1, 2. (a) Ngera kired el meruul er ngii me lebo er ngii a kmes el deleuill er kid me a Jehovah? (b) Ngera mo klungioled sel dosuub a cheldecheduch er a Biblia el mesaod er a rechad el ngiluu a omellach er a Dios?

 “NGDI kuk le ngak e ng bai ungil a dekeed er a Dios! Ak metik er osebechakl el ngar a Rubak el Dios.” (Psa. 73:28) Ngerang a rirellii ngika el milluches er a psalm el mo mesaod er a klaumerang er ngii el kirel a Dios? E le uchei e ngulemes er a remekngit el chad el ua lengar er ngii a budech er a rengrir e mlo kesib a rengul. Ngdilu el kmo: “Ng kol di dimlak a belkul el kulengeroid er ngak er a klengit, ma chimak le klikiid er a klengit?” (Psa. 73:2, 3, 13, 21) Engdi sera lebo er a Templo er a Dios e ngmlo sebechel el mesmechokl a uldesuel me ngmillemolem el kmeed er a Dios. (Psa. 73:16-18) Me ngsilubii a klou a ultutelel el tekoi el kmo, a lsekum a chad a soal el olekes a deleuill er ngii el obengkel a Jehovah e ngkmal kirel el mo chedal e kongei a ulekrael e oltaut er a klengar er ngii.​—Psa. 73:24.

² Ngsoad a lebo er ngii a kmes el deleuill er kid el obengkel a mera el Dios, me ngklou a ultutelel el kired el kongei a ulekrael me a omellach er ngii. Ngokiu tiakid el rolel e a Jehovah a mesmechokl er kid el mo ua blekerdelir a rechad el oba kengei er ngii. Ngar er a mong e a Dios a ullecholt a klechubechub el mo er a rechad me a bebil er a beluu er a lebesterir a techall el mo kongei a omellach er ngii. Aika el tekoi a llechukl er a chelsel a Biblia “el olisechakl er kid,” me “kede mo mela klubeled er ngii, kid el chad er chelechang el bocha lolekeed a ulebengelel a beluulchad.” (Rom 15:4; 1 Ko. 10:​11) Tia el suobel a mo mesaod a bebil er aika el tekoi. Me kede mo mesuub er a rolel a lomdasu a tekoi a Jehovah me a klungiaol el dengai sel losmechokl er kid.

3. Ngmekerang a Biblia a losaod er a klisichel a Jehovah el mengedereder er a rechad el ngar er a Isaia 64:8 me a Jeremia 18:1-6? (Momes er a siasing er a uchelel tia el suobel.)

³ A Biblia a mesaod er a Jehovah el di ua chad el omeob a chutem e le ngar er ngii a klisichel me a llemeltel el mengedereder er a rechad me a renged. A Isaia 64:8 a kmo: “Kau a Demmam e RUBAK. Kemam a ua chutem e kau a ua omeob olekang. Kulemeob er kemam.” A chad el omeob a chutem a sebechel el omeob er ngii el oltirakl er sel soal, me a chutem a diak el sebechel choderderii ngika el omeob. Me ngdi osisiu el mo er a rechad me a Dios. Ngdiak a llemelted el mengedereder er a Dios el di ua chutem el diak el sebechel el choderderii ngike el omeob er ngii.​—Monguiu er a Jeremia 18:1-6.

4. A Jehovah ngorrimel er a rechad el mo kongei er ngii me losmechokl er tir? Ka msodii.

⁴ A Jehovah a milsmechokl er a rechad er a Israel el ua chad el omeob a chutem. Engdi ngmekerang a Jehovah e kuk ngodech er a chad el omeob a chutem? Ngmesterir a rechad a ileakl el sengk el ngii a llemeltir el di tir el melilt a tekoi. Ngdiak loruul er a rebebil er a rechad el mo ungil me a rebebil el mo mekngit, me a lechub e lousbech er a llemeltel el mengedereder el orrimel er a rechad el mo olengesenges er ngii. A rechad a bai kirir el di tir el melilt el kmo te kongei er a Jehovah me losmechokl er tir me a lechub e ngdiak.​—Monguiu er a Jeremia 18:7-10.

