A Kengei er a Dios a Mo Uchul a Diak a Ulebengelel el Klengar

“Ele kau e [Jehovah] a omekngeltengat er a melemalt; kiueklii er a klungiaol el ua cheuatel.”​—PSALM 5:12.

1, 2. Ngera mle ongtil a Elias el mo er a mellakl dil er a Sarefath, e ngera el ulterekokl el tekoi a ledilu er ngii?

A REDIL me a ngelekel el sechal a dul songerenger me a profet er a Dios me ngdirrek el songerenger. Me ngika el mellakl dil er a Sarefath er a bocha longumel er a ngau el leko ngmeruul a kelir, e a profet el Elias a mocha duum el olengit a ralm el melim me a blauang el longang. Ngmle sebechel el msang a imelel el ralm, engdi ngkmal di mle ngar ngii er ngii a “tesasou el merikengko el ngar a delluchel belatong ma sesel cheluchul olib el ngar a bekai.” Ngulemdasu el kmo ngkmal diak a rolel er ngii e lomsa kelel a profet, me nguluuchais er ngii.​—1 King 17:8-​12.

² Engdi a Elias a di millemolem el melekoi er ngii el kmo: A “kot e ke rullii a tal kekerel blauang er a ikel ngar ngii er kau e nguu el me meskak, e sola e mochu meruul a ikel derngel el kirem kau ma ngelekem. Ele tiakid a lolekoi er ngii a [Jehovah] el Dios er a Israel el kmo, ‘A delluchel belatong a diak bo lak a merikengko er ngii ma lechub a bekai bo lak a cheluch er ngii.’ ”​—1 King 17:13, 14.

3. Ngera el klou a ultutelel el tekoi a dechelebangel er ngii er chelechang?

³ Me a tekoi el dilubech el mo er a mellakl el dil a rirellii el dimlak di bo el kirel el omsang a kelel a profet, e ngdirrek el mlo chelebangel er a meringel el omelilt el mle kirel el meruul er ngii. Me a ker a kmo, ngmo ultuil a klaumerang er ngii er a Jehovah el kirel a osebelel a klengar er ngii me a ngelekel el sechal, me a lechub e ngmai a tekoi er a klechad el mo er a uchei er a kengei er a Dios me a ungil el deleuill er ngii lobengkel? Kid el rokui a dirrek el mo chelebangel a osisiu el omelilt er a klengar er kid. Me sel bo leuaisei, e kede mo ochotii el kmo kede kerekikl el melemolem el melai er a kengei er a Jehovah me a lechub e kede nguu a tekoi er a klechad el mo er uchei? Ngkmal imis el betok a ungil el uchul me ngkired el mo ultuil a klaumerang er kid er a Dios, e blak a rengud el mesiou er ngii. E dirrek el ngar ngii a tekoi el kired el meruul me bo el sebeched el nguu a kengei er ngii.

‘Kau a Rredemelel a Nguu a Omengull’

4. Ngera uchul me a Jehovah a kmal rredemelel a nguu a cherrungel el omengull er kid?

⁴ A Jehovah a kmal ngar ngii a llemeltel el mengerechir er a rechad el mo kongei el mesiou er ngii. A cheldebechel er a rechanghel er ngii el ngar er a eanged a mle ta ngerir el melekoi el kmo: “[Jehovah el] Dios er kemam, ikau a redemelel a nguu a klebkall, ma chomengull, ma klisiich, ele kau a mileob a  rokuil tekoi, ma rokuil tekoi a ngarngii luleltirakl a uldesuel a rengum e ulebeob.” (Chocholt 4:11) Me a Jehovah a kmal rredemelel a nguu a cherrungel el omengull er kid e le ngii ngike el Ulemeob a rokui el tekoi.

