Bo Mungil el Ousbech er a “Tikingel a Dios” el Biblia

‘E mnguu a . . . saider ra reng, el ingii a tikingel a Dios.’​—EFESUS 6:17.

1, 2. Kede mekerang e ngosuterir a relmuut el betok el mo omerk er a Renged?

 ME A Jesus er a lesengei a seked e ngmlo melechesuar el kmo te kirir el mengull er a Dios, me ngdilu er a redisaiplo er ngii el kmo: “A sim a klou, e ar chad el oureor a mekesai; misei e molengit era Rubak ra sim me lodureklterir ar chad ra ureor el kirel a sim er ngii.” Ngdimlak di lolekoi aika el tekoi e lemerekong, e ngbai uriul er a ledu aika el tekoi, e “ngulekerterir ar teruich ma terul Obengkel” e ulderecheterir el mo olisechakl me a lechub e te oureor el kirel a “sim er ngii.” (Matteus 9:35-38; 10:1, 5) Me a uriul, e ngliluut el “ngililteterir ar kuk ngodech el okeuid, e odercheterir el derterung” el mo meruul er a osisiu el ureor.​—Lukas 10:1, 2.

² Chelecha el taem e ngdirrek el kmal usbechall a rebetok el chad el kirel a ureor er a berkel a Renged. A ildisir a rechad el mlo er a Chedaol el Blsoil er a beluulechad el rokir er a rak er a 2009, a mle 18,168,323. Te kuk mle betok er a 10 miliol a domekesiu er tir er a ildisir a Resioning er a Jehovah. A sers a kmal el medechang el kirel a omeridm. (Johanes 4:34, 35) Me ngkmal kired el meluluuch el olengit er a relmuut el betok el chad er a ureor. Engdi kede mekerang a doureor el kirel tia el ongtid? Ngsebeched el meruul er tiang sel bo dungil el churrengelii a omesiunged el blak a rengud el teloi er tia el ureor er a Renged el olisechakl e meruul er a remo disaiplo.​—Matteus 28:19, 20; Markus 13:10.

3. Ngmekerang a chedaol el reng er a Dios e ngosukid el mo churrengelii a omesiunged?

³ Tia el mlo merek el suobel a milsaod er a rolel e kede mongeseu el okiu a chedaol el reng er a Dios el mo “bekeu el mengedecheduch a tikingel a Dios.” (Rellir 4:31) Tia el chedaol el reng er a Dios a sebechel el ngosukid el mo ungil el omerk er a klumech. A ta er a rolel e ngsebeched el mo churrengelii a omesiunged a sel bo dungil el ousbech er a dongu el Jehovah el Dios a mla meskid, el ngii a llechukl el Tekingel, el Biblia, e tiang a mileketmokl el okiu a chedaol el reng er ngii. (2 Timoteus 3:16) A klumech el ngar er a chelsel a mlukreng er a Dios. Me nguaisei, a dousbech er a Biblia el ua uchetemel a osisechekled e ngulterekokl el mo uchul e a osisechekled a mukrael er a chedaol el reng er a Dios. Me a uchei er a bo desa el kmo kede mekerang a doruul er tia el tekoi, e ngungil a dolatk er sel klungel a klisichel tia el Tekoi.

‘A Tekingel a Dios a Ngar er Ngii a Klisichel’

4. Ngera el tekoi el ngar er a klemechel a Dios el Biblia a sebechel el ngodechii a klengar er a chad?

⁴ Ngkmal klou a klisiich el ngar er a tekingel me a lechub e ngklemechel a Dios! (Hebru 4:12) Ngoeak a okesiu e a klemechel el ngar er a Biblia a kuk kedorm er a erebita medal el saider, el ua lorus el ngmoech el imakl a chiuis er a cherrengul a chiuis. A klemerang er a Bades a sebechel el rutechii sel kmal chelsel a rengul me a uldesuel a chad el ochotii sel mera el blekerdelel. Me a klemerang el ngar er a Biblia a ngar er ngii a klisichel el sebechel el ngodechii a klengar er a chad. (Monguiu er a Kolose 3:10.) Me nguaisei, a Tekingel a Dios a mera el sebechel el melodech a klengar!

