Mosuub er a Tekingel a Dios

A Dios Ngmo Toketekii a Kabelment el Mengedereder er a Beluulechad el Rokir?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngera uchul me a klechad a ousbech er a di ta el kabelment?

A mondai er a klechad a mla mekelekelii a beluulechad el rokir. Ngar er a bebil el beluu, e a ruumesingd el chad a kmal chebuul. E a kuk bebil el beluu a kmal ungilbesrir a rechad er ngii. Me ngkirel el mo er ngii a di ta el kabelment el mengedereder er a beluulechad me bo el tabesul a rolel a longetmokl a tekoi el mo er a bek el beluu.​—Monguiu er a Olisechakl 4:1; 8:9.

2. Ngtechang a sebechel el mo merreder er a beluulechad?

A rechad a diak el sorir a di ta el chad el mo mengedereder er a beluulechad. Ngdiak el rokui el chad a kongei er a ta el chad el mo mengedereder, e le rechad a blechoel el di meruul aike el sorir er sel taem el lenguu a klisiich el mo mengedereder. Me tia el rolel a dereder a ua le kdekudel er osengir a rechad.​—Monguiu er a Osisechakl 29:2; Jeremia 10:23.

A Jehovah el Dios a mla ngiltii a Ngelekel el Jesus el mo mengedereder er a beluulechad el diak a ulebengelel. (Lukas 1:32, 33) A Jesus a mla kiei er a chutem, e ulemekungil er a resmecher, olisechakl er a rengariou a rengrir, e mengoit a taem el obengterir a rengalek. (Markus 1:40-​42; 6:34; 10:13-​16) Me a leuaisei, e a Jesus a ulterekokl el kmal mo ungil el Merreder.​—Monguiu er a Johanes 1:14.

 3. Ngsebechel el mo er ngii a di ta el kabelment?

A Dios a mla tutkii a Ngelekel el mo mengedereder er a beluulechad. (Daniel 7:13, 14) Me a Jesus a sebechel el ngar er a eanged e mengedereder er a chutem, el di ua merreder er a beluu el kiei er a ta el basio e mengedereder a betok el beluu.​—Monguiu er a Mateus 8:5-9, 13.

Me a rokui el chad te mo kongei er a Jesus me ngmengedereder? Ngdiak, ngdi tirke el betik a rengrir er a llemalt a mo kongei er ngii. Me a Jehovah a mo mengikiid er tia el chutem er tirke el uleltngakl er ngika el betik a rengul e melemalt el Merreder el bla lengiltii.​—Monguiu er a Mateus 25:31-​33, 46.

4. Ngmo mekerang ngike el mo Merreder er a beluulechad?

A Jesus a ua mengkerengel a sib el mla omuchel el mengudel er a remelemalt el chad er a bek el renged e olisechakl er tir el mo oubltikerreng. (Johanes 10:16; 13:34) E tirka el chad a kongei el melisiich er a omengederederel. (Psalm 72:8; Mateus 4:19, 20) Te blak a rengrir el ouchais er a rechad el kmo a Jesus a mla mo King.​—Monguiu er a Mateus 24:14.

Ngdi kmedung a Jesus el mo okngemed aika el mekngit el kabelment el ngii a omekcharm er a rechad. Ngmla melilt er a rebebil el blak a rengrir el chedal el mo mengedereder el obengkel el ngar er a eanged. (Daniel 2:44; 7:27) Me tia el Rengedel a Jesus a mo mekekii a beluulechad er a klemedengei er a Jehovah e dirrek el mo toketekii sel paradis el di mla ngar er ngii er a uchelel a reksi er a klechad.​—Monguiu er a Isaia 11:3, 9; Mateus 19:28.

El kirel a lmuut el omesodel, e momes er a 8 el bliongel er tia el babier, Ngerang Mera el Lolisechakl a Biblia?, el loltobed er ngii a Resioning er a Jehovah.