5. Ngera uchul me a bltkil a rengul a Dios el mei er kid a rullid el mo soad el mesiou er ngii?

⁵ A ta er a klou el uchul me ngkmal kired el mesiou er a Jehovah, a sel diak el mekimd el bltkil a rengul el mei er kid. Ngar er a chelsel a Biblia e ngmesaod el kmo: “Mitia Dios a milebii a chad, el rirellii a chad el okesiul a Dios. Ng milebii a sechal ma redil.” (Genesis 1:27) A Dios a ulemeob er a rechad e milsterir a llemeltir el di tir el melebedebek e melilt a tekoi el bo loruul. Me a Jehovah a mlo Demal a klechad e le ngii a milskid a klengar er kid. (Lukas 3:38) Ngdi ua kot el ungil el chedam, e le ngmla mesterir a rengelekel el sechal me a redil a rokui el tekoi el sebechir el ousbech el mo uchul a deuil a rengrir. Ngii el Chedam a “chongesechii a sils” e dirrek el “oleiit ra chull” me bo el sebechel tia el chutem er a Beluulechad el mekdubech a betok el dellomel el keled, e dirrek el rullii tia el basio el mo ungil a eltel, e klebokel el beluu el delengchekled.​—Matteus 5:45.

6, 7. (a) A Adam ngmlo uchul a ngera el chelebuul me a ringel el kirir a ruldidellel a rsechel? (b) Me sel tenget el olubet el lekiltmeklii a Kristus, ngerang mo rullii el kirir tirke el osiik er a kengei er a Dios?

⁶ A Jehovah a dirrek el mla ngubetid er a klou el blsel a klengit. A Adam er sera lerebet er a klengit, e ngdi mle ngii el rullii el mo ua chad er a bakutsi. Ngmlo ua mekngit el chedam el dimlak losiou er a delengcheklel, e bai mirrechorech er a chelsel a telungalek er ngii me bo el sebechel el melemolem er a mekngit el ngelbesel a rengul. Me ngii el mlo omtok er a Jehovah a uchul, me ngtilemellii sel ileakl el techall el mle kirir a rengelekel el mo nguu, el ngii a diak a ulebengelel el deurreng. Me sel recherechel a rengul a uchul me a klechad er chelecha el taem a kmal chuarm e mla mo diak el cherrungel a klengar er tir. Tiaikid a uchul me a rechad a mo smecher e ngar er a klengiterreng, e dirrek el mo mad. Me nguaisei, engdi ngngar ngii a char el kirel meketmokl e ngmochu sebeched el mengubet er tia el klsibai, e a Jehovah a mla kutmeklii tia el char el ngii a mo uchul e ngsebeched el mengubet er a blsel a klengit. (Monguiu er a Rom 5:21.) A Jesus Kristus a kilengei el mo meruul a soal a Demal, me ngmlo “mengkengkii a klengar er ngii el ngbetir ar betok.” (Matteus 20:28) Me ngdi telkib kung e tirke el nguu a kengei er a Dios a mo nguu a cherrungel el klungiolir er tia el olbetel a blals el mileketmokl.

⁷ Ngdiak a ngii di el chad el sebechel el remuul a tekoi el mo mekesiur a Omebeled el Jehovah, el mla remuul a kmal betok el tekoi el meskid a deurreng me a moktek er a klengar er kid. Me sel denguu a kengei er ngii, e ngmo sebeched el mesang a rolel a losmechokl aike el rokui el tellemall el klechad a chelebangel er chelechang. Me ngoeak a rolel er a Jehovah e ngmo meruul a tekoi el ochotii el mo er a derta me a derta er kid sel uchul me “tirikel osiik er ngii a le besterir chomeksulir.”​—Hebru 11:6.

“A Re Chedam a Di Mo Tir el Kongei el Mong”

8. Ngera ngosisecheklid er ngii el kirel a omesiunged el mo er a Dios a tekoi el dilubech el mo er a Isaia?

⁸ Ngmo sebeched el nguu a kengei er a Dios a lsekum kede ousbech er a techelled el melilt a tekoi el ngar er a melemalt el rolel. Tiang a kirel el mo uaisei, e le a Jehovah a diak lorrimel er kid el mo mesiou er ngii. Sel taem er a Isaia e ngmlo er ngii a moktek er ngii el mle soal a lemeketmokl, me ngdilu el kmo: “Ng techa bo kuderchii? Ng techa mo oderchelam?” Me a Jehovah er sera bo lodengelii a uldesuel ngika el profet, e ngulechotii a omengull er ngii el kirel a llemeltel a Isaia el melilt a tekoi el bo loruul. Nglocha dirrek el sebechem el melechesuar sel deuil a rengul a Isaia er a ledu el kmo: “Ng ngak a mong! Moderchak!”​—Isaia 6:8.

