Kau Ke Mecherei a Oureor el Klisichel A Dios Me Ngomekrael er Kau?

“A klungiolel a rengum lorrael er ngak er a meral rael!”​—PSALM 143:10.

1, 2. (a) Ka mosaod a bebil el tekoi el dilubech el olechotel a kmo a Jehovah a ousbech er a oureor el klisichel el omekrael er a remesiungel? (b) A oureor el klisichel a Dios ngdi oureor er a chelsel a ileakl el blekeradel? Ka msodii.

NGERA uldesuem sel molatk er a rolel a loureor sel oureor el klisichel a Dios? Ke kora mo melatk aike el mesisiich el omerellel a Gideon me a Samson? (Mengeteklel 6:33, 34; 15:14, 15) Me a lechub e ke mo melatk aike el blekengir tirke el Kristiano er a irechar me a lechub e ngsel blekerdelel a Stefanus el mle chelellakl a rengul er a lengar er a medal a kerrekeriil er a Sanhedrin? (Rellir 4:31; 6:15) E kuk ua ngerang a uldesuem sel momes er a klou el deurreng el ngar er a chelsel aike el meklou el ongdibel er kid, me a blakerreng er a rudam el tir a kelebus e le tir el diak el kengei el mo olab el mo er a bita me a bitang er a ngii di el cheldebechel er a beluulechad, me a dirrek el tia el di meleketek a klungel el ureor er a berkel a klumech er a Renged? A chouaika el tekoi a klou el olechotel sel oureor el klisichel a Dios.

² Me a oureor el klisichel a Dios, ngdi oureor er sel taem el lengar ngii a ileakl el tekoi me a lechub e ngngar er ngii a ileakl el blsechel? Ngdiak. A Tekingel a Dios a mesaod el kirir a Rekristiano el ‘merael el ngara [oureor el klisichel a Dios]’ e “cheltikaik ra [oureor el klisichel a Dios]” e “ngar er a [oureor el klisichel a Dios].” (Galatia 5:16, 18, 25) Aika el tekoi a olecholt el kmo sel oureor el klisichel a Dios a melemolem el omekrael a rokui el tekoi er a chelsel a klengar er kid. Ngkmal kired el bek el sils el dolengit er a Jehovah me lomekrael a uldesued me a cheldechedechad me a omerelled el ousbech er a oureor el klisichel. (Monguiu er a Psalm 143:10.) Me sel dekengei er a oureor el klisichel a Dios me lomekrael er kid, e ngsebechel el mekeroul a ungil el blekerdeled, el ngii a melisiich er a rebebil e dirrek el mo uchul a odanges el mo er a Dios.

3. (a) Ngera uchul me ngkired el mo mukrael er a oureor el klisichel a Dios? (b) E ngera el ker a bo dosaod?

³ Ngera uchul me ngklou a ultutelel el kirel a oureor el klisichel a Dios el lomekrael er kid? E le ngngar er ngii a ta er a klisiich el soal el omekrael er kid, el ngii a omtok er sel oureor el klisichel a Dios. Tiakid el klisiich a losaod er ngii a Bades el kmo “ngelbesel a tech,” el ngii a urunguled el mo nguibes a tekoi er tia el beluulechad, el demludiukes er ngii el okiu a diak el cherrungel el klechad el dengiluu er a Adam. (Monguiu er a Galatia 5:17.) Ngera el tekoi a kired el meruul me bo el sebechel a oureor el klisichel a Dios el omekrael er kid? Ngera el bakes a kired el meruul me bo el sebeched el mo mesisiich er a ngelbesel a tech? Ngsebeched el melatk aika el ker sel bo dosaod aike el medechel el elolem el blekeradel er a rodech er a oureor el klisichel a Dios, el “kllourreng, ma blekokuii, ma ungilreng, ma blakerreng, ma delemedemek, ma chomengerem.”​—Galatia 5:22, 23.