5. Ngmo mekerang a Jehovah a lsekum a rechad a diak lekengei er ngii me losmechokl er tir?

⁵ E kuk mekerang a lsekum a chad a kedidai a rengul me ngdiak lekengei er ngika el Omeob el Jehovah me losmechokl er ngii? Ngmekerang a Jehovah e oltaut er sel llemeltel el mengedereder er a rechad? A lsekum a omeob a mo meringel er ngii el mebii a bekai e ngsebechel el ngodechii a loruul er ngii me a lechub e nguu el choitii. Tia mo duubech e le ngika el omeob a dimlak lungil el omeob er tia el bekai. Engdi a Jehovah a blechoel el mesmechokl er a rechad el ngar er a melemalt el rolel. (Dut. 32:4) Me a lsekum a chad a diak el kengei er a Jehovah me losmechokl er ngii, e ngkngtil ngika el chad. A Jehovah a mesmechokl er a rechad el oltirakl er a rolel a loruul a tekoi tirka el chad. Me a lsekum te olengesenges er ngii e ngmo sebechel el ousbech er tir. El ua tiang, ngmla mesmechokl er a rengellitel el Kristiano me te mo ua bekai el “mo osongel er a klebekelel.” Engdi ngmo kesib a rengul er tirke el diak lolengesenges a ulekrael er ngii e mo diak el sebechel el ousbech er tir.​—Rom 9:19-23.

6, 7. Ngmilekerang a King el David me a King el Saul er sera losmechokl er tir a Jehovah?

 ⁶ A ta er a rolel a losmechokl er a rechad a Jehovah a okiu sel lollach er tir. Ka di molatk er sel rolel e a Jehovah a milsmechokl er a reteru el king er a Israel el Saul me a David. A omerellel a David el mlo er a laokreng el obengkel a Bathseba a mlo uchul a mekngit el mo er ngii me a rebebil er a rechad. Me alta e a David a mle king engdi a Jehovah a mle meringel el mellach er ngii. Nguldureklii a profet er ngii el Nathan el mo mesumech a tekingel el mo er a David. (2 Sa. 12:1-12) Me ngmilekerang a David? Ngkmal mlo ouuchel er a rengul er a tekoi el leriruul e ulebult, me a Dios a uluusubes er ngii.​—Monguiu er a 2 Samuel 12:13.

 ⁷ A King el Saul a kuk mle ngodech e le ngdimlak lorrenges a omellach. A Jehovah a uldureklii a Samuel el mo mesubed er a King el Saul me bo lokodeterir a rokui el chad er a Amalek me a cheremir. Engdi a Saul a dimlak lolengesenges a tekingel a Jehovah, e le ngdimlak lokodir a King el Agag me aike el kot el ungil el cheremir. (1 Sa. 15:1-3, 7-9, 12) Me a Jehovah a uldureklii a Samuel el mo mellach er a Saul. Me  ngmle kirel el orrenges e kongei er a Jehovah me losmechokl er ngii, engdi ngdimlak lekengei el nguu tia el omellach. Ngulemdasu el kmo ngmla er ngii a ungil el uchul e ngdiak lolengesenges er a Jehovah. Ngdilu el kmo ngmo melenget aika el charm el mo er a Jehovah. Me a Jehovah a ultngeklii a Saul me ngmlo diak el king, e mlo diak a deleuill er ngii el obengkel.​—Monguiu er a 1 Samuel 15:13-15, 20-23.

8. Ngera kede suubii er a omerellir a rechad er a Israel er a losmechokl er tir a Jehovah?

⁸ A Jehovah a dirrek el milsang a bebil er a renged a techall el mo olengesenges er ngii. Sel taem el Jehovah a ultebedeterir a rechad er a Israel er a beluu er a Ekipten er a rak er a 1513 er a uchei er a Kristus, e te mlo ileakl el chedal. Ngtilbir el mo omekrael e mesmechokl er tir, engdi a rechad a mle chetirir a losmechokl er tir a Jehovah e di millemolem el meruul a mekngit. Te dirrek el mlo mengull aike el klsuul el chelid er a beluu el meliuekl er tir. A Jehovah a mle betok el taem el oldurech er a reprofet el mo omeklatk er a rechad er a Israel me lolodech a blekerdelir, engdi te dimlak lorrenges er a uleklatk el lulemesterir. (Jer. 35:12-15) Misei e a Jehovah a mle meringel el mellach er tir e le ngdimlak lolengesenges er ngii. Me aike el teruich el kebliil el renged er a Israel a mlo mechitechut er a rechad er a Asiria, me a uriul e a eru el kebliil el renged er a Juda a mlo mechitechut er a rechad er a Babilon. Ngar er ngii a klou a ultutelel el tekoi el sebeched el suubii er tiang. A di ta el rolel el sebeched el ngmai a klungioled er a  omellach er a Jehovah a sel debecherei me losmechokl er kid.