9, 10. (a) Ngkirel el mo uangerang a osenged me a uldesued el kirel a omesiunged el mo er a Dios? (b) Ngera uchul me ngkired el mesiou er a Jehovah el oba rengud el rokir?

⁹ A rechad a ngar ngii a ilmeklir el melilt el mo mesiou er a Dios me a lechub e ngdiak. A Jehovah a kmal soal a dekengei el mesiou er ngii el mera el ngar er a rengud. (Monguiu er a Josua 24:15.) A Dios a kmal diak el deu a rengul er a ngii di el chad el morimel el mo mesiou er ngii; e dirrek el diak el kengei er a omesiungir tirke el di sorir el meruul a rengrir a rebebil er a rechad. (Kolose 3:22) Ngkmal diak el sebeched el nguu a kengei er a Dios, a lsekum kede ‘morimel’ el belkul a kmo, kede mecherei a beluulechad me ngmo mengitechut er a omengull er kid el mo er Ngii. (Exodus 22:29) A Jehovah a kmal medengei el kmo ngmo uchul a klungioled a dosiou er ngii el oba rengud el rokir. A Moses a milengelechel er a rechad er a Israel el mo melilt er a klengar er a ledu el kmo: “Bo le betik a rengmiu er a [Jehovah] el Dios er kemiu  e molengesenges er ngii e bo le blak a rengmiu er ngii.”​—Duteronomi 30:19, 20.

¹⁰ A King el David er a Israel er a irechar a milengitakl el mo er a Jehovah el kmo: “Sel sils el bo moumekemad er a re cherrouem, e a re chedam a di mo tir el kongei el mong. Ng ua nguches er a kmal dirk tutau, e a re mekekerel chad er kau a ekor kau er a chedaol bukl.” (Psalm 110:3) A ruumesingd el chad er a chelecha el taem a nguu a skel a kerruul me a omilil el mo kot er a chelsel a klengar er tir. Engdi tirke el betik a rengrir er a Jehovah a nguu a omesiungir el mo kot er a rokui el tekoi. Sel blakerreng er tir el omerk er a ungil el chais er a Renged el mo er a rechad a meketakl aike el meklou a ultutelel el tekoi er a klengar er tir. Te kmal cherrungel el oumerang el kmo a Jehovah a ngar ngii a klisichel el lomesterir aike el rokui el lousbech er a chelsel a klengar er tir er a bek el sils. ​—Matteus 6:33, 34.

A Tenget el Lekengei er Ngii a Dios

11. Ngera el klungiaol a lullatk el melai er ngii a rechad er a Israel er sel taem el lolul a tengetengir el mo er a Jehovah?

¹¹ Ngar er a cheungel a Llach er a Moses, e a rechedal a Dios a mle kirir el melenget aike el kot el ungil el cheremir me bo el sebechir el nguu a kengei er Ngii. A tekingel a Jehovah el Dios el ngar er a Levitikus 19:5 a kmo: “Sel momekoad er a charm el kirel a tenget er a budech, e moltirakl a ikel llach el bla kbeskemiu, e ak mo nguu a tengetengiu.” Ngdirrek el ngar er tia el osisiu el babier er a Biblia, e kede menguiu el kmo: “E sel molenget a tenget er omerengelsaul el mor a [Jehovah,] e kom melenget el oltirakl a llach me ng mo sebechel el mengai a tengetengiu.” (Levitikus 22:29) Me sel taem el lolul a kot el ungil el tengetengir a rechad er a Israel er a olengetongel, e sel chetul el tuobed el mo er bab a di ua “ungil a bul bau” el odeuir a rengul a mera el Dios. (Levitikus 1:9, 13) Me sel le terengur tia el ungil el bechochod el bau, e ngkmal mo dmeu a rengul er sel klou el olechotel a bltkil a rengrir a rechedal el mo er ngii. (Genesis 8:21) Me ngoeak aika el Llach er a irechar, e ngsebeched el mesang el kmo ngdirrek el meklou a ultutelel el kired loltirakl er a chelecha el taem. Tirke el rokui el melenget aike el kot el ungil er tir el mo er a Jehovah a nguu a kengei er ngii. Me ngngera el tenget a lekengei a Jehovah? Ka me bo dosaod a eru el blekeradel er a klengar el ngii a: omerelled me a cheldechedechad.

