A Biblia ng Tekingel a Dios?

“Ele chedaol Llechukl el rokui a melluches luleak a Reng ra Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt, el kirel ma chad ra Dios bo lsiich a kedmeklel el kirel a ungil lurreor, me le mekedmokl el mecherrungel.”​​—2 TIMOTEUS 3:​16, 17.

NGKMAL klou a belkul sel tekingel a Paulus el kirel a klungel a ultutelel a Biblia! Kede medengei el kmo ngmilsaod el kirel sel kot el tedebechel a Biblia el mla er ngii er sel taem el omekedong er ngii a rechad el Chuodel el Testament. Engdi a tekingel a dirrek el ngar ngii a klisichel el kirel aike el 66 el mekekerei el hong er a Biblia el uldimukl er aike el lulluches tirke el blak a rengrir el disaiplo er a Jesus er a kot el dart el rak.

Kau ke omes er a Biblia el klou a ultutelel el ua osengel a Paulus? Omomdasu e tirke el milluches er a Biblia te mera el mlukreng er a Dios? Tirke el Kristiano er a kot el dart el rak a uluumerang, e tia el klaumerang a dimla blekerdelir a remera el Kristiano. A ta el mengeteklel a klechelid er a rak er a 1,300 el mo er a 1,400 el John Wycliffe a ulemes er a Biblia el “klemerang a tekoi er a chelsel.” A babier el The New Bible Dictionary, a mesaod aika el tekingel a Paulus el llechukl er bab el kmo, “ngmlukreng el tekoi el oterekeklii el kmo a tekoi el ngar a chelsel a Biblia a klemerang.”

Ngodechii a Osenged el Kirel a Biblia

Chelecha el taem e te betok el chad a mla mo diak el ultuil er a klisichel a tekoi el medung er a Biblia. Ngar a babier el dai er ngii a kmo, The World’s Religions e ngmelekoi el kmo: “A rokui el Kristiano a kongei a ulekrael er a Biblia, me ngmesmechokl a uldesuir me a klaumerang er tir. Engdi tiang a diak el klemerang el tekoi, e le  rebetok el chad a omes er a Biblia el kmo ngdikea ultutelel, e mla mo diak el oltirakl a siukang er a klechad.” Me alta e te omes er tirke el milluches er a Biblia el mle blak a rengrir, engdi chelechang e te omes er tir el ua rechad el mle meringel el mesaod a klemerang er a tekoi er a klereng, engdi ngdiak a klemedengei er tir er a tekoi er a chelecha el taem.

Engdi a mera er ngii, te kesai el chad er a chelecha el taem a mecherei a Biblia me ngomekrael a uldesuir me a omerellir. El uai tiang, ngua ngera ildisel el morrenges er a rechad el melekoi el kmo a llechul a Biblia el kirel a kldung a di tekoi er a ngar a mong, e dirrek el dikea ultutelel er a chelechang? A rebetok a omdasu el kmo ngsebechir el di olisechakl a mekesai el llach er a Biblia el ngii a sorir a rechad el orrenges me a lechub e te oltirakl. A rebebil el leko te Kristiano a di mengemikr a llechul a Biblia el kirel a deleboes me a laokreng me a rechorech me a cheltelaol.​—1 Korinth 6:​9, 10.

Me ngngera uchul me nguaisei? Ngar a uchelel a rak er a 1,900 el mo er a 2,000 e a ta el hakase el Charles Marston a melekoi el ngar a babilengel el dai er ngii a The Bible Is True el kmo: “A rechad a kmal di mereched el mo oumerang a tekoi el lulluches tirke el chad er a omeluches er sel taem,” el omtok a tekoi el kirel a blakerreng el medung er a Biblia. Tiang klemerang el tekoi? Ngkirel el mo ua ngerang a osenged el bedul a uldesuir tirke el mellomes a rengrir el millasem el mengitechut er a klungel a ultutelel a Biblia? Ka me bo desang el kmo ngerang dmung a ongingil el suobel el kirel tiang.