9, 10. Ngmilekerang a rechad er a Ninive er a lomeklatk er tir a Jehovah?

⁹ A Jehovah a dirrek el milsterir a rechad er a Ninive el beluu er a Asiria a techall el mo kongei er a omellach er ngii. Ngdilu er a Jona el kmo: “Mkedmeklau e bor sel klou el beluu el Ninive e mdu tekoi el mor ngii; ak mla orrenges el kmo te ua ngeral dengerenger a re chad er ngii.” A Jehovah a tilbir el mo melemall er a Ninive e le rechad er ngii a kmal mle mekngit.​—Jon. 1:1, 2; 3:1-4.

¹⁰ Sel taem er a louchais a tekingel a Dios a Jona e a rechad a ulemuchel el mo oumera er a Dios. A rokui el chad er sel beluu a mle sorir el ochotii el kmo te uluuchel er a rengrir me ngdimlak lomengur e uluubail a bek. Ngmo lmuut er a king me “ng milekiis er a kingellel, e mildebedii a bilel, e uluubail er a bek e mlo dengchokl er a chab.” Me a rechad er a Ninive a kilengei er a Jehovah me losmechokl er tir e ulebult. Misei e a Jehovah a dimlak letemellii sel beluu.​—Jon. 3:5-10.

11. Ngera kede suubii er a omerellel a Jehovah el mo er a rechad er a Israel me a Ninive?

¹¹ Me alta e a rechad er a Israel a mle ileakl el chedal a Jehovah, engdi ngmle kirel el mellach er tir. E a rechad er a Ninive a dimlak el ileakl el chedal engdi te kilengei er ngii me ngmesmechokl er tir. Sei a uchul me nguluusubes er tir e dimlak lolekngemed er tir. Me a Jehovah a diak longetukel e ngbai oukerekeriil er a rokui el chad el oltirakl a omerellir.​—Dut. 10:17.

12, 13. (a) Ngera uchul me a Dios a melodech er a uldesuel el ultuil er a omerellir a rechad? (b) Ngera kede suubii er a omerellel a Jehovah el ‘uluuchel er a rengul’ e ngildechii a uldesuel el kirel a Saul me a Nineve?

¹² A Jehovah a sebechel el ngodechii a uldesuel el kirir a rechad a lsekum te melodech a omerellir. El ua tiang, a Biblia a kmo a Jehovah a uluuchel er a rengul e le ngrirellii a Saul el mo king er a Israel. (1 Sa. 15:11) E sel taem el rechad er a Ninive a uluuchel er a rengrir e ngmodech a blekerdelir e a Biblia a kmo: A Dios a “ngildechii a uldesuel e dimlak loruul er ngii el kdekudel tekoi el le dillii el mo meruul er ngii.”​—Jon. 3:10.

¹³ Sel lolekoi a Biblia el kmo a Jehovah a ‘uluuchel er a rengul,’ e ngbelkul a kmo ngngildechii a uldesuel el kirel a chad me a lechub e ngodechii a tekoi el bla letibir el mo meruul er ngii. A Jehovah a kilengei er a Saul er sera lengiltii el mo king, engdi sera bo lak lolengesenges e a Jehovah a ultngeklii. Me tiang a diak el belkul a kmo a Jehovah a mle cheleuid er sera lengiltii a Saul el mo king, e ngbai blekerdelel a Saul el mlo diak lolengesenges er ngii a uchul. Me sera lobult a rechad er a Ninive e a Jehovah a kilengei el ngodechii a uldesuel e dimlak lomekoad er tir. Me ngkmal mengelaod er kid sel dodengei el kmo a Jehovah a ungil a omerellel e chubechub e dirrek el kongei el ngodechii a uldesuel a lsekum a rechad a ngmodech a blekerdelir!

14. (a) Ngera ngousbech a Jehovah el mesmechokl er kid er chelechang? (b) Kede mo mekerang sel losmechokl er kid a Jehovah?

¹⁴ Chelecha el taem e a Jehovah a ousbech er a Biblia me a cheldebechelel el mesmechokl er kid. (2 Ti. 3:16, 17) Ngkirel el dmeu a rengud el kongei a ngii di el omellach me a ulekrael el mei el okiu aika el eru el rolel. Ngkired el melemolem el olengesenges a omellach er a Jehovah el diak lultuil er a ildisel a rak er a demetecholb me a lechub a ngerachel er a ongdibel el dolab. Me sel debecherei a Jehovah me losmechokl er  kid, e ngsebeched el mo ua tirke el chad el oba kengei er ngii.

