1. Ngera el klungiaol a bla lebsang a klechad a Jehovah?

 A JEHOVAH a Dios el “di ngar e diak a ulebengelel,” e mla ochotii a rolel e ngsebeched el kiei el mo cherechar. E ngii el tekoi a diak el sebechel el mengodech. A Biblia a kmo: A “tekingel a Rubak a di melemolem el diak a ulebengelel.” (1 Pe. 1:23-25) Me ngkired el oba omereng el saul e le ngmla meskid a Biblia me a klou a ultutelel el klemechel.

2. Ngera soal a Dios a bo dodengei el kirel?

² A Jehovah a soal a rokui el chad a bo lodengelii a ngklel. A Biblia a omuchel el mesaod er a ngklel sel losaod er a rolel e ngulemeob er a eanged me a chutem. (Gen. 2:4, footnote.) Ngdirrek el lilechesii a ngklel el betok el taem el ngar er a delsachel el bad er sera lebsang a Moses aike el Teruich el Llach. El ua tiang, sel kot el llach a omuchel el kmo: “Ngak a [Jehovah] el Dios er kau.” (Exo. 20:1-17) A Diabelong a mla melasem el melemall er a Biblia me bo lak el sebeched el mo medengelii a Dios me a dirrek el Ngklel. Engdi a Jehovah a kmal diak lebecherei tia el tekoi me lemeketmokl.​—Psa. 73:28.

3. Ngera bebil er a tekoi el soal a Dios a bo desuub er a Biblia?

³ A rechad a cheleuid a uldesuir el kirel a Dios. Engdi a Jehovah a soal a rokui el chad a bo lodengelii a klemerang. Ngkirel el mo dmeu a rengud e le Biblia a bleketakl el ouchais er kid a klemerang. (Monguiu er a Psalm 43:3, 4.) Me ngdi ua dengar er a chelsel a llomes e a beluulechad lengar er a ilkolk.​—1 Jn. 1:6, 7.

4, 5. Ngerang a ileakl el techall el dengiluu er a rak er a 1931?

⁴ A rechad el kiei er a osisiu el basio a sebechel el mo osisiu a blekerdelir, siukang er tir, me a rolel a klengar er tir el ngar er a ta el telecheroll el mo er a tang. E tiang a ua ledikesir. Me kid el Sioning er a Jehovah a dirrek el ngar er a ngii a dikesed. A Jehovah a mla  ngosukid el mo medengelii a Biblia me a klemerang el kirel me a moktek er ngii. Ngdirrek el mla meskid a ileakl el techall el mo oungakl er tia el ngklel.

⁵ Kede ngiluu tia el ngakl el ngar sel klou el ongdibel el mla er ngii er a Columbus, Ohio, U.S.A. er a rak er a 1931. A llechukl el “JW” a mle lluches er a chelsel a prokuram. A ta el odos a dilu el kmo, a rudam me a rudos a ulemdasu el kmo a belkul a “JW” a “Just Wait,” “Just Watch” me a lechub e ng “Jehovah’s Witnesses.” A uchei e kede uluungakl er a Remesuub er a Biblia, engdi ngar sel ileakl el cheldecheduch er a July 26, 1931, e tirke el rokui el mle kldibel a kilengei e ulemuchel el mo oungakl er a ngakl el Jehovah’s Witnesses. Ngmlo uchul a klou el deurreng er a denguu tia el ngakl el mlengai er a Biblia. (Monguiu er a Isaia 43:12.) A ta el odam a kmo: “Ngdiak kubes er sel klungel a deurreng me a klou el brotech er a chelsel tia el basio.” A rechad er tia el beluulechad a chetirir tia el ngakl, engdi a Jehovah a mla kongei er kid me kede ousbech er ngii el kuk betok er a okai el rak.

6. A dikesed er a Dios nguldimukl er a ngera el klemedengei?

⁶ A dikesed er a Dios a dirrek el uldimukl er a melemalt e meklou a ultutelel el tekoi el kirir a remesiungel er a irechar el ngar er a Biblia. Ka di molatk er a Abraham, Isak, me a Jakob. Tir me a telungalek er tir a locha mle blechoel el mesaod er a rolel a klengar el lodeuir a rengul a Jehovah. Me a chouaika el tekoi a mle sebechel el ngosuir a Josef me ngdimlak lerebet er a deleboes el omeruul el obengkel a bechil a Potifar. (Gen. 39:7-9) Me tirke el Kristiano er a irechar a mle kaingeseu er a uldasu el kirel a tekingel a Dios er a delongelir. A Paulus a uluuchais er a ongdibel aike el tekoi el lesiluub er a Jesus el kirel a Chedaol Blsoil er a Rubak. (1 Ko. 11:2, 23) Aika el tekoi a medung er a Biblia el ngosukid el mo meduch el mengull er a Dios. (Monguiu er a Johanes 4:23, 24.) A Biblia a sebechel el ngosuterir a rokui el chad, engdi kid el mesiungel a Jehovah a kired el mo oba omereng el saul el kirel.

