1-3. (a) Ngera uchul me a Josua a ungil el kerebai el kired? (b) Ngera kired el melatk er ngii sel dolilt a tekoi?

 AIKE el tekoi el dolilt a kmal meklou a ultutelel, e le nguchul e ngsebeched el omtebechel er a klengar er kid. El uai tiang, a chad el merael er a rael e mocha er a metengal a rael a mocha kirel el melilt er a rael el bo lokiu ngii. Me ngmo ngiltii sel rael el merael el bedul a basio el soal el mo er ngii, e diak bo lokiu sel kuk ta er a rael.

² A Biblia a ouchais el kirir a rebetok el tir a mle kirir el melilt a meklou a ultutelel el tekoi. A Kain a mle kirel melilt el kmo ngmo omtebechel er a ngesechel a rengul me a lechub e ngdiak. (Gen. 4:6, 7) Me a Josua a mle kirel el melilt el kmo ngmo mengull er a mera el Dios me a lechub e ngklsuul el chelid. (Jos. 24:15) Ngmle klou a ultutelel er a Josua a bo lorael er a melemalt el rael, me a omelilt el lurruul a ulechotii el kmo ngmle soal el melemolem el kmeed er a Jehovah. Engdi a omelilt el lurruul a Kain a mlo uchul e ngmlo cheroid er a Jehovah.

³ A lebebil er a taem e ngmo kired el melilt a meklou a ultutelel el tekoi me bo dolemolem el merael er a melemalt el rael. Lak dobes el kmo a omelilt er kid a sebechel el mo uchul a odanges el mo er a Jehovah e ngosukid el melemolem el kmeed er ngii me a lechub e ngrullid el mo cheroid er ngii. (Monguiu er a Hebru 3:12.) Ngar tia el suobel me sel ongingil e kede mo mesaod a euid el blekeradel er a klengar el kired el mo kerekikl me a omelilt el doruul a diak lerellid el mo cheroid er a Jehovah.

4. Ngera uchul me ngklou a ultutelel el kired el oureor?

⁴ A Rekristiano a kirir el oureor el olengeseu er a telungalek er tir. A Biblia a kmo a chad el chetil el mesiou er a telungalek er ngii a kuk mekngit er ngike el diak loumerang. (2 Th. 3:10; 1 Ti. 5:8) Me ngklou a ultutelel el kired el oureor,  engdi a lak dekerekikl e a omelilt er kid a sebechel el rullid el mo cheroid er a Jehovah. El oeak a ngera el rolel?

5. Ngkirem el melatk a ngerang er a uchei er omkengei er a ureor?

⁵ E kuk mekerang a lsekum ngkirem el osiik er a urerem? A lsekum ngmeringel er kau el metik er a urerem er a beluam, e ke locha mo kongei a ngii di el ureor el betik er ngii. Engdi ke mo mekerang a lsekum tia e ureor a omtok a omellach er a Biblia? Me a lechub e ngrullau me ngmo diak a temem el teloi er a ongdibel me a lechub e ke obengkel a telungalek er kau? Ke di kongei er ngii el ureor e le ke omdasu el kmo ngbai ungil a le ngar er ngii a urerem er a lak moureor? Lak mobes, a omelilt er kau a sebechel el ngosukau el mo kmeed er a Jehovah me a lechub e ke mo cheroid er ngii. (Heb. 2:1) Me ke mekerang e mo ungil el melilt a tekoi sel mosiik a urerem me a lechub e ke melatk el melodech er a urerem?

6, 7. (a) Ngera eru el uchul me a chad a kongei er a ureor? (b) Ngera ochotii el kmo a chad a soal el kmeed er a Jehovah? E ngera uchul?

⁶ A omelilt er kau a di mo ultuil er aike el soam el mo meruul er a klengar er kau. Me a ker a kmo: ‘Ngera uchul me ngsoak el oureor?’ A lsekum ke oureor e le ngsoam el olengeseu er a telungalek er kau me bo lsebechiu el melemolem el mesiou er a Jehovah, e ngmo ngosukau. (Mt. 6:33) A Jehovah a sebechel el ngosukau er sel taem el moridii a urerem me a lechub e ngmo mekngit a keizai er a beluu. (Isa. 59:⁠1) Ng ‘meduch el olsobel er a rechedal er a ringelir.’​—2 Pe. 2:9.

⁷ E kuk mekerang a lsekum ngsoam el oureor me bo lebetok a ududem? Nglocha sebechem el meruul el uaisei, engdi ngkdekudel a lsekum ke di oureor me bo lsebechem el mo merau. (Monguiu er a 1 Timothy 6:9, 10.) Me a lsekum a ududem me a urerem a kot el meklou a ultutelel el tekoi er a klengar er kau, e ngdi kau el rullau el mo cheroid er a Jehovah.