Delemedemek me a Kllourreng a Meleketek er a Budech er a Chelsel a Ongdibel

4. Ngmekerang a delemedemek me a kllourreng a loleketek a budech er a chelsel a ongdibel?

⁴ Monguiu er a Kolose 3:12, 13. Ngar er a chelsel a ongdibel, e a delemedemek me a kllourreng a dmak el oureor el meleketek er a budech. Aika el blekeradel er a rodech er a oureor el klisichel a Dios a sebechel el ngosukid el mo meruul a ungil el bedul a rebebil, e oserechii a rengud sel bo dechelebangel a tekoi el ngii a sebechel el longesechii a rengud, e dirrek el kilmeklii a rengud me lak doruul a mekngit sel loumekngit a chad el bedul kid. A lsekum e ngmo duubech a klaititekangel er a delongeled kid me a kldemed el Kristiano, e a kllourreng a ngosukid el  mo mesmechokl er sel chetituokel el tekoi me lebo er ngii a budech er a delongeled. Me a delemedemek me a kllourreng a kmal usbechall er a chelsel a ongdibel, e le kid el rokui a diak demecherrungel me kede ulterekokl el mo meruul a cheleuid.

5. Ngera dilubech er a delongelel a Paulus me a Barnabas, e tia el omeruul ngolechotel a ngera el tekoi?

⁵ Ka molatk er a tekoi el dilubech er a delongelel a Paulus me a Barnabas. Tirka el terung a dilak el oureor el kemanget el taem el meruul er a ureor er a berkel a ungil el chais er a Renged. Te di dul mla er ngii a ungil el blekerdelir. Engdi a ta el taem e “ngdilubech a meringel klaititekangel, me te mlo kacheroid.” (Rellir 15:36-​39) Me tia el omeruul a olecholt el kmo ngar er a delongelir a reblak a rengrir el mesiungel a Dios, e ngdirrek el sebechel el mo er ngii a klaititekangel. Me a lsekum a Kristiano a mo er ngii a mondai er ngii me a kldemel er a klaumerang, e ngmekerang e sebechel el meleketek er a budech me a kltarreng er a delongelir me a kekerei el tekoi lak lemukeroul el mo klou el mondai?

6, 7. (a) Ngera el ulekrael er a Bades a sebeched el otireklii me lak el duubech a klou el mondai er a delongeled kid me a rekldemed er a klaumerang? (b) Ngmo uchul a ngera el klungiaol a ‘demereched lorrenges, e demeoud el mengedecheduch, e lemeoud el ngmasech a rengud’?

⁶ Sel tekoi el losaod er ngii el kmo “meringel klaititekangel” er a delongelel a Paulus me a Barnabas a kmal mle mereched el duubech e mlo uchul a klou el ngasecherreng. Me a lsekum a Kristiano a mengedecheduch er a kldemel er a klaumerang e omelechesiu er ngii el ngosecha rengul, e ngkirel el melatk er a ulekrael el ngar er a Jakobus 1:19, 20 el kmo: “A chad a kirel mereched lorrenges, e meoud el mengedecheduch, e meoud el ngmasech a rengul, ele ngasecherreng ra chad a diak le rellii a llemeltel a Dios.” Tiang a kmal di mo ultuil er a blekeradel el lengar er a chelsel, me ngsebechel el ngodechii a cheldecheduch, me a lechub e ngmesaod er ngii er a ta er a taem, me a lechub e ngmelmesumech er ngii er a uchei er a lebo er ngii a klou el ngasecherreng er a delongelir.​—Osisechakl 12:16; 17:14; 29:11.

