Ngua ngera uldesuem el kirel a December 21, 2012, el ngii sel taem el ngar er a kalender er a rechad er a Maya el betok el chad a melekoi el kmo ngmo er ngii a klou el omeldechel a beluulechad? Ngoltirakl aike el mulemdasu el kmo ngmo er ngii, e nglocha mo diak el sebek a rengum, me a lechub e ngmo mekngit a rengum, me a lechub e ngmo diak msemeriar er ngii. Me tiang ngdi ta er a cheleuid el ulaoch el kirel a ulebongel er a beluulechad?

E kuk mekerang a “ulebongel er a beluulchad” el losaod er ngii a Biblia? (Mateus 24:3) A rebebil a medakt el kmo a beluulechad a mo meseseb, e a rekuk bebil a semeriar aike el tekoi el mo duubech er a ulebongel er a beluulechad. A rebetok el chad a mla mo seselk a rengrir el di orrenges el kmo a ulebongel er a beluulechad a olekedang. Engdi a rechad ngkirir el omdasu el uaisei? Ngerang a klemerang el omesodel tia el tekoi?

Ke locha mo mechas a rengum el mesuub el kirel aike el mera el lolekoi a Biblia el kirel a ulebongel er a beluulechad. A Biblia a diak di lebeskid a uchul e ngsebeched el ousemeriar el kirel a ulebongel, e ngbai dirrek el ochotii el kmo a rebebil a sebechir el mo omdasu el kmo a ulebongel a kmal meudang e mo mesaik el mengiil er ngii. Aki mengemedaol er kau el mo omtab a nger er a Biblia el kirel a ulebongel er a beluulechad.

NGER ER A BIBLIA: “[A Dios a] mla toketekii a beluulchad el mesisiich el ngar omekedecheraol er ngii, ng kmal diak bo le mengukl.”​—PSALM 104:5.

Tia el beluulechad a diak bo lemokngemed el okiu a ngau me a lechub e ngngii di el ngerang. A Biblia a bai olisechakl el kmo tia el beluulechad a mo delengcheklir a rechad el mo cherechar. A Psalm 37:29 a melekoi el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 115:16; Isaia 45:18.

A uriul er a lebebii a beluulechad a Dios, e ngmillekoi el kmo ‘ng kmal mle ungil,’ e dirk osisiu a uldesuel. (Genesis 1:31) Ngkmal diak el soal el mo melemall er ngii, e ngbai tibir el mo melemall er “tirkel melemall er a beluulchad” e mo omekerreu er ngii me ngdiak bo lemokngemed.​—Ocholt 11:18.

Me nguaisei, engdi ke locha mo melatk el kirel sel lolekoi er ngii a 2 Petrus 3:7 el kmo: “Ngdi eanged ma chutem el ngar ngii er chelechang a kldmokl . . . e medechel el kirel el mo metemall er a ngau.” Tia ngolecholt el kmo a beluulechad a mo meseseb? A lebebil er a taem e a Biblia a ousbech a tekoi el “eanged” me a “beluulechad” me a “ngau” el lomtechei a kmung ngerang. El uai tiang, a Psalm 65:8 sel lolekoi el kmo: “A beluulchad el rokir a medakt,” e ngousbech er a “beluulchad” el mesaod er a rechad.

Aike el bebil el bades er a 3 el klou el bliongel er a 2 Petrus a ochotii el kmo a eanged me a beluulechad me a ngau a rokui el di okesiu. A 5 me a 6 el bades a melekoi el kmo a osisiu el tekoi a dilubech er a Ieleb er a taem er a Noah. A beluulechad er sel taem a miltemall engdi tia el chutem a di mle medechel. Tia el Ieleb a bai ulekngemedeterir a remekngit el chad. (Genesis 6:11) Ngdirrek el ulekngemedii a “eanged” el ngii a omtechei er tirke el milengedereder er sel taem. Me ngngar er a osisiu el rolel, e a 2 Petrus 3:7 a omlaoch el kirel a diak a ulebengelel el okngemedel a mekngit el klechad me a kabelment er tir el ngar er ngii a chelebirukel er a chelsel.