5. Ngoeak a ngera el rolel e ngomekrael er kid a Biblia, e ngera mo rsel?

⁵ A llomeserreng el ngar er a Biblia a diak el sebeched el metik er ngii er a ngii di el ker. Ngar er a chelsel e ngsebeched el metik a ulekrael el sebechel el ngosuterir a rechad me te melemolem el kiei er a chelsel tia el meringel el beluulechad. A Tekingel a Dios a diak di lomekrael er kid er a chelechang, e ngdirrek el meskid a ulekrael el kirel a ngar er a medad el klebesei. (Psalm 119:105) Ngkmal sebechel el ngosukid el ileakl er sel taem el kid a chelebangel a mondai me a lechub e ngomelilt er kid el kirel a tekoi me a resechelid me a omilil me a ureor me a bail me a lmuut el bebil.  (Psalm 37:25; Osisechakl 13:20; Johanes 15:14; 1 Timoteus 2:9) Me sel doltaut a llach el debetik er a Tekingel a Dios e ngmo sebeched el ungil el teloi er a rechad. (Matteus 7:12; Filipi 2:3, 4) Me sel debecherei a tekingel a Dios me lomekrael er kid, e ngmo sebeched el ungil el melilt a tekoi el ngii a mo uchul a klungioled er a ngar er a medad el taem. (1 Timoteus 6:9) A Bades a dirrek el ouchais er kid el kirel a moktek er a Dios el kirel a ngar er a medad el klebesei el ngosukid el mo meklemeltii a klengar er kid el oltirakl er a moktek er ngii. (Matteus 6:33; 1 Johanes 2:17, 18) A klengar er a chad a mo mui er a deurreng e mo er ngii a belkul a lsekum e ngkongei el oltaut a llechul a Dios er a chelsel a klengar er ngii!

6. Ngua ngera klungel a klisichel a Biblia el kirel a klaumekemad er kid el bedul a Satan?

⁶ Ka molatk er tia el mesisiich el dongu el Biblia, el dousbech er ngii el oumekemad er a Satan. A Paulus a ulemekedong er a Tekingel a Dios el kmo ‘saider ra reng.’ (Monguiu er a Efesus 6:12, 17.) Sel bo dungil el ousbech er a Biblia, e a klumech el ngar er a chelsel a sebechel el ngubeteterir a rechad er a omengederederel a Satan. Tia el saider er a reng a olsobel a klengar, el diak lolemall a klengar. Misei a uchul e ngkmal kired el mo ungil el ousbech er tia el saider er a reng, el Biblia.

Bo Mungil el Ousbech er a Tekingel a Dios

7. Ngera uchul me ngklou a ultutelel el bo demeduch e dungil el ousbech er a ‘saider ra reng’?

⁷ A soldau a sebechel el mo meduch e ungil el ousbech a klekedellel er a mekemad a lsekum e ngblechoel el ousbech. Tia el omeruul a di osisiu el kirel a lsekum a chad a ungil e meduch el ousbech er a ‘saider ra reng’ el omtok er a Satan. A Paulus a milluches el kmo: “Bo le blak a rengum lodersau ra Dios el ua tal chad el mla measem el chad ra ureor, el diak a ngeral le merur er ngii, el melemalt loleisech a tekoi ra klemerang.”​—2 Timoteus 2:15.

8, 9. Ngerang a sebechel el ngosukid el mo medengei a belkul a tekoi el losaod a Biblia? Ka mosaod.

⁸ Ngerang a sebechel el ngosukid el mo “melemalt loleisech a tekoi ra klemerang” el ngar er a omesiunged? Me a uchei er a douchais er a klemerang el ngar er a Biblia el mo er a rechad, e ngkmal kired el omuchel el mo ungil el medengelii a Biblia. Me tiang a belkul a kmo ngkired el mo medengelii a belkul a bades me a lechub e ngsuobel el dosaod er ngii. A ta el dictionary a kmo “a tekoi el ngar er a chelsel a suobel me a lechub e ngbades el dosaod er ngii er a uchei me a uriul er a chelsel a cheldechedechad, a kirel el mo ungil el meketeklii a suobel el dosaod er ngii.”