⁷ Ngmo uchul a ngera el klungiaol a lsekum e kede oltirakl er tia el ulekrael? A dechoit a taem el mo ungil el melebedebek, e doluluuch el kirel tia el tekoi, e domdasu a tekinged er a uchei er a donger, e a Kristiano a kongei er a oureor el klisichel a Dios me ngomekrael er ngii. (Osisechakl 15:1, 28) Me ngoeak a ulekrael er tia el klisichel a Dios, e ngsebechel el olecholt a delemedemek me a kllourreng. Seikid e ngmo sebechel el oltirakl er a ulekrael el ngar er a Efesus 4:26, 29 el kmo: “Lak bora klengit a bo le kesib a rengmiu . . . Lak motebedii a mekngit el tekoi ra ngeriu, ngdi lsekum ngkirel e moltobed a ungil tekoi el toketekii a klungiaol el morar chad el orrenges, me le nguu a klengeltengat.” Me nguaisei, sel dolecholt er a delemedemek me a kllourreng, e ngsebeched el meleketek a budech me a kltarreng er a ongdibel.

Molisiich er a Telungalek er Kau el Okiu a Blekokeuii me a Ungilreng

8, 9. Ngerang a blekokeuii me a ungilreng, e ngmo uchul a ngera el klungiaol a lemeteketek er a chelsel a delengchokl?

⁸ Monguiu er a Efesus 4:31, 32; 5:8, 9. A blekokeuii me a ungilreng a uchul a omelisiich el di ua ungil el cheluut me a mekelekolt el ilumel el rullii a chad el mo ungil a rengul sel lemeringel a sils. Aika el blekeradel  a sebechel el mo uchul a deurreng er a chelsel a delengchokl. A blekokeuii a kmal ungil el blekeradel el mocholt er a ungil el cheldechedechad me a omerelled el meketeklii a klemeriarreng er kid el bedul a rebebil. A ungilreng a di uai a blekokeuii el mocholt el okiu a ungil el omerelled el mo uchul a klungiolir a rebebil, e dirrek el olechotel a omerelled el bekururau el mo er a rebebil. (Rellir 9:36, 39; 16:14, 15) Engdi a ungilreng a uldimukl er ngii a lmuut el bebil er a tekoi.

⁹ A ungilreng a ngarbab el olechotel a tekoi er a kldung. E le ngdiak di lolutk el kirel a omerelled e ngbai melutk el kirel aike el mera el blekerdeled. Ka molatk er a rodech el kmal ungil a rekel e ulterekokl el kmal merekos, el diak a kora mekngit er ngii, me a chedil er a blai a sebechel el nguu el omekang er a rengelekel. Me ngdi osisiu, a ungilreng el mo er ngii el oeak a oureor el klisichel a Dios a sebechel el mocholt er a chelsel a klengar er a Kristiano.

10. Ngera el omeruul a sebechel el ngosuterir a rechedal a telungalek el meleketek a rodech er a oureor el klisichel a Dios er a delengcheklir?

¹⁰ Ngar er a chelsel a delengcheklir a Rekristiano, e ngerang a mo ngosuterir a rechedal a telungalek el mo olecholt a blekokeuii me a ungilreng er a delongelir? A mera el klemedengei er a Tekingel a Dios a klou a ultutelel el kirel tia el tekoi. (Kolose 3:9, 10) A rebebil el bdelul a telungalek a odekiar a omesubel a rodech er a oureor el klisichel a Dios er a temel a Omengull el Telungalek er tir er a bek el sandei. A chouaisei el tekoi a diak el meringel er kid a meruul er ngii. Ngsebeched el ousbech aike el mla meketmokl el suobel el mesaod a dersta el blekeradel er a rodech er a oureor el klisichel a Dios. E sebeched el ousbech a bebil el sandei el mesuub a bebil el suobel el kirel aika el blekeradel. Me sel dosuub aika el suobel, e ngungil a donguiu aike el llechukl el bades e dosaod a belkul. Ngdirrek el sebeched el mesaod a rolel a doltaut aika el tekoi el bla desuub er a klengar er kid, e doluluuch el olengit er a Jehovah me lengesukid. (1 Timoteus 4:15; 1 Johanes 5:14, 15) A chouaisei el omesuub ngsebechel el omekrael a omerellir a rechedal a telungalek el mo uchul a klungiolir?

11, 12. A reteru el obekel el Kristiano te milekerang e ngmai a klungiolir er a omesubir er sel blekeradel el blekokeuii?

