Mngesuterir a Rengalek el Mo Outekangel a Betok el Omelsemai

A RENGALEK a chelebangel a meringel el omelsemai er a chelsel a klengar er tir er a chelechang. Te kiei er a chelsel tia el mekngit el beluulechad er a Satan me ngkirir el kerekikl el mengeroid er tir “ra ngibes ra klengeasek.” (2 Timoteus 2:22; 1 Johanes 5:19) Me a lmuut el tang, te melasem el ‘melatk er Omebelir’ sel loutekangel a omelenguul me a ulekakou el ngar er tirke el omtok er a klaumerang er tir. (Olisechakl 12:1) A odam er kid el Vincent a ngklel, a ouchais er a taem er a klengeasek er ngii el kmo: “Ngmla er ngii a chad el mle blechoel el omekako, e omecheracheb er ngak me a lechub e ngsoal el lokoad er ngak, e le ngak el mle Sioning er a Jehovah. A lebebil er a taem e ngkmal mo meringel er ngak me ngmo chetik el mo er a skuul.” *

Uldimukl er a orimel er a rebebil, e a rengeleked a dirrek el kirir el mo outekangel a urungulir el sorir el mo ua resechelirir. A Cathleen el ngeasek el odos er kid a melekoi el kmo: “Ngkmal meringel sel sekum te omes er kid el ngodech a blekerdeled er tir.” A ngeasek el odam er kid el Alan a kmo: “A resechelik a mle blechoel el mengesuseu er ngak el mo obengterir el milil, e kmal mle soak el obengterir.” Me a urungulir a rengeasek el sorir el teloi a klekool er a skuul a kmal mesisiich me ngsebechir el mechetikaik el mo obengterir a remekngit el sechelei. A ta el ngeasek el odos el Tanya a ngklel, a melekoi el kmo: “Ngkmal soak a klekool er a skuul. Me a resensei er a klekool er a skuul a blechoel el olengit er ngak el mo teloi er a klekool, e tia el tekoi a kmal mle meringel er ngak el kotouar er ngii.”

Me kede mekerang e ngosuterir a rengeleked el mo sebechir el outekangel aika el betok el omelsemai? A Jehovah a omekngerachel er a ruungalek el chad el mo omesterir a rengelekir a ulekrael el kirel a klengar. (Osisechakl 22:6; Efesus 6:4) A turrekong  er a ruungalek el chad el meluu er a Dios a ngosuterir a rengelekir el mo sorir el olengesenges er a Jehovah el mera el ngar er a rengrir. (Osisechakl 6:20-23) Ngoeak tiang, e a rengalek a mo sebechir el oltngakl a orimel er tia el beluulechad el mo lmuut er sel taem el di el tir el tang.

Ngdirrek el kmal meringel er a ruungalek el chad el oureor el kirel a telungalek er tir, e omecheliu er a rengalek, e meruul a ngerechelir er a ongdibel, el ngii a rokui el kirel el meketmokl er a osisiu el taem. A rebebil a di tir el tang el omekerreu er a rengelekir me a lechub, e ngkirir el outekangel a ultok er a rebecherir el diak lengar er a klemerang. Me nguaisei, engdi a Jehovah a soal a ruungalek el chad a locheuekl a taem el mo olisechakl e ngosuterir a rengelekir el mo sebechir el olengesenges er tir. Me a leuaisei, e kede mekerang e ngosuterir a rengeleked el mo sebechir el outekangel a orimel er a resechelirir, me a ongetikaik el kirel a mekngit el omeruul, me a ulecheracheb el bo lechelebangel er a bek el sils?

A Ileakl el Deluill el Obengkel a Jehovah

Sel kot el klou a ultutelel el tekoi a kirir a rengeleked el mo ungil el medengelii a Jehovah. Ngkirir el mo sebechir el “lomes er ngikel diak le meues.” (Hebru 11:27) A Vincent el dulsaod er ngii er a uchei, a melatk er a demal me a delal er a lolisechakl er ngii el mo omekeroul er a ileakl el deleuill er ngii el obengkel a Jehovah. Ngmelekoi el kmo: “Te ulsisecheklak er a klungel a ultutelel a doluluuch. Ak melatk er a taem er a dirk kekerei, e ak blechoel el meluluuch el mo er a Jehovah er a uchei er a bo kbad. A Jehovah a mle mera el chad er a renguk.” Kau ke meluluuch el obengterir a rengelekem? Ke orrenges er tir sel loluluuch el mo er a Jehovah? Te blechoel el omelekl a tekingir? Me a lechub e te melekoi aike el ngar er a chelsel a rengrir el mo er a Jehovah? Sel bo blechoel el orrenges a nglunguchir e ngsebechem el mo medengei el kmo te mera el omekeroul a ileakl el deluill er tir el obengkel a Jehovah.

