Ngblekerdelel a chad el diak lomdasu el kmo ngkuk ngarbab er a rebebil. Me a ngariou a rengul el chad a dirrek el medengei el kmo ngdiak el cherrungel me ngar er ngii a chelitechetul.

A Moses a dimlak lebo lekedidai a rengul er sera lenguu a dereder. Oumesingd el taem e a chad sel lebo longedereder e ngmo chemolt sel mera el blekerdelel. A Robert G. Ingersoll el chad er a omeluches er a bekord el 120 el rak er a mla me mong a dilu el kmo: “A rebetok el chad a sebechir el outekangel a chelebuul. Engdi a lsekum e ngsoam el mo medengelii a mera el blekerdelel e bsang a klisiich er omerreder.” Me a Moses a ulechotii a kot el ungil el kerebai el kirel a klengariourreng. El milekerang?

A Moses a mloterekokl er ngii a klou el ngerachel, e le Jehovah a dilu er ngii me longetakl er a rechad er a Israel. Engdi tia el klisiich a dimlak lerellii el mo kedidai a rengul. Ka molatk er sel meringel el omelilt el mle kirel el meruul er ngii el kirel a llemeltel a dikesir a rechad. (Ulecherangel 27:1-11) A ker el dilubech a kmal mle oberaod el tekoi, e le ngdirrek el ngar er ngii a bo lerellii er a telecheroll el merael mei.

Me ngmilekerang a Moses? Ngulemdasu el kmo ngmengeteklir a rechad er a Israel me ngsebechel el di oba uldesuel e mesmechokl er tia el tekoi? Ngmo melilt a tekoi el oltirakl er a duch er ngii, klemedengei er ngii, me a lechub e ngsel klou el klemedengei er ngii el kirel a uldesuel a Jehovah?

Alta e a kedidai a rengul el chad a mo meruul el uaisei, engdi a Moses a dimlak leuaisei. A Biblia a kmo: “Ma Moses a ngilai a tekingir el mor a RUBAK.” (Ulecherangel 27:5) Ka di molatk, uriul er a longetakl er a rechad er a Israel el bekord el 40 el rak e ngdimlak lultuil er a di uldesuel, e bai mle ultuil er a Jehovah. Me ngbleketakl el kmo a Moses a kmal mle ngariou a rengul.

Ngdirrek el dimlak lomdasu el kmo ngdi ngii el tang a kirel el mengedereder. Nguleldeu er a rengul er sel taem el Jehovah a millilt er a rebebil el chad er a Israel el mo profet e oureor el obengkel. (Ulecherangel 11:24-29) Me a demal a bechil er a ledu er ngii me lolilt er a rebebil el mo olengeseu er ngii, e a Moses a uleba klengariourreng e ultireklii a tekingel. (Exodus 18:13-24) Me ngar er a ulebongel er a klengar er ngii e ngullengit er a Jehovah me lengiltii a mo omtechei er ngii. Me a Jehovah er a lengiltii a Josua e a Moses a kmal mlo blak a rengul el olengeseu er ngika el kekerei el chad, e millisiich er a rechad el mo oltirakl er a Josua el mo soiseb er a Beluu er a Nglat. (Ulecherangel 27:15-18; Duteronomi 31:3-6; 34:7) Me ngbleketakl el kmo a Moses a uleba omereng el saul el kirel tia el techellel el omekrael er a rechad er a Israel er a omengull, engdi ngdimlak di lolatk er sel deruchellel e ngbai mle blechoel el melatk a mo uchul a klungiolir a rebebil.

Ngdiak el soad el mecherei a ngerachel el dobang me a duch er kid me lerellid el mo kedidai a rengud. E lak mobes, a lsoad a Jehovah a bo lousbech er kid, e a klengariourreng er kid a bai klou a ultutelel er sel duch er kid el meruul a tekoi. (1 Samuel 15:17) Me sel lengariou a rengud e kede mo oltirakl er a omellach er a Biblia el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum.”​—Osisechakl 3:5, 6.

Ngdirrek el kired el oukerebai er a Moses el diak domes a ngerecheled me a deruchelled el kmal klou a ultutelel.

Ngmo uchul a klungioled a dosuub er a klengariourreng er a Moses? Ochoi! Sel dolecholt er a klengariourreng e a rechad a mo beot er tir e dirrek el mo sorir el obengked. Me a lmuut el tang, kede mo odeuir a rengul a Jehovah el Dios el ngii a olecholt er a klengariourreng el mengebkall er a rechedal. (Psalm 18:35) “A Dios omtok er a re ngarbab a rengrir, e ungil a tekingel er a re ngariou a rengrir.” (1 Petrus 5:5) Me ngkmal ungil a doukerebai er a klengariourreng er a Moses!