¹¹ A chad me a bechil, el mle sorir a chebechiielir a bo lungil, a tilbir el mo dmolech el mesuub el kirel a rodech er a oureor el klisichel a Dios. Me tiang mlo uchul a ngera el klungiaol? A bechiil el redil a dilu el kmo: “Sel ki mosuub a lmuut el betok el kirel a blekokeuii el bltikerreng e ngmla ngosukemam el mo olecholt a ungil el blekeradel er a delongelam er seikid el taem el mei er a chelechang. Ngmla osisecheklemam el mo oba kllourreng e mereched el kausubes a mekngit er a delongelam. E dirrek el mla osisecheklemam el mereched el ‘mereng a saul’ e ‘olengit a klausubes’ sel lekirel.”

¹² A kuk ta er a obekel el Kristiano, el mlo chelebangel a mondai er a chebechiielir, a mlo medengei el kmo ngdimlak lolecholt a blekokeuii er a delongelir. Me te tilbir el mo dmak el mesuub er tia el blekeradel er a blekokeuii. Me ngngera mlo rsel? A bechiil el sechal a kmo: “A omesubam er a blekokeuii a ngilsukemam el mo biusech a medemam er a ungil el  blekerdelel a ta me a tang me ngdiak ki mereched el omdasu a mekngit el bedul a kuk tang e oltelechakl er ngii er a mekngit el tekoi. Ak mlo omuchel el melatk aike el mo uchul a klungiolel a bechik me ngii me ngdirrek el mirruul el uaisei el bedul ngak. A omeruul el ullecholt er a blekokeuii el bedul a bechik a dirrek el mlo uchul me ak milsang a techellel me ngmimokl el oltobed a uldesuel e diak di lemereched el ngmasech a renguk er a tekingel. Me tia belkul a kmo ngmle kirek el olecholt er a klengariourreng el bedul ngii. Me sera ki bo moltaut er tia el blekeradel er a blekokeuii er a chelsel a chebechiielam, e ngmlo sebecham el olecholt a kllourreng er a delongelam el kmal mlo uchul a klou el deuil a rengmam.” Omomdasu e a telungalek er kau ngsebechir el ngmai a klungiolir er a omesubel a rodech er a oureor el klisichel a Dios?

Olecholt a Klaumerang Sel Di el Kid el Tang

13. Ngera el mekngit el tekoi a kired el mo kerekikl er ngii me lak el temellii a deleuill er kid me a Jehovah?

¹³ A Rekristiano a kirir el mecherei a oureor el klisichel a Dios me lomekrael er tir sel lengar er a buai me a dirrek el sel di el tir el tang. A beluulechad er a Satan a ngar er ngii a kmal betok el mekngit el siasing me a mekikiongel el rolel a ongelaod er a chelsel er a chelechang. Tia sebechel el mo uchul a telemellel a deleuill er kid me a Jehovah. Me a leuaisei, a Kristiano ngkirel el mo mekerang? A Tekingel a Dios a mengelechel er kid el kmo: “Misei e bedobed el chemoit a bek el mengelengalek ma choleorech el delengerenger, e moba delemedemek el nguu a Tekoi el mla medalem ra rengmiu, el ngarngii a klisichel lolsobel a [klengar] er kemiu.” (Jakobus 1:21) Ka me bo dosaod er a rolel e ngsebechel a klaumerang, el ngii a ta er a blekeradel er a rodech er a oureor el klisichel a Dios, el mo ngosukid el melemolem el klikiid er a medal a Jehovah.

