1, 2. (a) Ngmekerang a Satan a lolasem el mengeuid er a rechad? (b) Ngera mo ngosukid el olekeed er kid er a Dios?

 A JEHOVAH EL DIOS a ulemeob er a rechad el kirir el mo er ngii a ungil el deleuill er tir me ngii. Engdi a Satan a soal a bo domdasu el kmo ngdiak dousbech er a Jehovah. Ngmla melasem el rulleterir a rechad el mo omdasu el uaisei el ulemuchel er sel taem er a lomulak er a Eva er a sers er a Eden. (Gen. 3:4-6) Me seikid el mei er chelechang, e a rebetok a omdasu el kmo te diak lousbech er a Dios.

² Ngsebeched el diak bo deuaisei, e le Biblia a mla smaod a rolel a Satan a lolasem el mengeuid er a rechad. (2 Ko. 2:11) Ngmengetikaik er kid el mo melilt a tekoi el rullid el mo cheroid er a Jehovah. Sel mlo merek el suobel a milsaod a rolel e ngsebeched el mo ungil melilt a tekoi el kirel a urered me a ongelaod me a deleuill er kid me a telungalek er kid. Tia el suobel a mo mesaod a eua el tekoi el lousbech a Satan el mengetikaik er kid, el ngii a klalo el uai a computer, klisichel a bedenged, udoud, me a kldidairreng. A bo dekerekikl el melilt aika el tekoi, e ngsebeched el ‘olekeed er kid er a Dios.’​—Jak. 4:8.

3. Ngoeak a ngera el rolel e a chad a sebechel el ousbech a computer me aike el klalo el uai ngii?

³ Te betok el chad a ousbech a computer me aike el klalo el uai ngii. Sel dousbech aikang el ngar er a ungil el rolel, e ngsebechel ngar er ngii a lengesuir er kid. Engdi a bo lemekngit a usbeched er ngii, e ngsebechel el rullid el mo cheroid er a Demad el ngar er a eanged. Molatk el kirel a computer. A rudam er kid a ousbech a computer el meluches e oltobed A Ongkerongel. A computer a dirrek el sebechel el ngosukid el osiik aike el soad el mo medengei e chadecheduch kid me a rebebil e sebechel mo uchul a deuil a rengud. Engdi a lsekum e ngkmal soad a computer e ngsebeched el mo mengoit a klou el taem el ousbech er ngii. A rulterau a klalo a meruul er a rechad el mo omdasu el kmo ngkmal kirir el mo olab aike el dirk tilobed el klalo. A ta el kekerei el chad a kmal mle soal a ta er a  bedengel a computer me ngulterur a ta er a kidney er ngii me bo el sebechel el mecherar ngii el computer. Tiang a mera el chelebuul el tekoi!

4. Ngmilekerang a ta el odam a lolodech a mekngit el blekerdelel el blechoel el ousbech a computer?

⁴ Ngkmal mekngit el tekoi a debechei a chouaika el klalo me letemellii a deleuill er kid me a Jehovah. Ngsebeched el mo mengoit a klou el taem el ousbech me a lechub e kede ousbech el ngar er a mekngit el rolel. A ta el odam el Jon a ngklel, el 28 a rekil a millekoi el kmo ngmilengoit a klou el taem el ousbech a computer er a bai losuub. * Ngmle blechoel el mekar el ousbech a Internet. Ngmelekoi el kmo sel lesal mo skareter e ngmengal mo meringel er ngii a stob el mengedecheduch er a rechad e omes a video el mo lmuut er aike el mekngit el video. Ngmle soal el melodech er tia el blekerdelel, me ngrirellii a computer er ngii me ngdi ngii el mad er sel taem el kirel el mo mechiuaiu.​—Monguiu er a Efesus 5:15, 16.

5, 6. (a) Ngera kirir a ruungalek el meruul el kirir a rengelekir? (b) Te mekerang a ruungalek a lengesuterir a rengelekir el mo er ngii a ungil el klausechelei er tir?

