Ngerang a Kirir a Rengalek el Suub el Kirel a Dios?

“Ele chedaol Llechukl el rokui a melluches luleak a [oureor el klisichel a] Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt.”​—2 TIMOTEUS 3:16.

A RENGALEK a kirir el mosisechakl er a klemerang el kirel a Dios. Ngsebechir el suubii tia el klemerang er ker? Ngsebechir el suubii er a chelsel sel kot el merael a chisel el babier er a beluulechad el ngii a Biblia.

A Biblia a ua llechukl el babier el mla er a Dios el mei. Ngar tia el babier, e a Dios a ouchais er kid er a blekerdelel e dirrek el ocholt a ulekrael el kirel a tekoi er a kldung el mora rokui el ngelekel, el meklou me a remekekerei. Ngsebeched el mo omes a bebil er a osisechakl el ngar er a chelsel a Biblia me a dirrek el suobel el sebechir a remekekerei el ngalek el mesuub el kirel.

Ngera soal a Dios a bo dodengei el kirel?

◼ Aike el Lolisechakl a Biblia: “Ng di kau el tang a [Jehovah], ke ngarbab el merreder er a beluulchad el rokir.”​—Psalm 83:18.

Suobel: A Dios a mera el ngar er ngii, e dirrek el ngar ngii a ileakl el ngklel.

◼ Aike el Lolisechakl a Biblia: “A [Jehovah] a merriter a bek el reng e medengei a bek el uldesuel ma telbilel a reng. A lsekum kosiik er ngii e ng ngoikau.”​—1 Kronika 28:9.

Suobel: A Jehovah el Dios a omekerreu er kid el rokui, el uldimukl er a remekekerei el ngalek. (Psalm 10:14; 146:9) Ngkmal soal a dosuub el kirel.

◼ Aike el Lolisechakl a Biblia: “Kele bo mekngit er a . . . diak a demal el ngalek. Le lsekum kom mo mekngit er tir me te lmangel el olengit a ngesou er ngak, e ngak el RUBAK a mo olengeseu er tir.”​—Exodus 22:22-​24.

Suobel: A Jehovah a orrenges a nglunguchir a remekekerei el ngalek. Me ngkmal sebeched el mengedecheduch er a Dios er a bek el taem, e dirrek el ouchais er ngii aike el ngar er a chelsel a rengud me a uldesued.

◼ Aike el Lolisechakl a Biblia: “Ng mle betok el lolasem er ngii e ulemekringel er ngiil Chedaol Dios er a Israel.”​—Psalm 78:41.

Suobel: A tekinged me a uldesued a ngar ngii a lerellii er a uldesuel a Jehovah, me ngkired el mo ungil el omdasu er a uchei er a dongedecheduch me a lechub e doruul a tekoi.

 Ngkirel el mo ua ngerang a omerelled el bedul a rechad er a ngodech el beluu?

◼ Aike el Lolisechakl a Biblia: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”​—Rellir 10:34, 35.

Suobel: A lsekum a Dios a kongei er a rokui el chad el kakerous a blekerdelel a klengar er tir, e ngbelkul a kmo ngdiak el kired el mengetukel er a rebebil e le tir el ngodech a chiro er a bedengir me a lechub e te chad er a ngodech el beluu.

◼ Aike el Lolisechakl a Biblia: “E mkedmeklemiu el di sebechiu loba delemedemek ma chomeluu el smodii a blkul sel omelatk el ngara chelsiu er tirikel mengeriil chomesaod.”​—1 Petrus 3:15.

Suobel: Sel taem el dosaod el kirel a tekoi er a klechelid, e ngkmal kired el olecholt aike el mera el ngar er a uldesued el oba blakerreng me a delemedemek. Ngdirrek el kired el olecholt a omengull el mo er a rechad el klaumerang er tir a kuk ngodech er a klaumerang er kid.

Ngkirel el mo ua ngerang a omerelled el mo er a rechad er a blid?

◼ Aike el Lolisechakl a Biblia: “Me kemiul ngalek, molengesenges rar demmiu mar delemiu ra bek el tekoi, e tiaikid chodeuir a rengul a Rubak.”​—Kolose 3:20.

Suobel: A rebekongesenges el ngalek a diak di lolecholt el kmo ngbetik a rengrir er a rechad er a blirir, e te dirrek el ochotii el kmo ngsorir el oldeu er a rengul a Dios.

◼ Aike el Lolisechakl a Biblia: “Bo mkaberekakl a chetimiu rar chad, ma le ngarngii a klaotutakl ra delongeliu e mkausubes; e ngmla ousubes a telemelliu a Rubak, misei e bo muaisei e mkausubes a telemelliu.”​—Kolose 3:13.

Suobel: A rebebil er a rechad el uldimukl er a rechad er a blid a ulterekokl el mo melibas er kid a lebebil er a taem. Engdi a lsekum e ngsoad a Dios a lousubes er kid, e ngkired el dirrek el ousubes er a rebebil.​—Matteus 6:14, 15.

 Ngera uchul me ngkirel el ungil a omerelled e melekoi a klemerang?

◼ Aike el Lolisechakl a Biblia: “Misei e mchitii a blulak, ma derta er kemiu bo longedecheduch a klemerang el mora ngar bita er tir.”​—Efesus 4:25.

Suobel: Sel dolekoi a klemerang, e kede oukerebai er a Dios e dirrek el odeuir a rengul. A lsekum kede mekurulii a blekeradel el blechoel el omulak, e kede mo ua ngike el cherrouel a Dios el Diabelong el ngii a “demal a blulak.”​—Johanes 8:44; Titus 1:2.

◼ Aike el Lolisechakl a Biblia: “A ikel ngiidi le ngerang el somiu a lruul ar chad lekor kemiu, dilerrek el moruul el uaisei el morar chad.”​—Matteus 7:12.

Suobel: Ngkired el mo blechoel el melatk a rengrir, uldesuir, me aike el lousbech a rechad er a blid me a dirrek el rechad el ngar er a basio el dekiei er ngii. Sel dolecholt er a ‘bltikerreng el morar rudam,’ e a rebebil a ulterekokl el mo meruul a osisiu el ungil el omeruul el bedul kid.​—1 Petrus 3:8; Lukas 6:38.

El ua lolecholt aika el kerebai, a suobel el mengai er a Biblia a sebechel el ngosuterir a rengalek el mo meduch el oureng a saul, e olecholt a omengull, e mo meduch el olecholt er a klechubechub sel bo lemeklou el chad. Engdi a ker a kmo, ngtechang a kirel el mo olisechakl aika el tekoi el mo er a rengalek?