Molekeed er Kau er a Dios

“Tiakid a Longerechir er Ngii er Kid”

NGERA ngmengerechir er ngii a Jehovah er tirke el sorir el mengull er ngii? Ngsoal a rediak el mecherrungel el chad a bo lecherrungel el mesiou er ngii? Me a lechub e ngdi mengerechir er kid er aike el sebeched el remuul? Ngklou a ultutelel a nger er aika el ker a lsekum ngsoad el mo dmeu a rengud el mesiou er a Dios. Me bo dorriter a tekingel a Mika el kirel a tekoi el soal a Dios a doruul.​—Monguiu er a Mika 6:8.

“Mla subedid el kmo ng ngera ungil.” A Dios a mla meketakl a tekoi el soal a bo doruul. Ngmla lmuches a llechul er a chelsel a Biblia, “el subedid el kmo ng ngera ungil.” A “Dios a bltikerreng,” me ngomekerreu er kid. (1 Johanes 4:8; 5:3) Me sel doltirakl a llechul e kede odeuir a rengul e dirrek el mo uchul a klungioled.​—Duteronomi 10:12, 13.

“Tiakid a longerechir er ngii er kid.” Ngar er ngii a llemeltel a Dios el mengerechir a soal er kid? Ngkmal ngar er ngii! Ngkired el olengesenges er ngii e le ngii a uchul a klengar er kid. (Psalm 36:9) Me a leuaisei, e ngera ngmengerechir er ngii er kid? A Mika a mesaod el kirel a edei el tekoi. E a eru er ngii a mesaod el kirel a deleuill er kid me a rechad, e sel ongedei er ngii a mesaod el kirel a deleuill er kid me a Dios.

“Mo meruul a melemalt.” A tekoi er a Hebru el “melemalt” a losaod er ngii a ta er a babier el kmo “nguldimukl er a melemalt me a ungil el deleuill er a rechad er a beluu.” Me a Dios a soal a bo lemelemalt el tabesul a omerelled el mo er a rechad el oltirakl a llechul. Kede olecholt er a llemalt sel lak dongetukel, e lak dongeblad er a rechad. (Levitikus 19:15; Isaia 1:17; Hebru 13:18) Me a melemalt el omerelled el bedul a rechad a mo uchul e ngmo ungil a omerellir el me er kid.​—Mateus 7:12.

“Mo olecholt er a diak le mengodech el bltikerreng.” A Dios a diak di lsoal a doruul a ungil e ngdirrek el soal a bo lebetik a rengud er a ungil el omeruul. A tekoi er a Hebru el “ungil el omeruul” (che’sedh) a osisiu a belkul er a “diak lemekimd el bltikerreng.” A ta el chad el mesuub er a Biblia a kmo: “A bltikerreng, klechubechub me a ungil el omeruul a diak el cherrungel el smodii a belkul a tekoi el [che’sedh]; ngbelkul a kmo ngmo modak aika el rokui e mo osisiu a belkul er tia el tekoi.” Me a lsekum e kede olecholt er a diak le mengodech el bltikerreng, e ngmo dmeu a rengud el olengeseu er a rechad, el ua losaod a Biblia.​—Rellir 20:35.

“Mo oba ngariourreng el olengesenges er a Dios er kid.” Kede olengesenges er a Dios sel doltirakl a llechul el ngar er a Biblia, me ngkirel el mo ‘ngariou a rengud.’ El okiu a ngera el rolel? A klengariourreng er kid el mo er a Dios a mocholt el okiu sel dorriter a blekerdeled e bo dungil el medengei a chelitechetud. Me a bo doba “ngariourreng el olengesenges” e ngbelkul a kmo ngtabesul a osenged el kirel a tekoi el soal a Dios a doruul me aike el sebeched el remuul el mo er ngii.

Ngdmeu a rengud e le Jehovah a diak longerechir er kid er a tekoi el diak el sebeched el meruul. Ngmo dmeu a rengul sel lomes er kid el blak a rengud el mesiou er ngii. (Kolose 3:23) Ngungil el medengei a chelitechetud. (Psalm 103:14) Me sel doba klengariourreng el mo medengei a chelitechetud e ngmo dmeu a rengud el mesiou er ngii. Ngsoam el mesuub el mo meduch el mesiou er a Dios? Sel moruul el uaisei, e ngmo uchul e a Dios a mo omekngeltengat er kau.​—Osisechakl 10:22.