8, 9. Ngera el ker el kirel a ureor a kirir a ruungalek el di tir el oker er tir? E ngera uchul?

⁸ Me a lsekum ke chedam, e lak mobes el kmo a rengelekem a mesuub er a rolel a omolilt a tekoi. A omerellem ngrulleterir el mo omdasu el kmo ngerang a kot el klou a ultutelel er a klengar er kau, ngurerem me a lechub e ngdeleuill er kau me a Jehovah? Me a lsekum ke melasem el mo merael a chisem me a lechub e ngmo betok a ududem, e a omomdasu e a rengelekem te mo melilt er a osisiu el tekoi sel bo lemeklou el chad me a lechub e te mo diak longull er kau? A ta el ngeasek el Kristiano a mesaod el kirel a demal el kmo, a urerel a mle kot el klou a ultutelel el tekoi er a klengar er ngii. Ngdmu el kmo: “A uchelel, e ngkmal mle meringel el oureor e le ngmle soal a lebo er ngii aike el kot el ungil tekoi el lousbech a telungalek er ngii. Engdi ngar er a chelsel aika el mereko el sesei el rak, e ngmilengodech a blekerdelel.” Ngmle klou a temel el di oureor e omechar a meringel a cheral el klalo el diak el lousbech a telungalek er ngii. Me chelechang e a rechad a medengelterir el kmo ngbetok a ududir engdi ngdiak lolisiich er a rebebil el mo mesiou er a Jehovah. Me ngoureng el kmo ulekum a demal a mle blak a rengul el olekeed er a telungalek er ngii el mo er a Jehovah er a bai di loureor el mengereker a betok el udoud.

⁹ Me kemiu a ruungalek, bo mkerekikl me lak bechei a ureriu me longeroid er kemiu er a Jehovah. Bo mungil el kerebai el kirir a rengelekiu, e mochotii er tir el kmo kom oumerang el kmo a deleuill er kid el obengkel a Jehovah a lmuut el klou a ultutelel er a udoud me a klalo.​—Mt. 5:3.

10. Ngera kirel a kekerei el chad el melatk er a uchei er a lolilt er a ureor el bo loruul er ngii?

¹⁰ A lsekum ke kekerei el chad el melatk el kmo ngera el ureor a soam el meruul er ngii sel bo mklou el chad e ke mekerang e mo ungil el melilt a tekoi? A omelilt er kau a di mo ultuil er aike el soam el meruul er a klengar er  kau, el ua desilubii er a uchei. Me a lsekum ke melatk el mo er a skuul el kirel a ileakl el ureor, e ngsebechel sel urerem el ngosukau el rullii a omesiungem el mo er a Jehovah el mo kot el klou a ultutelel el tekoi? Me a lechub e ngbai rullau el mo cheroid er a Jehovah? (2 Ti. 4:10) Ngsoam el mo ua rechad er a beluulechad el di dmeu a rengrir sel lebetok a ududir? Me a lechub e ke mo ua David el mle ultuil a klaumerang er ngii er a Jehovah, me ngdilu el kmo: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.” (Psa. 37:25) Tiang a di ua sel molilt er a rael el bo mokiu ngii, el ta er ngii a sebechel el rullau el mo cheroid er a Jehovah e sel tang a mo uchul a kot el ungil el klengar el kirem. (Monguiu er a Osisechakl 10:22; Malakai 3:10.) Me ngera ke mo ngiltii? *

11. Ngerang dmung a Biblia el kirel a ongelaod me a omilil? E ngera kired el melatk er ngii?

¹¹ A Biblia a diak lolekoi el kmo ngmekngit a doldeu er a rengud, e dirrek el diak lolekoi el kmo a ongelaod me a omilil a di ngosur a klou el temed. A Paulus a bai dilu er a Timothy el kmo ngungil el tekoi a dolisiich a bedenged. (1 Ti. 4:8) A Biblia a dirrek el melekoi el kmo ngar er ngii a “belsechel a deurreng” me a “belsechel a ngloik,” e omeklatk er kid el mo ungil el mechiuaiu. (Oli. 3:4; 4:6) Engdi a lsekum e ngdiak mkerekikl, e a ongelaod me a omilil a sebechel el rullau el mo cheroid er a Jehovah. Ngoeak a ngera el rolel? Ngokiu a diak el ungil el rolel a omilil me a ongelaod me a lechub e ke mengoit er a klou el temem el meruul aika el tekoi.

