A OKISEL a Jesus a diak el di el tekoi el dilubech er a irechar el diak a kmal belkul el kired er chelechang. A apostol el Paulus a milsaod er a klungel a ultutelel er a loluches el kmo: “A Kristus a mlokiis ra chelsir ar mla mad el mo ketengir [“kot el rodech,” NW] tirikel mlad. Ele kodall a uleak a tal chad, me ngkirel chokiis rar mla mad loeak a tal chad. Ma rokuil chad a mukngar el ngara Kristus, el ua rokuil chad el mad el ngara Adam.”​—1 Korinth 15:20-22, BT.

A Jesus a mlokiis er a kodall er sera Nisan 16 er a rak er a 33, el ngii sel sils el Rechijudea a uleldars a kot el redechel a wheat el mo er a Jehovah el Dios er a templo el ngar er a Jerusalem. A Paulus er a lomekedong er a Jesus el kot el rodech, e ngulechotii el kmo ngmo er ngii a rekuk bebil er a rechad el mo mekiis er a kodall.

A ongingil el tekingel a Paulus a mesaod aike el tekoi el mlo er ngii el okiu a okisel a Jesus. Ngdilu el kmo: “Ele kodall a uleak a tal chad, me ngkirel chokiis rar mla mad loeak a tal chad.” A klengit me a diak el cherrungel el blekeradel a demludiukes er ngii er a Adam a uchul me kede rokui el mo mad. Engdi a Jesus a tilengetengii a cherrungel el klengar er ngii el mlo uchul e a rechad a sebechir el mo mekiis e mo mimokl er a klsibai el mo er a klengit me a kodall. A Paulus a kmal mle ungil el mesaod er tia el tekoi el ngar er a Rom 6:23 el kmo: “Ele omeksullel a klengit a kodall, e ngdi diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.”

A Jesus a milsaod er a belkul a kodellel me a okisel el kired. Ngmillekoi el kirel el kmo: “A Ngelekel a Chad a kirel el mo mekider, . . . me tirkel rokui el mo oumera er ngii a mo oba diak a ulebengelel klengar. Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”​—Johanes 3:14-16.

Ka di molatk er a diak a ulebengelel el klengar el diak a ringel, chelebuul me a klengiterreng er ngii! (Ocholt 21:3, 4) Tiang a mera el ungil el klengar! A ta el mellomes a rengul el chad a mesaod er ngii el kmo: “Me alta debull a sebechel el omeklatk er a chad el kmo a klengar a kmal kedeb, engdi a okiis a oterekeklii el kmo a kodall me ngdirrek el kmal di tedeb.” Nguaisei, a okisel a Jesus a uchul a klengar!