A rengalek el ngar er ngii a ulterekokl el temir er a omengiuel a Biblia a mo uchul e ngmo sebechir el mo kmeed er a Jehovah. A Cathleen el dulsaod er ngii er a uchei a kmo: “A omengiuek er a Biblia er a dirk kekerei a kmal ngilsukak. Ngmlo ulterekokl a  renguk el kmo, a lsekum a rechad a omtok er ngak e a Jehovah a sobecheklak.” A rengelekem ngngar er ngii a ulterekokl el temel a omengiuel a Biblia er tir?​—Psalm 1:1-3; 77:12.

Ngklemerang el tekoi, a rengalek a kakerous a rolel a lolai a ulekrael er a redemerir me a rederrir. Me a okurulel a klaumerang er tir a di mo ultuil er a rekrir. Me nguaisei, engdi a lsekum e ngdiak a ulekrael, e ngmo meringel er tirke el mekekerei el mo medengelii a Jehovah el ua mera el Chad. Ngngerechelir a ruungalek el mekerulii a tekingel a Dios er a rengrir a rengelekir me bo lsebechir el mo ungil medengelii a osengel a Jehovah el kirel a tekoi er sel taem el lecheroid er tir. (Duteronomi 6:6-9) A rengalek a kirir el mo oumerang el kmo a Jehovah a betik a rengul er tir.

Kede Mekerang e Rullii a Rolel a Cheldecheduch el Mo er Ngii a Belkul

A ungil el rolel a cheldecheduch a dirrek el sebechel el olengeseu er a rengalek. Me nguaisei, engdi a ungil el cheldecheduch a diak di el sel mongedecheduch er a rengelekem el merekong. Nguldimukl er sel moker a ker, e moba kllourreng el orrenges er tir a longer er kau, el mo lmuut er a taem el nger er tir a diak el ungil er a uldesuem. A Anne el derrir a teru el buik a melekoi el kmo: “Ak melemolem el oker a ker el mo lmuut er a taem el bo kudengei aike el mera el ngar a uldesuir me aike el tekoi el lechelebangel er a chelsel a klengar er tir.” A rengelekem, te melechesuar el kmo ke orrenges er tir sel longedecheduch? A Tanya el dulsaod er ngii er a uchei a kmo: “A delak me a demak a mle kerekikl el orrenges er ngak sel kungedecheduch, e dirrek el dirk melatk aike el cheldechedemam. Te dirk medengei a ngklir tirke el sechelik el kim dilak el ngar er a skuul. Te dirrek el dirk oker er ngak el kirir a resechelik, me a lmuut el bebil er a tekoi el ki mulsaod er a ngar a mong.” Ngkmal klou a ultutetel el rolel a cheldecheduch sel dorrenges e dolebedebek a tekoi el mildung.

A betok el telungalek a mla metik er ngii el kmo, a temel a blengur a kot el ungil el techall el kirel a ungil el cheldecheduch. A Vincent a melekoi el kmo: “A temel a blengur a mle kot el klou a ultutelel el tekoi er a chelsel a telungalek er kemam. Ngmle kiram el ngar a tebel er aike bek el temel a blengur. A osengel a tv me a orengesel a rasio, me omenguiu a dimlak el kiram el meruul er a temel a blengur. A ungil el rolel a cheldecheduch er a bek el taem a mlo uchul, e ngchelellakl a renguk er a bek el sils el outekangel a orimel me a chetituokel el tekoi el bo kchelebangel er a skuul.” Ngmelemolem el melekoi el kmo: “A ungil el rolel a cheldecheduch el obengterir a rechad er a blik er a temel a blengur a rirellii el mo beot er ngak el mengedecheduch er tir er sel taem el kuusbech a ngeso el kirel a meklou el tekoi.”