⁹ Ngsebeched el mo ungil el medengelii a belkul a Bades el oeak sel bo dungil el medengei a belkul aike el rokui el bades el mesaod er a suobel. A tekingel a Paulus el ngar er a Galatia 5:13 a ochotii a klungel a ultutelel aika el tekoi el kmo: “Ngdi, rudam, kemiu el mlokedong a kirel me mnguu a ilmokl; ngdi lak mrellii ngiil ilmokl el mo techellel a urerel a tech, e bai moba bltikerreng el dul kesiou.” Ngera el ilmokl a lulsaod er ngii a Paulus? Ngikang ngmilsaod el kirel a ilmokl er a klengit me a kodall, me a lechub a klsibai er a klsuul el tekoi, me a lechub e ngkuk ta er a tekoi? A cheldecheduch a ochotii el kmo a Paulus a milsaod el kirel a ilmokl er a “dellebeklel a llach.” (Galatia 3:13, 19-24; 4:1-5) Ngmilsaod el kirel a ilmokl el chad a ngiltii el mo oltirakl er a Kristus. E dirrek el  oba omereng el saul el kirel tia el ilmokl el mo oubltikerreng el bedul a ta me a tang, el diak le ua blekerdelir tirke el kaucheraro e dirrek el kauketui.​—Galatia 5:15.

10. Me a bo dungil el medengelii a belkul a Bades, e ngera el tekoi a kired el melatk e ngmekerang e sebeched el ngmai?

¹⁰ A belkul a bades me a lechub e ngsuobel a ngar er ngii a kuk ta er a belkul. Ngsebechel a belkul el uldimukl er a “blekeradel me a omeruul me a uchul e ngdilubech a tekoi.” Me a bo dungil el medengelii a belkul a bades, e ngkired el mo medengei aike el uchul e ngmileketmokl tia el bades. El ua tiang, ngtechang a milluches er a suobel, e tiang milluches er a oingerang, er a chelsel a ua ngera el blekeradel. Ngdirrek el klou a ultutelel el bo dodengelii sel uchul me a babier a milluches, e mle ua ngerang a blekerdelel a klengar er a rechad me a klaumerang er tir er sel taem er a lemeluches tia el suobel. *

11. Ngkired el mo kerekikl er a ngera el tekoi sel dosaod a bades?

¹¹ A lsoad el mo ungil e bleketakl a omesoded er a Bades, e ngkired el mo “melemalt loleisech a tekoi ra klemerang.” Ngkired el mo kerekikl me ngdiak dousbech er a Biblia el omekdakt er a rechad. Me ngsebeched el ousbech a Bades el mesebechakl er a klemerang, el ua Jesus el milsebechakl er a klemerang er a longarm er ngii a Diabelong, engdi ngdiak el kired el ousbech er a Biblia el omekdakt e omekrur er a rebebil me a lechub e dorrimel er tir el mo oumerang er a osisechekled. (Duteronomi 6:16; 8:3; 10:20; Matteus 4:4, 7, 10) Ngkired el oltirakl er a tekingel a apostol el Petrus el kmo: “E di mongedaol ra Kristus el Rubak ra chelsel a rengmiu. E mkedmeklemiu el di sebechiu loba delemedemek ma chomeluu el smodii a blkul sel omelatk el ngara chelsiu er tirikel mengeriil chomesaod.”​—1 Petrus 3:15.

12, 13. Ngera el klemerang er a Tekingel a Dios a sebechel el “toruud cheuatel”? Ka mosaod.

¹² Ngera el tekoi a sebechel el meketmokl a lsekum e kede melemalt el loleisech a klemerang er a Tekingel a Dios? (Monguiu er a 2 Korinth 10:4, 5.) A klemerang er a Bades a sebechel el “toruud cheuatel” el belkul a kmo, ngmeketakl a klsuul el osisechakl me a mekngit el omeruul me a uldasu el lolisiich a rediak el mecherrungel el chad. Ngsebeched el ousbech er a Biblia el mesmechokl aike el tekoi el “lomtok ra klemedengei ra Dios.” A osisechakl el ngar er a Biblia a sebeched el ousbech el ngosuterir a rebebil el sumechokl a uldesuir el mo oltirakl er a klemerang.

