Ngsebechem el Mo Medengelii a Dios el Loeak a Ngklel?

Ngkmal klou el chetengakl sel lebo er ngii a techelled el ousbech er a ngklel a ngarbab a deruchellel el chad a dongedecheduch er ngii. Kede blechoel el loleker er tir el oeak a dui el lolab, el uai a “President” me a lechub e ng “Kau el Kuoll.” Me a lsekum a chouaisei el chad a dmu er kau el kmo, “Ngsebechem el di oleker er ngak er a ngklek,” e ke ulterekokl el mo omes er ngii el kmal chetengakl el tekoi.

A MERA el Dios a melekoi er kid el ngar er a Tekingel, el Biblia el kmo: “Ngak, el di ngak el tang, a [Jehovah].” (Isaia 42:8) Me alta e ngbetok a dial, el uai a “Ulemeob,” “Kot el Mesisiich,” me a “Ngarbab el Rubak,” engdi ngblechoel el mengebkall er a reblak a rengrir el mesiungel el loeak a lebechititerir me lomekedong er ngii el loba ngklel.

El ua tiang, a profet el Moses a mle ta el taem e ngulemuchel el mengeluch er a Dios el loeak a ledu el kmo: “Mousubes e [Jehovah].” (Exodus 4:10) Sera omengedolel a templo el ngar er a Jerusalem, e a King el Salomon a ulemuchel er a nglunguchel el olab aika el tekoi el kmo: “[Jehovah] el Dios.” (1 King 8:22, 23) A profet el Isaia er a lomtechei er a rechad er a Israel e longedecheduch er a Dios, e ngdilu el kmo: “Ngdi kau e [Jehovah] a Demmam.” (Isaia 63:16) Me ngbleketakl el kmo, a Demad el ngar er a eanged a soal a domekedong er ngii el lousbech er a ngklel.

Me alta ngklou a ultutelel a doleker er a Jehovah el loba ngklel, engdi a bo demera el medengelii a uldimukl er a betok el tekoi. A losaod er a chad el betik a rengul e oumerang er ngii, e a Jehovah a tilbir el kmo: “Ak mo . . . mengkar er tirkel medengelkak.” (Psalm 91:14) Me ngulterekokl el kmal betok a uldimukl er a bo dodengelii a ngklel a Dios, e le tiang a kmal dousbech er ngii el mo nguu a ulekerreuil a Dios. Me a leuaisei, e ngngera kired el meruul er ngii me bo el sebeched el mo medengelii a Jehovah el loeak a ngklel?