A Remenguiu A Oker . . .

Ngerang a osengel a Dios el kirel a omelmechek er a dekool?

▪ A chad a sebechel el oker er tia el ker e le Biblia a diak a omesodel el kirel a dekool. Me tiang belkul a kmo ngmeringel er kid el mo medengelii a uldesuel a Dios el kirel a usbechel a dekool? Ngdiak.

A Biblia a kmo “a Dios a dilokou a Chedaol Llechukl el rokui er a dingerir a re milluches.” (2 Timothy 3:16) Me ngoeak a omellach er a Biblia e kede mo medengelii a osengel a Dios el kirel a ulekerreuil a bedenged. Me bo dosaod a telemellel a omelamech el dekool el bla lebetik a rescientist, e domes a omellach er a Biblia el kirel tia el tekoi.

A dekool a uchul a telemellel a bedengel a chad me a kodellel. Ngar er a Merikel, e a 1 er a chelsir a re 5 el chad a mad el omelamech el dekool a uchul. A chais er a U.S. National Institute on Drug Abuse a melekoi el kmo bek el rak e a dekool a mekodeterir a rebetok el chad el kuk betok “er a uldekial a ildisir tirke el mlad el omelim el rrom a uchul, usbechel a mekngit el kar, koadelchad, chad el nguu a klengar er ngii, me a accident er a mlai, me a rakt el AIDS.”

Tirke el melamech a dekool a tomelleterir a rebebil. A chetul a dekool a melemall a bedenged. Tirke el diak lolamech a dekool a klou a techellir el mo kasinoma a olemedir e mo smecher a chaidirengrir a lsekum e te melungel a chetul a dekool, e tia el techall a mla ngmasech er a 30 el basent. Sesei el rak er a uchei, e a retoktang a dirrek el silubii el kmo a chetul a dekool a sebechel el meketeket el ngar er a bail, carpet me a lmuut el bebil er a basio el sebechir a rechad el dirk melungel er ngii. Tia el bul a dekool a di ua dok el melemall a bedengir a rengalek e dirrek el sebechel el rulleterir el mo meringel er tir el mesuub a tekoi.

Ngsebeched el mo smau el melamech a dekool. Ngrullii a chad el mo sibil tia el mekngit el omeruul. A rescientist a oumerang el kmo a nicotine el ngar a chelsel a dekool a rullii a chad el mo meringel er ngii el choitii a omelamech el dekool.

Ngerang a omesodel a Biblia el kirel aika el tekoi? Ka di molatk:

A Dios a soal a bo dongull a klengar. Ngokiu a Llach el lebilsterir a rechad er a Israel, e ngmileketeklii el kmo tirke el sorir el oldeu er a rengul a kirir el mo mengull a klengar er a rechad. (Duteronomi 5:17) A rechad er a Israel a mle kirir el remuul a sersel a chedoel a blirir. E ngera uchul? E le chedoel a blirir a mle oberberk me te blechoel el mo er ngii a uchul me ngmle kirir el remuul a sersel me lak lerebet a rechad el metemall me a lechub e lemad. (Duteronomi 22:8) Me a lmuut el tang, te mle kirir el kerekikl a cheremir me lak le temelleterir a rechad. (Exodus 21:28, 29) Me a chad el melamech a dekool a melemall a moktek er aika el llach, e le ngdi ngii el melemall er a bedengel, e dirrek el melemall er a rechad el kmeed er ngii.

A Dios a soal a bo lebetik a rengud er ngii me a rengar bita er kid. A Jesus Kristus a dilu el kmo a rubengkel a kirir el mo oltirakl a eru el meklou el llach. Ngkirir el mo betik a rengrir er a Dios er a rengrir, uldesuir, omeltkir, klisichir e dirrek el mo betik a rengrir er a rengar bita er tir el ua lebetik a rengrir er a di tir. (Markus 12:28-​31) A klengar a sengk el mla er a Dios, me a chad el melamech a dekool a diak a omengull er ngii el kirel tia el sengk e dirrek el diak lebetik a rengul er a Dios. (Rellir 17:26-​28) Me a mekngit el blekerdelel a sebechel el mo uchul a telemellir a rebebil, el belkul a kmo ngomulak sel ledu el kmo ngbetik a rengul er a ngar bita er ngii.

A Dios a soal a dongikiid er kid er a mekikiongel el tekoi. A Biblia a mengelechel er a Rekristiano el mo mengikiid er tir er a “ikel mengikiongel a bedenged ma rengud.” (2 Korinth 7:1) Me ngbleketakl el kmo a dekool a mengikiongel a bedengel a chad. Me tirke el sorir el oldeu er a rengul a Dios a mo meringel er tir el mengoit er a omelamech el dekool, engdi ngokiu a ngelsuil a Dios e ngsebechir el mo choitii tia el mekngit el blekeradel.