7. Ngera el tekoi a uldimukl er a dikesed er a Dios?

⁷ A Jehovah a dirrek el olengeseu er a rechedal er chelecha el taem (Psa. 118:7) Ngsebeched el menguiu el ngar er aike el babilenged a rolel a lomekerreu er tir. Me tiang a rullid el mo klou a rengud el mo lmuut er a taem el demodechelakl. A Biblia a melekoi el kmo: “Ngdi diak a klekedall er a mekemad el merruul el mo sebechel tomellau; ng mor ngii a nger er kau el kirir tirkel rokui el oltutakl er kau.” A bebil er a oidel a Biblia a melemolem el oleiuid er tia el bades el kmo: “Tiang a dikesir a remesiungel a Jehovah.” (Isa. 54:17, By) Me a Satan a kmal diak el sebechel el okngemedid.

8. Ngera kede mo mesaod er tia el suobel me sel ongingil?

⁸ A Satan a mla melasem el melemall er  a Biblia, e omart er a ngklel a Jehovah er a rechad, e mengeuid er a klemerang. Engdi ngkmal diak el sebechel el kutmeklii tia el uldesuel. Me ngar tia el suobel me sel ongingil e kede mo mesaod er (1) sel rolel e a Dios a mla omekerreu er a Biblia me a klumech er a chelsel; (2) me sel rolel e a rechad a sebechir el mo medengelii a ngklel; (3) me sel rolel e ngmla meskid a techelled el mo medengelii a klemerang er chelechang.

9-11. Ngmekerang a Jehovah a lomekerreu er a Biblia?

⁹ Ngbetok a omeruul el mla meketmokl el melasem el olekngemed er a Biblia, engdi a Jehovah a dirk omekerreu er ngii. A Ikelesia er a Katolik a mla melasem el merrob er a rechad me lak longuiu er a Biblia. Ngar er a rak er a 1229, e a cheldebechel er a ikelesia er a beluu er a France a rirellii a llach el kmo ngdiak el kirir a rechad el menguiu er a Biblia el ngar er a omelekingir. E ngar er a rak er a 1234 er a beluu er a Spain, e te rirellii a osisiu el llach. E a uriul el ngar er a rak er a 1559, e a Pope Paul IV a dilu el kmo a Biblia a uldimukl er aike el babier el diak el kirel a chad el print er ngii me a lechub e ngmo ouklalo er ngii el diak el nguu a kengei er a ikelesia.

¹⁰ Alta e a rechad a melasem el olekngemed er a Biblia engdi a Jehovah a melemolem el omekerreu er ngii. Ngar er a rak er a 1382 e a John Wycliffe a ultebedii a kot el oidel a Biblia el tekoi er a Merikel. Me a William Tyndale a dirrek el uleiuid er a Biblia el mo tekoi er a Merikel, me tiang a mlo uchul a kodellel er sera rak er a 1536. Ngmle llechotel er a teluo el kerrekar e uleldiu el kmo, “Rubak, bok a medal a king er a England.” E sola e te kobsii e durur er a ngau.

¹¹ Ngar er a rak er a 1535 e a Miles Coverdale a dirrek el uleiuid er a Biblia el mo tekoi er a Merikel. Me nguluusbech er sel oidel a Biblia el lurruul er ngii a Tyndale el tedebechel a Biblia er ngii e dirrek el uleiuid a bebil er a tekoi el ngar er a Biblia el tekoi er a Latin me a bebil el mla er a Biblia er a Martin Luther el mle tekoi er a Dois. E chelechang e ngar er ngii er kid a New World Translation of the Holy Scriptures. Me ngdmeu a rengud el ousbech er tia el kmal bleketakl e melemalt a oidel el Biblia el meruul er a omesiunged. Me ngdiak el sebechel a Satan me a ngii di el chad el lokngemedii a Biblia.

12. Ngmekerang a New World Translation e mla ngosuterir a rechad el mo medengelii a ngklel a Jehovah?

¹² A Jehovah el Dios a melemolem el omekerreu er a ngklel me ngdiak el lemengai er a rokui el Biblia. Me sera lemotobed a New World Translation, e a rudam a lilia  ngklel a Dios el Jehovah er aike el bek el basio el mle kirel el llechukl er ngii el oltirakl er aike el dimla llechukl el babier er a Biblia. Tia el ngakl a llechukl el 6,973 el taem er aike el Bades el tekoi er a Hebru e dirrek el llechukl el 237 el taem er aike el Bades el tekoi er a Grik. Me tia el New World Translation, a mla moiuid el ngar er a kuk betok er a 116 el bedengel a omelekoi. E a kuk betok er a 178,545,862 er ngii a mla motobed.