12. Ngera kirem el melatk er ngii sel molilt a rolel a ongelaod me a omilil?

¹² A kot e dolatk el kirel a ongelaod me a omilil el kired el melilt. Ngkmal sebeched el metik a ungil el ongelaod me a omilil. Engdi oumesingd el rolel a ongelaod er tia el beluulechad a di melisiich a tekoi el louketui a Dios, el ua koadelchad, tekoi er a olai, me a deleboes el omeruul. Me ngkmal kirem el mo kerekikl sel molilt a ongelaod me a omilil el soam el meruul. Molatk a chouaika el ker: Ngera ngrullii er ngak a tekoi er a ongelaod? Ngrullak el mo mekngit a omerellek me a lechub e ak mo omdasu el kmo a beluak a kot el ungil? Ngrullak el di mo soak el kot er a rokui el tekoi? (Osi. 3:31) Ngmo  uchul a klou el chitel a udoud? Me a omilil me a ongelaod el kuruul, ngmo melibas er a rebebil? (Rom 14:21) Te ua ngera el chad a bo kubengterir? (Osi. 13:20) Aika el tekoi, ngrullak el mo soak el meruul a mekngit?​—Jak. 1:14, 15.

13, 14. Ngera uchul me ngkirem el melatk a ildisel a taem el mongoit el milil?

¹³ Molatk a ildisel a taem el mongoit el kirel a ongelaod me a omilil. Di lekau el oker el kmo: ‘Ak mengoit er a klou el taem el di milil me ngdiak a temek el mo oldingel e mo er a miting?’ A lsekum ke mengoit er a klou el taem el di milil e ngmo diak el deu a rengum er ngii. Tirke el meruul aika el tekoi el ngar a tabesul el rolel a bai mo dmeu a rengrir sel loilil. E ngera uchul? Ngungil a rengrir el milil e le te medengei el kmo te riruul a meklou a ultutelel el tekoi er a uchei.​—Monguiu er a Filipi 1:10, 11.

¹⁴ Ngdiak el mekngit a dongoit a taem el milil engdi ngsebechel el mo uchul e kede mo cheroid er a Jehovah. A odos el Kim el 20 a rekil a mlo chelebangel er tia el tekoi. Ngmelekoi el kmo ngdi mle blechoel el milil sel Ongeim el Ureor, Sebadong, me a Sandei. Ngdi chelechang e ngmla mo medengei el kmo ngar er ngii a lmuut el meklou a ultutelel el tekoi el kirel el meruul, me ngdmu el kmo: “Ngak el pioneer a uchul me ngkirek el mekiis er a 6:00 er a tutau el mo oldingel, me ngdiak el sebechek el di milil el mo tutau. Ngdiak el mekngit a omilil, engdi ngsebechel el mo mengesang er kid.” Ngmla mo medengei el kmo ngkirel el mo tabesul a rokui el tekoi el loruul.

15. Te mekerang a ruungalek e ngosuterir a rengelekir el mo melilt a ungil el rolel a omilil?

¹⁵ A ruungalek a kirir el osiik aike el lousbech a telungalek er tir. Ngdirrek el ngerechelir el oubltikerreng e oldeu a rengrir a rengelekir e olengeseu el olekeed er tir er a Jehovah. Misei e lak momdasu el kmo a rokui el omilil a mekngit. (1 Ko. 5:6) Me a leuaisei, e a ungil el omelilt el kirel a ongelaod me a omilil a mo uchul e ngsebechiu el telungalek el mo dmeu a rengmiu. * Tiang a mo uchul e a omelilt el moruul a diak lerellau el mo cheroid er a Jehovah.

16, 17. Ngera el klengiterreng a bla bo lechelebangel er ngii a rebetok el oungalek el chad? Kede mekerang e medengei el kmo a Jehovah a ungil el medengei a ringelir?

¹⁶ A ruungalek me a rengalek a rruul el kirir el kaubltikerreng. A Jehovah a dilu el kmo ngbetik a rengul er a rechedal el ua bltkil a rengul a chedil el mo er a ngelekel. (Isa. 49:15) Me a lsekum a ta er a chad er a telungalek er kid a mo cheroid er a Jehovah e ngmo mekngit a rengud. A ta el odos el ngelekel el redil a milsuld a ngklel a dmu el kmo: “Ngkmal mlo mekngit a renguk me ak mlo omdasu el kmo ngera uchul me ngmlo cheroid er a Jehovah? Ak dirrek el mlo omdasu el kmo ngak a uchul me ngmlo cheroid.”

