Ngera Belkul Sel Lousubes er Kau a Jehovah?
Ngera Belkul Sel Lousubes er Kau a Jehovah?
‘RUBAK el Dios el mui er a blekokuii ma klechubechub, e diak le mereched el ngmasech a rengul, . . . e ousubes a chelebirukel, ma teluchakl, ma klengit.’—EXODUS 34:6, 7.
MOSIIK A NGER
Ngera ngmirruul a Jehovah el kirel a kngtil a David me a Manase, e ngera uchul?
Ngera uchul me a Jehovah a dimlak lousubes er a rechad er a Israel?
Kede mekerang e nguu a klausubes er a Jehovah?
1, 2. (a) Ngmle uangerang a omerellel a Jehovah el mo er a rechad er a Israel? (b) Ngera el ker a losaod tia el suobel?
SEL taem er a Nehemia, e a rechad er a Levi a milluluuch er mederir a rechad el ouchais el kmo a ruchelir a ‘ulekor el olengesenges’ a llechul a Jehovah. Engdi a Jehovah a mle blechoel el olecholt el kmo ngii a Dios ‘el ousubes a klengit; e mui er a klechubechub ma bltikerreng; e meoud el ngmasech a rengul.’ A Jehovah a millemolem el olecholt er a blekokuii el mo er tirke el chad el liluut el mo er a belurir er a taem er a Nehemia.—Nehemia 9:16, 17.
2 Ngsebeched el di kid el oker el kmo, ‘Ngera belkul sel lousubes er ngak a Jehovah?’ Me a bo donger er tia el ker e bo dorriter er sel omerellel a Dios el uluusubes er a reteru el king el David me a Manase.
A OBERAOD EL KLENGIT EL LURRUUL A DAVID
3-5. Ngmilekerang a David e ruebet er a oberaod el klengit?
3 Alta e a David a mle chad el milluu er a Dios, engdi ngrirebet er a oberaod el klengit. El ua klengit el lerirellii el mo er a Uria me a Bathseba, el dirrek el mlo uchul a ringel el mo er a rebetok el chad. Me nguaisei, engdi sel rolel e a Jehovah a ulemeklemalt er a David a ochotii a klou el klausubes er Ngii. Ka molatk er a tekoi el dilubech.
4 A David a uldureklterir a resoldau er ngii el mo oumekemad er a Raba el mats er a Amon. E tia el beluu a mle 50 el mael a cherridel er a ongos er a Jerusalem, el ngar er a mong er a Omoachel el Jordan. Tiaikid el taem e a David a mla er a chedoel a blil e mesang a bechiil el redil el Bathseba el melecholb. E a bechil a mlo er a mekemad. Me a David a kmal mlo soal a Bathseba me ngdilung me bo lemengai el mei er a blil, me ngmlo bad el obengkel.—2 Samuel 11:1-4.
5 Sera bo lodengei a David el kmo a Bathseba a mla mo dioll e ngmlo soal a lluut el me remei a bechil el Uria me bo lsebechel el mo bad el obengkel a bechil. Me alta e a David a millasem el meruul er a Uria me bo le bad el obengkel a bechil, engdi ngkmal dimlak lekengei el mo soiseb er a blil. Me a king a lilechesii a babilengel el mo er a mengeteklel a urrurt me lenguu a Uria el loia “er sel kmal meringel a mekemad er ngii,” e lechiis. Me a Uria a mlad er a mekemad me ngtilaut a uldesuel a David. (2 Samuel 11:12-17) Me a kngtil a king el mlo er a laokreng a mlo chachisois er sera lokodir a diak a kngtil el chad.
A NGELDECHEL A BLEKERDELEL A DAVID
6. Ngmle uangerang a blekerdelel a Dios el kirel a kngtil a David, e ngera ngochotii el kirel a Jehovah?
6 Kede medengei el kmo a Jehovah a mle sebechel el omes a rokui el tekoi el dilubech. (Osisechakl 15:3) Me alta e a king a mlo bechil a Bathseba, engdi a “RUBAK a dimlak lungil a rengul er omerellel.” (2 Samuel 11:27) Me ngmilekerang a Dios el kirel a klengit el leriruul a David? Nguldureklii a profet el Nathan el mo omes er ngii. Me a Jehovah a Dios er a klausubes a uchul, me ngmle soal el osiik er a techall el mo olecholt er a klechubechub er ngii. Ngsebechem el mo medengelii a klou el klechubechub er a Jehovah, e le ngdimlak lorrimel er a David el mo ouchais a kngtil e bai milecherei a Nathan me ngousbech er a okesiu el ocholt a kngtil. (Monguiu er a 2 Samuel 12:1-4.) Me tiang a kmal mle ungil rolel a losmechokl er a mle chetituokel el tekoi!