¹³ Ngkmal ungil a kerebai el lulechotii a 93 a rekil el mechas er a beluu er a India. Ngmlukeroul el oumerang el kmo a chad sel lemad e a klengar er ngii a moiuid el mo er a charm me a lechub e ngta er a chad e melemolem el ngar. Ngulemuchel el mesuub er a Biblia el oeak sel lekeluches ngii me a ngelekel el sechal, el kiei er a ta er a beluu, me ngkilengei aike el tekoi el lesiluub el kirel a Jehovah me a telbilel. Me nguaisei, engdi a klaumerang er ngii el kirel a klengar el di melemolem el ngar er a uriul er a kodall, a kmal mle mesisiich er a uldesuel me ngulemtok er a ngelekel er a loluches el mo er ngii el mesaod el kirel a blekerdelir a rulekoad. Ngdilu  el kmo: “Ngkmal diak el sebechek el mo medengelii a klemerang er a bades el mosaod. A rokui el klechelid a olisechakl el kmo a klengar a di molemolem er a uriul er a kodall. Ak kmal oumerang el kmo a chad a mad engdi a klengar er ngii a di melemolem, e le ngmo soiseb er a bedengir a rebebil e melemolem el uaisei el 8,400,000 el taem. Tiang ngdiak el sal klemerang el tekoi? A oumesingd el klechelid ngcheleuid?” Ngsebechel a ‘saider er a reng’ el ngodechii a mesisiich el klaumerang er a chad? A uriul er a sesei el sandei er a losaod el kirel tia el suobel el ousbech a bades, e ngika el mechas a milluches el mo er a ngelekel el kmo: “Ak kol mocha medengelii a klemerang el kirel a blekerdelir a rulekoad. Ngkmal dmeu a renguk sel kudengei el kmo sel le bo er ngii a okiis, e ngmo sebeched el mesterir tirke el mla mad el betik er a rengud. Ak kuureng el ulekum a Rengedel a Dios a di mereched el mei.”

Molisechakl el Ousbech er a Omengeluch

14. Ngera belkul a dongeluch er a rechad el dolisechakl er tir?

¹⁴ A bo dungil el ousbech er a Biblia el ngar er a omesiunged e ngdiak el belkul a kmo kede di menguiu a bades e merekong. A Paulus a milengedecheduch el luluusbech er a ‘omengeluch,’ me kid me ngkired el mo mesuub er ngii. (Rellir 19:8, 9; monguiu er a Rellir 28:23.) A ‘omengeluch’ a belkul a kmo ‘kede mengeluch er a chad el mo kongei a tekoi el dolekoi.’ Me a chad el mecheluch a mo ‘kongei er a tekoi el lorrenges er ngii.’ Me sel dechelechur a chad el mo kongei er a osisechakl er a Biblia, e ngbelkul a kmo kede mla chulechur el mo kongei er a osisechakl el lorrenges er ngii. Tia el tekoi a sebechel el meketmokl sel bo dungil el osisecheklii el mo kongei er a klemerang er a tekoi el dosaod er ngii. Ngsebeched el meruul er tiang el oeak a doltirakl aika el ongingil el suobel.

15. Ke mekerang e ocheuir a osengel a chad el mo uchul a omeluu er ngii el mo er a Biblia?

¹⁵ Mocheuir a osengel a chad el mo uchul a omeluu el mo er a Tekingel a Dios. Sel mosaod er a bades e mochotii er a chad a klungel a ultutelel a bo lodengelii a osengel a Dios el kirel a suobel. Me a uriul er a omoker a ker e mrengesii a nger er ngii, e ngsebechem el melekoi el kmo, ‘Ka me bo desang el kmo ngerang a uldesuel a Dios el kirel tia el tekoi.’ Me a lechub e ke oker el kmo, ‘Ngerang dmu Dios el kirel tia el tekoi?’ Me a dosaod er a bades el oltirakl er tiaikid el rolel, e kede melisiich er a tekoi el kmo a Biblia a mla er a Dios el mei, e sebechel el ngosuir ngike el orrenges el mo oba omeluu el kirel a Tekingel. Ngklou a ultutelel el doruul el uaisei sel dongedecheduch er a chad el oumerang er a Dios engdi ngdiak a ungil el klemedengei er ngii er a osisecheklel a Biblia.​—Psalm 19:7-10.

16. Ngera sebechel el ngosukau el mo ungil el meketakl a bades?

¹⁶ Lak di monguiu a bades e lemerekong; momeketakl. Ngmle blechoel el blekerdelel a Paulus el ‘meledaes e omeketakl’ a tekoi el lullisechakl. (Rellir 17:3) A Bades el mosaod er ngii a betok a belkul, misei e ngkirem el melisiich er sel tekoi el soam el mesaod er ngii. Ngsebechem el meruul er tiang el oeak sel momelekl er a tekoi el klou a ultutelel, e dirrek el oker a ker el ngosuir a chad el mo medengelii a belkul a tekoi el mosaod er ngii. E sola e mosaod er a belkul sel bades el soam el melisiich er ngii. Me a uriul, e mngesuir ngike el orrenges el mo meduch el oltaut er a bades er a chelsel a klengar er ngii.

