoi aike el sorir a rechad el orrenges?

Mchoit a taem el onger aika el ker me bo el sebechem el dongchii a klechelid, el ngii a ourodech a ungil el rodech.

TEKOI EL SOADEL: Chebechiil.

A OSISECHEKLEL A BIBLIA: “A rokuil chad bo longull a chebechiil, e lak longidokel a dusall; e a Dios a mo oukerrekeriil rar ngara deleboes ma laokerreng.”​—Hebru 13:4.

KER: Tia el klechelid ngmelisiich er a rechedal el di mo bechiil el okiu a llach?

TEKOI EL SOADEL: Dertel a chebechiil.

A OSISECHEKLEL A BIBLIA: Sera loker er a Jesus el kirel a dertel a chebechiil, e ngdilu el kmo: “Ngikel mengoit ra bechil el diak el laokerreng a uchul, e mo bechil a ngodech el redil, a mocha ra laokerreng.”​—Matteus 19:9.

KER: Tia el klechelid ngmelisiich a tekingel a Jesus el kmo ngdi ta el laokreng a mo uchul e a chad a sebechel el dortii a chebechiielel, e ngike el dimlak el bo er a laokreng a sebechel el lmuut el mo bechiil?

TEKOI EL SOADEL: Tekoi er a kldung.

A OSISECHEKLEL A BIBLIA: “Mchiis ra deleboes. A ikel bek el ngodech el klengit el le borngii a chad a ngara ikrel a bedengel; ngdi ngikel mora deleboes a mocha ra klengit el kirel a di bedengel.”​—1 Korinth 6:18.

A “redil ra chelsir a ngildechii a kirel a klausau el mora diak le kirel, mar sechal me te dirrek el uaisei el chilitii sel kirel rael el mora redil e dul kmal mlo mekekad ra ngelbesel a rengrir, ma sechal a merruul a de  merur er ngii el tekoi el bedul a sechal, ma blals el kirel ngiil cheleuid er tir a le ngilai el mora bedengir.”​—Rom 1:26, 27.

KER: Tia el klechelid ngolisechakl el kmo ngklengit a durs er a delongelir a rediak el bechiil el chad me a dirrek el sechal me a sechal me redil me a redil?

TEKOI EL SOADEL: A rechedal tia el klechelid a oltaut a omellach er a Biblia.

A OSISECHEKLEL A BIBLIA: “Ak di melluches el kmo, a le ngarngii chokedongall el kmo chodam e le ngara deleboes, malechub e ngngibes, malechub e ngomengull el bleob, malechub e ngomelaes, malechub e le cheltelaol ra rrom, malechub e lomerober e ngdiak mobengkel​—el mo lmuut ra blengur me ngdiak mobengkel.” (1 Korinth 5:11) Ngera mo duubech el mo er tirke el melekoi el kmo te Kristiano e diak el obult er a mekngit el omerellir? A Tekingel a Dios a kmo: “Ngikel mekngit el chad mcheridii ra chelsiu.”​—1 Korinth 5:13.

KER: Tia el klechelid ngmesuld a ngklir a rechedal el tir a mo diak el obult er a mekngit el omerellir?

[Siasing er a 6 el llel]

Ngera el klechelid a ungil a chisel e le ngoltaut a ngar er a bab el omellach er a Biblia el kirel a tekoi er a kldung?