7. Ngmlo uangerang a uldesuel a David el kirel a okesiu er a Nathan?
7 A David a mle soal a llemalt me ngkmal ngilasech a rengul er ngike el merau el chad er a okesiu el ledillii a Nathan, me ngdilu el kmo: “Ak ulsiich a tekoi el ngar medal a di ngar el RUBAK el kmo ngikel chad el rirellii itiang a kirel mad!” Ngliluut el melekoi el kmo ngike el chebuul el chad a kirel el ngmai a cheral aike el kloklel el lurriid. Me a Nathan a dilu er ngii a mesisiich el tekoi el kmo: “Kau ingiil chad.” E sola e dilu er a David el kmo a telemellel a mekngit el omerellel a mo melemolem el ngar er ngii er a chelsel a delengcheklel me a ringel a mo er a telungalek er ngii. Ngdirrek el mo merur er a rebeluu el kirel a klengit el leriruul. Me a David a mlo melechesuar a berredel a klengit el leriruul me ngdilu el kmo: “Ak mlor a klengit el omtok er a RUBAK.”—2 Samuel 12:5-14.
A NGLUNGUCHEL A DAVID ME A KLAUSUBES ER A DIOS
8, 9. Ngmekerang a Psalm 51 e ocholt a dmolech el uldesuel a David, e ngosisecheklid er a ngerang el kirel a Jehovah?
8 A tekoi el medung er a cheliteklel a King el David er a uriul, a ochotii a klou el kngtil a rengul. A 51 el bliongel er a Psalm a mesaod a betok el ongtil a David el mo er a Jehovah e dirrek el ochotii el kmo ngdimlak di lullecholt a kngtil e lemerekong, ngdirrek el uluuchel er a rengul e ulebult er a kngtil. Ngkmal mle kerekikl el melatk er a deleuill er ngii me a Dios me ngdilu el kmo: “Ak mla mor a klengit el omtok er kau—el di kau el tang.” Ngdirrek el ullengit er a Jehovah el kmo: “Momeob er a beches el chaidireng er a chelsek e Dios, e mlia beches e blak a rengul reng er a chelsek. . . . Mluut el meskak ngii el deurreng el ngar olsobel er kau el mei, e mrellii a renguk el mo bekongesenges.” (Psalm 51:1-4, 7-12) Me kau ke ua David el kongei el ouchais a kngtim me a chelitechetum el mo er a Jehovah?
9 A Jehovah a milecherei a David me ngmlo chuarm er a belsel a mekngit el omerellel, e ngii el ringel a millemolem el omekcharm er ngii. Me nguaisei, engdi sera lomes er ngii el mera el uluuchel er a rengul e ‘loltubokl’ er ngii, e nguluusubes er ngii. (Monguiu er a Psalm 32:5; Psalm 51:17) Me a Jehovah a ungil el medengei a uldasu me a moktek er a chad el meruul a klengit. Me ngmle chubechub el uluusubes er a David me a Bathseba e dimlak loukerrekeriil e lomekoad er tir el oltirakl er a Llach er a Moses el kirir tirke el mo er a laokreng. (Levitikus 20:10) E rirellii a ngelekir el Salomon el mo ongingil el king er a Israel.—1 Kronika 22:9, 10.
10. (a) Ngerang a uchetemel a klausubes er a Jehovah el mo er a David? (b) Ngera sebechel a chad el remuul me lousubes er ngii a Jehovah?
10 Sel blekerdelel a David el ullecholt er a klechubechub el mo er a Saul a locha ta er a uchul me a Jehovah a uluusubes er ngii. (1 Samuel 24:4-7) A Jesus a milsaod er a blekerdelel a Jehovah el kmo: “Lak moukerrekeriil er a re chad, me lak bo loukerrekeriil er kemiu a Dios, ele Dios a mo oukerrekeriil er kemiu el di ua iser cho moukerrekeriil er a re chad; ng mo meruul el ekor kemiu a ikel murruul el mor a re chad.” (Mateus 7:1, 2) Ngkmal mo mechelaod a rengud sel dodengei el kmo a Jehovah a mo ousubes a oberaod el kngtid el uldimukl er a laokreng me a okodellel a chad! Ngousubes er kid a lsekum kede ousubes er a rebebil, e ouchais a kngtid el mo er ngii, e ngmodech a uldesued el kirel a mekngit el omerelled. Me nguaisei, a Jehovah a ousubes er a chad el mlo er a klengit a lsekum e ngouuchel er a rengul e obult er a kngtil.—Monguiu er a Rellir 3:19.