Ka di lekau el oker el kmo, ‘A telungalek er ngak ngblechoel el dmak el omengur er a bek el sandei?’ A osmecheklel tia el tekoi, ngsebechel el mo uchul a ungil el rolel a cheldecheduch el obengterir a rengelekek?

A Uchul me a Ungil el Omengetmokl a Klou a Ultutelel

A Omengull el Telungalek er a bek el sandei a melisiich er a ungil el rolel a cheldecheduch, e dirrek el ngosuterir a remekekerei el mo outekangel a mondai er tir. A Alan el dulsaod er ngii er a uchei a melekoi el kmo: “A rechad er a blik a uluusbech er tia el temel a Omengull el Telungalek er kemam el mengedecheduch er kemam. Te dirrek el milsaod aike el tekoi el kim chelebangel er a bek el sils.” A delal a Alan a melekoi el kmo: “A ki uluusbech a bebil er aika el techall el mo ungil el kutmeklemam el kirel omesiungam. Aikaikid el rolel a ungil el omengetmokl a ngilsuterir a rengelekam el mo meduch el mesebechakl er a klaumerang er tir, e dirrek el olecholt el kmo tia el klaumerang er tir a klemerang el tekoi. Ngoeak tiaikid el rolel a cheldecheduch, e ngmlo ulterekokl a rengrir el kirel a tekoi, el ngii a mle usbechall er sel taem el lechelebangel a omelsemai.”

Me nguaisei, a rengalek sel bo lechelebangel a orimel er a resechelirir, e ngdiak el kirir el di melekoi el kmo, ngdiak me a lechub e lorael e lemerekong. Ngkirir el mo sebechir el onger a ker el kmo ngera uchul, e ngera me ngdiak. Ngdirrek el kirir el mo ulterekokl a rengrir el mesebechakl er a klaumerang er tir er sel taem el lomekako er tir a rechad. A lsekum ngdiak el sebechir el mesebechakl er a klaumerang er tir, e ngmo meringel er tir el dechor el kirel a mera el omengull. Me a rolel a ungil  el omengetmokl a sebechel el mekurulii tia el ulterekokl el reng.

Sel baks el ngar 30 el llel, a beldukl er ngii aike el tekoi el sebeched el mesaod er a temel a Omengull el Telungalek er kid. Mrellii tia el ungil el omengetmokl el ousbech a meringel el ker el oker er a rengelekiu. Nguldimukl er tiang, e mosaod a meklou a ultutelel el suobel el ousbech a ungil el kerebai el ngar a Biblia. Chouaikakid el rolel a omesuub a ulterekokl el ngosuterir a rengelekiu el mo meduch el mesaod a tekoi sel bo el chelebangel a ngii di el omelsemai er a skuul me a ngii di leker.

A Blid, Ngbasio er a Ulekerreu?

A blim, ngbasio el sebechir a rengelekem el semeriar el mei er ngii er a bek el sils er a uriul er a temel a skuul? A lsekum e ngbasio er a ulekerreu, e ngsebechel el ngosuterir a rengelekem el mo mesisiich el mo dechor el outekangel a ngii di el omelsemai er a bek el sils. A odos el ngii a chedal a telungalek er a Bethel a kmo: “Sera ak kekerei e sel mle kot el klou a ultutelel el tekoi a kmo, a blik a mle basio er a ulekerreu. Me a ngii di el tekoi el mo duubech er a skuul e ngmle ulterekokl a renguk el kmo sel be krei, e a rokui el tekoi a di mo ungilbesul.” Ngua ngerang a blekeradel er a chelsel a blim? Ngbasio er a “ngasechereng, ma reng er chomengirt, ma chomeleakl,” me a lechub e ngbasio er a “bltikerreng, ma deourreng, ma budech”? (Galatia 5:19-23) A lsekum ngblechoel el diak a budech er a blai, e kau ke melasem el osiik a rolel e ngsebechem el rullii a blim el mo uchul a ulekerreu el kirir a rengelekem?