13. Kede mekerang e medengei el kmo a rechad a dimla medengelii a ngklel a Dios er sera lobeob a rekot el obekel?

¹³ Tirke el kot el obekel el Adam me a Eva a mle medengelii a ngklel a Jehovah e uluusbech er ngii. A Noah a dirrek el uluusbech er tia el ngakl. Ngdilu el kmo: “Le modanges a [Jehovah] el Dios er a Sem.” (Gen. 4:1; 9:26) Me a Dios a uluusbech er a ngklel sel longedecheduch er a rechad. Ngdilu el kmo: “Ngak, el di ngak el tang, a RUBAK el Dios er kau. Ng diak a kuk tar a chelid el kim omii er a klebkellek.” E dirrek el dilu el kmo: “Ngak a RUBAK; ng diak a kuk ngodech el Dios.” (Isa. 42:8; 45:5) Me a Jehovah a mla ochotii a ngklel el mo er a rechad. Me ngkirel el dmeu a rengud el ousbech er a ngklel a Jehovah e dirrek el Sioning er ngii! Me tiaikid a belkul a tekoi el medung er a Biblia el kmo: “Kim oba ngklel a Dios er kid e kim mokedechor a bangderang er kid!”​—Psa. 20:5.

14. Kede dirrek el metik er a ngklel a Dios er ker?

¹⁴ A ngklel a Dios a diak di debetik er ngii er a chelsel a Biblia e lemerekong. Ngdirrek el sebeched el metik er ngii er a Moabite Stone el ngar er a Dibon el 13 el mael a cherridel er a mo bedul ongos er a Ulekoad el Daob. Ngar tia el bad e ngellechukl a cheldecheduch el mesaod er a King er a Israel el Omri el uldimukl er a omesodel a King er a Moab el Mesa el kirel a mekemad el mlo er a beluu er a Israel. (1 Ki. 16:28; 2 Ki. 1:1; 3:4, 5) Me tia el Moabite Stone a dirrek el llechukl er ngii a ngklel a Dios el ngar er a Tetragrammaton. E tia el Tetragrammaton a dirrek el llechukl el betok el taem er a babier er a Lachish Letters, el ngii a blechebached el bekai el lebiltik er a beluu er a Israel.

15. Ngerang a Septuagint, e ngera me ngmle usbechall?

¹⁵ Betok er a 2,000 el rak er a uchei, e aike el Bades el tekoi er a Hebru a mloiuid el mo tekoi er a Grik e tilobed el Septuagint. Ngera uchul me ngmle kirel el moiuid el mo tekoi er a Grik? A rechad er a Judea a mle kelebus er a Babilon el 70 el rak. Me sera letobed er a rak er a 537 er a uchei er a Taem er Kid, e a rebebil er tir a di kiliei er a Babilon. Engdi cherengel a taem e a rebetok er tir a millukl el mo kiei er a Alexandria er a beluu er a Ekipten el rechad er ngii a millekoi a tekoi er a Grik. Me tirka el Chijudea a uluusbech er a oidel aike el Bades el tekoi er a Hebru el tekoi er a Grik. Me a bebil er a Septuagint el tekoi er a Grik a llechukl a ngklel a Dios el tekoi er a Hebru.

16. Ngmilekerang a Bay Psalm Book a lousbech er a ngklel a Dios?

¹⁶ A kot el babier el tilobed er a American colonies a mle oidel a Psalm el ngar er ngii a ngklel a Dios. Me ngmloiuid er a tekoi er a Hebru el mo tekoi er a Merikel el ngklel a Bay Psalm Book el tilobed er a rak er a 1640. Me ngar er a Psalm 1:1, 2, e ngellechukl a ngklel a Dios el Iehovah. Ngmelekoi el kmo, a ngeltengat el chad a diak lorrenges er a remekngit el chad, e bai soal a “llechul a Iehovah.” Me a lsoam a lmuut el omesodel a ngklel a Dios, e momes er a brochure el The Divine Name That Will Endure Forever.

17, 18. (a) Ngerang a klemerang? (b) Ngera el tekoi a uldimukl er a ‘klemerang’ el kirel a ungil chais?