12. Ngera el omeruul a sebechel el mo uchul e a Dios a mo diak el kengei er a ‘modars’ el tengetengel a chad?

¹² Ngar er a babilengel a Paulus el mo er a Rekristiano er a Rom, e ngmilluches el kmo: “Modars a bedengiu el mo ngar el chedaol tenget, el odeuir a rengul a Dios, e tia bo lomesiungiu.” (Rom 12:1) Me tiang a belkul a kmo a chad a kirel el mo klikiid a omerellel me a bedengel a lsekum e ngsoal el nguu a kengei er a Dios. A lsekum a chad a mo mengidokel er a bedengel el mo melamech a dekool, me a buuch, e ousbech a mekngit el kar, e mo imis el melim a rrom, e a omesiungel el mo er a Dios a kmal di mo diak a ultutelel. (2 Korinth 7:1) Me a lmuut el tang, a lsekum a chad a “mora deleboes [e ngmocha] ra klengit el kirel a di bedengel” me a lechub e ngmo meruul a ngii di el tekoi el mo uchul a deleboes el omeruul, e ngulterekokl el oridii a kengei er a Jehovah. (1 Korinth 6:18) Me a chad el soal el melemolem el oldeu er a rengul a Dios, a kmal kirel el mo ‘chedaol ra ikel bek lomerellel.’​—1 Petrus 1:14-​16.

13. Ngera uchul me ngkmal klou a ultutelel el kired el mengebkall er a Jehovah?

¹³ A ta er a tenget el sebechel el odeuir a rengul a Jehovah a okiu a cheldechedechad. Tirke el betik a rengrir er a Jehovah a blechoel el ouchais a ungil el  tekoi el kirel ngii el Dios er a buai me a dirrek el chelsel a delengcheklir. (Monguiu er a Psalm 34:1-3.) Ngsebechem el mo menguiu er a Psalm 148 el mora 150 el bliongel, e momtab er sel rolel e ngmelemolem aika el Bades el melisiich er kid el mo mengebkall er a Jehovah. Ngkmal klemerang, “moldanges er ngii kemiu el rokui el olengesenges er ngii.” (Psalm 33:1) E ngike el kot el ungil el Kerebai el Jesus Kristus, a mileketeklii a klungel a ultutelel a dongebkall er a Dios el okiu sel doruul er a urered el omerk er a ungil chais el kirel a Renged.​—Lukas 4:18, 43, 44.

14, 15. A Hosea, ngmilengelechel er a rechad er a Israel el mo meruul er a ngera el rolel a omelenget, me ngmlo uangerang a uldesuel a Jehovah el kirel a tengetengir?

¹⁴ Sel doba blakerreng el omerk er a klumech el olisechakl er a rechad, e ngolechotel a bltkil a rengud el mo er a Jehovah, me a urunguled el soad el mo nguu a kengei er ngii. El uaitiang, ka molatk er a profet el Hosea el mle meringel el omeklatk er a rechad er a Israel e le te mlo meruul a klsuul el omengull me a Dios a uleltngakl er tir. (Hosea 13:1-3) Ngmilengelechel er tir el mo meluluuch el mo er a Jehovah el kmo: “Mousubes a rokui el kngtmam, e mrenges a nglungucham, e a kim mo oldanges er kau el sel ki bla mtibir.”​—Hosea 14:1, 2.

¹⁵ A sechal kerbou a kot el mle meringel a cheral el charm el rechad er a Israel a mle sebechir el melenget el mo er a Jehovah. Me nguaisei, engdi a ‘odanges er kau el sel bla mtibir’ a belkul a kmo kede mo ungil el dobedebek a cheldechedechad me ngmo uchul a odanges el mo er a mera el Dios. Ngmle uangerang a osengel a Jehovah el kirir tirke el meruul er tia el rolel a omelenget? Ngdilu el kmo: “Ng mo betik a renguk er tir el oba renguk el rokir.” (Hosea 14:4) Me a Jehovah a mo ousubes a kngterir, e mo kongei, e dirrek el mo sechelirir tirke el chad el meruul er chouaitia el ungil el rolel a omelenget el mo er ngii.