NGER ER A BIBLIA: “A beluulchad ma ikel rokui el ngar a chelsel, el lesal ngemokel a rengrir a re chad er ngii, a di mei el remiid; e ngdi ngikel meruul a ikel odeuir a rengul a Dios a di melemolem er a klengar er ngii el diak a ulebengelel.”​—1 JOHANES 2:17.

A “beluulchad” el ngii a mo remiid, a diak el tia el basio el dekiei er ngii, e ngbai tirke el chad el kiei er a chelsel el diak loltirakl a soal a Dios. Me ngdi uai a toktang er a botk el mo oltobed er a tumor el sebechel mo kasinoma me losebelii a klengar er a chad, a Dios a mo “oltobed” er a remekngit el chad me bo el sebechir a rungil el chad el mera el oldeu a rengrir el kiei er tia el chutem. (Osisechakl 2:22) Me ngoeak tiang, e a “ulebongel er a beluulchad” a ungil el tekoi.

A chouaisei el ungil uldasu el kirel a “ulebongel er a beluulchad” a loleiuid er ngii a bebil el Biblia el kmo ng “ulebongel er tia el blekeradel.” (Mateus 24:3; NW) A rechad me tia el beluulechad a mo suobel er a ulebongel a uchul me ngulterekokl el mo er ngii a beches el blekeradel er a beluulechad. Sei a uchul me a Biblia a melekoi el kirel “sel mei el beluulchad.”​—Lukas 18:30.

A Jesus a millekoi el kirel tia el taem er a ngar medad el kmo ng “beches el beluulchad.” Ngar seikid el taem, e ngmo olutii a blekeradel er a klechad el mo oltirakl er sel di mla soal a Dios. (Mateus 19:28) Aikakid a bo doldeu a rengud er ngii:

• Paradis el chutem el ngar er ngii a ulekerreu me a ungil el klengar el kirir a rokui el chad.​—Isaia 35:1; Mika 4:4.

• Ureor el ngar er ngii a belkul e uchul a deurreng.​—Isaia 65:21-23.

• Rokui el rakt a mo diak.​—Isaia 33:24.

• Remechuodel a lmuut el mo ngeasek.​—Job 33:25.

• Okisir a rulekoad.​—Johanes 5:28, 29.

Me a lsekum e kede meruul “a ikel odeuir a rengul a Dios” me aike el soal a doruul, e ngdiak el kired el medakt er a ulebongel er a beluulechad, e ngbai kired el ousemeriar el kirel.

NGER ER A BIBLIA: “Sel mues a ikal tekoi el mochar ngii, e bo modengei el kmo a Rengedel a Dios a kmedal mei.”​—LUKAS 21:31.

Ngar er a babier el The Last Days Are Here Again, e a Brobesong el Richard Kyle a meluches el kmo a “mereched el ngeldechel a tekoi me a uldikel er a klechad a rulleterir a rechad el mo omlaoch el kirel a ulebongel er a beluulechad,” el tokubets a lsekum e ngdiak el sebechir el smaod aike el tekoi el dubechang.

Me nguaisei, engdi tirke el profet el ngar er a Biblia el millekoi el kirel a ulebongel a dimlak lolasem el mesaod a diak lodengei el tekoi el dilubech er a temir. Te bai mlukrael er a Dios el mo mesaod aike el mo duubech el mo ochotii el kmo ngdi mereched a ulebongel er a beluulechad. Ka momtab aika el ulaoch e di el kau el merriter el kmo aika ngtoutang er chelecha el taem me a lechub e ngdiak.

• Mekemad, bosech er a kall, desiu, me a berkel a bekoiueiuul el rakt.​—Mateus 24:7; Lukas 21:11.