A ta er a rolel e ngsebechem el ngosuterir a rengelekem sel bo lechelebangel a omelsemai, a oeak sel mosisecheklterir el melilt er a rungil el sechelirir. El ua tiang, ngsebechem el mengemedaol er a remeklou el chad er a klaumerang el rudam me a rudos er a ongdibel, el me teloi a omililiu el telungalek. Ngdirrek el sebechem el mengemedaol er tirke el odam el oldingel a ongdibel me a lechub e ngtirke el teloi er a mui el taem el omesiou el me teloi er kemiu el telungalek el omengur. Ngdirrek el sebechem el osisecheklterir el mekeroul a ungil el klausechelei er tir el obengterir tirke el modengelterir el misionari me a rengar a Bethel el oeak sel loluches a babier me a e-mail me a lechub e te kaudengua. Chouaika el deleuill a sebechel el ngosuterir a rengelekiu el mo meleketek a klaumerang er tir er a tekingel a Dios. Ka molatk er sel ungil el tekoi el dilubech er a delongelel a apostol el Paulus me a ngeasek el buik el Timoteus. (2 Timoteus 1:13; 3:10) A kmes el deleuill er a Paulus me a Timoteus a ngilsuir ngika el ngeasek el buik el mo oltaut a turrekong er ngii er a tekingel a Dios.​—1 Korinth 4:17.

Bo Blechoel el Chemat er a Rengelekiu

A Jehovah a kmal dmeu a rengul el mesterir a rengeasek el tir a sebechir el dechor el kirel a llemalt, er a chelsel tia el klou a orimel er ngii el beluulechad er a Satan. (Psalm 147:11; Osisechakl 27:11) Ke ulterekokl el dirrek el dmeu a rengum el mesterir a rengeasek el melilt a ungil el rolel a klengar. (Osisechakl 10:1) Mochotii a uldesuem me a rengum el kirir a rengelekem, e moba bltikerreng el chemat er tir. A Jehovah a ochotii a kot el ungil el kerebai el kirir a rechedam me a rechedil el oltaut er ngii. Sel taem er a lemetecholb a Jesus, e a Jehovah a dilu el kmo: “Kau a betik ra renguk el Ngelekek, el odeuir a renguk.” (Markus 1:11) Aike el ungil el tekingel a Demal el chilat er ngii a ulterekokl el kmal millisiich er a Jesus el mo sebechel el outekangel aike el omelsemai el lechilebangel! Me ngdi osisiu, mrelleterir a rengelekiu me bo lodengei el kmo ngbetik a rengmiu er tir, e dirrek el dmeu a rengmiu er aike el ungil el tekoi el loruul.

Me nguaisei, engdi ngdiak el sebeched el cherrungel el omekerreu er a rengeleked er a bek el omelsemai me a ulekakou me a omelenguul. Engdi ngsebeched el ngosuterir. El oeak a ngera el rolel? Mngesuterir el mekurulii a ileakl el deleuill er tir el obengkel a Jehovah. E blechoel el mengedecheduch el mesaod a meklou a ultutelel el tekoi. Mrellii a temel a Omengull el Telungalek el mo klou a belkul, e dirrek el mrellii a blim el mo basio er a ulekerreu. Sel moruul aikang, e ke ulterekokl el ngosuterir a rengelekem el mo mesisiich el dechor el mtekangel a ngii di el omelsemai.

[Footnote]

[Baks/​Siasing el ngar er a 30 el llel]

A UNGIL EL OMENGETMOKL A KLOU A LENGESUIR

Aikakid a bebil er a blekeradel el lechelebangel a rengeasek el chad er a chelechang. Ngungil a omolasem el mesaod aika el tekoi er sel temel a Omengull el Telungalek.

▸ A sensei er a klekool a melisiich er a ngelekem el redil el mo teloi a klekool er a skuul.

▸ A ngelekem el sechal a longesuseu er ngii el mo melamech a dekool er a omerolel el mo remei.

▸ A rebebil el ngeasek el buik a melekoi er a ngelekem el kmo te mo odecheleklii a lsekum e te mesang el oldingel a obliil.

▸ A ngelekem el redil a oldingel a obliil e metik er a chad el ledak el skuul.

▸ A ngelekem a kirel el mo dechor er a medal a skuul e mesaod er sel uchul e ngdiak longull er a banderang.

▸ A buik a blechoel el melenguul er a ngelekem e lengii el Sioning er a Jehovah.

[Siasing el ngar er a 29 el llel]

Ngar er ngii a ulterekokl el temir a rengelekem el menguiu er a Biblia?