NGMECHAS a rengum er sel ker el ngar er a medal tia el babier? A rebebil a mo mechas a rengrir er ngii, engdi a rebetok el chad er chelechang a kora melatk el kmo a Dios a locha mekngit a blekerdelel me a lechub e te omdasu el kmo ngmera el mekngit a blekerdelel. E ngera uchul?

A rebebil el silobel er aike el ngmeklou el tellemall a oker el kmo: “Ngera uchul me a Dios a omechei aika el tekoi me ngduubech? Ngdiak lomekerreu? Me a lechub e ngmekngit a blekerdelel?”

A rekuk bebil a dirrek el mo mechas a rengrir sel longuiu er a Biblia. Sel longuiu a cheldechedechal a Noah me a Ieleb el mlo er ngii, e te mo melatk el kmo, ‘Ngera uchul me a betik a rengul el Dios a milechititerir tirke el chad me te mo mad? Ngmekngit a blekerdelel?’

Kau ke dirrek el mo oker a osisiu el ker? Me a lechub e ngmeringel er kau el onger er a chad el oker er kau el kmo a Dios ngmekngit a blekerdelel? Ka molatk er a kuk ta er a ker el sebechel el ngosukau.

Ngkmal chetid a mekngit el blekeradel e le ngar er ngii a klemedengei er kid el kirel a ungil me a mekngit. Kid a kmal kakerous er a charm e le Ngike el Ulemeob er kid a milebid el ngar er a “okesiul.” (Genesis 1:27) Tiang ngera belkul? Ngrirellid el mo sebeched el oltirakl a blekerdelel me a llechul el kirel a ungil me a mekngit. Ka molatk er tiang: A lsekum e kede ngiluu a klemedengei er kid el kirel a ungil me a mekngit er a Dios e kmal chetid a mekngit el blekeradel, e tiang diak lochotii el kmo a Dios me ngdirrek el uaisei a uldesuel?

A Biblia a meketeklii tia el tekoi, e le ngar er a chelsel e a Dios a melekoi el kmo: “A rolek ma uldesuek a kuk ngar bab er a roliu ma uldesuiu.” (Isaia 55:9) Me a lsekum e kede oukerrekeriil er a Dios el kmo ngmekngit a blekerdelel, e ngua lak doumerang er tia el bades, e le ngdi ua dolekoi el kmo a roled a kuk ngarbab er a rolel. Ngungil a bo dodengei a lmuut el betok el tekoi er a uchei er a bo doba chouaisei el uldasu. Alta ngsebeched el oker el kmo, ‘Ngera uchul me a bebil er a omerellel a Dios a ua lolecholt el kmo ngmekngit a blekerdelel?’ Me bo desa mera el belkul a tekoi el “mekngit a blekerdelel” me bo dodengelii a omesodel.

Sel dolekoi el kmo a chad a mekngit a blekerdelel, e kede oukerrekeriil er a uchul e ngmeruul a tekoi. A mekngit a blekerdelel el chad a dmeu a rengul el omes er a rebebil el chuarm me a lechub e ngdiak lomekerreu a ringelir. Me nguaisei, a mekngit a blekerdelel el chedam a mellach er a ngelekel el sechal e le ngsoal melemall er a rengul. Engdi a ungil el chedam a mellach er a ngelekel e le ngsoal el olisechakl e omekerreu er ngii. Ngblechoel el diak dodengelii a uchul me a rechad a meruul a tekoi me ngbeot er kid a mo ngodech a uldesued el kirir. Kede ungil medengelii tiang a lsekum e ngmla ta el leduubech el mei er kid.

Ka me bo dosaod aike el eru el uchul me a rechad a omdasu el kmo a Dios a mekngit a blekerdelel, el ngii a meklou el tellemall el domes er chelechang me a cheldecheduch er a Biblia el kirel a Dios el omals er a rechad. Aika el tekoi ngmera el olecholt el kmo a Dios a mekngit a blekerdelel?