⁵ Kemiu el oungalek a diak el kiriu el omtebechel a rokui el tekoi el loruul a rengelekiu, engdi ngkiriu el omtebechel er a rolel a lousbech a computer. Lak bechititerir me lebo er aike el Web site el ngar er ngii a mekikiongel el omeruul me a lechub a oltuubladek er ngii, e lousekool a klekool el melisiich a uldikel, me a lechub e longedecheduch er a remekngit el chad el ngar er a Internet. A lsekum e ke mechititerir me te meruul aike el sorir me lak longesang er kau, e te mo omdasu el kmo aika el tekoi a diak el mekngit. Ngngerecheliu a ruungalek el omekerreu er a rengelekiu er a ngii di el tekoi el sebechel el rulleterir el mo cheroid er a Jehovah. Ngmo lmuut er a charm me ngmo mesebechakl er a ngelekel a lsekum e ngar er ngii a chad el mo melemall er ngii. A ruungalek me ngkirir el meruul el uaisei.​—Momekesiu er a Hosea 13:8.

⁶ Mngesuterir a rengelekem el mo obengterir a Rekristiano el kakerous a rekrir el tir a ungil melilt a tekoi. E kele mobes el kmo a rengelekem a ousbech er kau el mo obengterir el meruul a tekoi. Me a leuaisei, e mdak el locherchur e moilil e moureor el obengterir. Tiang a mo ngosukemiu el rokui el melemolem el kmeed er a Jehovah. *

7. Ngera me ngsoad a lolemolem el mesisiich a bedenged?

⁷ Kede blechoel el oker er a rechad el kmo te ua ngerang. A Adam me a Eva a ulerrenges er a Satan e mlo cheroid er a Jehovah a uchul me kede rokui el mo smecher. A Satan a kmal soal sel bo desecher e le ngmo meringel er kid el mesiou er a Jehovah. E sel demad e ngdiak el sebeched el mesiou er ngii. (Psa. 115:17) Me ngsoad el meruul aike el sebeched me di lolemolem el mesisiich a bedenged. * E dirrek el kired el mo melatk el kirel a klisichel a bedengir a rudam me a rudos er kid.

8, 9. (a) Ngmekerang a klisichel a bedenged e mo diak di el chimo el tekoi el kired el omdasu er ngii? (b) Ngera uchul me ngungil a lolemolem el dmeu a rengud?

⁸ Nguaisei, engdi a klisichel a bedenged a diak  di el chimo el tekoi el kired el omdasu er ngii. A rebebil a mengoit a klou el taem el mesaod el kirel a kakerous el diet me a ukeruul me a lechub a chiltel a bedenged er a bai lomerk a klumech el kirel a Rengedel a Dios, e le alta te omdasu el kmo te olengeseu er a rebebil. Engdi ngdiak el kired el ousbech a Blil a Ongdibel me aike el meklou el ongdibel er kid el olterau me a lechub e kede mesaod a uldesued el kirel a klisichel a bedenged. E ngera uchul?

⁹ Kid a mo kldibel el mo mesaod er a Biblia e mo nguu a deurreng el okiu a chedaol el klisichel a Dios. (Gal. 5:22) Me alta sel demei er a miting e ngngar er ngii a chad el soal el mesaod el kirel a kakerous el ukeruul me a kar, engdi tiang a diak el moktek er aika el miting er kid. Ngsebeched el rulleterir a rebebil el mo diak el deu a rengrir. (Rom 14:17) Bechititerir a rechad me di el tir el melilt aike el bo loruul el kirel a klisichel a bedengir. Ngdiak a ngii di el chad me a lechub e ngtoktang el sebechel el omekungil a rokui el secher. E dirrek el diak el ungil a di deblechoel el melatk el kirel a klisichel a bedenged. (Lk. 12:25) A Biblia a bai melekoi el kmo “a dmeu a rengul el reng a ungil kar.”​—Osi. 17:22.

10. (a) Ngerang a rullii a chad el mo klebokel er a osengel a Jehovah? (b) Ngoingerang e ngmo cherrungel a klisichel a bedenged?