¹⁷ Ngdmeu a rengud el mesiou er a Jehovah  el Dios el “blak a rengul e merang.” (Dut. 32:4) Ngerang a klemerang? Ngar er a Biblia el tekoi er a Hebru me a Grik, e a tekoi el “klemerang” a blechoel el melutk er a mera el tekoi, melemalt, e dirrek el sebeched el ultuil a klaumerang er kid er ngii.

¹⁸ A Jehovah a mla ngosukid el mo medengelii a klemerang. Ngdirk melemolem el lolengeseu er kid el mo medengei a lmuut el betok el kirel a klemerang. (2 Jn. 1, 2) Ngar er a Osisechakl 4:​18, e kede suubii el kmo: “Ngdi rolel a melemalt a ua sel lobuu a llomes er a mochu tutau, el mengal mo mellomes sel bo le cheldecheos.” A Jesus a milluluuch el mo er a Dios el kmo: “A tekingem a klemerang.” (Jn. 17:17) A Biblia a ngar er ngii a ‘klemerang’ el kirel a ungil chais el kirel aike el rokui el tekoi el doumerang kid el Kristiano. (Gal. 2:14) Me ngerang a bebil er aika el klemerang? Ngklemerang el kirel a ngklel a Jehovah, omengederederel, olubet el tengetengel a Jesus, okiis, me a dirrek el Rengedel. Me chelechang e kede mo mesuub er sel rolel a Dios a lomekerreu er a klemerang alta e a Satan a melasem el mengeuid er ngii.

19, 20. Ngtechang a Nimrod? E sera longedereder, e a rechad te millasem el mo mekerang?

¹⁹ A uriul er a Ieleb, e ngmla er ngii a mesisiich el chad el ngklel a Nimrod. (Gen. 10:9) Ngii a ulemtok er a Jehovah el Dios a uchul me ngmera el milsiou er a Satan el di uai tirke el mlo omtok er a Ngelekel a Dios er a uriul. Me a Jesus a dilu er tir el kmo: “Kemiu a mla er a demmiu el Diabelong, e somiu el meruul aike el ngelbesel a rengul a demmiu,” el ngii a “dimlak lolemolem el ngar er a klemerang.”​—Jn. 8:44, NW.

²⁰ A Nimrod a milengedereder er a beluu er a Babel me aike el mats er a delongelel a omoachel er a Tigris me a Eufrates. (Gen. 10:10) Nglocha ngike el chad el miluchelii a ureor el meleketek er a Babel me a tebekebok er ngii er a bekord er a rak er a 2269 er a uchei er a Kristus. A Jehovah a dimlak el soal a rechad a di lekiei er a chimo el basio, engdi tirke el milleketek er a Babel a dilu el kmo: “Mereko e de teketekii a beluu el ngar ngii a tebekebok er ngii el chetebtel a mo rutechii a eanged. Kede rullii me bo lorael a chised me kid lak bo de meterakl el mo chacheroid er tial beluulchad.” Me ngdimlak el sebechir el toketekii tia el tebekebok e le Dios a “chileuid omelekingir a rokui el chad.” Me a rechad a millukl el mo kiei er cheroid er a Babel. (Gen. 11:1-4, 8, 9) A Satan a kmal mle soal el melemall er a mera el omengull e dirrek el soal el meruul er a rechad el rokui el mo mengull er ngii. Engdi a Jehovah a ulemekerreu er a mera el omengull, me ngbek el sils el di lorael el mo betok a rechad el mengull er ngii.

21, 22. (a) Ngera uchul me a mera el omengull a dirkak a ta el lebo el sebechel el mokngemed? (b) Ngera kede mo mesuub er a ongingil el suobel?

²¹ A mera el omengull a dirkak a ta el lebo el sebechel el mokngemed. E ngera uchul? E le Ngarbab el Sensei er kid el Jehovah a meskid a tekingel el Biblia, me kid a medengelii a ngklel, e dirrek el medengelii a klemerang. (Isa. 30:20, 21) Me sel dongull er a Dios el oltirakl a soal e kede mo oba mera el deurreng. Engdi ngkmal kired el mo kerekikl el oumerang aike el klemerang el tekoi e dirrek el oltirakl a ulekrael el dengai el okiu a chedaol klisichel a Dios.

²² Me a ongingil el suobel, e kede mo mesuub a rolel e a bebil el ikelesia a ulemuchel el olisechakl a cheleuid el tekoi el kirel a Dios. Kede mo suubii el kmo a Bades a diak lolisechakl aika el cheleuid el tekoi. Kede dirrek el mo mesang el kmo a Jehovah a omekngeltengat er kid el meskid a klemerang el tekoi el kirel. E aikang a kmal ileakl el dikesed er a Dios.