15, 16. (a) Ngsebechel el mo ua ngerang a uldesuel a chad sel loridii a techellel er a omesiou? Ka mosaod. (b) Ngera ngosukid el mo outekangel er a rrenged sel denguu a omellach?

¹⁵ Ngmekerang a Jehovah a lollach er kid? Ngosisecheklid er aike el soal a doruul, e omeklemalt a uldesued. A lebebil er a taem e kede ousbech er a mesisiich el omellach el mekngit el omeruul el derirellii a uchul. Me ngsebechel el mo uchul e ngmengai a techall er a omesiou el dulebang. Ka molatk er a ta er a remechuodel el Dennis a ngklel. * Ngngiluu a omellach e le ngdimlak el melemalt a rolel a lousiobai. Ngmlo ua ngerang a uldesuel a Dennis er sel kesus er a letobed a subed el kmo ngdikea losiou el ta er a remechuodel? Ngkmal mlo mekngit a rengul, me ngdmu el kmo: “Ngar er aika el mereko el 30 el rak e ak ullab a betok el techall er a omesiou, el mle regular pioneer, e ngar er a Bethel, e dirrek el mle ta er a remesiou er a ongdibel e a uriul e ak mlo ta er a remechuodel. Ak dirrek el ultebedii a kot el cheldechedechak er a klou el ongdibel. E chelechang e ngdikeang.” Ngkmal mlo merur e mlo omdasu el kmo nglocha dikea lluut a cheldebechelel a Jehovah el lousbech er ngii.

¹⁶ A Dennis a mle kirel el melodech a omerellel. Engdi ngerang a ngilsuir el mo outekangel er a rrengel? Ngmlo blak a rengul el mesuub er a Biblia e oldingel a obliil e mo er a bek el miting. Nguleba omereng el saul el kirel a omelisiich er a rudam me a rudos er ngii me a dirrek el ike el babilenged. Me ngdilu el kmo: “A suobel el ‘Ngmla ta el Mosiou? Ngsebechem el Lmuut el mo Mesiou?’ el ngar er a Watchtower er a August 15, 2009 a mle ua ileakl el babier el ulenger a nglunguchek.” Ngar er tia el suobel e a Dennis a siluubii el kmo, ngsebechel el ousbech a temel el melisiich er a deleuill er ngii me a Jehovah. Me a omellach el lengiluu a mlo uchul a klungiolel e a sesei el rak er a uriul e ngliluut el mo ta er a remesiou er a ongdibel.

17. Ngmekerang e sebechel a omesuld el ngakl el ngosuir a chad el mlo er a klengit? Ka mosaod.

¹⁷ A omesuld el ngakl a ta er a rolel a omellach er a Jehovah. Tia el omeruul a omekerreu er a ongdibel er a mekngit el blekerdelel a chad e dirrek el ngosuir ngika el chad el mo obult er a kngtil. (1 Ko. 5:6, 7, 11) A Robert a milsuld a ngklel el bekord el 16 el rak. Me ngar er a chelsel aika el taem e a rechad er a blil a uleltirakl er a ulekrael er a Biblia me ngdimlak longedecheduch er ngii me a lechub e lousiangel er ngii. Chelechang e ngmla lmuut el me er a ongdibel e kmal blak a rengul. Ngmesaod el kmo a ta er a uchul e ngliluut el me er a ongdibel a sel omerellir a rechad er a blil el dimlak longedecheduch er ngii. Me oleko a rechad er a blil a chilitii a telkib el taem el obengkel me a lechub e te uleker er ngii el kmo ngua ngerang, e ngmlo diak loureng el omes er tir. Me tiakid a ta er a uchul me ngmlo soal el lmuut el mo er a Jehovah e mo teloi er a rechad er a ongdibel.

18. Ngkired el mekerang sel losmechokl er kid a Dios?

¹⁸ Me alta ngdiak bo lemesuld a ngkled, engdi ngkired el melatk el kmo kede mo mekerang er sel taem el Dios a omekrael e mesmechokl er kid. Me kede mo mekerang? Kede mo ua David e kongei er a omellach? Me a lechub e kede mo ua Saul el ultngeklii? Lak dobes el kmo a Demad el Jehovah a Ngike el Klou el Omeob a Chutem, el “mesmechokl er tirkel betik er a rengul, el ua chedam el mesmechokl er a rengelekel sechal el ngikel mekebekii.” Me a leuaisei, e becherei a Jehovah me losmechokl er kau.​—Osi. 3:11, 12.