¹⁰ Ngdirrek el kired el mo kerekikl er a rolel a dongetmokl er kid, engdi ngdiak el kired el omesiich er kid el uai a rengeasek. A Biblia a kmo: “A kemanget el klengar a omeksullel a melemalt el chad, ma cheball el chui a krone er a klebkall.” (Osi. 16:31) A Jehovah a omes er a rengul a chad el kuk klou a ultutelel er a rolel a longetmokl er ngii, me kid me ngkired el mo oba osisiu el uldasu. (Monguiu er a 1 Petrus 3:3, 4.) Kid kede mo melemall er a klengar er kid el oeak a kdekudel el rolel a ukeruul me a lechub e ngbotk el mo menglebokel er kid? Ngdiak el ior er a rekid me a klisichel a bedenged, e le mera el klebekellel a chad a mo er ngii el oeak a ‘deurreng el le besterir a RUBAK.’ (Neh. 8:10) Ngar er a chelsel a beches el beluulechad, e ngmo cherrungel a klisichel a bedenged e sebeched el lmuut el mo ngeasek. (Job 33:25; Isa. 33:24) Me chelecha el dongiil er sel taem, e ngkired el mo ungil el melilt a tekoi e mo oumerang aike el telbilel a Jehovah. Tiang a mo ngosukid el mo dmeu a rengud er a klengar er kid er chelechang e mo diak desal lomdasu el kirel a klisichel a bedenged.​—1 Ti. 4:8.

11. Ngmekerang a udoud e rullid el mo cheroid er a Jehovah?

¹¹ Ngdiak el mekngit a lengar er ngii a ududed me a lechub e dongereker. (Oli. 7:12; Lk. 19:12, 13) Engdi a lsekum e nguibes a rengud er a udoud, e ngmo rullid el mo cheroid er a Jehovah. (1 Ti. 6:9, 10) A “sebekreng er tial klengar” a melekoi el kirel a desal mo imis el melatk el kirel aike el dousbech. A chouaitia el sebekreng a sebechel rullid el mo cheroid er a Jehovah. A “ngibes er a kerruul” a belkul a kmo kede mecheblad el mo oumerang el kmo a udoud a mo rullid el mo dmeu a rengud e mukerreu. (Mt. 13:22) A Jesus a dilu el kmo “ng diak a chad” el sebechel el sibil a Dios me a kerruul.​—Mt. 6:24.

12. Ngoeak a ngera el rolel e a rechad a melasem el mo betok a ududir er a di mereched el taem? Ngmekerang a dekerekikl me lak bo demekngit el melilt a tekoi?

¹² Ngsebeched el mekesuseu el mo meruul a mekngit a lsekum e kede omdasu el kmo a udoud a klou a ultutelel. (Osi. 28:20) A rebebil a sorir el di mereched el mo betok a ududir me te mechar a ticket er a lottery. E a rebebil el odam a mo teloi a siobai el sebechel rulleterir el di mereched el mo betok a ududir, e ouchais er a rebebil er a chelsel a ongdibel el kmo tir me ngdirrek el sebechir el mo betok a ududir. E sel lebebil, e a rudam a meleng a udoud er a rechad er a ongdibel el kirel a siobai e dmu er tir el kmo te mo harau er tir a lmuut el betok el udoud. Me a lsekum e ngmerechorech a rengud, e kede mo kongei a chouaika el siobai el mo uchul e kede oriid a betok el udoud. Me bo mkerekikl me lak bo lemerechorech a rengum e le ngdiak el sebechel el mo betok a ududed er a di mereched el taem.