• Klou el ngelsecheklel a delengerenger.​—Mateus 24:12.

• Telemellel a beluulechad el rechad a uchul.​—Ocholt 11:18.

• Rechad a betik a rengrir er a di tir, me a udoud, me a tametereng engdi te diak lebetik a rengrir er a Dios.​—2 Timothy 3:2, 4.

• Telemellel a klengar er a telungalek.​—2 Timothy 3:2, 3.

• Rechad a diak el semeriar er a olechotel a ulebongel el olekedang.​—Mateus 24:37-39.

• Berkel a ungil chais el kirel a Rengedel a Dios el meliuekl er a beluulechad el rokir.​—Mateus 24:14.

Me ngua aike el lullekoi a Jesus, sel domes a “ikal tekoi” e ngochotii er kid el kmo a ulebongel er a beluulechad a kmedang. (Mateus 24:33) A Resioning er a Jehovah a oumerang el kmo aika el tekoi a toutang, e ouchais er a klaumerang er tir el mo er a rebebil el ngar er a 236 el beluu.

A cheleuid el ulaoch el kirel a ulebongel ngbelkul a kmo ngkmal diak el bo er ngii?

NGER ER A BIBLIA: “Me sel ledu re chad el kmo, ‘Ng budech ma rokui el tekoi a di ungilbesul,’ e seikid e ng di mereched el mer tir a kloul tellemall! Ng di mereched el mei el ua rengelel a ngeuil a cheroll el mor a redil el omechell el diak el sebeched el chemiis er ngii.”​—1 THESALONIKA 5:3.

A Biblia a omekesiu er a telemellel a beluulechad el mo er a uchelel a ringelel a cheroll, el ngii a ringel el lulterekokl el bo lechelebangel er ngii a chedil e kmal di kiul mo er ngii. A omerollel a taem el mo lmuut er a ulebongel a dirrek el di uai a kldiull, e le a chedil el dirk dioll a medengei aike el olechotel a temel el mo omechell. Me a toktang er ngii a locha mo ochotii sel taem el bo lomechell er ngii, engdi a lsekum e ngmo engelakl er sel taem, me ngii a di medengei el kmo ngdi kmedung e ngmechellii a ngelekel. Me ngdi osisiu, a ngii di el cheleuid el ulaoch el kirel a ulebongel a diak el sebechel ngmodech aike el tekoi el toutang er chelechang el ochotii el kmo kede kiei er a uriul sils.​—2 Timothy 3:1.

‘A lsekum e ngkmal bleketakl a olechotel a ulebongel el kmo ngkmedang,’ e ke locha mo oker el kmo, ‘ngera uchul me a rebetok el chad a diak el sebechir el mesang?’ A Biblia a ochotii el kmo, sel lebo lekeed a ulebongel, e a rebetok a mo omdasu el kmo ngdiak a ultutelel aika el olangch. Te mo diak el ues aika el meklou el omelodech el ngar er ngii er a uriul el sils, e bai mo melekoi el kmo: “A  re demmam a mla mad, e ngdi bek el tekoi a dirk osisiu er ser a lobeob a beluulchad el mer chelechang!” (2 Petrus 3:​3, 4) Ngbelkul a kmo, alta ngkmal bleketakl a olangch el kirel a uriul sils, engdi te betok a mo oltngakl.​​—Mateus 24:​38, 39.

Tia el suobel a mla smaod a di bebil er aike el olangch el ngar er a Bades el olecholt el kmo a ulebongel a kmedang. * Kau ngsoam el mo mesuub a lmuut el betok? A lsoam, e momekedong er a Resioning er a Jehovah el kirel a diak locheraol el omesubel a Biblia. Ngsebechem el mesuub el ngar er a blim me a lechub e ngsel soam el basio me a lechub e ke ngar er a dengua. A di ta el tekoi el mousbech er ngii a temem, e aike el klungiaol el bo mngai a diak a ulebengelel.