16, 17. A lsekum a klaumerang el mo er a Dios a rullii a chad el mo blak a rengul el omerk er a ungil chais, e ngmo uangerang a uldesuel a Jehovah el kirel ngii el chad?

¹⁶ A omengebkall el kirel a ngklel a Jehovah el okiu a berkel a klumech a kmal klou el tedebechel a mera el omengull. A omengebkall el kirel a ngklel a mera el Dios a kmal mle klou a ultutelel er a uldesuel a ta er a milluches er a Psalm a uchul, me ngmle blechoel el olengit er a Jehovah el kmo: “Bo lungilbesul er a rengum a nglunguchek er omereng el saul e [Jehovah].” (Psalm 119:108) E kuk uangerang er chelecha el taem? A Isaia a ulemlaoch el kirel a klou el ildois er a rechad el mo er ngii er chelecha el taem el kmo: “A re chad a mo ouchais er a ungil chisel sel bla le rellii a Dios! . . . Me ng mo metenget er olengetongel el oldeu er a rengul a [Jehovah].” (Isaia 60:6, 7) Me chelecha el taem e ngmera el mla tmaut a otutel tia el tekoi, el rebetok el miliol el chad a meruul er a omelenget er tir el mo er a Dios “el tenget er chodanges, el rodech ra ngor lolecholt ra ngklel.”​—Hebru 13:15.

¹⁷ E kau a kuk mekerang? A Dios, ngkongei el nguu a tengetengem? A lsekum e ke omdasu el kmo ngdiak, e ke kongei el mo melodech a blekerdelem e mo omuchel el ouchais er a buai el kirel a omengebkellel a ngklel a Jehovah? A lsekum a klaumerang er kau a rullau el mo omuchel el omerk er a ungil el chais, e tiang a mo uchul e ke mo melenget er a tenget el “kuk ngar uchei er a le metenget el mor ngii a mla mo klou el sechal kerbou.” (Monguiu er a Psalm 69:30, 31.) Misei e bo lulterekokl a rengum el kmo a ungil el “bechochod” el tengetengem el kirel a omengebkellel a Jehovah a lodengelii, me ke ulterekokl el mo nguu a kengei er ngii. (Esekiel 20:41) Sel deurreng el bo mnguu a kmal diak a ngii di el deurreng er a beluulechad el sebechel el mo mekesiur.

‘A Jehovah a Di Ngii el Mo Omekngeltengat er a Remelemalt’

18, 19. (a) Ngua ngerang a osengir a rebetok el chad el kirel a omesiou el mo er a Dios? (b) Ngmo uchul a ngera el tekoi a lsekum kede oridii a kengei er a Dios?

¹⁸ Chelecha el taem, e a rebetok el chad a osisiu a lomdasu a tekoi el ua rebebil er a taem er a Malakai el millekoi el kmo: “Ng diak a belkul a dosiou er a Dios, ngera belkul me kede kmal meruul a le dung”? (Malakai 3:14) Misei a uchul e te dirrek el mlekususeu el mo melisiich a ngibeserreng er tir, e mlo omdasu el kmo a moktek er a Dios el kmal meringel er tir el loltaut,  me a dirrek el llechul a dikea ultutelel. Te dirrek el ulemes er a berkel a ungil el chais el ua lak a ultutelel, e dirrek el mengesang er tir.

¹⁹ Me ngsebeched el mesang el kmo tia el uldasu a ulemuchel er sel taem er a sers er a Eden. Ngii el Satan a milengesuseu er a uldesuel a Eba el mo mengemikr er sel klungel a ultutelel a ungil el klengar el omsang a Jehovah, el mlo uchul me ngdirrek el urridii a kengei er a Jehovah. Me chelecha el taem e a Satan a kmal dirk melasem el mengesuseu er a rechad el mo oumerang el kmo ngkmal diak a ngera el denguu a doruul a soal a Dios. Me nguaisei, engdi a uriul e a Eba me a bechil a mlo melechesuar el kmo sel doridii a kengei er a Dios, e ngbelkul a kmo kede dirrek el oridii a klengar er kid. Me tirke el rokui el mo oltirakl er a mekngit el kerebai er tirka el kot el chedam me a chedil, a ulterekokl el mo ua itir el mo oriid a klengar er tir.​—Genesis 3:1-7, 17-19.