13. A Jehovah ngsoal a bo el ua ngerang a osenged el kirel a udoud?

 ¹³ A Jehovah a mo omekngeltengat er a meringel el urered el melai aike el dousbech a lsekum e kede nguu a ‘Rengedel ma ikel soal’ el mo kot er a klengar er kid. (Mt. 6:33; Efe. 4:28) Ngdiak el soal a leiit a medad sel dengar er a miting e le kid el mle meringel el oureor. Ngdirrek el diak el soal a lesebek a rengud el kirel a udoud sel dengar er a Blil a Ongdibel. A rebetok el chad er tia el beluulechad a omdasu el kmo ngkirir el meruul aike el rokui el sebechir me lebo er ngii a ududir e le ngdiak el sorir el oureor sel bo lemechuodel. Te blechoel el ouchais er a rengelekir el mo meruul er a osisiu el tekoi. Engdi a Jesus a ullechotii el kmo tiang a diak a belkul. (Monguiu er a Lukas 12:15-21.) A Gehasi a ulemdasu el kmo ngsebechel el merechorech a rengul e a osisiu el taem e ngngar er ngii a ungil el deleuill er ngii me a Jehovah.​—2 Ki. 5:20-27.

14, 15. Ngera me ngdiak lungil a domdasu el kmo a udoud a mo uchul a ulekerreuid? Mouchais er a tekoi el dilubech.

¹⁴ A betok el uasi a mla remos e le te melasem el omdechem a ngikel el kuk kmal oberaod. A osisiu el tekoi a sebechel el duubech el mei er kid a dolasem el mo merau. A ta er a remechuodel el Alex a ngklel a mesaod el kmo ngblechoel el kerekikl er a usbechel er a udoud e diak el meterekakl a usbechel er a shampoo. Engdi a Alex a mlo teloi er a ta er a bedengel a siobai el ulemdasu el kmo ngsebechel el choitii tia el di mla urerel e mo pioneer. Me ngmilsuub a betok el tekoi el kirel tia el siobai er ngii e uluusbech a ududel e dirrek el milleng a udoud me bo el sebechel soiseb a klou el moke er ngii, engdi ngbai urriid a ududel. A Alex a dilu el kmo: “Ngkmal mle soak el lmuut el ngmai a ududek.” Ngulemdasu el kmo a lsekum e ngdi millemolem er tia el siobai er ngii e ngsebechel el lmuut el koreker a moke er ngii.

¹⁵ A Alex a di ulemdasu el kirel tia el siobai er ngii. Ngmle meringel er ngii el nguu a omesiungel el mo er a Jehovah el mo kot, e dirrek el dimlak lungil mechiuaiu. Engdi ngdimlak el sebechel el mo ungil tia el siobai er ngii. Me ngurriid a rokui el ududel e mle kirel el oterur a blil. Ngmelekoi el kmo tiang a mlo uchul a klou el mondai el kirel a telungalek er ngii, engdi ngsilubii a klou a ultutelel el tekoi. Ngdmu el kmo a ngii di el chad el ultuil er a blekeradel er a Satan el kirel a mera el ulekerreu me a deurreng a mo metemall a rengul. (Osi. 11:28) Me a lsekum e kede ultuil er a ududed me a lechub a duch er kid el mengereker, e kede mera el ultuil er a Satan, el ngii a “chelid er tial beluulchad.” (2 Ko. 4:4; 1 Ti. 6:17) A Alex a mla melodech a tekoi er a klengar er ngii me bo el sebechel el ousbech er a klou el temel el omerk er a ungil chais. Tiang a mlo uchul a deuil a rengul ngii me a telungalek er ngii e mla ngosuterir el mo kmeed er a Jehovah.​—Monguiu er a Markus 10:29, 30.

16. Ngera uchul me ngkmal dmeu a rengud, engdi ngera sebechel duubech a lsekum e ngmo kedidai a rengud?

¹⁶ Ngkmal dmeu a rengud e le kede Sioning er a Jehovah. (Jer. 9:24) E tiang a uchul me kede blechoel el melasem el melilt a ungil tekoi e oltirakl a ngarbab el llechul a Dios. Engdi ngkired el kerekikl me ngdiak bo lekedidai a rengud e domdasu el kmo a uldesued a kuk ngarbab er a uldesuel a Jehovah, e le tia sebechel rullid el mo cheroid er ngii.​—Psa. 138:6; Rom 12:3.

17, 18. (a) Ngtechang a losaod er ngii a Biblia el ngariou a rengul? E techang a kedidai a rengul? (b) Ngmilekerang a ta el odam e dimlak lebecherei a kldidairreng me lerellii el mo cheroid er a Jehovah?

