Mosuub er a Tekingel a Dios

A Biblia Ngomlaoch Aike el Mo Duubech er a Ngar Medad el Klebesei?

Tia el suobel a mesaod a ker el locha mla ta el moker, e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. A ulaoch er a Biblia ngmesaod a ulterekokl el tekoi?

Ngdi ta el Ngike el Kot el Ngarbab el Dios a sebechel el omes a rokui el tekoi er a ngar medad el klebesei. (Amos 3:7) El ua tiang, a irechar e ngulemlaoch el kirel a demiel a chad el mo okedongall el Messias me a lechub e ng Kristus. Ngii el Messias a uldidellel a rsechel a blak a rengul el chad el Abraham. Ngii a mo mengedereder el mo uchul e a rebekongesenges el chad a mo sebechir el nguu a klengeltengat er a cherrungel el klengar el klikiid er a ngii di el secher. (Genesis 22:18; Isaia 53:4, 5) Me ngika el chad a mle kirel el ngar er a beluu er a Bethlehem el mei.​—Monguiu er a Mika 5:2.

Ngmlo bleketakl el kmo a Jesus a ngike el Messias. Betok er a euid el dart el rak er a uchei, e a Biblia a ulemlaoch el kmo a klikiid el ekebil a mo mechellii a Messias e ngii a mo muketui. Ngmo tongetengii a klengar er ngii el kirel a kngterir a rebetok, e mo medakl el teloi er a remeteet. (Isaia 7:14; 53:3, 9, 12) A Biblia a dirrek el ulemlaoch er a betok er a eim el dart el rak er a uchei el kmo, ngmo soiseb er a Jerusalem el ngar bebul a donkey e dirrek el mo moterau el kirel a 30 el silber. E aika el rokui el tekoi a di tilaut.​—Monguiu er a Sekaria 9:9; 11:12.

2. A Dios ngomlaoch el kirel a blsechel a tekoi?

Betok er a eim el dart el rak er a uchei, e a Biblia a ulemlaoch el kirel sel rak el be ldum a Messias. A ulaoch a millekoi el kirel a “49 el rak” me a dirrek el “434 el rak,” el uldekial a 483 el rak. E aika el rak ngulemuchel er oingerang? A doltirakl er a Biblia, e aika el rak a ulemuchel er sel taem el mesiungel a Dios el Nehemia a mlo er a Jerusalem e ulemuchel el meleketek er a mats. Me a reksi er a beluu er a Persia a olecholt el kmo tia el tekoi a dilubech er a rak er a 455 er a uchei er a taem er a Jesus. (Nehemia 2:1-5) Me a Jesus a miltecholb el Messias er a uriul er a 483 el rak, el ngii a mle rak er a 29 el ultutii sel ulaoch el mildung er a uchei.​—Monguiu er a Daniel 9:25.

 3. A ulaoch er a Biblia ngtoutang er chelechang?

A Jesus a ulemlaoch el kirel a meklou el tekoi el kirel a taem er kid. A ulochel a milsaod el kirel a ungil el chais el kirel a Rengedel a Dios, el ngii a mo uchul a ulengull el mo er a rechad el betik a rengrir er a Dios. Me tia el Renged a mo okngemedii tia el mekngit el blekeradel el dekiei er a chelsel.​—Monguiu er a Matteus 24:14, 21, 22.

A ulaoch er a Biblia a mesaod a komakai el tekoi el kirel a ulebongel er tia el blekeradel er a klechad er chelechang. Alta e ngmeleketek a klemedengei er a rechad, me ngkirel el merael el mo ungil a blekeradel er a klengar, engdi a Biblia a bai mileketeklii el kmo a rechad a mo melemall er tia el beluulechad. Me a tellemall el oeak a mekemad, bosech er a kall, desiu, me a bekoiueiuul el rakt a di mo meleketek. (Lukas 21:11; Chocholt 11:18) Me a rechad a mo kiei el diak loltirakl a llach er a kldung. Me ngngar er a chelsel aika el meringel el taem, e tirke el oltirakl er a Jesus a mo omerk er a ungil el chais el kirel a Rengedel a Dios er a bek el beluu.​—Monguiu er a Matteus 24:3, 7, 8; 2 Timoteus 3:1-5.

4. Ngera mo duubech el mo er a klechad er a ngar medad el klebesei?

Ngika el Kot el Ngarbab el Dios a mo omesterir a reblak a rengrir el chad a betok el ungil el tekoi er a ngar medad el klebesei. A Jesus Kristus el Messias me a rengellitel er ngii, a mo ngar er a eanged e mengedereder er tia el chutem. Tirkang a tirke el mo chedal sel kabelment me a lechub e ng Renged, el ngii a mo mengedereder el kirel a ta el telael el rak. Me a rulekoad a mo mekiis e mo er ngii a techellir el mukerrekeriil el kmo te rredemelel a mo nguu a diak a ulebengelel el klengar me a lechub e ngdiak. Me a lmuut el tang, tia el Renged a mo omekungil er a rokui el chad el mo kiei er seikid el taem. E dirrek el mo diak a secher me a kodall.​—Monguiu er a Chocholt 5:10; 20:6, 12; 21:4, 5.

A lsoam a lmuut el omesodel, e momes er a 25-28 el llel me a 228-231 el llel tia el babier Ngerang Mera el Lolisechakl a Biblia?