Ongedei el Ker: Ngera Uchul me a Dios a Mechikak me Ak Chuarm?

A DEMAL a Ian a mle chad er a omelim el rrom. Me alta e a Ian a mlukeroul el ngar er ngii aike el lousbech er a klechad er ngii, engdi ngmle blechoel el oureng er sel bltkil a rengul a demal el mo er ngii. Me ngdmu el kmo: “Ngdimlak el betik a renguk er ngii, e le ngdi blechoel el melim a rrom e mekngit a omerellel el mo er a delak.” Me a Ian er sera lorael el mo klou e ngmlo betok a keril el kirel a Dios. Me ngmelekoi el kmo: “A lsekum e ngmera el ngar er ngii a Dios e ngera uchul me ngmechititerir a rechad me te chuarm?”

Ngera uchul me kede oker a ker? Alta e ngdi ungilbesul a klengar er kau engdi nglocha dirrek el chetim el omes er a remelemalt el chad el chuarm. Me nguaisei, engdi a rechad a mo blechoel el oker er tia el ker sel lebo lecharm me a lechub e a betik er a rengrir a mo smecher e mad.

Ngerang a nger er a rebebil? A rebebil a oumerang el kmo a Dios a mechikid me kede chuarm el olisechakl er kid el mo ngariou a rengud e chubechubechad. E a rekuk bebil a omdasu el kmo te chuarm er chelechang el kirel a klengit el leriruul er sel mle klengar er tir er a uchei.

Ngera belkul a nger er tir? A Dios a diak lomekerreu er kid me ngmeringel er kid el mo betik a rengud er ngii.

Ngera ngolisechakl a Biblia? A Biblia a bleketakl el kmo a Dios a diak el uchul a ringel el kirir a rechad. “A lsekum a chad a measem er a ua isei el ongarm, e ng diak le kirel el kmo, ‘Tial ongarm a mlar a Dios el mei.’ Ele Dios a diak el sebechel el mecharm er a mekngit, ma diak longarm er a ngii di le chad.” (Jakobus 1:13) Me sel uldasu el kmo a Dios a omekcharm a kmal omtok er a omesodel a Biblia el kirel a blekerdelel a Dios. El mekerang?

A ta er a kot el ngarbab el blekerdelel a Dios a bltikerreng. (1 Johanes 4:8) A Biblia a meketeklii el kmo a omerellel a Dios a di ua omerellel a oltut el chedil. A Dios a oker el kmo: “Ng sebechel a redil el obes er a ngelekel tolechoi e diak le betik a rengul er a ngelekel lulechellii? A lta e a chedil a mo obes er a ngelekel, ngdi ngak a kmal diak kubes er kau.” (Isaia 49:15) Omomdasu e ngsebechel  a betik a rengul el chedil el durengul el melemall er a ngelekel? Ngkmal diak. Ngbai osiik a rolel e omekerreu er a ngelekel me ngdiak lecharm. Me ngdi osisiu, a Dios a diak lomekcharm er a remelemalt el chad.​—Genesis 18:25.

Engdi chelecha el taem e a rechad a chuarm, me ngsebeched el mo oker el kmo, ‘A lsekum a Dios a klou a klisichel e dirrek el omekerreu er kid, e ngera uchul me ngdiak lokngemed aike el tekoi el uchul a ringel me a chelebuul?’

Ngar er ngii a ungil el uchul me a Dios a omechei a ringel me ngmelemolem. A ta er ngii a kmo: A rechad a blechoel el uchul a ringel el mo er a rebebil. A rebetok el mekngit el chad el omekringel er a rebebil a chetirir el melodech a omerellir. Me a Dios a kirel el mo okngemedeterir me bo lak a ringel.

A apostol el Petrus a mesaod er a uchul me a Dios a dirkak lokngemedeterir a remekngit er a ledu el kmo: “A Rubak a diak le meoud el mo meruul a ikel tekoi el le tilib el mo meruul, el ua ikel lomdasu a re bebil er a re chad. Ng bai oba kllourreng el kiriu, ele ng diak el soal a ngii di le chad a leriid, e bai soal a rokui el chad a lobult el mo imikr a kngterir.” (2 Petrus 3:9) Me a kllourreng er a Jehovah a ochotii el kmo ngkmal betik a rengul e chubechubechad.

Me nguaisei, engdi ngdi kmedung e a Jehovah a “mo mechititerir tirkei el omekcharm er kemiu me te mo chuarm.” Me tirke el omekringel er a remelemalt el chad a “mo chuarm er a belsir er a chelebuul el diak a ulebengelel.”​—2 Thesalonika 1:6-9.

A Ian el dulsaod er ngii er a uchei a mlo medengei a nger er a keril el kirel a ringel, me ngildechii a osengel el kirel a klengar.

A lsoam a lmuut el betok el omesodel sel uchul me a Dios a omechei a ringel me sel rolel e ngmo okngemedii tia el tekoi, e momes er a 11 el bliongel er a babier el Ngerang Mera el Lolisechakl a Biblia? Ngsebechem el download er tia el babier er a www.dan124.com

[Baks el ngar er a 9 el llel]

Ngera Ngdilung a Jesus el Kirel a Ringel?

A Jesus a dimlak loltelechakl er a Dios el kirel a ringel el lechilarm er ngii a rechad. Ngbai mirruul aika el tekoi el beldukl er iou.

A Jesus a ulechotii el kmo a Dios a diak lomals er a remelemalt el chad el omekringel er tir. A Jesus a ulemekungil er a resmecher, rechitechut, me a remeiko. (Mateus 15:30) Me a mengasireng el tekoi el lurruul a osisecheklid er a eru el meklou a ultutelel el tekoi: A kot e a Jesus a uluusbech er a klisichel a Dios el mengesadel a ringel el diak lolechel a ringel. E a ongerung e a Jesus a mlo “chubteterir” a rechad sel lomes er tir el chuarm me ngulemekerreu er tir. (Mateus 20:29-​34) A uldesuel a Jesus a mle ua uldesuel a Demal, me ngokiu a tekingel me a omerellel e kede mo medengei el kmo a Dios a mekngit a rengul el omes er a rechad el chuarm me ngsoal el olengeseu er tir.​—Johanes 14:7, 9.

A Jesus a ulechotii el kmo a Satan a uchul a betok el ringel me a chelebuul. A Jesus a dilu el kmo: “Ser a ngar a mong el mei e ng omekoad er a re chad.” (Johanes 8:44) Ngdirrek el mileketeklii el kmo a Satan a “merreder er tial beluulchad” e ngike el “mengeblad er a beluulchad el rokir.”​—Johanes 12:31; Ocholt 12:9.

A Jesus a meskid a omelatk el kirel a taem el mo diak a ringel. Ngullisechakl er a rulebengkel el meluluuch el kmo: “Demmam el ngar a eanged: . . . a Rengedem le mei: bo le motaut a soam er a beluulchad el ua ingii er a eanged.” (Mateus 6:9, 10) Me sel lemei a Rengedel a Dios e ngmo diak a ringel er a beluulechad el di ua eanged.

A Jesus a milsaod er a blekerdelel a klengar el ngar cheungel a Rengedel a Dios el mo er a Johanes el kmo, a Dios a “mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”​—Ocholt 1:1; 21:3, 4.