A Dios Ngomals er Kid?

“Ngmekngit a renguk er tirke el mlad, engdi a kumdasu el kmo ngmle tembatsu (el belkul a kmo ngblals el mla er a Dios).” Aika mle tekingel a ngar er a bab el chad er a balatiks er a beluu er a Siabal er a uriul er sel taem el klou el desiu el 9.0 a klisichel me a tsunami a tilemellii a beluu er a March 2011.

Sera lemad a rekuk betok er a 220,000 el chad er a klou el desiu el mla er a beluu er a Haiti er a January 2010, e a ta er a merael a chisel el chad er a klechelid el ngar er a TV a milsaod er a uchul el kmo, ngmlo uaisei e le rechad a mlo oltirakl a omerellel a Diabelong, misei e ngmle kirir el ‘obult el mo er a Dios.’

A ta er a prist er a Katolik er a beluu er a Huriping a millekoi el kmo: “A Dios a soal el lmuut el melisiich a mla mo diak loureor el ukltked.” Ngmillekoi er tiang er a uriul er sel taem er a lemad a 79 el chad el mlo obiou e mleredered er a rechad el tir a mle ketitech er a chelsel a klou el seked el ngar er a Manila. A ta er a simbung er sel beluu a uluuchais el kmo “a 21 el basent er a remeklou el chad a oumerang el kmo a Dios a olecholt er a ngesechel a rengul el oeak a mlongkangk el chutem me a ses el eolt me a kuk bebil el meklou el tellemall” el ngii a blechoel el melemall er tia el beluu.

SEL uldasu el kmo a Dios a ousbech a chouaika el meklou el tellemall el mo omals er a remekngit el chad a diak el beches el tekoi. A uriul er a 60,000 el chad er a lemad er a klou el desiu me a ngau me a tsunami el mlo er ngii er a Lisbon er a beluu er a Portugal er a rak er a 1755, e a ta el mellomes a rengul el chad er sel taem el Voltaire a ngklel a uleker el kmo: “A Lisbon ngkuk mle mekngit er a Paris el ngii a mats er a klou el delengerenger el omeruul?” Me nguaisei, a rebetok el miliol el chad a kora sorir el mo medengei el kmo a Dios kele lousbech a chouaika el meklou el chelebuul el mo omals er a rechad. Ngar er a betok el beluu e a chouaika el chelebuul a lomekedong el kmo ngomerellel a Dios.

Aike el uldasu a rullid el mo oker el kmo: A Dios ngmera el ousbech a meklou el telemellel a beluu el mo omals er a rechad? Aika el betok el tellemall el dirk mlo er ngii, ngmla er a Dios el mei?

A rebebil a oumerang el kmo ngmera el uaisei, e le Biblia a olecholt el kmo a Dios a uluusbech a meklou el tellemall el mo okngemedeterir a rechad. (Genesis 7:17-​22; 18:20; 19:24, 25; Ulecherangel 16:31-​35) Engdi sel dorriter aike el cheldecheduch er a Biblia e kede mesang el kmo, ngmla er ngii a edei el kakerous el blekeradel. A kot, e a Dios a uluuchais er a rechad er a uchei er a ledubech a tellemall. E a ongerung, a Dios a dimlak lokodeterir a rungil el chad el obengterir a remekngit el ua tekoi el duubech er chelechang sel lebo er ngii a telemellel a beluu. Ngdi tirke el kmal mle mekngit el chad me tirke el dimlak lorrenges a uleklatk a mlad. Me a ongedei, a Dios a kiltmeklii a rolel e tirke el chad el diak a telemellir a mlo sebechir el chemiis.​—Genesis 7:1, 23; 19:15-​17; Ulecherangel 16:23-​27.

Ngdiak a ta el olechotel a kmo a Dios a uchul aika el diak el mochur a ildisel el tellemall el ngii a mlo uchul a chelebulir a rebetok el miliol el chad er chelechang. Ngmo er ngii a taem e ngsebechel el mo diak a telemellel a beluu? Ngmekerang e sebeched el outekangel sel leduubech aika el tellemall? Ke mo metik a nger er a ongingil el suobel.