14. A lak a klaumerang er kid er a Dios e ngmekerang e sebechel el choitikikid el mo meruul a mekngit?

¹⁴ A belkul a mera el klaumerang a kmo, a Jehovah el Dios a mera el ngar er ngii. E le a lsekum e ngdiak doumerang el kmo a Dios a mera el ngar er ngii, e ngsebeched el mechitikaik el mo meruul a mekngit. Ka molatk a tekoi el dilubech el mo er a rechedal a Dios er a irechar. A Jehovah a ullecholt el mo er a profet el Esekiel aike el mekikiongel el tekoi el lurruul er a ledu el kmo: “Kau el ngelekel a chad, ke mla mes el kmo ng ngera te meruul a re mengeteklel a Israel er a milkolk? Te mengull el meluluuch er a chelsel a delemerab el mui er a bleob. E sola e kmo, ‘A [Jehovah] a diak lesekid. Ng mla choitii a beluu.’” (Esekiel 8:12) Ke miltebengii sel tekoi el mlo uchul tia el mekngit el blekeradel? A Jehovah a dimlak el mera el chad er a rengrir, me te ulemdasu el kmo ngdiak el sebechel el mes aike el rokui el mekngit el tekoi el loruul.

15. Ngmekerang e sebechel a mesisiich el klaumerang er kid el mo er a Jehovah el omekerreu er kid?

¹⁵ Ngar er a kuk bitang, e mutebengii a kerebai er a Josef. Ngmle cheroid er a rechad er a blil me a rechedal, engdi a Josef a dimlak el bo er a deleboes el omeruul el obengkel a bechil a Potifar. E ngera uchul? Ngdilu el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?” (Genesis 39:7-9) Nguaisei, a Jehovah a mle mera el chad er a rengul a Josef. Me a lsekum a Dios a mera el chad er a rengud, e ngsoad el odeuir a rengul me ngdiak demekesuseu el mo omes a mekikiongel el rolel a ongelaod me a ka doruul a ngii di el ngera el mekngit sel di el kid el tang. Ngsebeched  el mo ulterekokl a rengud el uai ngike el milluches er a Psalm el milengitakl el kmo: “Ng mo bliochel a klengar er ngak el kiei er a blik. Ak mo olechib er osengek er a ngii di le ngerang el chelsengsang.”​—Psalm 101:2, 3.

Mongkar er a Rengum el Lokiu a Omolecholt a Omengerem

16, 17. (a) El ua losaod a babier er a Osisechakl, ngmekerang e a “tal kebelung el buik” a lemekesuseu el mo meruul a mekngit? (b) Ngua siasing el ngar er a 26 el llel, e ngmekerang e a chouaisei el tekoi a sebechel el duubech er a chelechang el mo er a remekekerei me a remeklou el chad?

¹⁶ A omengerem, el ngii a ulebongel el blekeradel er a rodech er a oureor el klisichel a Dios, a ngosukid el mo oltngakl a tekoi el mekngit er a osengel a Dios. Ngsebechel el ngosukid el mo mengkar er a rengud. (Osisechakl 4:23) Ka molatk a tekoi el ngar er a Osisechakl 7:6-​23, el mesaod er a “tal kebelung el buik” el mekesuseu er a omengetikaik er a oteruul el redil. Ngmlo obedikl er a uriul er a lorael er a “chades el kmeed er a chibokill el le kiliei er ngii a tal redil.” Nglocha mlo er sel basio e le ngrirenges a chisel ngii el dil. Me nguaisei, engdi ngdimlak lomelechesiu el kmo tia el omerollel a sebechel el mo uchul e a “klengar er ngii a ngar a metacherbesul” el blekeradel.

¹⁷ Ngmekerang e ngika el buik a mle sebechel el oibngii er tia el mekngit el blekeradel? Ngmle sebechel el uaisei oleko ngmillatk er tia el uleklatk el kmo: “Lak bechere choua isel redil me lochau a rengmiu; e lak bo momais el osiik er ngii.” (Osisechakl 7:25) Ngar er ngii a klubeled er tiang: A lsekum e ngsoad a lomekrael er kid a oureor el klisichel a Dios, e ngkired el mo olechib er kid er a ngii di el blekeradel el sebechel el mo uchul e kede ruebet er a klengit. E a ta er a rolel e ngsebechel a chad el mo oltirakl er a omerollel ngike el “kebelung el buik” a oeak sel lak el kerekikl er a osengel er a mubi er a TV me a usbechel a Internet. A ledurengul a chad me a lak, engdi ngsebechel el mes a siasing er a remeau el ngii a sebechel el mo uchul e ngobedikl el mo blechoel el omes a mekikiongel el deleboes el omeruul. E tiang a sebechel el tomellii a ukltkel me a delongelel el obengkel a Dios. E dirrek el sebechel el mo uchul a telemellel a klengar er ngii.​—Monguiu er a Rom 8:5-8.