¹⁷ A Biblia a mesaod el kirir a remekedidai a rengrir me a rengariou a rengrir. A King el David a uleba ngariourreng el olengit a ulekrael er a Jehovah me ngmlukngeltengat el kirel. (Psa. 131:1-3) Engdi a Jehovah a ulemals er a King el Nebukadnesar me a Belsasar e le ngmle mekedidai a rengrir. (Dan. 4:30-37; 5:22-30) A lebebil e kede mo chelebangel a blekeradel el rullii el mo meringel er kid el olecholt a klengariourreng. A Ryan, el 32 a rekil el ministerial servant a millukl el mo er a ta er a ongdibel. Ngulemdasu el kmo ngdi mo mereched el metutk el mo ta er a remechuodel,  engdi a uriul er a ta el rak e ngdirkak bo leuaisei. Ngmlo kedidai a rengul e ngilasech a rengul er a remechuodel e le ngdirkak lengiltii el mo ta er tir? Ngmlo diak lemei er a miting e milecherei tia el kldidiul a rengul el rullii el mo cheroid er a Jehovah me a ongdibel? Ke mo mekerang omko ke mle chelebangel er a osisiu el tekoi?

¹⁸ A Ryan a milenguiu a suobel el kirel a rolel a longiil er a ungil tekoi. (Osi. 13:12) Ngmelekoi el kmo: “Ak mlo medengei el kmo ngmle kirek el mesuub el mo oba kllourreng me a klengariourreng e mecherei a Jehovah me losisecheklak.” Me ngmlo omuchel el lolengeseu er a rechad er a ongdibel me tirke el loldingel er tir. E a uriul e ngmlo mesuub a Biblia el obengterir a rebebil el mle blak a rengrir er a omesubir. Ngmelekoi el kmo: “Sera ltetkak el mo ta er a remechuodel er a uriul er a ta el rak me a tedobech, e ngmlo mechas a renguk. Ngmlo diak kullatk el kirel tia el tekoi e le ngmera el mle dmeu a renguk er a omesiungek.”​—Monguiu er a Psalm 37:3, 4.

19, 20. (a) Ngmekerang e mo ulterekokl a rengud el kmo aike el tekoi el desiluub er aika el suobel a diak lerellid el mo cheroid er a Jehovah? (b) Te rua techa el chad a millemolem el kmeed er a Jehovah?

¹⁹ Ngdiak a ta er aike el euid el tekoi el dulsaod er aika el eru el suobel el mekngit. Ngkmal dmeu a rengud el Sioning er a Jehovah, e sebeched el oldeu a rengud er a ungil klengar er a telungalek me a klisichel a bedenged. A urered me a ududed a usbechall me bo el sebeched el omekerreu er kid me a telungalek er kid. A ongelaod a ungil el kired me aike el klalo el uai a computer a sebechel el ngosukid. Engdi ngdiak el kired el obes el kmo a lsekum e kede meruul er a tekoi er a mekngit el taem, e imis el meruul er ngii el ngar er a mekngit el rolel, e ngsebechel el rullid el mo cheroid er a Jehovah.

²⁰ A Satan a soal a bo mcheroid er a Jehovah engdi ngsebechem el omekerreu er kau me a telungalek er kau! (Osi. 22:3) Molekeed er kau er a Jehovah e molemolem el kmeed er ngii. Te betok el chad el ngar er a Biblia a mirruul er tiang. A Enok me a Noah a ‘mle ungil a deleongel er tir me a Dios.’ (Gen. 5:22; 6:9) E a Moses a uluumerang er a Dios alta ngdimlak el sebechel el mesang. (Heb. 11:27) A Jesus a mle blechoel el meruul aike el soal a Demal a loruul e mlukngeltengat el kirel. (Jn. 8:29) Me a leuaisei, e moukerebai er tirka el chad, e “di le blechoel el ungil a rengmiu, e moluluuch el di blechoel, e moreng a sulel a Dios er a ngii di le ngerang.” (1 Th. 5:16-18) Lak becherei a ngii di el tekoi me lerellau el mo cheroid er a Jehovah!