¹⁷ A Jehovah a ungil el medengelii a blekeradel el mngar er a chelsel. Ngkmal mlo ‘mekngit a rengul’ er a lesa kot el ngelekel el mo omtok er ngii. Ngdirrek el kmal mlo mekngit a rengul er sel taem el oumesingd el chad er a uchei er a Ieleb a dimlak lorrenges er a Noah. (Gen. 6:5, 6) Tirke el dirkak bo lechebengelii tia el tekoi a meringel er tir el mo medengelii a ringelel. Engdi ngkdekudel el tekoi a lsekum ke kongei er a mekngit el omerellel ngike el mla mesuld a ngklel el chedam me lerellau el mo cheroid er a Jehovah. Ke mekerang e sebechem el outekangel er a kngtil a rengum a lsekum a chedam a mo cheroid er a Jehovah?

18. Ngera uchul me a ruungalek a diak el kirir el omdasu el kmo ngtir a uchul me a ngelekir a mlo cheroid er a Jehovah?

¹⁸ Lak momdasu el kmo kau a uchul a tekoi el dilubech. A derta el chedal a telungalek el mla metecholb a “di chemur oberaod el telechellir” e di tir el melilt el mo mesiou er a Jehovah me a lechub e ngdiak. (Gal. 6:5) A Jehovah  a omes er a chad el mlo er a klengit el di mle ngii el melilt el mo meruul er ngii, me ngdiak lomdasu el kmo ngkau a uchul. (Ese. 18:20) Misei e lak moltelechakl er a rebebil, e bai mongull er sel rolel a Jehovah a lollach er a rechedal. Lak moltelechakl er a remechuodel, el tir a omekerreu er a ongdibel. Bai bo mesisiich el dechor el omtok er a Diabelong e lak becherei tia el tekoi me lerellau el mo cheroid er a Jehovah.​—1 Pe. 5:8, 9.

19, 20. (a) Te mekerang a ruungalek er a remla mesuld a ngklir e outekangel a kngtil a rengrir? (b) Ngera el omelatk a lobang?

¹⁹ Ngera mo duubech a lsekum ngmlo kesib a rengum er a Jehovah el kirel a tekoi el dilubech el mo er a ngelekem? Ngsebechel el rullau el mo cheroid er a Jehovah. Ngkmal kirem el ochotii el mo er a rechedam el kmo a bltkil a rengum el mo er a Jehovah a kuk ngaruchei er a bltkil a rengum el mo er tir. Bo leblak a rengum el melisiich er a deleuill er kau me a Jehovah me bo lsebechem el outekangel er a kngtil a rengum. E bo blechoel el teloi er a Rekristiano el rudam me a rudos. (Osi. 18:1) Moluluuch el mo er a Jehovah e mouchais aike el mera el ngar a rengum. (Psa. 62:7, 8) Lak molasem el melemall a llechul el kirel a omesuld el ngakl. Ngdiak el kired el osiik a uchul e bo dongedecheduch er a chedad el mla mesuld a ngklel, el okiu a e-mail me a lechub e kede oudengua el mo er tir. (1 Ko. 5:11) Bo leblak a rengum el mesiou er a Jehovah. (1 Ko. 15:58) A odos el dulsaod er ngii er a uchei a kmo: “Ngkirek el mo blak a renguk el mesiou er a Jehovah e melisiich er a deleuill er ngak el obengkel, me sel lluut el mei er a Jehovah a ngelekek e ngsebechek el olengeseu er ngii.”

²⁰ A Biblia a kmo a bltikerreng “a melatk e mengiil” a rokui el tekoi. (1 Ko. 13:​4, 7) Ngdiak a kngtil a omoureng er a betik er a rengum me lluut el mo er a Jehovah. E le bek el rak e a rebetok el milsuld a ngklir a ouuchel a rengrir e lmuut el mo er a Jehovah. E ngii a kltmokl el “ousubes a tellemall” me ngdiak lolemolem el kesib a rengul sel lobult a tang.​—Psa. 86:5.

21, 22. Ngera el rolel a omelilt a soam el meruul?

²¹ A Jehovah a mla mesterir a techellir a rechad el di tir el melilt a tekoi el bo loruul. (Monguiu er a Duteronomi 30:19, 20.) Me ngbelkul a kmo ngerecheled el mo ungil el melilt a tekoi. A derta el Kristiano a kirir el di tir el oker el kmo: ‘Ngak ak melilt a tekoi el rullak el mo merael er a melemalt el rael? Me a lechub ak mla mechei a urerek, omilil me a ongelaod, me a deleuill er a telungalek me ngrullak el mo cheroid er a Jehovah?’

²² A Jehovah a diak el meterob el oubltikerreng el mo er a rechedal. Me a di ta el tekoi el sebechel el oridid er a Jehovah a sel bo demekngit el melilt a tekoi. (Rom 8:38, 39) Misei e lak debechei a ngii di lengerang me lerellid el mo cheroid er a Jehovah. A ongingil el suobel a mo mesaod a eua el blekeradel er a klengar el kired el mo kerekikl sel doruul a omelilt er kid el kirel.