18. Ngera el tekoi a kirel a Kristiano el meruul el mo mengkar er a rengul, e mekerang e aikang a ousbech er a blekeradel er a omengerem?

¹⁸ Nguaisei, engdi ngsebeched e dirrek el kired el mereched el olecholt a omengerem er sel taem el bo dechelebangel er a osengel a mekikiongel el siasing. A lmuut el ungil el tekoi el sebeched el rullii a sel dolasem el olechib er kid er a mekngit el omeruul er a uchei er a leduubech! (Osisechakl 22:3) A dolecholt a omengerem a uldimukl er ngii a dolatk a omellach el kirel a tekoi, e mo oltirakl ngii el omellach er a chelsel a klengar er kid. El ua tiang, ngungil a debecherei a computer me lengar er a basio el sebechir a rechad el mesang. A rebebil a mla metik er ngii el kmo ngungil a lomes a TV me a lechub e te ousbech a computer sel lengar er ngii a rechad er a blai. Me a rekuk bebil a mla tibir el mo diak el lousbech a Internet. (Monguiu er a Matteus 5:27-​30.) Me ngkmal kired el mo er a tkurrebab el sebeched el omekerreu er kid me a telungalek er kid, me a omengull er kid el mo er a Jehovah bo el sebechel ‘el tuobed ra klikiid el rengud, ma ungil luklatk ma kloumerang el diak a telingaol er ngii.’​—1 Timoteus 1:5.

19. Ngera el klungiaol a mo er ngii e le kid el kongei er a oureor el klisichel a Dios me lomekrael er kid?

¹⁹ A rodech el mo er ngii el lokiu a urerel a oureor el klisichel a Dios a mo uchul a betok el klungiaol. A delemedemek me a kllourreng a sebechel el meleketek er a budech er a chelsel a ongdibel. A blekokeuii me a ungilreng a sebechel el mo uchul a deurreng er a telungalek. A klaumerang me a omengerem a ngosukid el mo kmeed er a Jehovah e melemolem el klikiid er a osengel. Me a lmuut el tang, a Galatia 6:8 a oterekeklii el kmo: “Ngikel omriid el mora [oureor el klisichel a Dios] a mo meridm ra [oureor el klisichel a Dios] ra diak a ullebengelel klengar.” Me nguaisei, ngokiu a olubet el tengetengel a Kristus, e a Jehovah a mo ousbech er a oureor el klisichel el omesterir a diak a ulebengelel el klengar tirke el kongei el mukrael er tiaikid el klisiich.

Ngmekerang a Omonger?

• Ngmekerang a delemedemek me a kllourreng a lteketekii a budech er a chelsel a ongdibel?

• Ngera sebechel el ngosuterir a Rekristiano el mo olecholt a blekokeuii me a ungilreng er a chelsel a delengcheklir?

• Ngmekerang a klaumerang me a omengerem a lengesuir a Kristiano el mo mengkar er a rengul?

[Aike el Ker er a Suobel]

[Siasing el ngar er a 26 el llel]

Ngera kired el meruul me lak el duubech a klou el ngasecherreng er a delongeled?

[Siasing el ngar er a 27 el llel]

A omesubel a rodech er a oureor el klisichel a Dios a mo uchul a klungiolel a telungalek

[Siasing el ngar er a 28 el llel]

Ngera el mekngit el tekoi a sebeched el oibngid er ngii a dolecholt a klaumerang me a omengerem?