Jesus Kristus​—Ngerang Rullii er Kau a Klemechel

“E ngak a mlei el kirel a bo lolab a klengar a sib, el mo olab el olsibes.”​—JOHANES 10:10.

A JESUS KRISTUS a mlei er tia el chutem el me mesiou, el dimlak el mei el kirel siungel. Ngoeak a omesiungel, e ngmilecherei a kmal mekreos el sengk el kirir a rechad​—el ngii a klumech el olecholt a klemerang el kirel a Dios me a moktek er ngii. Tirke el kongei er tia el klumech a sebechir el oldeu a rengrir er a ungil el klengar er a chelechang, el di ua blekerdelir a rebetok el miliol el mera el Kristiano er a chelechang. * E ngar er a chelsel sel klumech el lullisechakl er ngii a Jesus e ngngar er ngii a kmal mekreos el sengk el mo er a rebek el chad el ngii a cherrungel el klengar er ngii el letilengetengii el kired. A diak a ulebengelel el klungioled a ultuil er kid el mo kongei er tia el klou a ultutelel el klemechel.

A tekoi el leriruul a Dios me a Kristus A Jesus a mle medengei el kmo ngmo chormii a meringel el kodall er a chimorir a recherroel. (Matteus 20:17-​19) Me ngmillekoi a tekingel el ngar er sel merael a chisel el bades er a Johanes 3:16 el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a diak bo lriid, e bai mo oba diak a ullebengelel klengar.” A Jesus a dirrek el dilu el kmo ngmlei el mo “mengkengkii a klengar er ngii el ngbetir ar betok.” (Matteus 20:28) Ngera uchul me ngdilu el kmo ngmo mengkengkii a klengar er ngii er a bai lenguu a klengar er ngii?

Sel klou el bltkil a rengul a Dios a uchul me ngkiltmeklii a rolel a osobel el mo ngosuterir a rechad er sel lemludiukes er ngii el klengit me aike el mekngit el terechedel, el ngii a diak el cherrungel el klechad me a dirrek el kodall. Misei e a Dios a uldureklii a di ta el betik er a rengul el Ngelekel el mei er a chutem, el mo tongetengii a klengar er ngii el kirir a rechad. A Jesus a ullengesenges er a Demal e mlo tongetengii a cherrungel el klengar er ngii el kired. Sel tekoi el domekedong er ngii el olubet, a kot el mekreos el sengk er a Dios el kirir a rechad. * Tiang a sengk el sebechel el mo uchul a diak a ulebengelel el klengar.

Aike el kired el meruul A olubet el sengk, ngkirel el eko er kau? Tiang a di mo ultuil er kau. A domekesiu er ngii, e ngua chad el oldars er a bliull el sengk el eko er kau. Me nguaisei, tia el sengk a diak el sebechel el mo kloklem a lak mkengei e modersii a chimam el nguu. Me ngdi osisiu, a Jehovah a kiltmeklii a olubet el tenget el kirem, engdi ngdiak el sebechel el mo kloklem a lak mkengei e modersii a chimam el nguu. Me ngmekerang a omolai er ngii?

A Jesus a dilu el kmo ngdi “tirikel rokui loumera” er ngii a mo nguu a diak a ulebengelel el klengar. Me a klaumerang a mocholt el okiu a rolel a klengar er kau. (Jakobus 2:26) Me a dolecholt er a klaumerang er kid el bedul a Jesus, e ngbelkul a kmo kede oltirakl a tekoi el lullekoi me aike el lurruul. Ngmo sebeched el rullii tiang sel bo dungil el medengelii a Jesus me a Demal. A Jesus a kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—Johanes 17:3.

Ngbetok er a 2,000 el rak er a mla me mong e a Jesus Kristus a mirrekii a klumech el ngii a ngilodech a rolel a klengar er a rebetok el miliol el chad. Ngdiak el soam el mo medengei a lmuut el betok el kirel tia el klumech, me sel rolel e ngsebechem kau me tirke el betik er a rengum el mo ngmai a klungioliu er ngii, er a diak di el chelechang e ngbai melemolem el diak a ulebengelel? A Resioning er a Jehovah a kmal dmeu a rengrir el mo ngosukau.

[Footnote]