17. Ngmekerang e a ungil el omesodel a Bades a sebechel el rullii a chad el mo oumerang?

¹⁷ A ungil el omesodel a Bades el sebechel el rullii a chad el mo oumerang. A Paulus a mlo ungil el ‘meledaes e omeketakl’ a Bades el uluusbech a ungil el urebetellel a uldasu. (Rellir 17:2, 4) Ngsebeched el mo ua ingii sel dolasem el rutechii a rengul a chad el orrenges er kid. ‘Ngsebeched el oltobed’ a ngar er a rengul a chad sel doker a ker el lesemeriar er ngii. (Osisechakl 20:5) Bo mkerekikl me lak lemeringel a  tekingem, e bai mosaod a tekoi el bleketakl e  melemalt. A tekoi el mosaod a kirel el ngar er ngii a uchetemel, el ngii a Tekingel a Dios, el Biblia. Ngbai ungil a omosaod er a ta el bades e momekesiu er ngii, er a bai di morreched el menguiu a betok el bades. A dousbech a bleketakl el olechotel a tekoi e ngsebechel el mo uchul e ‘ngungil el orengesall a cheldecheduch.’ (Osisechakl 16:23) A lebebil er a taem, e ngmo kired el merriter a suobel me bo el sebeched el lmuut el mo medengei a betok. Ngike el 93 a rekil el mechas el dulsaod er ngii er a uchei, a mle soal el mo medengei el kmo ngera uchul me a betok el klechelid a oumerang er a osisechakl el kirel a klengar el melemolem er a uriul er a kodall. Me a bo el sebechel el mo kongei er a osisecheklel a Biblia el kirel tia el tekoi, e ngmle klou a ultutelel el bo lodengei el kmo tia el osisechakl ngmla er ker el mei e mlekerang e a betok el klechelid er a beluulechad a mlo oumerang er ngii. *

Molemolem el Ungil el Ousbech er a Tekingel a Dios

18, 19. Ngera uchul me ngkired el melemolem el mo ungil el ousbech er a ‘saider er a reng’ el ngii a Tekingel a Dios?

¹⁸ A Biblia a kmo: “Le teletael er tial belulechad a mo nguemed.” A remekngit el chad a menga el mo mekngit. (1 Korinth 7:31; 2 Timoteus 3:13) Me ngkmal klou a ultutelel el dolemolem el ‘merruud cheuatel’ el ousbech er a ‘saider er a reng, el ngii a Tekingel a Dios,’ el Biblia.

¹⁹ Ngkmal dmeu a rengud el ngar er ngii a Tekingel a Dios el Biblia el sebeched el ousbech er ngii el meketakl a klsuul osisechakl e remutech a rengrir a remelemalt el chad! Ngdiak a ngodech el tekoi el sebechel el merruud a cheuatel el ua klumech el ngar er a Biblia. Me a leuaisei, e bo leblak a rengud el ousbech er a ‘saider er a reng’ el mo ungil el kutmeklii a ureor er a Renged el bla loterekeklii er kid a Dios.

[Footnote]

Ngera Ke Siluub?

• Ngua ngera klungel a klisichel a Tekingel a Dios?

• Kede mekerang e mo ungil e ‘melemalt el ouchais a klemerang’?

• A klumech el ngar er a Biblia ngsebechel el remuul a ngerang el mo “toruud cheuatel”?

• Ke mekerang e kilungii a duch er kau el mengeluch er a rechad el ngar er a omesiungem?

[Aike el Ker er a Suobel]

[Siasing el ngar er a 18 el llel]

A Rolel a Dousbech er a Tekingel a Dios el Mengeluch

▪ El rullii a chad el mo oumerang er a Biblia

▪ El omeketakl a Bades

▪ El ungil el mesaod a tekoi el mo rutechii a rengul a chad

[Siasing el ngar er a 17 el llel]

Ngkmal kirem el mesuub el mo meduch el ousbech er a ‘saider er a reng’