A MANASE A MLO ER A KLENGIT E ULEBULT
11. Ngera el mekngit el tekoi a lurruul a King el Manase el olengasech er a rengul a Dios?
11 Me bo dosaod er a ta er a cheldecheduch el ochotii el kmo a Jehovah a kongei el ousubes er a rechad. Bekord el 360 el rak er a uriul er a omengederederel a David, e a Manase a mlo king er a Juda. Ngmilengedereder el 55 el rak el kmal di mirruul a betok el mekngit el tekoi el uchul me ngurridii a kengei er a Jehovah. Ngtileketek a olengetongel er a Baal, “e mlo mengull el meluluuch a btuch,” e millenget er a rengelekel el sechal el mo delaol tenget, e dirrek el millisiich a tekoi er a olai. Me “ng mirruul a betok el mekngit el kmal ulengeschii a rengul a RUBAK.”—2 Kronika 33:1-6.
12. Ngmilekerang a Manase e obult el mo er a Jehovah?
12 Me a Manase a milengai er a belual el mo kelebus er a Babilon. Me ngar isei e nglocha mlo melatk a tekingel a Moses el mo er a rechad er a Israel el kmo: “Ngdi sel bor a chelebuul, e a ikal rokui el tekoi le dubech el ekor kemiu, e seikid e kom mochu obult el mor a RUBAK e olengesenges er ngii.” (Duteronomi 4:30) Me a Manase a ulebult el mo er a Jehovah. El milekerang? “Ng ngiluu a rengul el mor iou” e “milluluuch er a Dios” (e tiang a mocholt er a 23 el llel). (2 Kronika 33:12, 13) Ngdiak dodengei a tekoi el ledilung a Manase er a nglunguchel, engdi nglocha di osisiu er aike el ledilung a King el David el ngar er a 51 el bliongel er a Psalm. Me ngbleketakl el kmo a Manase a kmal uluuchel er a rengul e ulebult er a mekngit el omerellel.
13. Ngera uchul me a Jehovah a uluusubes er a Manase?
13 Ngmilekerang a Jehovah er sera loluluuch a Manase el mo er ngii? “Ng rirenges a nglunguchel e liluut el nguu el mor a rengedel er a Jerusalem.” Me a Manase a di ua David el mlo melechesuar a berredel a kngtil me ngmera el uluuchel er a rengul e ulebult. Seikid a uchul me a Dios a uluusubes er ngii e liluut el olutii el mo king el ngar er a Jerusalem. Me a “Manase a mlo medengei el kmo a RUBAK a Dios.” (2 Kronika 33:13) Ngkmal mo mechelaod a rengud sel domes chouaika el olechotel a klausubes er a Dios el kirir tirke el obult er a kngterir!
NGAR ER NGII A TELKELEL A KLAUSUBES ER A JEHOVAH?
14. Ngokiu a ngera el rolel e a Jehovah a ousubes a klengit?
14 Te di kesai el chedal a Dios er chelechang a olengit a klausubes el kirel a klengit el ua lurruul a David me a Manase. Engdi a omerellel a Jehovah el uluusubes er tirka el teru el king a meketeklii el kmo ngsebechel el ousubes er a chad el rirellii a oberaod el klengit a lsekum e ngmera el ouuchel er a rengul e obult.
15. Kede mekerang e medengei el kmo a Jehovah a diak lousubes a rokui el klengit?
15 Me ngdiak el kired el omdasu el kmo a Jehovah a mo ousubes a rokui el klengit. Me bo domekesiu er a blekerdelel a David me a Manase er a blekerdelir a rediak lolengesenges el chad er a Israel me a Juda. A Dios a ulderechii a Nathan el mo mengedecheduch er a David e dirrek el milsang a techellel el mo obult. Me a David a kilengei e ulebult. Me a Manase er a lesal mlo chebuul e nguluuchel er a rengul e ulebult. Engdi a rechad er a Israel me a Juda a dimlak lobult er a mekngit el omerellir, misei a uchul me a Jehovah a dimlak lousubes er tir. Ngbai millemolem el oldurech er a reprofet el mo ouchais er a uldesuel el kirel a mekngit el omerellir. (Monguiu er a Nehemia 9:30.) Me sel taem er a lluut el mo remei er a belurir tirke el mlengai el mo er a Babilon, e a Jehovah a dirk uleldurech er a remesiungel el ua prist el Esra me a profet el Malakai el mo omeklatk er tir. Me a rechad er sel taem sel lolengesenges er a Jehovah e ngmlo dmeu a rengrir.—Nehemia 12:43-47.
