Te Ngar Ngii a Rechad el Ngar er a Diak el Lemeues el Basio Te Rua Techang?

Ngar er a beluu er a Europe e a ta el chuodel el mechas a mo soiseb er a ikelesia el beldoel er a rosario e mo outubuach er a medal a bleob el chaus el Santa Maria. Ngar er a beluu er a Africa, e a rechedal a mla mad el chad a oleitel a meringel el ilumel er a debellel a chederir. Ngar er a beluu er a Merikel e a kekerei el chad a olsengerenger e meluluuch el melatk el kmo ngmo er ngii a techellel el mengedecheduch er ngike el anghel el omekerreu er ngii. Ngar er a beluu er a Asia, e a prist a melul a bek bedengel a chiro er ngii el babier el melenget el mo er a rebeldekel.

TIRKA el chad, te meruul er a ngera el osisiu el tekoi? Te rokui el oumerang el kmo te ngar ngii a remellomes a rengrir el chad el ua blekerdelir a rechanghel el kiei er a diak el meues el basio el sebeched el mengedecheduch er tir, e dirrek el ngar ngii a klisichir el omekrael, e mengesuseu a klengar er a rechad. E tia el klaumerang a diak el kora olekibetiekl a uldesued me a lechub e lebeches el tekoi. Ngbai kmal mo mechas a rengud er a ildisel a kakebosech el uldasu el kirir tirke el chad el kiei er a diak el meues el basio.

A rechad er a Moslem a mengull er a di ta el Dios el Allah. * A rechedal a Klsuul Klekristiano a melekoi el kmo a Dios a Trinidad, el ngar ngii a Dios el Chedam me a Dios el Ngalek me a Dios el Chedaol Reng. A rechad er a Hindu a oumerang el kmo te ngar ngii a rebetok el telael el chelid el sechal me a redil. A rebebil a melekoi el kmo a rechelid er tir a ngar er a chelsel a bebil el charm me a kerrekar me a bad me a dirrek el chelsel a omoachel. E a rekuk bebil a mekesuseu a uldesuir el mo oltirakl a babier me a mubi me a dirrek aike el prokuram er a TV el mesaod el kirir a rechanghel me a mekngit el chelid me a deleb me a dirrek el chelid el sechal me a redil.

Me nguaisei, el kmal betok a kakebosech el uldasu me a klaumerang el kirel a betok el Dios me a rechelid, me ngdi osisiu el dirrek el kmal betok a uldasu me a klaumerang el kirel a kakerous el rolel e ngsebeched el mengedecheduch aika el chelid. Me nguaisei, engdi ngdiak el ngii el rokui el rolel a cheldecheduch a melemalt. Ka molatk er tia el tekoi: A uchei er a omoudengua, e ngkirem el mo medengei el kmo ngtechang a soam el omekedong er ngii, e dirrek el kirem el mo ulterekokl a rengum el kmo a chad el momekedong er ngii a mera el chad, e dirrek el sebechel el mengedecheduch er kau er a dengua. Me a lsekum e ke melatk el mengedecheduch er a chad el di momeob er ngii er a chelsel a uldesuem e ngdiak a ngerang el sebechel el rullii. A lmuut el tang, ngkdekudel el tekoi a lsekum e ke melasem el mengedecheduch er a chad el meruul er ngii el mo ngike el chad el soam el mengedecheduch er ngii.

Me a leuaisei, e te rua techang a mera el kiei er a diak el lemeues el basio? A Biblia a diak di longer er tia el ker, e ngdirrek el smodii el kmo ngtecha ngike el kired el mengedecheduch er ngii, e dirrek el ngerang a nger er ngii el kired. Molemolem el menguiu er tia el babier. Ke locha mo mechas a rengum er aike el tekoi el mocholt er a chelsel a Biblia.

[Footnote]