20, 21. (a) Ngerang mirruul er ngii a mellakl dil er a Sarefath, e ngngera dilubech er a uriul? (b) Me ngkired el mekerang, e ngera uchul me ngkired el oukerebai er ngika el mellakl dil er a Sarefath?

²⁰ Ngkmal klou a klekakerous er a blekeradel el dilubech el mo er a Adam me a Eba me aike el tekoi el dilubech el mora Elias me a mellakl dil er a Sarefath. A uriul er a lorrenges a ungil el tekingel a Elias ngika el redil, e alta e ngdi mle kesai a kelir, e ngdi ngkilengei el mo meruul er a blauang, e ulemuchel el msang a kelel ngika el profet. Me a uriul e a Jehovah a ultutii a telbilel el mildung el okiu a Elias. Me a cheldecheduch a melemolem el ouchais el kmo: “Me te rokui el di mle ungilbesul a kelir el betok el klebesei. Me ngdi ua le tilbir a [Jehovah] el okiu a Elias, a delluchel belatong a dimlak bo lak a merikengko er ngii ma lechub e a bekai blo lak a cheluch er ngii.”​—1 King 17:15, 16.

²¹ Ngike el mellakl dil er a Sarefath a rirellii a tekoi el kesai el chad er a delongelir a rebetok el biliol el kiei er chelecha el taem a kongei el mo meruul er ngii. Ngmle cherrungel a klaumerang er ngii el mo er a Dios er a osobel, me ngii el Dios a dirrek el dimlak el chitii, er a temel a chelebulel. Tiaikid el cheldecheduch me a lmuut el bebil a kmal meketeklii el kmo a Jehovah a kmal rredemelel a nguu a cherrungel el klaumerang er kid. (Monguiu er a Josua 21:43-​45; 23:14.) A klengar er a Resioning er a Jehovah er chelecha el taem a meskid a klou el olechotel el kmo a Jehovah el Dios a kmal diak el sebechel el obes er tirke el rokui el nguu a kengei er ngii.​—Psalm. 34:6, 7, 17-​19. *

22. Ngera uchul me ngkmal orechudel er chelechang el kired el melemolem el osiik er a kengei er a Dios?

²² Sel sils er a kerrekerilel a Dios el “mei el mor tirikel rokui el kiei er bebul a chutem ra belulechad el rokir” a kmal di kmedung. (Lukas 21:34, 35) Ngkmal diak a chad el sebechel el chemiis er ngii. Ngdiak a ngii di el ilteet me a kerruul el sebechel el mo mekesiur sel okedong el bo lolekoi er ngii ngike el Chad er a Kerrekeriil er a Dios el kmo: “Mei, kemiu el mlukngeltengat ra Demak, mo mediukes ra rengedel a Dios el mlekedmokl el kiriu.” (Matteus 25:34) Chochoi, a ‘[Jehovah] a omekngeltengat er a melemalt; ngiueklii er a klungiaol el ua cheuatel.’ (Psalm 5:12) Me tiang a meketeklii el kmo ngkmal kired el melemolem el osiik er a kengei er a Dios.

[Footnote]

Ke Dirk Melatk?

• Ngera uchul me a Jehovah a rredemelel a nguu a cherrungel el omengull er kid?

• Ngera el rolel a omelenget a lekengei er ngii a Jehovah er chelechang?

• Sel tekoi el “oldanges er kau el sel ki bla mtibir” ngmelekoi el kirel a ngerang, e ngera uchul me ngkired el meruul er ngii el mo er a Jehovah?

• Ngera uchul me ngkired el melemolem el osiik er a kengei er a Jehovah?

[Aike el Ker er a Suobel]

[Siasing el ngar er a 17 el llel]

A profet er a Dios, ngullengit er a chebuul el mellakl dil el mo meruul er a ngera el tekoi?

[Siasing el ngar er a 19 el llel]

Ngera el klungiaol a sebeched el ngmai e le kid el meruul er a tenget el kirel a omengebkellel a ngklel a Jehovah?

[Siasing el ngar er a 21 el llel]

Sel cherrungel el klaumerang er kau el mo er a Jehovah a mo uchul a klungiolem