16. (a) Ngera dilubech el mo er a renged er a Israel e le tir el dimlak lobult er a kngterir? (b) Ngera el techall a mo er a rengelekir a rechad er a Israel el kiei er chelechang?
16 A Jehovah a mlo diak longerechir er a rechad er a Israel el melenget a charm er sera loderchii a Jesus el mei er a chutem el tongetengii a cherrungel el klengar er ngii el kirir. (1 Johanes 4:9, 10) A Jesus a ullecholt a uldesuel a Demal er a ledu el kmo: “Jerusalem, Jerusalem! Komkoad er a re profet e ometech er a re chad er a bad el luledurech er tir a Dios el olab a klumech el ekor kemiu! Ng mle telal leko kumechull er a rokui el chedam el ua dechuu el malk el mengudel er a re ngelekel er eungel osebekel, e kemiu a dimlak el somiu! Mada Templo er kemiu a mo cheloit e di mo bechachau.” (Mateus 23:37, 38) Me a mekngit el omerellel a renged er a Israel el dimlak lobult a uchul me a Jehovah a mlo ngiltii a beches el “Israel ra Dios.” (Mateus 21:43; Galatia 6:16, BT) E kuk ngera mo duubech el mo er a rengelekir a rechad er a Israel el kiei er chelechang? Ngar er ngii a techellir el nguu a klechubechub me a klausubes er a Jehovah a lsekum te olecholt er a klaumerang er tir er Ngii me sel olubet el tengetengel a Jesus Kristus. Me tia el techall a dirrek el sebechel el mo er tirke el mlad el dimlak lobult er a kngterir sel lebo lebekiis er a chelsel a beches el beluulechad.—Johanes 5:28, 29; Rellir 24:15.
A KLUNGIAOL EL OKIU A KLAUSUBES ER A JEHOVAH
17, 18. Kede mekerang e nguu a klausubes er a Jehovah?
17 Ngua ngerang a uldesued el kirel a klausubes er a Jehovah? Ngkired el mo ua David me a Manase, el mo melechesuar a kngtid, obult er a mekngit el omerelled, e olengit er a Jehovah me lousubes er kid e lengesukid el mengikiid er a rengud. (Psalm 51:10) Me a lsekum kede mlo er a oberaod el klengit, e ngkired el olengit a ngeso er a remechuodel. (Jakobus 5:14, 15) Me a derta er kid a mo mechelaod a rengud sel dodengei el kmo a Jehovah a dirkak le mengodech e ngii a ‘Dios el mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng. E oltaut er a telbilel el mor a re betok el telael el chad e ousubes a chelebirukel, ma teluchakl, ma klengit.’—Exodus 34:6, 7.
18 A Jehovah a uluusbech er a mesisiich el okesiu el meketeklii el kmo ngmo ousubes a kngterir a rechad er a Israel a lsekum te obult er a mekngit el omerellir. (Monguiu er a Isaia 1:18.) Me ngera belkul a klausubes er a Jehovah el kired? Ngsebechel el mengubet a rokui el kngtid a lsekum kede oba omereng el saul el mo er a Jehovah e obult er a mekngit el omerelled.
19. Ngera kede mo mesaod er a ongingil el suobel?
19 Me kid el mo nguu a klausubes er a Jehovah, kede mekerang e oukerebai er ngii el ousubes er a rebebil? Kede mekerang e melodech a uldesued el kirir tirke el mlo er a oberaod el klengit e ouuchel er a rengrir e obult? A ongingil el suobel a mo ngosukid el merriter a rengud me bo el sebeched el mo ua Demad el Jehovah el ngii a “ousubes a tellemall.”—Psalm 86:5.
[Aike el Ker er a Suobel]
[Siasing el ngar er a 26 el llel]
A Jehovah a uluusubes er a Manase me ngliluut el mo king er a Jerusalem
